San Juan 10
10
Ñchowambe-we'quepʌ comparación
1Wiyuŋše'ʌsmij nwiyuŋdzamjaytyamba: Iwʌ sunba tyʌjcʌyu ñchowambe'sta'm wye'que'ojmo, pero ja'n tyʌjcʌy te' tʌjcʌyajpamʌy sino que emʌc maŋba qui'mdʌjcʌyu wa'ytye' ñu'mu, nu'mdʌjcʌpya. 2Pero iwʌ tʌjcʌpya te' tʌjcʌyajpamʌy, te'wʌte' te' ñchowambe-coque'noye. 3Ñe'cʌcotoya ya'aŋwajapya te' tʌjcʌquiuy te' tʌjcʌquiuy-quioquenbapʌ's, y ñʌctʌ'yjayajpa ñe' ñchowambe'sta'm wyejcʌ', y ñʌquiʌsi wyejyajpa tumdumʌ te' ñe' ñchowambe wa'y ñʌpujtyaju. 4Y ñʌputpʌ'yaju'ca wyi'najayajpa. Y te' ñchowambe's quio'ŋyajpa porque ñʌctʌ'yjayajpa wyejcʌ'. 5Pero ja'n ispʌquiapyʌ pʌn ja'n quio'ŋyay, sino que pyoyjayajpa, porque ja'n ñʌctʌ'yjayay te' ja'n ispʌquiapyʌ pʌ'nis wyejcʌ'.
6Yʌ'šejpʌ comparación chamjayaju Jesujsis, pero ñe'cʌ'sta'm jañʌctʌ'ya tiyʌte' inʌc te'šej nʌ chamu te' comparacioŋbit.
Te' oyepʌ ñchowambe-coque'noye Jesuste'
7Te'cotoya chamwʌtzʌcjayajque'tu Jesujsis: Wiyuŋše'ʌsmij nwiyuŋdzamjaytyamba: Ʌjte' te' tʌjcʌquiuy te' ñchowambecotoyata'm, y te' ñchowambeta'm pʌnda'mde'. 8Jujche'ŋ wina miñajupʌ que ja'n ʌj sutzi-aŋma'yoquiuy chʌquiaju y nu'myajpapʌte'. Pero te' ñchowambe wʌ'aŋja'moyajpapʌ pʌnda'mde', y te'ta'mbʌ's jaquiʌmato'ŋʌyjaya te' ñe'ta'm 'yaŋma'yoquiuy. 9Ʌjte' te' tyʌjcʌquiuy. Iwʌ ʌjpit tʌjcʌpya maŋba quiotzojcu. Y maŋba pyutpa tyʌjcʌyu y maŋba pya'tu jyamacʌtʌjcuy.
10Te' nu'mbapʌ minba wa'ytye' ñu'mu, y yajca'oyu y yajtoco'yoyu. Ʌj minu'ʌj wa'yʌs ndzi'yaju jomepʌ quenguy, y wa'y omgomʌ'ñaju te' jomepʌ quengu'yojmo. 11Ʌjte' te' oyepʌ coque'noye. Y ʌs ndzi'oquia'pa'ʌs nwin ñchowambecotoyata'm, sunba'ʌjte' nʌmu pʌngotoyata'm. 12Te' coyosa ja'nde' te' coque'noye ni ja'nde' te' ñchowambecomi. Juca quienba nʌ minu quiʌ'šajpapʌ's te' ñchowambe, pyochaquiajpa te' ñchowambeta'm. Y te' cʌ'soye's wene ñuquiajpa y eyata'mbʌ puŋdijtitnayajpa. 13Te' coyospapʌ popya porque coyospapʌtijte', y ja'n quioquipi te' ñchowambeta'm.
14Ʌjte' te' oyepʌ coque'noye. Ispʌquiajpa'ʌs ʌsne'ta'm, y ʌsne'ista'm ispʌquiajpa'ʌj, 15jujcha' ʌs Ndata'sʌj ispʌcpa, y ʌs ispʌcpa'ʌs ʌs Ndataj. Y ndzi'oquia'pa'ʌs ne' nwin ñchowambecotoyata'm, y te'wʌ pʌnda'mde'. 16Ijtyajque'tumaj eyata'mbʌ ja'ndiyʌta'mbʌ yʌy ʌs nwe'que'ojmo. Te'ta'mbʌ pyʌcpa wa'yʌs nʌmiñaju, y maŋba ñʌctʌ'yjayaju ʌs nwejcʌ'. Y maŋba ñʌctʌ'yjayaju ʌs ndzame. Y tumʌco necstoyoquiuy maŋba ijtu y tumʌtya'a quioqueñajpapʌ's. 17Sunba'ʌj Ndata's porque ndzi'oquia'pa'ʌs nwin wa'yʌj ŋga'u. Y ñempe'ʌj ŋga'ʌ muspati'ʌj nwinsa'que'tu. 18Ya'iwʌ'sʌj ja'n musi yajca'u, sino que ne' su'noquiupyi'tʌste' ndzi'oquia'pa nwin. Ijtu ʌs aŋgui'mʌtʌjcuy wa'yʌs ndzi'oquia'u nwin, y ijtu ʌs aŋgui'mʌtʌjcuy wa'yʌj nwinsa'wʌtzʌjcu. Yʌ'šejpʌ aŋgui'mʌtʌjcu'yʌj tzi'u Ndata's.
19Pijche'ca quipotoŋgʌ'yajque'tu ñe'co'mo judiota'm myatoŋyaju'ca yʌ'šejta'mbʌ tzame. 20Sone pʌn ñe'co'mocta'm nʌmyajpa inʌc: Ñʌc'ijtʌyupʌyʌ' yatzi-espiritu's, y co'sawapʌyʌ'. ¿Tiyajca'nde' ŋgʌmato'ŋʌytyamba? 21Eyata'mbʌ nʌmyajpa inʌc: Yatzi-espiritu's ñʌc'ijtʌyupʌ pʌn ja'n chamdzamnay yʌ'šej. ¿Muspasʌ'ŋ cho'yʌyu to'tipʌ pʌn yatzi-espiritu's?
Judio'sta'm japyʌjcʌchoŋya Jesús
22Nʌ inʌc quiosʌ'ŋajyaju judio'sta'm te' tumdumʌ amepʌ templo's jyomecotzʌjcuy Jerusale'ŋojmo. Y pacac aŋsʌŋde' inʌc. 23Y Jesús tey inʌc nʌ wyijtu templo'aŋi te' Salomo'ŋis chʌjcupʌ setze'ojmo. 24Y quiʌne'ŋgʌwitu'yaju judio'sta'm, y ñʌjayaju: ¿Jujche'ŋ jamayʌ' maŋba nyajopi'tjayu tʌs ndzocoy? Juca mijte' te' Cristo quejuqueju'c tʌj tzamja. 25'Yaŋdzoŋyaju Jesujsis: Ndzamjaytyamwa'mʌsmij y ja'nmis nwʌ'aŋjamdame. Te' ʌs ndzʌcpapʌ tiyʌ ʌs Ndata's ñʌquiʌsi, te'wʌ's yajquejpa iwʌ'ʌjyʌ'. 26Pero mista'm ja'nmis nwʌ'aŋjamdame, porque ja'nʌsmijte'ne' ñchowambeta'm, ndzamjaytyamuše'ʌsmij. 27Ʌsne' ñchowambe'sta'm, sunba'ʌjte' nʌmu ʌsne' mbʌ'nista'm, ñʌctʌ'yjayajpa ʌs nwejcʌ', y ʌs ispʌquiajpa'ʌs, y co'ŋyajpa'ʌj. 28Y ʌs ndzi'yajpa'ʌs ja'n yayepʌ quenguy. Ja'n maŋu tyocoyaju mumu jamacotoya. Y ya'iwʌ's ja'n musi yajʌcʌ'jayaju ʌs ŋgʌ'ojmoc. 29Ʌs Ndata'sʌjte' tzi'yaju ʌs mbʌnda'm. Y ʌs Ndataj mʌja'ŋbʌte', y ya'iwʌ's ja'n musi yajʌcʌ'jayaju ñe' quiʌ'ojmoc. 30Ʌj Ndataji'ŋ tu'mbacpʌtʌjyʌ'.
31Pijche'ca pyʌquiajque'tu tza' judio'sta'm wa'y tyʌŋga'yaju Jesús. 32Ñʌjayaju Jesujsis: Ndzʌcwa'mʌs sone oyeta'mbʌ tzʌqui mista'm nwi'naŋdʌjqui. ¿Jutipʌ tzʌquicotoya'mʌjte' sunba ndʌŋga'tamu tza'pit? 33Y 'yaŋdzoŋyaju judio'sta'm y nʌmyaju: Oyepʌ tzʌquicotoya ja'ndʌsmij ndʌŋga'e tza'pit, sino porque otowewʌ'ajapyamis Dios, porque mij mbyʌnmijyʌ' y nʌmij ñʌmu que Diosmijte'. 34'Yaŋdzoŋyajque'tu Jesujsis: ¿Ja'nja jequete' ja'yʌyu mista'm aŋgui'mgu'yojmo: Ʌj nʌmu'ʌj, diosta'm mijte'? 35Jʌ'ʌ, ñʌjayatʌju diosta'm te' pyʌjcʌchoŋyajupʌ's te' Diojsis chame. Y te' Totojaye ja'nde' šutzipʌ. 36Ʌjte' te' yajmasa'najupʌ y quiʌ'wejupʌ najsacopajcʌsi ʌs Ndata Diojsis. Porque nʌmu'ʌj que Diojsisʌjyʌ' 'Yune, te'cotoya nʌjaytyambamisʌj que otowewʌ'ajapya'ʌs Dios.
37Juca te' ʌs ndzʌcpapʌ tiyʌ ja'nde' ʌs Ndata's šunbašej, u'yʌj wʌ'aŋjamdame. 38Pero juca ndzʌcpa'ʌs Ndata Diojsis šunbapʌ tiyʌ, ñempe misʌj ja'n nwʌ'aŋjamdame ʌj, wʌ'aŋjamdamʌ te' ʌs ndzʌquiajpapʌ isaŋwʌ'ajcuy. Te'šej wa'mis mustamu y nwʌ'aŋjamdamu que ʌs Ndataj ijtu ʌs ndzoco'yojmo, y ʌj ijtu'ʌj Ndata's choco'yojmo.
39Y chʌcme'tzwʌtzʌquiaju judio'sta'm jutz wa'y ñuquiaju Jesús, pero jamusʌ ñuquia.
40Y maŋwʌtzʌjque'tu Jesús te' Jordaŋ-nʌ'is 'yocwinduc, wina inʌc nʌ yajnʌ'yʌ'oyumʌy Juan. Tey maŋu itma'ŋaju. 41Sone pʌ'nis inʌc quiʌ'minba tey. Y nʌmyajpa inʌc: Wiyuŋšej jachʌcʌ Jua'ŋis nijutzpʌ isaŋwʌ'ajcuy. Pero mumu tiyʌta'm chamu Jua'ŋis yʌ' Jesuscʌsipʌ, wiyuŋbʌ tiyʌte'. 42Y sone pʌ'nis wyʌ'aŋjamyaju Jesús tey.
Избрани в момента:
San Juan 10: ZCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nuevo Testamento en Zoque Copainalá © Sociedad Bíblica de México, A.C. 1967.