Знайдзі час на адпачынакУзор

Напоўніся, каб выліваць.

Быць напоўненым Сьвятым Духам - гэта проста наступнае: падпарадкаваць Ягонай моцы ўсю маю сутнасьць. Калі душа падпарадкоўваецца Сьвятому Духу, Сам Бог напоўніць яе. - Эндру Мюррэй.

Адпачынак патрэбны нам таму, што мы працуем або трацім энэргію нейкім іншым спосабам. І тое, што мы даведваемся, як адпачываць, і адчуваем, што мы адпачылі, не азначае, што так будзе заўжды.

Мы зноў будзем працаваць.
Мы зноў будзем дапамагаць іншым.
Мы зноў зьнясілімся эмацыйна.

Сэнс ня ў тым, каб адпачываць проста дзеля адпачынку. Мы адпачываем, каб здолець працаваць зноў. Праца й адпачынак - нібыта адплывы й прыплывы мора; мы мусім напоўніцца, каб здолець выліваць.

Як мы ўжо тое абмеркавалі, разважаньне над Божым Словам, вядзеньне дзёньніку ды абмежаваньне рэчаў, якія адцягваюць нашую ўвагу, зьяўляюцца звычкамі, што аднаўляюць нашыя сілы. Робячы тое штодня, мы знаходзім адпачынак. Гэтаксама, як нашае фізычнае цела мае патрэбу ў дастатковым начным сну, каб асьвяжыцца, наш дух таксама мае такую патрэбу. Мы ня можам спадзявацца мець моцны, жвавы дух, нічога ня робячы дзеля гэтага. Мы ня можам думаць, што адзін тыдзень вакацыяў дапаможа нам не стамляцца ў наступныя месяцы. Каб трываць, мы павінны штодня рабіць нешта наконт нашага адпачынку. І мы таксама мусім заўважаць, калі мы адпачываем зашмат.

У сваёй кнізе “Leading on Empty: Refilling Your Tank and Refueling Your Passion” пісьменьнік і пастар Уэйн Кардэйра распавядае пра сон, што яму аднойчы прысьніўся. Нейкая кабета прыйшла да гаспадара аднае фэрмы й папрасіла яго нечага, што ў яго не было. Ён сказаў: “Прыходзь заўтра, у мяне тады будзе больш.” Яна засмуцілася, але ён не зьвяртаў увагі. Ён проста працягваў працаваць. Людзі прыходзілі да яго штодня, і калі ў яго больш не заставалася яек або малака, ён проста казаў: “Прыходзь заўтра, у мяне тады будзе больш.” Пастар Кардэйра падзяліўся гэтаю новаю пэрспэктываю, якую ён займеў пасьля таго сну:

Я не павінны прывязвацца да ўяўнага, бясконцага цыклю вырабляць больш, зарабляць больш, або спрабаваць зрабіць болей, чым на мінулым тыдні. У адным дні ўсяго толькі 24 гадзіны, і я хачу зрабіць тое, што магу ад усяго сэрца. Калі час скончыцца, я скажу: “Прыходзь заўтра, у мяне тады будзе больш.”

Штодня мы прачынаемся з пэўнаю колькасьцю мэнтальнай, эмацыйнай ды фізычнай энэргіі. Калі мы аддалі ўсё, што маглі, мы мусім адпачыць. Калі мы пустыя, у нас ёсьць менш магчымасьцяў перашкаджаць Ягонаму пляну на нашае жыцьцё.

Схіліся, супакойся ды адпачні. Гэта найлепшы і найбольш адпаведны час для таго, каб напоўніцца Сьвятым Духам.

Паразважай

• Ці ты адчуваеш, што мусіш задавальняць кожную патрэбу, што бачыш?
• Што ты можаш пачаць рабіць штодня, каб асьвяжыцца?
• Занатуй тое, што Бог сказаў табе праз сёньняшняе чытаньне Бібліі або пасьвячэньне.