Maatiusiup Aglangit 10
10
Aapuusitalit 12 Qaiqujauningit
Maakusi 3:13-19; Luukasi 6:12-16
1Jiisusiup ilinniaqtini 12 qaiquvait, pijunnarniqtaaqtillugit anirnirlungnik anititsijunnaqullugit, qanuittutuinnarniglu aannianaqtunik qanimmasirniglu aaqqiijunnaqsitillugit. 2Aapuusitalit 12 atingit ukuanguvut: sivulliqpaaq, Saimuuni, taijaujuq Piitturuusimik qatanngutaalu Aanturuu; Jaimisikkuglu Juanasikuk nukariik, Sipitiup irningik. 3Pilippuusi, Patiulumiulu; Tuumasi, Maatiusilu, Ruumamiut kiinaujaiqtitsijiqutingat; Jaimisilu Aulpiasiup irninga, Taatiasilu; 4Saimuunilu Kainanimiumik taijaujuq#10:4 Ruumamiunik akiraqtuqtiujuq Taijauvangmijuq pitturiat Juutasilu Iskariat, taassuma Jiisusi pijautilauqpaa.
Taakkua 12 Piliriaksanginnik Uqaujjauningit
Maakusi 6:7-13; Luukasi 9:1-6
5Taakkua 12 Jiisusiup tilivait imaak maligaksaliurlugit, “Juutiunngittut nunanginnut ainiarasi, Samiariarmiut nunanginnuaqtaililusi. 6Makunungali siipinut asiusimajunut ailirissi, Isarialimiut inunginnut. 7Imaak ajuriqtuilusi, ‘Qilaup Ataniuvia qagliliqpuq!’ 8Qanimajut aaqqiksigik, tuqungajullu uummaqtillugit, sivuuragijaujuniglu paqtiqtut paqtirunniiqtisigik, anirnirluillu inungnit anitillugit. Akiqanngittumik tunisiviugassi akiqanngittumiktauq tunisiuk. 9Guulunik, siulvirimigluunniit naksarniarasi, kannujanigluunniit kiinaujanik ikpiarjungmiutaqarniarasi; 10aullalirussi qinuratiit puuksajanganik naksarniarasi, uvinirukkannirniglu, itigagutikkannirnigluunniit, ajauppiamigluunniit naksarniarasi; pinasuaqti tunisiviujariaqarmat pijariaqaqtanganik.
11“Iglugasangnut tikikussi nunalingnulluunniit, qaujinasuarissi qinirlusi nalliannituinnaq ilissinnik tunngasuktitsigajaqtumik, tunngasuktitsijuq taanna najuliqsiuk, tavvanngat nunamit aullalauqqaarasi. 12Iglumut itirussi, uqarissi ‘Saimaniup ilagilisi.’ 13Inunginnit tunngasuktitaugussi, saimaniup najurniaqpaasi; tunngasuktitaunngikkussili saimmaqtissinisi aturnianngilaq. 14Nunalingnit tunngasuktitaunngikkussi uqausirijasi naalaktaujumanngippata, tavvanngat aullarissi itigassi saningit katagaqtillugit. 15Qularnanngittumik uqautivassi, Iqqaqtuivik Nalliutikpat Guutiup nikaginiqsarilaaqpait Sutuumamiut Gumuuramiullu inungit taakkunangat nunalingnit tunngasuktissinngittunit.”
Akiraqtuqtauniup Tikiutininga
Maakusi 13:9-13; Luukasi 21:12-17
16“Takugit siipititut tilivassi amaruit akurngannut; taimaimmat quglugiatitut ujjiqsutiarissi, tuuvititullu piqunniqtigilusi. 17Qaujisatsiarissi, angutit ilanginnut tigujaujumaaqpusi iqqaqtuqtauvingmullu aataulusi, isiqujaujunniirumaaqpusilu Juutit ukpirnirmut katimavinginnut. 18Uvangalu pijjutigilunga iqqaqtuqtaujumaaqpusi aulatsijiujunut angajuqqaarjuanullu, Uqausirnik Tusaruminaqtunik uqausiqarunnaqullusi taakkununga, Juutiunngittunullu. 19Iqqaqtuqtauvingmut aataugussi isumajaarniarasi qanuq uqariaqarniarmangaassi, uvvalu qanuililusi uqausiqarniamangaassi; tamanna nalliutikpat, uqausiksassinnik tunisiviujumaarassi. 20Uqausirijasi ilissinnit pinianngimmata; Ataatasili Anirninganit pijumaaqput, uqallagumaarmat ilissitigut.
21“Angut pijaukkaijumaaqpuq qatanngutiminik tuqutitauqullugu, ataataujurlu taimaatsainnaq pijumaarivuq qiturngaminut; qiturngarlu angajuqqaamingnik akiraqtulirumaaqput tuqutautissilutik. 22Inulimaanut uumigijaulirumaaqpusi uvanga pillunga. Ukpirnirminigli tigumianginnarluni isuanut, taanna piulijaujumaaqpuq. 23Nunalingnit akiraqtuqtaugussi, tavvanngat qimaagissi nunaup asianut, qularnanngittumik uqautivassi Isarialiup iglugasagjuangit ingirrajariirviginiannginnassiuk, Inuup Irninga tikilauqaaqtinnagu.
24“Ilinniaqti anginiqsaunngilaq ilisaijiminit; pijilu anginiqsaunngilaq angajuqqaaminit. 25Taimaimmat, ilinniaqti ilinniaqtitsijimitut taimailiruni tavva naammaksivuq, pijilu angajuqqaaqaqtuq taimaatsainnaq angajuqqaamituuliruni tavva naammaksivuq. Ilagiiktut angajuqqaangat Piulsipaapimik taijauqattaqsimakpat, tavva nangminingit atiqaqtitauniaqput, piunginniqsaukkanniqtumik!”
Kinaa Sivuuragijaujuksauva?
Luukasi 12:2-7
26“Taimaimmat inungnik sivuuraniarasi; ijiqtausimajut saqqititaujumaaqput, ijiraqtuangujullu qaujijaujumaaqput. 27Taaqtumi uqautigussi, qaumatsiaqtumi uqausirijaksarivasi; siutikkut isijjugviugussi uqausirijariaqaqpasi igluup qaanginni. 28Sivuuraginiarasigik timimik tuqutsijut tarnirmigli tuqutsijunnanngittut; sivuuragisiugli, tamainnik asiruijunnaqtuq timimik tarnirmiglu ikumarjuarmi. 29Kiinaujarmut savirajakulungmut atausirmut qupanuangnik marruungnik niuvirunnaqputit, taimaikkaluaqtillugu qupanuaq atausirluunniit katagnianngilaq nunamut Ataatasi taimaiqunngippagu. 30Nujasi aglaat niaqussinniittut qatsiungmangaata qaujimajauvut. 31Taimaimmat sivuuraniarasi; qupanuanit unuqtunit pillariuniqsammarialuugassi!”
Christuusimik Uqausiqarniq, Narrunirlu
Luukasi 12:8-9
32“Kinatuinnaq inungnut uqausiqaqpat uvannik, uvangattauq taimaatsainnaq uqausirilaaqpara Ataatannut qilangmiittumut. 33Kinatuinnarli inungnut uqausiqanngippat uvannik, uvangattauq uqausirilaanngivara Ataatannut qilangmiittumut.”
Inuuqatigiitsiarnirmiunngittuq Akiraqtuqtigiingnirmigli
Luukasi 12:51-53; 14:26-27
34“Isumaniarasi inuuqatigiitsialiqtitsijaqturasugilunga nunarjuarmut; inuuqatigiitsialiqtitsijaqtunngilanga, savigjuarmigli#10:34 Akiraqtuqtigiingnirmigli pititsivunga. 35Tikilauqpunga irniq ataatamingnut akiraqtuliqullugu, paniglu anaanaminut akiraqtuliqullugu; ukuarlu sakiminut arnamut akiraqtuliqullugu; 36inuup akaunginniqpaamik akiraqtuqtiginiaqpait nangminini iglumiuqatini.
37“Nalliat ataataminik anaanaminigluunniit uvannit ungagijaqarniqsaukpat, taanna uvannut ilagijaujunnanngilaq; nalliallu irnirminik paningminigluunniit uvannit ungagijaqarniqsaukpat, taanna uvannut ilagijaujunnanngilaq. 38Nalliat sanningajuliksaminik naksanngittuq maligluni uvannik, taanna uvannut ilagijaujunnanngilaq. 39Inuusirminik annirusuktuq, inuusirminik asiujijumaaqpuq; inuusirminigli annirusunngittuq uvanga pillunga, taanna inuusirminik nagvaarumaaqpuq.”
Akiliqtauniksait
Maakusi 9:41
40“Ilissinnik ilaliuqsijuq uvannik ilaliuqsivuq; uvanniglu ilaliuqsijuq tilijinnik ilaliuqsivuq. 41Nalauttaijumik ilaliuqsijuq, nalauttaijutut akiliqtaujumaaqpuq; nalliallu ilaliuqsijuq Guutimik ilaqatsiaqtumik, Guutimik ilaqatsiaqtutitut akiliqtaujumaaqpuq. 42Nalliat imirmik niglinaqtumik imiqtitsijuq maliktinnit mikinniqpaujumik, imiqtitaujuup uvannut maliktiuninga pijjutigilugu, taanna sulimmariglunga uqautivassi akiliqtautsiarumaaqpuq.”
Цяпер абрана:
Maatiusiup Aglangit 10: EAIBR
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Eastern Arctic Inuktitut Bible (Romanized) © Canadian Bible Society, 2022-2023.