युहन्ना पेज्याइ ङोःसी
पेज्याइ ङोःसी
दीखो युहन्नाइ प्रुःक्योक याःबु लेःङ्गोइ पेज्या इःङे। दी पेज्याला येशुला कोन्ज्योइ नाःमाङ मीसीगेन वचन इःङे लाःती प्रुःदी एः, ओः वचन मीः काःल्सी ओःले उःइ कील्ला तेःकुए लाःती प्रुःदी एः। येशुरा कोन्ज्योइ पुः ओःले ताःम्ज्या पेःक्योक थार्च्युगेन ख्रीष्ट इःङे। दी याःबु लेःङ्गो टोःगेनक्याइ येशुला ओःन्डुलेरा सेमल्हुक लुज्युक ओःले ओः सेमल्हुकलाःम्ले खुङक्याइ मीःली ज्योर्च्युक लाःती प्रुःक्योक इःङे।
दी पेज्याइ तोःङ्ला कोन्ज्योइ वचन ओःले येशु चीग्रा इःङे लाःती एः। दी याःबु लेःङ्गोइ पेज्याइ तोःङ्गीइ बोला येशुरा कोन्ज्योइ पुः ओःले ताःम्ज्या पेःक्योक थार्च्युगेन ख्रीष्ट इःङे लाःती तेङेन याःमाछाककीइ लेःगाक्याइ बारेला प्रुःदी एः। ओः तीङ्ला प्रभुइ पेःक्योक याःमाछाककीइ लेःगाक्याइ बारेला प्रुःदी एः। दी बोला चीङ मीःक्याइ येशुला सेमल्हुक लुदी खुङगीइ योबाक्या काःल्सी, इःनाङ राःङ्साक्याइदी खुङला टाःलाङ पेःसी ओःले खुङला सेमल्हुक मालु लाःती प्रुःदी एः। अध्याय च्युक्सुम मीःजीक च्युप्तीःनथुप येशुइ राःङ ताःम्दी डोगेन कुःङ्मु योबाक्या ङीमु पेःक्योक संगती ओःले क्रुसला सीजेतोःङ्ला खुङगीइ योबाक्याला तयार पेःगेन तामक्या ओःले उत्साह तेर्केन तामक्या लाःक्योककीइ बारेला प्रुःदी एः। तीङ्गीइ अध्यायक्याला येशु ताःम्दी काःल्क्योक, खुङ क्रुसला सीक्योक, फीर्च्या सीक्योकलाःम्ले सोम्बो काःल्क्योक ओःले ओः तीङ्ला खुङ राःङगीइ योबाक्यासाःला थोङ्क्योकीइ बारेला प्रुःदी एः।
नाःमाङ मीसीगेन मीःली ज्योर्केन वरदान येशुलाःम्ले ज्योर्कुए। दी वरदानदी येशुला लाःम, तेःन्दाम ओःले मीःली इःङे लाःती खुङसाःला ओःङेक्याइ ज्योर्कुए। दी पेज्याइ याःबु तामदी ची एः लाःना, मीःलीइ तामक्या लोप्चेला छ्यु, खुरा, ज्योती, कोःरालु ओःले खुङगीइ लुःक, ओःले अङ्गुर ओःले ओःखोइ ब्रुम्दोक्या च्योःङ्रा उःला कोःकेन तामक्याला लेःङ्दी पेदामक्याला लाःती एः।
थीमी सुची
ङोःसी १:१-१८
बप्तीस्मा तेर्केन युहन्ना ओःले येशुइ तोःङ्गीइ योबाक्या १:१९-५१
येशुइ लेःगाक्या २:१–१२:५०
यरुशलेमगीइ छुरफारला अन्तीम ङीःमाक्या १३:१–१९:४२
येशु सीक्योकलाःम्ले सेन्क्योक ओःले खुङला थोङ्क्योक २०:१-३१
खुङला गालीलला फीर्च्या थोङ्क्योक २१:१-२५
Цяпер абрана:
युहन्ना पेज्याइ ङोःसी: SYW
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2024 (Active), Wycliffe Bible Translators, Inc. All rights reserved.