Популярни библейски стихове от San Juan 15

Споделяне

Ʌjte' te' uva-a'ŋucu, y mijta'mde' te' aŋmaŋda'm. Iwʌ itjojcʌtʌcpa ʌs ndzoco'yojmo, y ʌj ñe' choco'yojmo, yʌ'wʌ jene maŋba tyʌ'maju. Pero iwʌ'sʌj ca'ŋdzacpa yajtiyʌ ja'n ñʌwʌ'ay.

Itjojcʌtʌctamʌ ʌji'ŋ y ʌj maŋba'ʌj itjojcʌtʌjcu mista'm ndzoco'yojmo. Jujcha'nde' te' aŋmaŋda'm ja'n musi tyʌ'maju ñaytyumʌ juca wecspʌ'wa'a 'ya'ŋucucʌsi. Te'šejtijque' mijta'm ja'nmij musi ñdyʌ'majtamu juca ja'nmij itjojcʌtʌctame ʌji'ŋ.

Juca ʌs ndzoco'yojmo mij itjojcʌtʌctamba, y juca ʌs ndzame itjojcʌtʌcpa mista'm ndzoco'yojmo, wa'ctamʌ tiyʌta'm mis sundamba y maŋba'ʌsmij ndzi'tamu.

Ja'nmisʌjte' mis ŋgopiŋdamu'ʌj sino que ʌsmijte' ŋgopiŋdamu mijta'm. Y ŋgottamu'ʌsmij wa'mis maŋu ndzʌcjaytyamu ʌs Ndata's yoscuy, y uy chaquiaju te' wʌ'aŋja'moquiuy jujche'ŋ wyʌ'aŋjamyajpapʌ's. Te'šejpʌ yoscuy ʌste' sunba. Y tiyʌta'm mis nwa'cjaytyamba ʌs Ndataj ʌs nʌquiʌsi, ñe'cʌ'smij maŋba ñchi'tamu.

Juca ŋgoca'yajpatʌ amigota'm te'šejtʌ nyajquejpa que wiyuŋšejtʌ su'nopya.

Mumu aŋmaŋ ja'n tyʌ'mapyʌ ʌjpit maŋba tyʌcpʌ'u ʌs Ndata Diojsis. Y mumu jujche'ŋ tʌ'majpapʌ maŋba yajcʌwaju y quiosucsu wa'y más tyʌ'maju.

Yʌ'še'ʌsmij aŋgui'mdamba: Našunʌtʌjtamʌ ne'co'mo, jujcha'ʌsmij ʌs sundamu.

Juca jene ndzʌctambamis tʌm, te'wʌcʌsimis nyajquejaytyamba ʌs Ndata's myʌja'ŋajcuy. Y te'šej mis nyajquejtamba que ʌsmijyʌ' ŋgʌ'aŋmayeta'm.

Tzʌctamʌ cuenta que ʌjte' te' wiyuŋšejpʌ uva-a'ŋucu y ʌs Ndata Diojsis te' quiʌyujpapʌ.

Iwʌ ja'n itjojcʌtʌqui ʌs ndzoco'yojmo, maŋba pyiŋbutpʌ'yatʌju jujcha' ja'n 'yoyepʌ aŋmaŋ y maŋba tyʌjtzu. Y maŋba quiojtyatʌju jucʌtʌjcojmo wa'y pyoŋbʌ'yaju.

Yʌ'šejta'mbʌ tiyʌ'ʌsmij ndzamjaytyamu wa'y ʌs oma's jyo'ʌyjayu mista'm ndzocoy, y wa'mij 'yomdzocopyactamu.

Juca ŋgojamjaytyambamis ʌs aŋgui'mguytya'm, maŋbamisʌj sunjojcʌtʌctamu ʌsmij sunjojcʌtʌctambašej. Ʌs ŋgojamjayu'ʌs Ndata's 'yaŋgui'mguytya'm, y sunjojcʌtʌcpa'ʌs Ndataj ñe'cʌ'sʌj sunjojcʌtʌcpašej.

Našunʌtʌjtamʌ ne'co'mo. Yʌ'še'ʌsmij aŋgui'mdamba.

Juca inʌc mij ja'n nwyʌ'aŋja'moytyame, te' ja'n wyʌ'aŋja'moyapyʌ's šunʌtʌjtambamij inʌc. Pero como nwyʌ'aŋja'moytyambamij, y ʌsmijyʌ' ŋgopiŋbuttamu te' ja'n wyʌ'aŋja'moyapyo'moc, te'cotoyamijte' ŋgui'nisʌtʌjtamba te' ja'n wyʌ'aŋja'moyapyʌ's.