Maatiusiup Aglangit 11
11
Juanasi Paaptitsirijiup Uqariaqtuqtitininga
Luukasi 7:18-35
1Jiisusiup ilinniaqtini 12 tamakkuninga uqautijariiramigit, tavvanngat aullaqpuq, nunalit qanigijaaniittunuarluni ilinniaqtitsivuq ajuriqsuillunilu. 2Juanasi Paaptitsiriji tigujausimavingmiilluni Christuusiup piniarninganik tusarami, ilinniaqtimi ilanginnik tilisivuq Jiisusimuaqullugit. 3Taakkua Jiisusimuaramik apirivaat, “Taannauvit Juanasiup tikinniarniraqsimajanga, uvvalu asingnik niriugiaqaqpita?”
4Jiisusiup kiuvait, “Utirlusi Juanasi uqautilauqsiuk tusaqtassinnik takujatsinniglu: 5tautunngittut tautuliqput, tusiattut pisutsialiqput, paqtiqtullu sivurananiraqtaujunik aaqqiktauvut aaqqitsiarlutik, tusaanngittut tusaaliqput, tuqungajullu makipput, uqausillu tusaruminaqtut uqausiuvut ajuqsaqtunut. 6Saimanaqtumiipuq taanna uvannik qularutiqanngittuq!”
7Juanasiulli ilinniaqtingit utiliqtillugit, Jiisusiup Juanasi inugiaqturjuanut uqausiriliqpaa, uqarluni: “Juanasi nunaqarviuqattanngittumiitillugu upakkassiuk, qanuittumik takuniarasugilauqpisi? Ivigjuarmik anurimut niunngaksimajumik? 8Qanuittumigli takujaqtulauqpisi? Angummik annuraatsiaqsimajumik? Annuraatsiaqsimajulli angajuqqaarjuakkuvingmi iniqasuunguvut! 9Qanuittumik takujaqtulauqpisi? Nalauttaijumi? Ilaak, takulauqpusi nalauttaijumit pillariuniqsamik. 10Juanasi taannauvuq Guutiup uqausingita uqausirijangat imaak: ‘Takugit, uqariaqtuqtitara sivunirni tiliniaqpara aqqutiksarnik aaqqiksuiqullugu.’ 11Sulijumik uqautivassi, Juanasi Paaptitsiriji inulimaanit inuusimajunit pillariuniqpauvuq; Guutiulli Ataniuvingani mikiglitiqtuq, taanna Juanasimit pillariuniqsauvuq. 12Taimanngat Juanasiup uqallaqattalirninganit pigiarluni ullumimut tikillugu Guutiup Ataniuvinga aksururnaqtukkuuqtitausimavuq, inuillu pirajangnikkut aksururlutik pinasuaqsimallutik. 13Nalauttaijut, Muusisiullu piqujangit uqausiqaqsimavut Guutiup Ataniuvinganik, Juanasi tikillugu; 14uqausirijanginniglu ukpirusugunnarussi, taanna Juanasi Ilaijjauvuq, tikilaarninga uqausiusimalauqtuq. 15Tusaajuungnik siutilik, tusarli!
16“Qanurli ajjiutittunnaqpakkaa maanna inuujut? Imaittuujaqput surusit niuvirviup saniani iksivaaqtut, pinnguarlutik qaigalaaqattautillutik immingnut, imailiurlutik, 17‘Katititaujuqannguaqtillugu nijjaatitsinnguaqpugut ilissinnut, taanisirumanngilasili! Tuqujuqsiutinullu inngirviginnguaqpassi, qiajumanngittusili!’ 18Juanasili tikimmat, nirittailivagluni uainimiglu imiqpagani, inuillu uqaqput, taanna anirnirlungmik ilummiqtausimavuq! 19Inuulli Irninga tikimmat, niriqattaqpuq imiqattarlunilu, inuillu uqaqput, ‘Una angut takusiuk! Niriluaqattaqtuq, uainimiglu imiqtiulluni, Ruumamiut kiinaujaiqtitsijiqutingita ajuqtulijullu piqannarijangat!’ Guutiulli silatuninga saqqititauvuq piniarningitigut.”
Nunalit Ukpirusunngittut
Luukasi 10:13-15
20Nunalingnili Jiisusiup kamanaqtulinirnik pinasuarviginiqpaarijangit inuit ajuqtulinirmingnik qaqialiqtuqanngilat, taakkuali Jiisusiup uqarvigiliqpait, uqarluni; 21“Kappiannamik ilissi, Kurasin! Kappiannamiglu ilissi, Pitsaita! Tamakkua kamanaqtuliniit ilissinni piniarniuqattalauqtut piniarniungaalauqpata nunani Tairimi Saitunimilu, inungit qaqialiqqammirajalaunngilat ikpiarjungnik qaqialiqtuqsiutinik atilutik arjalinirniglu immingnut kanngaqtirvigilutik pigajalauqput! 22Sulitsiaqtumigli uqautivassi, iqqaqtuqtauviup ullunga nalliutikpat, Guutiup nunalit Tairimiut Saitunimiullu nikaginiqsarijumaaqpait ilissinnit! 23Ivvillu Kapiirniam! Ilingnik qangattaqtittumavit? Qilangmut, igitaujumaaqputilli ikumarjuarmut! Kamanaqtulinilli ilissinni piniaqtaulauqtut piniarniugajalauqpata Sutuumami, Sutuumamiut suli ullumi saqqijaarajaqput! 24Sulitsiaqpunga, iqqaqtuqtauviup ullungani Guutiup nunaliit Sutuumamiut nikaginiqsarijumaaqpait ilissinnit!”
Qaigissi Uvannut Taqaiqsirlusilu
Luukasi 10:21-22
25Taissumaniutillugu Jiisusi uqaqpuq, “Ataataak, qujagivagit, Ataniujutit qilangmi nunarjuarmilu! Tamakkua ijiqsimagavigit silatujunut ilisimajunullu, tamatumingali saqqititsilauravit nutaqqatitut taimaittunut; 26ilaak, Ataataak, tamanna taimailingatillugu quviagigaviuk.
27“Ataatama tamainnik tunisivigilaurmanga; Irniq qaujimajaunngilaq Ataataup kisimi qaujimavaa, Ataatattauq qaujimajaunnginnivuq Irniup kisimi qaujimavaa, taakkunungalu Irniup qaujitittumajangita kisimi qaujimavaat.
28“Qaigissi uvannut, tamassi aksuruqtusi uqumaiksaqtusilu, taqaiqsiqtittumavassi. 29Nangmautara tigusiuk atilugu, ilinniarvigiliqsinnga; piqunniqtuugama piujurinangalu uummatikkut; taqaiqsirnirmik tavva nanisiniaqpusi tarnissigut. 30Nangmautara iluarmat, nangmagaaksaqutigalu uqittuuvuq.”
Цяпер абрана:
Maatiusiup Aglangit 11: EAIBR
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Eastern Arctic Inuktitut Bible (Romanized) © Canadian Bible Society, 2022-2023.