পত্থম 17
17
গোজেন সুদমর্ চিহ্নো
1অব্রাম বয়জ যেক্কে নিরেনোব্বোই বজর সেক্কে লগেপ্রভু তারে দেগা দিইনে কলঅ “মুয়ই বেগত্তুন্ খেমতাবলা গোজেন। তুই মঅ সমারে উদোলোলিগান্ রাগা আর মর্ আওজ্ মজিম্ আঢিবে। 2তত্তে মুই মঅ সুদোমান উজু গোজ্যং আর তঅ বংশগুন বোউত্ বাড়েই দিম্।”
3সেক্কে অব্রামে মাদিত্ মাদা নিগিরি পড়িলো, আর গোজেনে তা লগে কধা কুয়ো ধুরিলো। 4তে কলঅ, “তত্তে মর্ এ সুদোমত্ মর্ যিয়েনি গুরিবার আঘে সিয়েনি এবাবোত্যে: তুই ভালোক্কুন জাদর্ বাপ্ অবে। 5তরে অব্রাম (যিয়েনর্ ভেদ্তান ‘দাঙর্ বাপ্’) বিলিনে আর ডাগা ন-অবঅ, মাত্তর্ ইক্কেত্তুন্ ধুরি তঅ নাঙান্ অবঅ অব্রাহাম (যিয়েনর ভেদ্তান ‘বোউত্ মান্জোর্ বাপ্’); কিত্তে মুই তরে ভালোক্কুন জাদর্ আগ বাপ্ বানেই রাগেয়োং। 6মুই তর্ বংশবোরে বোউত্ বাড়েই দিম্। তঅ ভিদিরেত্তুন্ মুই বোউত্ জাদ বানেই দিম্, আর তঅ ভিদিরেত্তুন্ বোউত্ রাজার জর্ম অবাক্। 7এ সুদোমান বানা তর্ আর মঅ ভিদিরে চুলিবো সিয়েন নয়; সিয়েন্ চুলিবো তর্ পুয়ো-ছাগুনোর আর মঅ ভিদিরে বংশর পর্ বংশ ধুরি। ইবে অবঅ এক্কো উমরর্ সুদোম। এ সুদোমত্ মুই তর্ আর তঅ পরেদি তঅ বংশর্ মানুচ্চুনোরঅ গোজেন ওলুং। 8যে কনান দেজত্ তুই ইক্কিনে বিদেশী ওইনে বজত্তি গরর্ তার বেক্কানি উমরর্ সোম্বোত্তি ইজেবে মুই তরে আর তঅ বংশবোরে দিলুং। মুই তারার বেক্কুনোর্ গোজেন ওলুং।” 9গোজেনে অব্রাহামরে আরঅ কলঅ, “এ সুদোমত্ তর্ যিয়েনি গুরিবার্ আঘে সিয়েনি অলঅ: তুই আর তর্ বেক্ পুয়োগুনে বংশর পর বংশ ধুরিনে এ সুদোমান মানি চলিবাক্। 10মর্ এ সুদোমান, যিয়েনর চিহ্নো ইজেবে তমার পত্তি মরদর্ চুনুগুলোবোর্ মাদাগান তনা গরা পড়িবো, সিয়েন্ তর্ আর তঅ বংশর্ মানুচ্চুনোত্তুন্ মানি চলা পড়িবো। 11তমার বেক্কুনোর্ চুনুগুলোবোর্ মুজুঙেন্দি চামান্ কাবি ফেলা পড়িবো। তর্ আর মঅ ভিদিরে এ সুদোমান ঠিগ্ গরা অলঅ, ইয়েনই অবঅ তার চিহ্নো। 12বংশর্ পর্ বংশ ধুরিনে তমার্ পত্তি মরদ্ পুয়োগুনোর্ জর্ম অনার্ আস্টো দিনোত্ এ চুনুগুলোবোর্ মাদাগান্ কাবানা অনুষ্ঠানান্ গরা পড়িবো। তর্ বংশর্ কনজনে ন-ওইনে তমা ঘরর্ চাগর্ অলেয়ো তারারে বেক্কুনোরে এ চুনুগুলোবোর্ মাদাগান কাবি দে পড়িবো, তারা তমা ঘরত্ জর্মেয়োন এবাবোত্যে কনঅ চাগরর্ পুয়ো ওক্ বা টেঙালোই বিদেশীগুনোত্তুন্ কিনে চাগর্ ওক্। 13মুই আরঅ কঙর্, যে চাগর্বো তমা ঘরত্ জোর্মেয়্যে বা যিবেরে টেঙালোই কিনে ওইয়্যে, তারার পত্তি জনরে চুনুগুলোবোর্ মাদাগান কাবিদে পড়িবো। ইয়েনই অবঅ তমা কিয়েত্ মর্ উমরর্ সুদোমর্ চিহ্নো । 14যে মানুচ্চোর চুনুগুলোবোর্ মুজুঙেদি চামান্ কাবা নয় তারে তা জাদঅ ভিদিরেত্তুন্ তুলি দিয়া পড়িবো, কিত্তে তে মর্ সুদোমান অমান্য গোজ্যে।”
15গোজেনে অব্রাহামরে আরঅ কলঅ, “তঅ মোক্কো সারীরে আর্ সারী বিলিনে ন-ডাগিবে। তা নাঙান্ অবদে সারা। 16মুই তারে বর্ দিইনে তা ভিদিরেদি তরে এক্কো মরদপুয়ো দিম্। মুই তারে আরঅ বর্ দিম্ যেনে তে ভালোক্কুন জাদর্ আর তারা রাজাগুনোর্ আগ মা অয়।”
17এ কধাগান শুনিনে অব্রাহামে মাটিত্ মাদা নিগিরি পড়িলো আর আজি আজি মনে মনে কলঅ, “সালে কামাক্কায় একশঅ বোজোজ্যে বুড়োর্ পুয়ো-ছা অবঅ, আর্ সিবে অবঅ নব্বই বোজোজ্যে মোগো পেদত্।”
18পরে অব্রাহাম গোজেনরে কলঅ, “আহ্, ইশ্মায়েলে যেনে তর্ দোয়েলোই বাঁজি থায়!” 19সেক্কে গোজেনে কলঅ, “তঅ মোক্কো সারার হামাক্কায় পুয়ো অবঅ, আর তুই তা নাঙান্ রাগেবে ইস্হাক (যিয়েনর্ ভেদ্তান ‘আজানা’)। তার্ আর তা বংশর্ মানুচ্চোত্তে মুই মর্ উমরর্ সুদোমান চালু রাগেম্। মাত্তর্ ইশ্মায়েল পৌইদ্যেনে তুই যিয়েনি কোইয়োচ্ সিয়েনি মুই শুনিলুং। 20শুনিচ্, মুই তারেয়ো বর্ দিম্ আর ভালোক্কুন্ পুয়ো দিইনে তা বংশর্ মানুচ্চুনোরে বোউত্ বাড়েই দিম্। তেয়ো বারবো গুট্টি-নেতার্ আগ বাপ্ অবঅ আর তা ভিদিরেত্তুন্ মুই এক্কো দাঙর্ জাত্ বানেম্। 21মাত্তর্ ইস্হাকত্তে মুই মর্ সুদোমান চালু রাগেম্। এজেত্তে বজর্ এ সময়োত্ তে সারার্ করত্ এবঅ।”
22অব্রাহাম লগে কধা কনা থুম্ গুরিনে গোজেনে তা কায় কুরেত্তুন্ উগুরেন্দি উদি গেলঅ। 23গোজেন কধা মজিম্ অব্রাহামে সেদিন্যে ইশ্মায়েল চুনুগুলোবোর্ মাদাগান তনা গুরি দিলো। সে লগে তে তার্ কিন্যে বা ঘরত্ জোর্মেয়ে বেক্ চাগরুনোরে, অত্তাৎ তা ঘরর্ পত্তি মরদরে চুনুগুলোগুন তনা গুরি দিলো। 24অব্রাহামর নিজোর্ যেক্কে চুনুগুলোবো তনা গরা অলঅ সেক্কে তার বয়জ্ নিরেনোব্বোই বজর, 25আর তা পুয়োবো ইশ্মায়েলর বয়জ্ এলদে তের বজর। 26একই দিনোত্ অব্রাহাম আর তা পুয়ো ইশ্মায়েল চুনুগুলোগুন তনা গুরিদে ওইয়্যে। 27সে লগে ঘরর্ অন্য বেক্ মরত্তুনোরে, অত্তাৎ যিগুনে তা ঘরত্ জোর্মেয়োন্ আর বিদেশীগুনো ইত্তুন্ যিবেরে কিনে ওইয়্যে তারারে বেক্কুনোরে তনা গুরিদে অলঅ।
Цяпер абрана:
পত্থম 17: CBT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright © 2021 Bangladesh Bible Society