Zlr 30
30
1Nghadapta Rasel ta kwala ni kul yanatá zwaŋ ta Yakubu ná, ka drə tsi ta makuma ni. Kaʼa nda Yakubu mantsa: « Vliha vla ta zwani, ka mantsa a tsi wu, mtuha yu! » kaʼa. 2Ka ɓasanavatá Yakubu ta ŋuɗuf ta Rasel, kaʼa mantsa: « Iʼi Lazglafta ra? Tsatsi ta pyaftá kagha ka zlgha zwaŋ, » kaʼa. 3Kaʼa mantsa: « Wana kurɗa ɗa Bilha, lam la da tsi ka yata tsi ta zwaŋ ta karama ɗa#30:3 Ta karama ɗa nda gwaɗa Hebru ná, manda mnay kazlay dzaʼa galay yu kəʼa ya., ka mutsafta iʼi guli ta zwaŋ nda ma tsatsi, » kaʼa. 4Ka vlaŋtá tsi ta kurɗa ni Bilha ta Yakubu ŋa markwa taŋ, ka lam tsi da tsi. 5Ka zlghaftá Bilha ta huɗi, ka yanatá tsi ta zwaŋa zgun ta Yakubu. 6Ka Rasel mantsa: « Magiha maga Lazglafta ta skwi tɗukwa, ka snatá tsi ta tawa ɗa, ka vlihatá tsi ta zwaŋa zgun, » kaʼa ka tsanaftá tsi ta hga ni ka Daŋ#30:6 Daŋ nda gwaɗa Hebru ná, manda mnay kazlay maga skwi tɗukwa kəʼa ya.. 7Ka zlghəglaftá Bilha kurɗa Rasel ta huɗi guli, ka yəglanatá tsi ta zwaŋa zgun ka mahis ta Yakubu. 8Ka Rasel mantsa: « Lmaf lma ŋni ta lmu katakata nda makuma ɗa, ka zatá yu ta ghwa, » kaʼa. Ka tsanaftá tsi ta hga ni ka Naftali#30:8 Naftali nda gwaɗa Hebru ná, manda mnay kazlay lmaf lma yu ta lmu kəʼa ya..
9Nghay Leʼa ta tsaghuta yay ni ta zwaŋa, ka klaftá tsi ta kurɗa ni Zilpa, ka vlaŋtá Yakubu ka marakw. 10Ka yanatá Zilpa kurɗa Leʼa ta zwaŋa zgun ta Yakubu. 11Ka Leʼa mantsa: « Zɗakwa həga wu na na! » kaʼa. Ka tsanaftá tsi ta hga ni ka Gat#30:11 Gat nda gwaɗa Hebru ná, manda mnay kazlay Zɗakwa həga kəʼa ya.. 12Ka yəglanatá Zilpa kurɗa Leʼa ta zwaŋa zgun ka mahis ta Yakubu. 13Ka Leʼa mantsa: « Tutá yu da rfu! Ta rfu, ka miʼaha dzaʼazlay nda iʼi, » ka tsanaftá tsi ta hga ni ka Aser#30:13 Aser nda gwaɗa Hebru ná, manda mnay kazlay ma rfu kəʼa ya..
14Ma sana fitik, ta fitika tska alkama ta vwah, ka sliʼaftá Rubeŋ ka laghu da vwah ka mutsaftá tsi ta mandragurha#30:14 Mandragurha: Mndərga sana skwi ya ta ɗyaku ka sluhwa manda matiwira nzakwa slrəŋa ni. Laviŋ lava miʼaha ta zay ŋa zlgha huɗi ka lu., ka klanaktá tsi ta ma ni Leʼa. Ka Rasel nda Leʼa mantsa: « Kdəkkdək, klaɗif kla ta tsa mandragurha zwaŋa gha ya, » kaʼa. 15Ka Leʼa zlghanaftá mantsa: « Ta slaghu a tsa kləguduɗta gha ta zəʼala ɗa ya, dzaʼa kəl ka ka kləgəltá mandragurha zwaŋa ɗa wu ɓa? » kaʼa. Ka Rasel mantsa: « Nawa ɓa! Dzaʼa han da kagha ta na rviɗik gita na, ŋa mbəɗapta nda mandragurha zwaŋa gha, » kaʼa. 16Ta vraktá Yakubu ma vwah ga hawu, ka lab Leʼa da guyay, kaʼa nda tsi mantsa: « Da iʼi dzaʼa hana ka gita, skwa skwa yu ta kagha nda mandragurha zwaŋa ɗa, » kaʼa. Ka han tsi da tsi ta tsa rviɗik ya.
17Ka snatá Lazglafta ta duʼa Leʼa, ka zlghaftá tsi ta huɗi, ka yanatá tsi ta mahutafa zwaŋa zgun ta Yakubu. 18Ka Leʼa mantsa: « Pliha pla Lazglafta ta nisəla ɗa, kabga vlaŋ vla yu ta kurɗa ɗa ta zəʼala ini, » kaʼa. Ka tsanaftá tsi ta həga ni ka Yisakar#30:18 Yisakar nda gwaɗa Hebru ná, manda mnay kazlay nisəla kəʼa ya.. 19Ka zlghəglaftá Leʼa ta huɗi guli, ka yanatá tsi ta mamkuʼ a zwaŋa zgun ta Yakubu. 20Ka Leʼa mantsa: « Ŋərma mbəhu ya vliha Lazglafta, ndana tama dzaʼa vliha vla zəʼala ini ta sgit, kabga mkuʼ yanata yu ta zwana zgwana, » kaʼa. Ka tsanaftá tsi ta hga ni ka Zəvuluŋ#30:20 Zəvuluŋ nda gwaɗa Hebru ná, manda mnay kazlay vla sgit kəʼa ya.. 21Tahula tsa, ka yatá tsi ta makwa, ka tsanaftá tsi ta hga ni ka Dina.
22Ka havaptá Lazglafta ka Rasel, ka snanatá Lazglafta ta tawa ni, ka gunanatá tsi ta marɓa ni. 23Ka zlghaftá tsi ta huɗi ka yatá zwaŋa zgun. Kaʼa mantsa: « Klap kla Lazglafta ta iʼi ma hula, » kaʼa. 24Ka tsanaftá tsi ta hga ni ka Yusufu#30:24 Yusufu nda gwaɗa Hebru ná, manda mnay kazlay sganaghata kəʼa ya., kaʼa mantsa: « Ka sgaɗigha sga Yawe ta sana zwaŋa zgun, » kaʼa.
Nuta Yakubu ka gadghəl
25Manda yatá Rasel ta Yusufu, ka Yakubu nda Lavaŋ mantsa: « Zliɗ zla, dzaʼa vru yu dzagha ɗa, ta haɗika ɗa. 26Vliha vla ta tvi ka hliŋta yu nda zwana ɗa, nda miʼa ɗa ksagha yu ta slna dabga taŋ, ka sliʼa yu. Nda sna kagha ta slna ya maga gha yu, » kaʼa. 27Ka Lavaŋ nda tsi mantsa: « Kdəkkdək, fiha fa ta sləməŋ. Ta nghə yu ta manda ŋa ɗa ná, tfiɗigha tfa Yawe ta wi nda ma kagha. 28Mniha mna ta nisəla gha ya má ta ndan ka, ta plagha pla yu, » kaʼa. 29Kaʼa nda tsi mantsa: « Nda sna kagha ka yu magaghatá slna, nda ya rina gha sgavaghata da iʼi. 30Tsa kiʼata ni si da kagha makəɗ yu ka sagha ya ta yavafta katakata. Tfaghagha tfa Yawe ta wi manda sagha ɗa da ghuni. Ndanana ní, yawu dzaʼa maga iʼi ta ŋa ɗa slna ŋa həga ɗa tama? » kaʼa. 31Ka Lavaŋ mantsa: « Nu dzaʼa vlaghata yu tama? » kaʼa. Ka Yakubu mantsa: « Haɗ sana skwi dzaʼa ka vlihata wa. Ka zlghaf zlgha ka ta skwi dzaʼa mnaghata yu katsi, nda fa vgha ɗa ŋa nghapta ka rina fisika gha, dzaʼa nghay yu manda va ya si ta nghə yu tazlay. 32Gita, dzaʼa lab la yu vivitsanata ɗina ta inda rina fisika gha. Dzaʼa talap tala yu ta inda tuwakha nda wirtsa tida ka ya nda ghəŋa ni usa ni a tsi, dər kwitikw tsi dər dagala a tsi. Inda tuwakha ka marɗirɗi, inda guha nda wirtsa tida, dər kwitikw tsi dər dagala a tsi ya ná, tsaha ya dzaʼa nzakway ŋa nisəla ɗa. 33Ta kəma dzaʼa ngha ka, ka ŋərma mndu yu tsi ka ki tsi baɗ sagha da nghanatá ya hlap yu ŋa nisəla ɗa. Inda gu kul haɗ wirtsa tida, dər kwitikw tsi dər dagala a tsi, inda tuwak kul haɗ ka marɗirɗi dzaʼa slanaghata lu mataba ŋa ɗa ya ná, ka ya ghalaf yu nda ghala dzaʼa nzakwa tsa, » kaʼa. 34Ka Lavaŋ mantsa: « Ɗina tsa, ka zlghaf zlgha yu ta gwaɗa gha, » kaʼa.
35Baɗu va tsa fitik ya, ka talaptá Lavaŋ ta dugzumha ya ndurtsutsa, nda ya nda ghəŋa ni usa ni, nda inda guha ndurtsutsa nda ya nda ghəŋa ni usa ni, nda inda ya mamu ŋusliŋ tida, nda ya ka marɗirɗi mataba tuwakha, ka vlaŋtá tsi ta zwana ni. 36Ka sliʼaftá Lavaŋ nda zwana ni, ka magatá fitik hkən ta mbaɗa diʼiŋ nda Yakubu. Ka Yakubu ka ngha hamata pɗakwa bra rina fisika Lavaŋ. 37Ka ɓlaʼatá Yakubu ta zwana sləmaha fuha kavghakavgha. Ka slaʼuwaptá tsi ta ɓlakatavu tida ka wirtsaptá ka ŋusliŋ ka ŋusliŋ tida. 38Mbaɗa ka pghamtá tsa sləmaha wirtsap tsi ya ma tsuʼaŋha rina fisik, ma vla lagha taŋ da sa ima. Gi bla a buhway rini ta buhu ta lagha həŋ da sa imi. 39Ka buhu tsa rina fisikha ya ta buhu ta vata tsa sləmaha ya. Ka yayatá tsa guha ya ta zwana guha wereh wereha, nda wirtsa nda wirtsa, nda zlawa nda zlawa ta həŋ. 40Tsa tuwakha si pghawu Yakubu ta slərpu ya, mbaɗa ka mbəɗanatá kuma taŋ nda təv bra rina Lavaŋ ya nda wirtsa nda wirtsa, nda ya ka marɗirɗi ya kay. Mbaɗa kəʼa ka katsaghutá ŋa ni ma bra, ka kwal kul zlanata ŋa guya vgha nda rina Lavaŋ. 41Inda buhway rini ɓurguzl ɓurguzla ta buhu ya ná, pghamta Yakubu ta tsa sləmaha ya kay ma tsuʼaŋha ta nghay tsa riniha ya ŋa buhway taŋ ta vata tsa sləmaha ya. 42Ama ka nda saha nda saha rini ya, haɗ ta fatá tsa sləmaha ni ya wa. Ka nzaku tsa nda saha nda saha ya ka ŋa Lavaŋ, ta nzaku tsaha ɓurguzl ɓurguzla ya ŋa Yakubu. 43Ka sgaku dzaʼa gadghəla ni ta kəma ta kəma. Ndəghundəgha rina fisikha, nda kurɗuha nda ya nda kwalvaha, nda ŋalibwaha, nda kəɗihha tani.
Избрани в момента:
Zlr 30: xed
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators, Inc. All rights reserved.