AKAM 16
16
Pol Lapen Silas Atum Along Timothi Kedun
1Ansi Pol ke Derbe lapen Listra arongsopi anta damlo. Hadak Timothi pu inut a-Khristian dolo. Alangli peita Khristianlo. Labangpi ke Jihudi amonit-lo, bonta Timothi apo ke Grik amonit-lo. 2Listra lapen Ikoniam arongsopi kedo kekroitang atum anta alangliphan aningdoksi rohurlo. 3Pol Timothi aphan ari kecheponji aning hang-lo. Lasi alangliphan reng-rot pilo; athe pima, Timothi apo ke Grik amonit-lo pu hadak malom kedo a-Jihudi atum an chinihurlo. 4Alangli-tum rongsopi hei hei angbong kedam un ahut, kekroitang atum lapen mondoli akesar atum Jerusalem along keparaitang aron hei hei halatum aphan pisi lahei hei kekroiji aphan pulo. 5Lasi mondoli atum akekroi thebomlo, lapen arnivangta mondoli abangphuta nangbatbomlo.
Troas Arongsopi Along Pol Ning Arjan Kethek-long
6Pol lapen ari asangho atum Phrigia adet lapen Galasia alongri angbong dongponputsi damlo, pima Karjong Kangthir alanglitum aphan Asia adet ke pathan longledet-lo. 7Alanglitum Maisia adet ahoi lesi Bithinia adet kedamji aphan mathalo, bonta Jisu a-Karjong alanglitum aphan khang-lo. 8Lasi alanglitum Maisia adet dongponputsi Troas arongsopi damjuilo. 9Ajo Pol ning arjan thek-long-lo. Alangli thek-long-lo, Masedonia adet amonit inut arjapthersi alangliphan choningrisi pulo, “Masedonia adet vang-ra nelitum aphan neraptha!” 10Pol labangso aning arjan thek-longdet aphi nelitum Masedonia adet kedamjisi chesik-lo, pima hadak kedo amonit atum aphan Birta Keme kepathandamjisi Arnam nelitum aphan nephalo pu nelitum chinipamelo.
Philipi Arongsopi Along Lidia Aning Kecherui
11Troas pen telongpi chethapsi nelitum Samothresk alanglom damphit-lo, lapen puthot arni Neapolis arongsopi lelo. 12Hadak pen nelitum Philipi arongsopi damlo. Lake Mesedonia adet isi alongri angbong kedo aphrangsi arongsopi lo, lapen Roman aron-aso isi asong kedo adimlo. Hadak nelitum penang arni dolo. 13Arni isi, Sabbath Arni nelitum halabangso arongsopi pen barsi langroi akung damlo, pima hadak Jihudi atum kardom adim doji pusi nelitum mathalo. Nelitum ingnisi hadak kechingrum arloso atum pen chingkilo. 14Hadak nelitum alam nangkarjudun atum angbong Lidia pu inut Thiatira arongsopi arlosopita inut-lo. Alangli ke hepi arje ape kejor lapen Arnam aphan kangduk abangpilo. Lasi Pol kethan alam kedengjisi Hemphu labangpi aning ingpulo. 15Labangpi lapen ahem amonit atum an baptisom endet aphi labangpi nelitum aphan nephalo. Alangli pulo, “Nanglitum jongsi neliphanta Hemphu aphan kekroi binong abangpilo pu mathalo tangte, vang-ra neli hemle donon.” Alangli nelitum aphan jasemet arneponlo.
Philipi Arongsopi Along Pol Lapen Silas Aphan Phatek Kebeng
16Arni isi nelitum kardom adim kedam un ahut inut abanpi nelitum pen chetong-lo. Labangpi ke inut alodeppilo, lapen kehingno akarjong ajakong pen ajok mo aphi keplangji alam thanmeksi ahemphu atum aphan tangka palongpi-olo. 17Labangpi Pol lapen nelitum aphi phi nangdunlo, lapen hangkongsi pulo, “Labangso amonit atum ke kangtuinei a-Arnam aban atumlo! Kejok kelongji atovarsi alanglitum nanglitum aphan nangthanlo!” 18Labangpi penang arni lasonsi klembomlo. Lasi Pol aning oisi, chetevarsi hala kehingno akarjong aphan pulo, “Jisu Khristo amen pen ne nangphan hukum pilo, nang labangpi pen nangbarnon!” Hala mamat kehingno akarjong labangpi pen nangbarlo.
19Ansi ahemphu atum tangka kelongji atovar avedet thek-longsi halatum Pol lapen Silas aphan nep-lo, lapen chethurponsi hithi adim rongsopi ahemphu atum angno ponlo. 20Halatum kangsai atum angno Pol lapen Silas aphan vansi pulo, “Latum ke Jihudi amonit-lo. Latum labangso arongsopi angbong jasemet pahuriseilo. 21Ili Roman amonit atum ke-en longle lapen kekroilongle aron hei hei si latum than pachethang-lo.”
22Ansi armu atumta halatum along jalangdunsi Pol lapen Silas aphan thurpak-lo, lapen kangsai atum alanglitum ape palumsi kechokji ahukum pilo. 23Halatum alanglitum aphan jasemet choksi phatek beng-lo, lapen alanglitum aphan ton pametu pusi phatek ahemphu aphan hukum pilo. 24Lason sodak ahukum longsi phatek ahemphu abang alanglitum aphan phatek angbong angdengsi bilo, lapen alanglitum akeng kapat pang-omruilo.
25Bonta ajo achitim malom Pol lapen Silas Arnam ardomsi Arnam aphan kero alun lunkong-lo, lapen phatek arlo kedo atum arjudun phrong-lo. 26Ansi tongsekot pen chikli thepi vangsi phatek ahemthur paklemhurlo. Hala mamat phatek anghap do-an chingpudang-lo lapen hala phatek kejang atum aphan kekok-i ingchin ari anta klo-et-lo. 27Phatek ahemphu amek prangsi phatek anghap do-anta kechingpudang thek-long-lo, lapen phatek kejang atum an kat-et-lo pusi alangli mathalo. Lasi alangli anokjir chesatsi amethang chepathiji dok dok-lo. 28Bonta Pol un an ase kethe pen hangsi pulo, “Nangmethang chephangnori! Nelitum kadokaveta ladaksi do!”
29Phatek ahemphu melur hei hei hangsi phatek arlo damlo, lapen kephere pen a-ok klemhursi Pol lapen Silas akeng-ri domkhrup-lo. 30Ansi alangli alanglitum aphan phatek arlo pen ponsi arjulo, “Akehai atum! Kejok kelongji aphan neli kopi klem nangjima?”
31Alanglitum thakdunsi pulo, “Hemphu Jisu aphan kroinon, anke nangli lapen nanglitum hem isi amonit kejok longpo.” 32Ansi alangliphan lapen alangli hem amonit an aphan Hemphu alam thanlo. 33Halabangso ajo lapen halabangso apor ahut mamat alangli, alanglitum aphan ponsi areng amek an chamlo; lapen alangli lapen ahem amonit atum an baptisom enlo. 34Ansi alangli Pol lapen Silas aphan amethang ahem cheponsi an pacholo. Alangli lapen alangli hem amonit atum aning arongpik-lo, pima nonke halatum Arnam aphan kroilo.
35Puthot adap kangsai atum chedanbang atum aphan toisi phatek ahemphu aphan papulo, “Halabangso amonit atum aphan padamlongnon.” 36Lasi phatek ahemphu abang Pol aphan pulo, “Kangsai atum nanglitum aphan kelophlotji ahukum pilo. Nonke nanglitum dak pen barra ningkangsam pen damnon.”
37Bonta Pol chedanbang atum aphan pulo, “Nelitum ke Roman amonit-lo setta nelitum aphan ingsai-sepin pen rat angno nechok-lo lapen phatek nebeng-lo. Lapen nonke halatum nelitum aphan dak pen padamjoipoma? Lapu ke chokche! Halatum amethang vangsi nelitum aphan pabarvek nangji.”
38Ansi chedanbang atum kangsai atum aphan labangso alam thandamlo, lapen Pol lapen Silas ke Roman amonit-lo pu arjulongsi halatum pherelo. 39Lasi halatum vangsi alanglitum aphan choningrisi phatek pen vanlo, lapen rongsopi pen damnon pusi choningrilo. 40Pol lapen Silas phatek pen barsi Lidia ahem lutdamlo. Hadak alanglitum kekroitang atum pen chetong-lo, lapen halatum aphan ning kepathe alam pusi damjuilo.
Цяпер абрана:
AKAM 16: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.