लुका 24
24
येशु सीक्योकलाःम्ले फीर्च्या सेन्क्योक
(मत्ती २८:१-१०; मर्कुस १६:१-११; युहन्ना २०:१-१०)
1साताइ तोःङगीइ ङीःमाला ङामुरा ओः पेःन्पीःजाक्या राःङगीइ तयार जोक्योक मलम खुर्ती येशुइ रोःला टुःल्जेला तुःर्साला काःल्सी। 2ओःला लेप्कासुना खुङक्याइ तुःर्साला स्युःगेन कोः उप्केन तोः तेङ्ज्याक्योक फ्रेसी। 3तुःर्सा नाःङ्ला स्युःगासुना खुङक्याइ प्रभु येशुइ रोः माःफ्रे। 4खुङक्या जोल्देरा एःकासुना एक्कासी छ्य्वामे केःला केःङ्क्योक मेःन्दा ङी मीःक्या खुङक्याइ सुःरला लाःङ्सी। 5पेःन्पीःजाक्या जीबाइ साछ्योले गो रील्सी। इःनाङ ओः मेःन्दा ङी मीःक्याइ खुङक्याला लाःसी, “सेन्क्योक मीःला सीक्योकक्याइ तुःर्साला चीले चाल्देरा एःपा? 6येशु दीला म्याः। खुङ सीक्योकलाःम्ले सेन्दी एः! गालीलला एःकासुना खुङगीइ ख्याक्याला ची लाःती एःके, ख्याक्याला टेःम्बा म्याःपा? 7‘ङाः मीःइ पुःला माःताक्पा मीःक्याइ लाःक्पाला तेर्केन एः, क्रुसला प्याङेन एः ओःले ङीःमा सुमगीइ ङीःमु फीर्च्या सीक्योकलाःम्ले सेन्ङेन एः।’” 8ओःले खुङक्याइ येशुइ लाःक्योक ताम टेःम्बा साल्सी।
9ओः पेःन्पीःजाक्या तुःर्सालाःम्ले लोःदी ओःङ्दी राःङगीइ थोङ्क्योक थाम्जेर तामक्या मेःन्दा च्युजीक योबाक्याला ओःले राःङ्सा थाम्जेरला लाःतेर्सी। 10ओः पेःन्पीःजाक्यादी मरीयम मग्दलीनी, याकुबकीइ आमा मरीयम, योआन्ना ओःले राःङ्सा चीङ पेःन्पीःजाक्या एःके। दी पेःन्पीःजाक्याइरा दीखो तामक्या च्युजीक योबाक्याला लाःतेर्सी। 11इःनाङ खुङक्याइ ओः पेःन्पीःजाक्याइ लाःक्योक तामक्याला सेमल्हुक मालु। खुङक्याइ ओःखो नी म्याःक्योक ताम चीग्रा इःङे लाःसी। 12इःनाङ पत्रुसदी जुरुक्क लाःङ्दी तुःर्साला छ्योङ्देरा काःल्सी ओःले गो माःर्ला कुःदी तागासुना नी सुतीइ केःलाक्या बाहेक राःङ्सा चीङ माःथोङ। दीखो थोङ्दी खुङ याःमाछाक नेतेरा खीमछ्योले लोःसी।
येशु मेःन्दा ङी योबाक्यासाःला थोङ्क्योक
(मर्कुस १६:१२-१३)
13ओः ङीःमुरा येशुइ योबाक्यालाःम्ले मेःन्दा ङी योबाक्या यरुशलेमलाःम्ले च्युजीक कीलोमीटर जे थारीःङ्बुला एःक्योक इम्माउस लाःकेन युःलछ्योले डोदेरा एःके। 14खुङक्याइ ओः तीःजीला काःल्क्योक थाम्जेर तामक्याइ बारेला ताम लाःतेरा एःके। 15एःन्डुले ताम लाःतेरा ओःले टेः पेःदेरा एःकासुना येशु राःङ्रा खुङक्याइ सुःरला ओःङ्दी खुङक्या ङीमु डोगाला स्युःसी। 16इःनाङ कोन्ज्योइ खुङक्याइ येशुला ङोःसेमीःखुन्दी जोतेर्सी। 17येशुइ खुङक्याला लाःसी, “ख्याक्या चीइ बारेला ताम लाःतेरा डोदेरा एःपा?” खुङक्या लाःङ्दी तेःसी ओःले खुङक्याइ तोःङ्बा नाःक्छील थोङ्गुके। 18ओः मेःन्दा ङी नाःङ्ले क्लेओपास लाःकेन्दीइ येशुला टीःसी, “फीलाःम्ले ओःङेन मीःक्या नाःङ्ला ख्याइ चीग्रा दीखो ताम छोर्ती मीःन्दु। दाङ तीःरीङ यरुशलेमला काःल्क्योक ताम ची ख्याइ कोःदी म्याःपा?” 19येशुइ टीःसी, “काःन्डुबा ताम?” खुङक्याइ लाःसी, “नासरतकीइ येशुइ बारेला काःल्क्योक ताम। खुङ कोन्ज्योइ लेःङ्गो तेर्केन्दी एःके, ओःले खुङ ङीमु कोन्ज्यो ओःले थाम्जेर मीःक्याइ तोःङ्ला छ्योम्बो लेःगा पेःगेन्दी ओःले याःबुले लोप्केन्दी ल्हे एःके। 20इःनाङ उःइ छेस्यो पुजाहारीक्या ओःले शासकक्याइ खुङला मृत्युदण्ड तेर्चेला तेर्सी ओःले खुङक्याइ येशुला क्रुसला प्याङ्सी। 21खुङगीइरा इस्राएलीक्याला थार्च्युउए लाःती ङीःइ खुङगीइ लाःम तादी एःके। ओःले खुङला क्रुसला प्याङ्क्योकाङ ङीःमा सुम काःल्सी। 22ङीःइ छोबाइ मेःन्दा काःजे पेःन्पीःजाक्याइ लाःक्योक तामक्याइ ङीःला नी याःमाछाक्का जोसी। खुङक्या ङामुरा तुःर्साला काःल्सी, 23इःनाङ ओःला खुङक्याइ येशुइ जुबु माःज्योर। खुङक्या ओःङ्सी ओःले खुङक्याइ स्वर्गदुतक्या थोङ्क्योक ओःले ओः स्वर्गदुतक्याइ ‘येशु नी सोम्बोरा एः’ लाःक्योक ताम लाःसी। 24दीखो कोःदी ङीःइ चीङ रोःक्याङ तुःर्साला तागाला काःल्सी, खुङक्याइयाङ ओः पेःन्पीःजाक्याइ लाःक्योक च्योःङ्रारा थोङ्सी, इःनाङ येशुइ जुबुदी माःथोङ।”
25येशुइ खुङक्याला लाःसी, “ख्याक्याइ सेम काःजे थुक्पु दु! कोन्ज्योइ लेःङ्गो तेर्केन्दी मीःक्याइ लाःक्योक थाम्जेर तामक्याला सेमल्हुक लुजेलाङ ख्याक्याला काःजे काःबु काःल्दी दु। 26नाःम्खालीङगीइ महीमाला स्युःजे तोःङ्ला थार्च्युगेन ख्रीष्टकीइ दी तुःक्पु ज्योर्कोःउए लाःती टेःम्बा म्याःके ले?” 27मोशालाःम्ले छुदी थाम्जेर कोन्ज्योइ लेःङ्गो तेर्केन्दी मीःक्याइ प्रुःक्योक कोन्ज्योइ थाम्जेर पेज्याक्याला येशुइ बारेला प्रुःक्योक तामक्याइ बारेला येशुइ खुङक्याला लाःतेर्सी।
28खुङक्या डोदेरा पेःक्योक इम्माउस युःलगीइ थामालारा लेप्कासुना येशुदी ताःरुङ थारीःङ्बु डोजे छोल्क्योक च्योःङ्रा थोङ्गुके। 29इःनाङ ओः मेःन्दा ङीइ वासी पेःदी लाःसी, “नाःम छेचे छोल्सी, तीःरीङ ख्या ङीः ङीमुरा तेः।” ओः सोङ्गारा, येशु खुङक्या ङीमुरा तेःचेला खीम नाःङ्ला स्युःसी। 30साःप्च्या साःजेला तेःकासुना येशुइ खुरा लेःङ्सी ओःले मोलाम तेर्ती ओः खुरा च्यासी ओःले खुङक्याला तेर्सी। 31ओःले का कोन्ज्योइ खुङक्याला छोर्च्युसी ओःले खुङक्याइ येशुला ङोःसेसी। इःनाङ ओः तेःकासुरा खुङक्यालाःम्ले येशु तोर्सी। 32खुङक्या चीगकीइ राःङ्साला लाःसी, “खुङगीइ उः ङीमु लाःमला ताम लाःतेरा उःला छ्येइ पेज्याइ तामक्याइ बारेला याःबुले लाःकासुना उःइ सेम खाम्साङ्बुइ काःङ्दी म्याःके ले?”
33ओःले खुङक्या थाङ्मा चीगलारा लाःङ्सी ओःले यरुशलेमछ्योले लोःदी काःल्सी। ओःला लेप्कासुना खुङक्याइ मेःन्दा च्युजीक योबाक्या ओःले खुङक्या ङीमु रुःप काःल्क्योक मीःक्याइ 34एःन्डु लाःतेरा पेःक्योक फ्रेसी, “प्रभु तेःन्दामरा सीक्योकलाःम्ले सेन्दी एः, खुङ सीमोनसाःला थोङ्दी एः!” 35ओःले ओः मेःन्दा ङीइ लाःमला काःल्क्योक ताम ओःले येशुइ खुरा च्यासुना खुङला ङोःसेक्योक ताम खुङक्याला लाःसी।
येशु खुङगीइ योबाक्यासाःला थोङ्क्योक
(मत्ती २८:१६-२०; मर्कुस १६:१४-१८; युहन्ना २०:१९-२३; प्रेरीत १:४-८)
36दीखोइ बारेला खुङक्या ताम लाःतेरा एःकासुना येशु राःङरा खुङक्याइ कील्ला लाःङ्सी ओःले लाःसी, “ख्याक्या ङीमु खाम्साङ्बु एःच्युक।” 37हेन्डी का थोङ्सी लाःती खुङक्या माःङ्बुरा हालेसी ओःले जीसी। 38इःनाङ येशुइ खुङक्याला लाःसी, “ख्याक्या एःन्डुले चीले जीउबा? चीले ख्याक्याइ सेमला एःन्डुबा पाःकेन ओःङ्गुबा? 39ङाःइ लाःक्पा ओःले काङ्बा तादो ओःले ख्याक्याइ ङाःला याःबुले ङोःसेउए।#२४:३९ येशुइ दीखो लाःती खुङगीइ लाःक्पा काङ्बाला काँटी तीःप्क्योक डाम तेःङ्जेला लाःक्योक इःङे। ओः सोङ्गारा, खुङक्याइ येशुला खुङरा इःङेन्दुबा लाःती ङोःसेज्युक लाःती लाःक्योक इःङे। ङाःला नुःम्दी तादो, हेन्डीइदी ङाः ङीमु एःक्योक च्योःङ्रा रेःकोक रा स्या मेःयोःङ एः।” 40एःन्डु लाःती येशुइ खुङक्याला राःङगीइ लाःक्पा ओःले काङ्बा तेङ्सी। 41खुङक्या माःङ्बुरा केःदाङ ओःले याःमाछाक काःल्दी दीखो तामला सेमल्हुकरा लुमाःखु। ओः सोङ्गारा, येशुइ खुङक्याला लाःसी, “ख्याक्या ङीमु चीङ साःगेन स्याः एःपा?” 42खुङक्याइ येशुला योक्योक तुःम्बु चीग ङ्याः तेर्सी। 43ओःले खुङगीइ ओः ङ्याः लेःङ्दी खुङक्याइ तोःङ्लारा साःसी। 44ओःले येशुइ खुङक्याला लाःसी, “ङाः ख्याक्या ङीमु एःकासुना मोशाइ प्रुःक्योक छ्येइ ठीमगीइ तामक्या, कोन्ज्योइ लेःङ्गो तेर्केन्दी मीःक्याइ छ्येइ पेज्याक्याला ओःले भजनगीइ पेज्याक्याला ङाःइ बारेला प्रुःक्योक थाम्जेर तामक्या छङेन एः लाःती ङाःइ ख्याक्याला लाःती एःके।”
45ओः तीङ्ला येशुइ खुङक्याला छ्येइ पेज्याला प्रुःक्योक तामक्या सेगेन ल्हे तेर्सी 46ओःले लाःसी, “छ्येइ पेज्याला एःन्डुले प्रुःदी एः, थार्च्युगेन ख्रीष्टकीइ तुःक्पु खुर्ती ङीःमा सुमगीइ ङीःमु फीर्च्या सीक्योकलाःम्ले सेन्ङेन एः। 47ओःले खुङगीइ मीःनला स्याबा पेःदी लाःयो पोःर्सी लाःना लाःयोइ क्षमा ज्योर्कुए लाःकेन ताम यरुशलेमलाःम्ले छुदी थाम्जेर क्युःपाक्याइ मीःक्याला कोःच्युकोःउए। 48ख्याक्याइरा दी थाम्जेर काःल्क्योक तामक्या राःङ्सा मीःक्याला लाःकोःउए। 49ओःले कोःदो, ङाः ङाःइ आःबाइ ख्याक्यासाःला ताङ्तेर्के लाःक्योक चाङ्मा ला ताङ्तेर्के। इःनाङ चाङ्मा ला ख्याक्याखाला ओःङ्दी नाःम्खालीङगीइ ल्हेइ माःकाःङथुप ख्याक्या दीखो क्याःसालारा कुःदी तेः।”
येशु नाःम्खालीङला काःल्क्योक
(मर्कुस १६:१९-२०; प्रेरीत १:९-११)
50ओःले येशुइ योबाक्याला क्याःसालाःम्ले बेथानीया युःलछ्योले खेर्सी, ओःला लेप्ती खुङगीइ राःङगीइ लाःक्पा क्यादी खुङक्याला मोलाम तेर्सी। 51मोलाम तेर्तेरा एःकासुना येशु खुङक्यालाःम्ले खाफ्यासी ओःले नाःम्खालीङला खेर्सी। 52खुङक्याइ येशुला पीमु चुदी फ्या छाल्सी ओःले माःङ्बुरा खाम्साङ्बु पेःदेरा यरुशलेमला लोःसी। 53ओःले खुङक्या तेन्दुरा कोन्ज्योइ मन्दीरला जोम्गुके ओःले कोन्ज्योला प्रशंसा पेःउके।
Цяпер абрана:
लुका 24: SYW
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2024 (Active), Wycliffe Bible Translators, Inc. All rights reserved.