NAANAA 9
9
Luda bàka kunna kũ Nuhuo
1Akũ Luda arubarikaa dà Nuhugu kũ a nɛ́nɔ à pìńnɛ: Àgɔ̃ nɛ́ i àgɔ̃ kara à andunia pa. 2Nɔ̀bɔnɔ kũ bãnɔ kũ pɔ́ kũ òdi táa o kũ kùaonɔ kũ kpɔ̀nɔ nigɔ̃ á vĩna vĩ pínki. Ma ń náárɛ á ɔĩ. 3Pɔ́ kũ òdi táa onɔ pínki nigɔ̃ de á pɔ́ble ũ. Ma ń kpááwa pínki lákũ ma pɔ́ble kũ òdi butɛ zĩtɛanɔ kpàáwa nà yã. 4Ama àsun nɔ̀bɔ kũ odi a kùtu kpáro sóro, zaakũ a arumɛ a wɛ̃̀ndi ũ. 5Mani á aru kũ à de á wɛ̃̀ndi ũ fĩna boárɛ. Tó nɔ̀bɔ gbɛ̃ dɛ̀ ke tó gbɛ̃ a gbɛ̃dake dɛ̀, mani a aru fĩna bonɛ. Mani fĩna bo gbɛ̃ kũ à a gbɛ̃dake dɛ̀ɛa. 6Tó gbɛ̃ a gbɛ̃dake dɛ̀, oni a dɛ, zaakũ ma bisãsiri kɛ̀ ma taka ũmɛ. 7Àgɔ̃ nɛ́ i àgɔ̃ kara, à da anduniala àgɔ̃ kɛ dasi.
8Luda pì Nuhunɛ kũ a nɛ́nɔ dɔ: 9Ma bàka nigɔ̃ kú kãáo kũ á burinɔ 10kũ pɔ́ wɛ̃̀ndide kũ ò kú kãáo kũ ò bò gó gũnnɔ pínki, bãnɔ kũ bɛ pɔ́kãdenɔ kũ nɔ̀bɔsɛ̃ntɛnɔ kũ pɔ́ kũ ò kú zĩtɛanɔ pínki. 11Ma bàka nigɔ̃ kú kãáo. Mani í da anduniala mà pɔ́ wɛ̃̀ndidenɔ kakatɛ pínki doro. Í ni da anduniala à a kakatɛ doro. 12Akũ Luda ɛ̀ra à pì: Ma bàka nigɔ̃ kú kãáo kũ pɔ́ wɛ̃̀ndide kũ ò kú kãáonɔ ari gɔrɔ sĩnda pínkimɛ. A sèedaan dí. 13Mani ludambɛfɛ̃nɛda bo legũa ma bàka kunna kũ anduniao sèeda ũ. 14Tó ma tò legũ sìsi ludambɛfɛ̃nɛda bòa, 15lákũ ma bàka kú kãáo nà kũ pɔ́ wɛ̃̀ndide buri sĩnda pínkio, a yã ni dɔmagu. Mani tó í da anduniala à pɔ́ wɛ̃̀ndide kakatɛ pínki doro. 16Tó ma ludambɛfɛ̃nɛda è legũa, ma bàka kunna kũ pɔ́ wɛ̃̀ndide buri sĩnda pínkio ari gɔrɔ sĩnda pínki yã ni dɔmagu. 17Akũ Luda pì Nuhunɛ: Ma bàka kunna kũ pɔ́ wɛ̃̀ndide kũ ò kú andunia gũnnɔ pínki sèedaan gwe.
Nuhu nɛ́nɔ
18Nuhu nɛ́ kũ ò bɔ̀tɛ gó gũnnɔ tɔ́n dí: Sɛmu, Hamu, Yafɛti. Hamumɛ Kanaa de ũ. 19Nuhu nɛ́nɔn gwe gbɛ̃nɔn aakɔ̃. Ń burinɔ mɛ́ ò dàgula andunia gũn pínki.
20Nuhu bi búbariimɛ, akũ à geepi líkpɛ bà. 21Kũ à sèwɛ̃ mì à kã̀, akũ a wutɛna pótompo a kpɛ́n. 22Kũ Kanaa de Hamu a de pótompo è, à bò à gɛ̀ɛ à ò Sɛmunɛ kũ Yafɛtio. 23Akũ Sɛmu kũ Yafɛtio uta zɔ̃kɔ̃ɔ sɛ̀ ò dì ń gã̀aa ń pla ò táa ò kũ kpɛo. Ń arɛ dɔna gu pãndea de òsun ń de pótompo ero yãi, ò gɛ̀ɛ ò kù ń de pótompola. 24Kũ wɛ̃ wère Nuhua à vù, à mà lákũ a nɛ́ kpɛde kɛ̀arɛ nà, 25akũ à pì:
Kanaa nigɔ̃ láari pɔ́ ũmɛ,
àkũ mɛ́ anigɔ̃ a gbɛ̃nɔ zɔ̀ kpɛde ũ.
26Akũ à pì:
Arubarikademɛ Dikiri, Sɛmu Luda ũ,
Kanaa nigɔ̃ de Sɛmu zɔ̀ ũ.
27Luda karana kɛ Yafɛtinɛ,
a burinɔ ń baka le Sɛmu burinɔ arubarikaa gũn,
Kanaa nigɔ̃ de Yafɛti zɔ̀ ũ.
28Í dana anduniala gbɛra Nuhu kɛ̀ wɛ̃̀ wàa do kpɛ́ basuppla akuri. 29À kɛ̀ wɛ̃̀ wàa siikɔ̃ kpɛ́ basuppla akuri, akũ à gà.
Цяпер абрана:
NAANAA 9: BB2005
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bisã Bible © SIM International, 2005.