Zlr 31
31
Sliʼapta Yakubu ga Lavaŋ
1Ka snaŋtá Yakubu ta skwi ta mnə zwana Lavaŋ: « Yakubu ta hlaghata inda skwa da ŋni. Inda skwa gadghəla ni ná, da da ŋni mutsafta tsi, » ka həŋ. 2Kəʼa ka Yakubu nghadamta da kuma Lavaŋ ná, pala a kuma ni nda tsi manda ya ghalya wa. 3Ka Yawe nda Yakubu mantsa: « Vra ta haɗika dzidzíha gha, da taba la ghuni, dzaʼa nza nza yu kawadaga nda kagha, » kaʼa.
4Ka ghunaftá Yakubu ta mndu hgədanaghatá i Rasel nda Leʼa da vwah, ma vla ngha rina fisika ni. 5Kaʼa nda həŋ mantsa: « Ta nghadaptá yu ná, pala a kuma da ghuni nda iʼi manda ya ghalya wa. Nziya nza tsi ná, kawadaga Lazglafta da ɗa nda iʼi. 6Nda sna vərɗa kaghuni kazlay magana maga yu ta slna ta da ghuni nda inda mbrakwa ɗa kəʼa. 7Da ghuni ta nənɓaɓtá iʼi. Ghwaŋ səla ni ta mbaɗanaftá nisəla ɗa. Tsaw vlaŋ a Lazglafta ta tvi ŋa magihatá ghwaɗaka skwi wa. 8Ka má kaʼa mazlay mantsa: “Tsa rina fisikha wərtsitsa ya dzaʼa nzakway ŋa nisəla gha,” kaʼa ná, inda taŋ ka yayatá həŋ ta zwani wərtsitsa. Ka má kaʼa guli mantsa: “Tsaha nda wereha ya dzaʼa nzakway ŋa nisəla gha,” kaʼa, inda taŋ ka yayatá həŋ ta zwani wereh wereha. 9Lazglafta ta hlaghutá rina da ghuni ka vlihata. 10Ma fitika buhway rini fisikha ta buhu, wya skwi nghaŋ yu ma suna ɗa. Ka nghaŋtá ta dugzumha ta buhwa mana guha, nda wereh wereha həŋ, wərtsitsa wərtsitsa həŋ, nda zlawa nda zlawa ta həŋ. 11Ka duhwala Lazglafta nda iʼi ma tsa suna ɗa ya mantsa: “Yakubu,” kaʼa. “Wana yu!” ka yu 12“Ngha ɓa, inda dugzumha ta buhwa mana guha ná, wereh wereha həŋ, wərtsitsa wərtsitsa həŋ, nda zlawa nda zlawa ta həŋ. Nda nza mantsa ya kabga nda ngha yu ta skwi maga gha Lavaŋ. 13Iʼi Lazglafta ta maravata da kagha ma Betel, ma vli dzugwa ka ta pala, ka pghaftá ka ta rɗi tida, ka waɗihatá ka ta waɗu ya. Ndanana, sliʼaf sliʼa ka zlaŋta ka ta na haɗik na, ka dzaʼa ka ta haɗika la ghuni,” kaʼa nda iʼi, » kaʼa.
14Ka i Rasel nda Leʼa nda tsi mantsa: « Ta mamu skwa za həga dzaʼa zəgəlta aŋni ma həga ga da ŋni ra? 15Klaf kla ta aŋni ka mayəm, kabga skwap skwa ta aŋni, ka zutá tsi guli ta tseda ŋni. 16Mantsa tama, inda tsa skwa gadghəl hlaghu Lazglafta da da ŋni ya ná, nda nza ka ŋa ŋni nda zwana ŋni. Ndana tama, maga ta inda skwi mna gha Lazglafta ŋa magay, » ka həŋ.
17Ka sliʼaftá Yakubu, ka hlaftá zwana ni nda miʼa ni ta ŋalibwaha. 18Ka hlaghatá tsi ta inda bra rina ni, nda inda skwa ni mutsaf tsi, tsaha ya bra rini ka ŋa ni, ya mutsaf tsi ma Padaŋ Aram, ŋa vru da da ni Izak ta haɗika Kanʼana.
19Laghu la Lavaŋ da gatsiŋtá swidi ta tuwakha ni, ka lagha Rasel da ghalaghatá skwa wuyayha da ni. 20Ka nanaftá Yakubu ta Lavaŋ mnda la Aram, ka laghu kul snanamta. 21Ka kɗikaghutá tsi nda inda skwiha ya ta nzakway ka ŋa ni. Ka tsughwaɗaghatá tsi ta ghwa Yufratis, ka laghu tsi nda təv ghwá Gilghat.
Guyafta i Yakubu ta vgha nda Lavaŋ
22Baɗ mahkəna fitik, ka lagha lu da mnanatá Lavaŋ kazlay kɗikagha kɗika Yakubu kəʼa. 23Ka sliʼaftá Lavaŋ kawadaga nda gwal ga taŋ ka zbiŋtá Yakubu. Ndəfáŋ fitika taŋ ta mbaɗa, ka lagha tsi slanaghata mista ghwá Gilghat. 24Girviɗik tama, ka maravata Lazglafta da Lavaŋ mnda la Aram ma suni, kaʼa nda tsi mantsa: « Ɗasuwa ká ka, yaha ka da gwaɗanaftá Yakubu dər nda zɗaku, dər nda ŋaslu, » kaʼa.
25Ta ɓhadaghatá Lavaŋ slanaghatá Yakubu, dzagwa dzagwa Yakubu ta həga tumpula ni mista ghwá Gilghat. Ka dzagwatá Lavaŋ nda gwal ga taŋ tani ta ŋa taŋ guli. 26Ka Lavaŋ nda Yakubu mantsa: « Nəna magiha ka ka naniɗifta, ka hlagaghutá kwagha ɗa manda gwal ta hlə lu da ga vuʼa na? 27Nya kəl ka ka kɗikagaghuta kul mniɗiŋta na? Nya kəl ka ka naniɗifta? Ka má mniɗiŋ mna ka ná, má nda rfu, nda laha, nda tim, nda ya nda kəzliŋkəzliŋ má zlighista yu. 28Ama zliɗiŋ a ka ta tvi dər ka brusata ɗa ta kwagha ɗa nda zighiha ɗa wa. Nana skwi maga ka na ná, manda magakwa halaway magata ka. 29Mamu yu nda mbrakwa magaghunatá ghwaɗaka skwi mazlay, tsaw ka Lazglafta da gha nda iʼi ta rviɗik ɗahawu na: “Ɗasuwa ká ka, yaha ka da gwaɗanaftá Yakubu dər nda zɗaku dər nda ŋaslu,” kaʼa. 30Mantsa nzakwa ni! Sliʼaf sliʼa ka, ka saghwi misimmisim kabga ta ndana ɓhadaghata da da gha ka, ama nya kəl ka ka ghalagaghutá lazglaftaha ɗa ɓa? » kaʼa.
31Ka Yakubu nda Lavaŋ mantsa: « Zləŋ ta ksutá iʼi, zlah dzaʼa hlaghu hla ta kwagha ni, ka yu ma ndana ɗa. 32Ka da wa dzaʼa slanaghata ka ta lazglaftaha gha ya, dzatá tsa mndu ya. Ta wa ira mnduha u, psa psa ta skwa gha ma inda huzlaha ɗa, ka kla ka, » kaʼa. Tsaw sna a Yakubu kazlay ghalaf ghala Rasel ta tsa skwiha ya kəʼa wa.
33Ka lam Lavaŋ da həga tumpula Yakubu, lamha da ŋa Leʼa, lamha da ŋa tsa kurɗuha his ya. Lay slanagha a wa. Ka sab tsi ma həga tumpula Leʼa, ka lam tsi da ŋa Rasel. 34Tsaw klaf kla Rasel ta tsa skwa wuyayha ya ka pghiŋta mista skwa nzaku ta ŋalibwa, ka nzafta tida. Ka psaptá Lavaŋ ta inda vli ma tumpul, slanagha a wa. 35Ka Rasel nda da ni mantsa: « Daɗaka, yaha ka da ɓasa ŋuɗuf, ta trapta ɗa ta sliʼavata ta kəma gha. Skwa má miʼaha miʼaha ya ta iʼi, » kaʼa. Ka zbə tsi, slanagha a ta tsa skwa wuyayha ya wa.
36Ka ŋlaftá ŋuɗufa Yakubu, ka zbə tsi ta zlərɗa wi nda Lavaŋ. Kaʼa nda tsi mantsa: « Nahgani krughuva ɗa, nahgani dmakwa ɗa, kəl ka ka ndriɗista. 37Manda psapta gha ma inda huzla ɗa, slanagha sla ka ta skwa həga gha dər turtuk rki na? Klagap kla ta kəma mnduha ɗa, nda mnduha gha, ka tsuʼuwaghata həŋ ta guma ni. 38Vaku hisambsak yu kawadaga nda kagha, haɗ tuwakha gha nda guha gha ta pghigiŋtá zwaŋ wu, haɗ maŋazaka gha zu yu wa. 39Haɗ ya ksa nimtak mataba rina gha ka klaghaktá yu wa. Iʼi yeya katək ta platá skwi ta zwaɗuta. Ka ghalu ghala lu ta rini gifitik dər nda rviɗik a tsi ná, da iʼi ta sagha ka da zbay. 40Gifitik, ghuy ghuya yu ta ɗaŋwa ta kayaghu, girviɗik ghuy ghuya yu ta ɗaŋwa ta mtasl, faf a yu ta hani ta ira ɗa wa. 41Vaku hisambsak maga yu ma həga ga ghuni, vaku ghwaŋpəɗ fwaɗ maga yu ta dzugwa kwagha gha his. Vaku mkuʼ maga yu ta ngha rina fisikha gha. Ghwaŋ səla gha ta mbaɗanaftá nisəla ɗa. 42Ka má haɗ Lazglafta da ɗa, Lazglafta Abraham, Lazglafta ya ta tsəlɓu Izak ta tsəlɓu nda zləŋ nda zləŋ ŋa ni ya kawadaga nda iʼi wu katsi, má nda dzvu bətbət zliɗista ka. Ama ka nghadaptá Lazglafta ta ghuya ɗaŋwa ɗa, nda slna ya maga yu nda dzva ɗa. Girviɗik ɗahawu, ka kuratá ta tsihatá guma ni, » kaʼa.
Dzrafta i Yakubu ta wi nda Lavaŋ
43Ka Lavaŋ nda Yakubu mantsa: « Nana kuʼaha na ná, kwagha ɗa ya, na zwana zgwana na guli ná, zwana ɗa ya, rina fisik guli ná, rina ɗa ya, inda na skwiha ta nghə ka na ná, ŋa ɗa ya. Ama ndanana, nu dzaʼa lavəgliŋta yu ta magəgəltá ŋa kwagha ɗa nda na zwani yaya həŋ na na? 44Sawi, dzraf u dzra ta wi, iʼi nda kagha, ka nzakwa tsi ka masləmtsək mataba u, » kaʼa. 45Ka klaftá Yakubu ta pala ka dzugwata.
46Tahula tsa, ka Yakubu nda mnduha ni mantsa: « Tskagaghawa tska ta pala, » kaʼa. Ka tskadaghatá həŋ ka ŋir. Ka zutá hahəŋ demdem ta skwa zay ma tsa vla ŋir ya. 47Ka tsanaftá Lavaŋ ta hga tsa vli ya ka Yegarsahaduta, ta hgə Yakubu ka Galeʼed#31:47 Galeʼed nda gwaɗa Hebru ná, tsaya ŋira masləmtsək. Yegarsahaduta guli ná va tsa skwa turtuk yeya nda gwaɗa Aram.. 48Ka Lavaŋ mantsa: « Masləmtsək mataba ɗa nda kagha na ŋir na gita, » kaʼa. Tsaya ta kəl lu ka hgay ka Galeʼed. 49Ta hgay lu guli ka Mitspa#31:49 Mitspa nda gwaɗa Hebru ná, manda mnay kazlay vla nghapta kəʼa ya., kabga ka Lavaŋ guli na: « Ka nghapta Yawe ka uʼu baɗ nzar u diʼiŋ ya diʼiŋ ya, kul nghəglaŋtá u ta vgha u. 50Ka ta ghuya ɗaŋwa ka ŋa kwagha ɗa, ka hlaf hla ka ta sanlaha ma miʼaha ŋa marakw, ɗasuwa ká ka, mndu a masləmtsək mataba u wu, Lazglafta ka ghəŋa ni ya, » kaʼa.
51Ka Lavaŋ nda Yakubu guli mantsa: « Ngha ta na ŋira pala na, ngha ta na pala dzugwana yu mataba u na. 52Na ŋira pala na ná, masləmtsək ya. Na dzugwatá pala na guli ná, masləmtsək ya. Haɗ iʼi dzaʼa tsughwaɗaghutá na ŋira pala na ŋa dzaʼa nda da kagha wa. Haɗ kagha dzaʼa tsughwaɗaghutá na ŋira pala na nda na dzugwatá pala na guli ŋa dzaʼa da iʼi, ŋa maga ghwaɗaka skwi wa. 53Ka nza i Lazglafta Abraham nda Lazglafta Nahur ŋa tsa guma mataba u, » kaʼa. Tsaya Lazglafta da taŋ. Ka waɗatá Yakubu nda hga Lazglafta ta tsəlɓu Da ni Izak ta tsəlɓu ŋa ni nda zləŋ nda zləŋ ya. 54Ka hnatá Yakubu ta skwa pla ghəŋ mista tsa ghwá ya. Ka hagaftá tsi ta la dzidza ni ŋa za skwa zay. Ka zutá həŋ ta skwa zay ka han həŋ mista tsa ghwá ya.
Избрани в момента:
Zlr 31: xed
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Wycliffe Bible Translators, Inc. All rights reserved.