Genesis 14
14
Ja Abrami, ya el b'a yib k'ab'al ja Loti
1-2Ja k'ak'u jumasa jawi, syam sb'aje chab' k'ole mandaranum. Ja b'ajtan k'ole'i, ja it jumasa:
Amrafel sb'a Babilonia,
Arioc sb'a Elasar,
ja Quedorlaomer sb'a Elam,
Tidal sb'a Goim.
Ja pilan k'ole'i, tey ja mandaranum jumasa iti:
Bera sb'a Sodoma,
Birsa sb'a Gomorra,
Sinab sb'a Adma,
Semeber sb'a Seboim,
ja mandaranum b'a Soar.
3-4Ja jo'e mandaranum jumasa iti, b'a yojol lajchawe (12) jab'il ye'n wax a'teltajiye yuj ja Quedorlaomeri, ek' jun jab'il ti och staklaye'a. Ja'yuj ti stsomo sb'aj ja soldado'e jumasa yi'oje b'a loman yaman b'a paman ja' it mi snika sb'aji. 5B'a pilan jab'il ja Quedorlaomer sok ja mandaranum jumasa ma' tey sok ja ye'n, elye waj tiro'anuke sok ja pilan jo'e mandaranum jumasa b'a Astarot Carnaim ch'ak ya'we spak ajnel ja refaita jumasa b'a chonab' Hami, ch'ak ya'we spak ajnel ja zuzita jumasa; b'a Save-quiriataim ch'ak ya'we spak ajnel ja emita jumasa; 6b'a yaxk'ul jumasa b'a Seir, ch'ak ya'we spak ajnel ja horeo jumasa, yi'aje spatik man b'a El-paran, b'a mojan ja takin lu'um k'inali. 7Tsa'an yuj ja jawi, ti kumxiye jan b'a Cades yi'aje kan yi spetsanil ja slu'ume ja amalecita jumasa. Ja Haseson-tamari, ch'ak ya'we spak ajnel ja amorreo jumasa ma ti ajyi ye tiwi.
8Jaxa ye'nle ja mandaranum jumasa b'a Sodoma, sok b'a Gomorra, b'a Adma, b'a Seboim sok b'a Bela, ti' wajye b'a loman yaman b'a paman ja' it mix nijki, ti cho tiro'aniye tiw 9ja ma'tik mi lek wax iljiye yuj ja mandaranum jumasa b'a Elami, b'a Goim, b'a Babilonia sok b'a Elasari. Ja ma' ochye tiro'aneli, chanwane, jaxa ma' tiro'aniye soki, jo'wane. 10Jaxa b'a loman yaman jumasa jawi, jel ja k'e'en jumasa toj chab'ek' b'ut'el, yajni spakawe ajnel ja mandaranum jumasa sb'a Sodoma sok sb'a Gomorra ti ch'ak mok'uke b'a k'e'en jumasa jawi. Jaxa tuk soldado jumasa kanye'i, ti ch'ak waj snak' sb'aje b'a yoj yaxk'ul. 11Jaxa chanwane mandaranumi, ch'ak yelk'ane spetsanil ja jastiki, sok spetsanil ja wa'el jumasa ay b'a Sodoma sok b'a Gomorra, ti'xa wajye'a. 12Jaxa Lot yuj ja ti ay b'a Sodoma ja ye'n, ja'yuj cho i'jini ja jas sb'aj ye'n.
13Ja k'ak'u jaw ja Abram hebreo, ti ay lajan sok ja wits sb'a winik Mamre. Ja winik jawi, ja smoj sb'aj sok ja amorreo jumasa, cho ay chab' smoj alijel sb'i'ile' Escol sok Aner. Yoxwanile yamigo sb'aje sok ja Abrami. June ja ye'nle ja ma' spaka ajnel b'a syama sb'aje'i, jak yal yab' ja Abrami, 14yuj ja yijts'in Loti, yamji, lutji, yajni yab' ja Abrami, stsomo spetsanil ja ya'tijum jumasa, ma' oj kuch yuj ja tiro'aneli. Ja spetsanile'i, ay oxe syen sok waxak lajune winik (318) sok ja winik jumasa jawi, yi'aje spatik ja chanwane mandaranumi, man b'a chonab' Dan. 15Yajni och ja a'kwali, spiltala'an ja swinik jumasa ja Abrami, jun ita ch'ay k'ujol och snol k'ab'uke ja chanwane mandaranumi. Yajni yilawe sk'ujoli, yi'aje spatik man Hoba, jun chonab' tey b'a k'e'el k'inal yuj ja chonab' Damasco. 16Jach' ya' el libre jastal it ja Loti, ja ixuke jumasa sok ja tuk swiniki, ch'akto sta' spetsanil ja jastik sb'aj jumasa it ch'ak i'juk yi ja yijts'in Loti.
17Ja Abrami yajni yila sk'ujol ja Quedorlaomer sok ja tuk mandaranum yamigo jumasa, ti'xa kumxi'a, jaxa mandaranum b'a Sodoma waj sta' ja Abram b'a loman yaman b'a slu'um ye'n ja mandaranumi. 18Jaxa Melquisedek mandaranum b'a Salemi, cho pagre ay yuj ja Dyos it tey b'a nalan cha'ani, ya' wa'uk ya yu' ya'lel ts'usub' 19Jel lek sta'a ti' ja Abrami, ti yal yab'a:
—Abram,
jel lek oj yil a ja Dyos it tey b'a nalan cha'an
it ye'n sk'u'lan ja satk'inal sok ja lu'umi.
20Ja Dyos it jel niwani
ye'n sb'aj spetsanil ja ts'eb'oj jumasa,
yuj ja ye'n ya'a wil k'ujoluk
ja ma'tik mi lek waxa wila b'aj soki—.
Jaxa Abrami, juts'in ch'ak ya'yi ja Melquisedek jujune ja yajni k'ot b'a slajunil ja jastik sta'a. 21Jaxa ye'n ja mandaranum b'a Sodoma, ti yal yab' ja Abrami:
—A kumxuki ja kristyano'i, jaxa jastik junuki, i'aj kan we'na.
22Jachuk, ja Abrami, ti yala'a:
—Ja ke'n kaloj yab' ja Dyos it tey b'a nalan cha'an ma' sk'u'lan ja satk'inal sok ja lu'umi, 23Mi oj ki' jun swa'mal wa jastik a b'aj we'n. Mini june ja yak'il wa xanab' oj ki', b'a jach' mi ti' oj ja wal yuj we'n k'e'yon riko'il. 24Kechan oj ki' ja jas yabye ja jmoj jumasa, sok ja b'a sb'ej oj yi'e ja Aneri, ja Escol sok ja Mamre, ja kamigo jumasa ma' smojtayone'i.
Цяпер абрана:
Genesis 14: YABD
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Sociedad Bíblica de México 2021