San Juan 15
15
Te' uva-a'ŋucu y te' 'yaŋmaŋda'm
1Tzʌctamʌ cuenta que ʌjte' te' wiyuŋšejpʌ uva-a'ŋucu y ʌs Ndata Diojsis te' quiʌyujpapʌ. 2Mumu aŋmaŋ ja'n tyʌ'mapyʌ ʌjpit maŋba tyʌcpʌ'u ʌs Ndata Diojsis. Y mumu jujche'ŋ tʌ'majpapʌ maŋba yajcʌwaju y quiosucsu wa'y más tyʌ'maju. 3Pero mijta'm ŋguiʌwajtamwa'mij te' ʌsmij ndzamjaytyamupʌ tzamepit. 4Itjojcʌtʌctamʌ ʌji'ŋ y ʌj maŋba'ʌj itjojcʌtʌjcu mista'm ndzoco'yojmo. Jujcha'nde' te' aŋmaŋda'm ja'n musi tyʌ'maju ñaytyumʌ juca wecspʌ'wa'a 'ya'ŋucucʌsi. Te'šejtijque' mijta'm ja'nmij musi ñdyʌ'majtamu juca ja'nmij itjojcʌtʌctame ʌji'ŋ.
5Ʌjte' te' uva-a'ŋucu, y mijta'mde' te' aŋmaŋda'm. Iwʌ itjojcʌtʌcpa ʌs ndzoco'yojmo, y ʌj ñe' choco'yojmo, yʌ'wʌ jene maŋba tyʌ'maju. Pero iwʌ'sʌj ca'ŋdzacpa yajtiyʌ ja'n ñʌwʌ'ay. 6Iwʌ ja'n itjojcʌtʌqui ʌs ndzoco'yojmo, maŋba pyiŋbutpʌ'yatʌju jujcha' ja'n 'yoyepʌ aŋmaŋ y maŋba tyʌjtzu. Y maŋba quiojtyatʌju jucʌtʌjcojmo wa'y pyoŋbʌ'yaju.
7Juca ʌs ndzoco'yojmo mij itjojcʌtʌctamba, y juca ʌs ndzame itjojcʌtʌcpa mista'm ndzoco'yojmo, wa'ctamʌ tiyʌta'm mis sundamba y maŋba'ʌsmij ndzi'tamu. 8Juca jene ndzʌctambamis tʌm, te'wʌcʌsimis nyajquejaytyamba ʌs Ndata's myʌja'ŋajcuy. Y te'šej mis nyajquejtamba que ʌsmijyʌ' ŋgʌ'aŋmayeta'm. 9Jujcha' ʌs Ndata'sʌj sunba, te'šej ʌsmij sundaŋgue'tpa. Sunjojcʌtʌctamʌ'ʌj ʌsmij sunjojcʌtʌctambašej. 10Juca ŋgojamjaytyambamis ʌs aŋgui'mguytya'm, maŋbamisʌj sunjojcʌtʌctamu ʌsmij sunjojcʌtʌctambašej. Ʌs ŋgojamjayu'ʌs Ndata's 'yaŋgui'mguytya'm, y sunjojcʌtʌcpa'ʌs Ndataj ñe'cʌ'sʌj sunjojcʌtʌcpašej. 11Yʌ'šejta'mbʌ tiyʌ'ʌsmij ndzamjaytyamu wa'y ʌs oma's jyo'ʌyjayu mista'm ndzocoy, y wa'mij 'yomdzocopyactamu. 12Yʌ'še'ʌsmij aŋgui'mdamba: Našunʌtʌjtamʌ ne'co'mo, jujcha'ʌsmij ʌs sundamu. 13Juca ŋgoca'yajpatʌ amigota'm te'šejtʌ nyajquejpa que wiyuŋšejtʌ su'nopya. 14Mijta'm ʌsmijyʌ' amigota'm juca ndzʌctambamis tiyʌta'mʌsmij aŋgui'mdamba. 15Ja'na'ʌsmij coyosašej maŋu ŋgomʌ'ytyamu porque te' coyosa's ja'n myusi tiyʌte' chʌcpa quiomi's. Pero nʌjaytyamwa'mʌsmij que ʌsmijyʌ' amigota'm porque nyajmustamwa'mʌsmij tiyʌta'mʌj yajmatoŋu Ndata's. 16Ja'nmisʌjte' mis ŋgopiŋdamu'ʌj sino que ʌsmijte' ŋgopiŋdamu mijta'm. Y ŋgottamu'ʌsmij wa'mis maŋu ndzʌcjaytyamu ʌs Ndata's yoscuy, y uy chaquiaju te' wʌ'aŋja'moquiuy jujche'ŋ wyʌ'aŋjamyajpapʌ's. Te'šejpʌ yoscuy ʌste' sunba. Y tiyʌta'm mis nwa'cjaytyamba ʌs Ndataj ʌs nʌquiʌsi, ñe'cʌ'smij maŋba ñchi'tamu. 17Našunʌtʌjtamʌ ne'co'mo. Yʌ'še'ʌsmij aŋgui'mdamba.
Maŋbamij ŋgui'nisʌtʌjtamu jana wʌ'aŋja'moye'sta'm
18Juca ŋgui'nisʌtʌjtambamij te' ja'n wyʌ'aŋja'moyapyʌ's, mustamʌ que ʌj te' wina qui'nišajwa'a que ja'n mijta'm. 19Juca inʌc mij ja'n nwyʌ'aŋja'moytyame, te' ja'n wyʌ'aŋja'moyapyʌ's šunʌtʌjtambamij inʌc. Pero como nwyʌ'aŋja'moytyambamij, y ʌsmijyʌ' ŋgopiŋbuttamu te' ja'n wyʌ'aŋja'moyapyo'moc, te'cotoyamijte' ŋgui'nisʌtʌjtamba te' ja'n wyʌ'aŋja'moyapyʌ's. 20Jamwʌtzʌctamʌ tiyʌta'ma'mʌsmij nʌ ndzamjaytyamu ʌs: Ja'n maŋu más myʌja'ŋgomʌ'yaju te' coyospapʌ que ja'nde' quiomi. Yacsnutzʌquiajuše'ʌj, te'šej mij maŋba nyacsnutzʌcʌtʌjtaŋgue'tu. Juca quiojamjayaju ʌs ndzame, te'šej maŋba quiojamjayajque'tu mista'mne'. 21Pero mumu yʌ'šejta'mbʌ tiyʌ maŋbamij ñchʌcjatʌjtamu porque ŋgowʌ'aŋjamjaytyambamis ʌs nʌy, porque ñe'cʌ'sta'm ja'n ispʌquiay te' cʌ'wejupʌ'sʌj.
22Juca inʌjcʌj jaminʌ y yajtiyʌ'ʌs inʌc jañchamjaya ñe'cʌta'm, ja'ndiyʌta'm inʌc quiowa. Pero yʌtij ja'ndiya' tiyʌ wa'y cha'maŋjayaju wa'y jana ijtyaju quiowa. 23Iwʌ'sʌj qui'nispa ʌj, qui'nisjaquie'tpa ʌs Ndataj. 24Juca inʌjcʌs jañchʌcʌ maya'aŋda'mbʌ isaŋwʌ'ajcuy ñe'co'mota'm ya'iwʌ'smaj jachʌctʌ'ʌpʌ, ja'ndiyʌta'm inʌc quiowa. Pero te'šejta'mbʌ tiyʌpit queñajwa'mʌj ʌj y quienjayajque'tu ʌs Ndataj y qui'nišajpatʌj mejtzji'ŋ. 25Pero yʌ'šej chʌquiaju'ŋmʌjcʌ tujcu te' chambašej ñe'ta'm 'yaŋgui'mgu'yojmo, te' nʌmbamʌy: Comeque'cti'ʌj qui'nišaju.
26Pero maŋba'ʌsmij ŋgʌ'wejaytyamu te' Cotzo'ŋopyapʌ. Te'wʌ maŋba chu'cumu ijtumʌy ʌs Ndata Dios. Te'wʌte' te' wiyuŋdzambapʌ Espíritu maŋba quiʌ'wejupʌ ʌs Ndata's. Te'wʌ'sʌj maŋba cotestigosaju ʌj. 27Y mista'm maŋbamisʌj ŋgotestigosajtaŋgue'tu, porque ʌji'ŋmij ittamu desde que nʌcʌtzo'tzu'ʌs nyoscuy.
Избрани в момента:
San Juan 15: ZCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nuevo Testamento en Zoque Copainalá © Sociedad Bíblica de México, A.C. 1967.