পত্থম 16
16
হাগার আর ইশ্মায়েল
1অব্রামর মোক্কো সারীর সেক্কেয়ো কনঅ ঝি-পুয়ো ন-অন্। হাগার নাঙে তার এক্কো মিসরীয় চাগরানী এলঅ। 2একদিন্যে সারী অব্রামরে কলঅ, “চাহ্, লগেপ্রভু মরে ভাজ্ বানেয়্যে। সেনত্তে তুই মঅ চাগরানীবো ইধু যাহ্। ধগে অলে তারে দিইনে মুই গুর-গারা পেইম্।” 3সেনত্তে কনান দেজত্ অব্রামর দশ বজর কাদানার্ পরেদি সারী তার মিসরীয় চাগরানী হাগার লগে অব্রামরে জড়া বানি দিলো। 4অব্রামে হাগার ইধু গেলে পরেদি তে পিদিলী অলঅ। যেক্কে হাগারে বুঝি পারিলো, তে পিদিলী ওইয়্যে সেক্কে তে তা গিরোজ মোক্কোরে ইংসে-নিন্দে গরা ধুরিলো। 5সেক্কে সারী অব্রামরে কলঅ, “মঅ উগুরে তার এ কামানিত্তে আজলে তুয়ই দায়ী। মর্ এ চাগরানীবোরে মুই তঅ বিচ্ছোনত্ তুলি দুয়োং, মাত্তর্ ইক্কিনে পিদিলী ওইয়্যে হবর্ পেইনে তে মরে ইংসে গরা আরাম্ভ গুরিলো। সালে তর্ আর মঅ ভিদিরে কন্না দুষী সিয়েন্ ইক্কিনে লগেপ্রভু বিচের গোরোক্।”
6জোবত্ অব্রামে সারীরে কলঅ, “চাহ্, তঅ চাগরানীবো দঅ তঅ আদত্ আঘে। তর্ যিয়েন্ গম্ বিলিনে মনে অয়্ তা উগুরে তুই সিয়েন্ গর্।” সেক্কে সারী হাগার উগুরে এন্ চিৎ-নপুজ্যে বেবহার গরা ধুরিলো, হাগারে তা কায়-কুরেত্তুন্ ধেই গেলঅ।
7পদথ্ ধূল্যেচর-চাগালা ভিদিরে এক্কান্ পানি পয়নালা ইধু লগেপ্রভুর দূত্তো হাগাররে দেগিলো। পয়নালাবো অলদে শূর নাঙে এক্কান জাগাত্ যেবার পদথ্। 8স্বর্গদূত্তো কলঅ, সারীর চাগরানী হাগার্, তুই কুত্তুন্ এজর্ আর কুধু যেবে?
জোবত্ হাগারে কলঅ, “মুই মঅ গিরোজর্ মোক্ সারীর কায়-কুরেত্তুন্ ধেই যাঙর্।”
9সেক্কে লগেপ্রভুর দূত্তো কলঅ, “তঅ গিরোজর্ মোক্কো ইধু ফিরি যেইনে আরঅ তা তলেদি থানাগান মানি লগোই।” 10তে তারে আরঅ কলঅ, “মুই তঅ বংশর্ মানুচ্চুনোরে এন্ গুরি বাড়েই দিম্, তারারে গুণিনে কুল্ ন-পেবে।” 11তে তারে আরঅ কলঅ, “চাহ্, তুই পিদিলী ওইয়োচ্। তর্ এক্কো পুয়ো অবঅ। আর সে পুয়োবোর নাঙান্ তুই ইশ্মায়েল (যিয়েনর্ ভেদ্তান্ ‘গোজেনে শুনে’) রাগেবে, কিত্তে তর্ দুঘোর্ কানানিগান লগেপ্রভু কান্ পাত্যে। 12মাত্তর্ মানুচ্ অলেয়ো তে ঝাড়্বো গাধা ধোক্ক্যেন অবঅ। তে বেক্কুনোরে শত্রুতা গুরি তুলিবো আর অন্যগুনেয়ো তারে শত্রু বিলিনে মনে গুরিবাক্। তে তা ভেইয়ুনো দেজর কায়-কুরে বজত্তি গুরিবো।”
13এ কধাগান শুনিনে হাগারে মনে মনে কলঅ, “মুই কি সালে তারে হামাক্কায় দেগিলুং যিবের্ চোগো মুজুঙোত্ মুই আগং?” লগেপ্রভু, যে হাগার লগে কধা কোইয়্যে, তারে আওজ্ গুরিনে হাগারে সেক্কে কলঅ, “তুই গোজেন, যিবের্ চোগো মুজুঙোত্ মুই আগং।” 14সেনত্তে কাদেশ আর বেরদ ভিদিরে যে কূয়োবো আঘে সিবের্ নাঙান্ অলদে বের্-লহয়-রোয়ী (যিয়েনর ভেদ্তান্ “যিবে জেদা আর মরে দেক্ক্যে, তার কূয়ো”)। 15পরেদি হাগারর্ এক্কো পুয়ো অলঅ, সেক্কে অব্রামে পুয়োবোর্ নাঙান্ দিলো ইশ্মায়েল। 16অব্রামর ছিয়েশি বজর্ বয়জত্ ইশ্মায়েলর জর্ম ওইয়্যে।
Цяпер абрана:
পত্থম 16: CBT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright © 2021 Bangladesh Bible Society