Judit 15
15
Jiñi israelitajob mi jisañob jiñi asiriojob
1-2Che'bä tsi' yu'biyob pejtelel chuki tsa' ujti, jiñi xjisayajob ya'bä añob ya' ti lejchempat otot, tsa' ñumeñ kajiyob ti bäk'eñ, che' jiñi pukajts'ibilob tsa' lok'iyob majlel ti puts'el. Mi' it'uch'tañ t'uch'tañob ibä, ma'añik majch mi' iwis pijtañ ipi'äl. Jujuñtikil tsi' isajka majlel jiñi bij mu'bä itajob. Ajñel tsa' majliyob cha'añ ibäk'eñ, yik'ot ma'añix isujmlel tsa' ñumiyob majlel ya' ti joktäl yik'ot ya' ti bijtak ambä ti witstak. 3Jiñi xjisayajob ya'bä woli ijoy käñtañob jiñi tejklum Betulia, tsa' kajiyob ti puts'el ja'el cha'añ ibäk'eñ. Che' jiñi, pejtelel jiñi xjisayajob israelitajob tsa' lok'iyob iyajñesañob majlel.
4Ozías tsi' choko majlel t'añ k'älä ya' ti tejklumtak Cobá, Bebai, Colá yik'ot Betomestaim yik'ot ti joytälel ilumal jiñi israelitajob ya' ti witstak. Jiñob tsi' itsiktesayob chukitak tsa'bä ujti, yik'ot tsi' k'ajtibeyob cha'añ mi' ilok'elob ijisañob jiñi xjisayajob xts'a'leyajo'bä ti' tojlel.
5Che' tsi' yu'biyob jiñi t'añ, pejtelel jiñi israelitajob tsa' bäk' lok'iyob majlel cha'añ mi' jisañob jiñi asiriojob. Tsi' yajñesayob majlel k'äläl ya' ti tejklum ik'aba' Hobá, baki tsi' juñyajlel ijisayob. Che' ja'el jiñi ya'bä chumulob ya' ti Jerusalén yik'ot jiñi año'bä ya' ti witstak tsa' itempayob ibä cha'añ mi' ijisañob jiñi asiriojob. Jiñi israelitajob año'bä ti Galaad yik'ot ti Galilea, tsi' tsäñsayob ka'bäl asiriojob tsa'bä k'otiyob ya' ti Damasco yik'ot ti joytälel.
6Jiñi yañtako'bä xchumtälob ti Betulia, jiñi machbä añik tsa' lok'iyob ti jisaya, tsa' majliyob ya' ti' lejchempattak icha'añ asiriojob. Tsi' laj ch'ämbeyob ichu'bä añäl icha'añob ñukbä ik'äjñibal ya'bä kälem ya'i. 7Che' jiñi, tsa' tiliyob jiñi israelitajob tsa'bä lok'iyob majlel ti jisaya ti' tojlel asiriojob; tsi' ujti ilaj ch'ämob majlel ichu'bä añäl tsa'ixbä ikäyäyob jiñi asiriojob. Che' ja'el jiñi chumulo'bä ya' ti witstak yik'ot ti joktäl tsi' ch'ämäyob jiñi chu'bä añäl ja'el.
8Jiñi Joaquín, iyum jiñi motomajob, tsa' majli ti Betulia cha'añ mi ikäñe' chuki tsa' imele Lak Ch'ujutat cha'añ mi' ikoltañ jiñi israelitajob. Jiñi xñoxob año'bä iye'tel ya' ti Israel chumulo'bä ya' ti Jerusalén, tsi' ipi'leyob majlel cha'añ mi' iñuk'esäbeñob ipusik'al Judit. 9Che'bä tsi' k'eleyob jiñi Judit, tsa' iyäk'eyob iyutslel it'añ. Tsi' su'beyob:
«¡Jatetäch jiñi iñuklel ipusik'al Jerusalén!
¡Ñumeñ ñuk ak'äjñibal ti' tojlel israelitajob!
¡Jatetäch iñuklel atejklum!
10Jatet tsa' amele ti uts'at pejtelel iliyi,
yik'ot tsa' amelbe ñukbä koltaya ti tojlel Israel.
Tijikña ipusik'al Lak Ch'ujutat cha'añ tsa'bä amele.
¡La' ich'ujutesañet Lak Yum machbä añik ip'isol ip'ätälel
ti' pejtelel k'iñ!»
Che'bä tsa' ujti ili k'ay jiñi israelitajob tsi' jak'äyob: «¡Che'kix!»
11Jiñi israelitajob tsa' kajiyob ilok'sañ majlel jiñi chu'bä añäl ya' ti lejch'empat otot cha'añ asiriojob k'äläl che' tsa' ñumi jump'ejl uj. Ixku jiñi pisilbä otot icha'añ Holofernes tsa' ñumi ti' tojlel Judit temel yik'ot pejtelel jiñi chu'bä añäl ambä ti imal: Pejtelel uch'ibältak melbilbä ti säklemañbä tak'iñ, jiñi wäyibtak, yik'ot mu'bä ik'äjñel ti uch'el ti jujump'ejl k'iñ. Judit tsi' yäk'e ikuch majlel pejtelel iliyi ti xäñibal melbilbä ti te' yik'ot ikawayu'.
Mi iñuk'esäñtel jiñi Judit
12Pejtelel jiñi x-ixikob israelitajo'bä tsa' majliyob ik'elob Judit, cha'añ mi' tijikñesabeñob ipusik'al yik'ot cha'añ mi' cha'leñob soñ ti' itojlel. Che' jiñi, jiñi Judit tsi' ch'ämä ñichim yik'ot tsi' yäk'e ti' jujuñtikil jiñi x-ixikob ya'bä añob ipi'leñob.
13Jiñi x-ixikob tsi' meleyob ixojtil joläl ti yopol olivo te' yik'ot tsi' xojoyob ti' ijol ti jujuñtikil. Ti' tojlel jiñi tejklum ñaxañ ya' majlel Judit, jiñäch woli ipäs majlel jiñi soñ cha'añ x-ixikob. Ti pat ya' tilelob pejtelel jiñi wiñikob xojolo'bä icha'añ tilel ixojtil ijol, chukulob icha'añ iye'tijib cha'añ tsäñsaya. Ti' tem pejtelelob, wiñikob yik'ot x-ixikob, woli ik'äyob majlel k'ay cha'añ Lak Ch'ujutat.
Ik'ay jiñi Judit
14Che' jiñi, jiñi Judit yik'ot pejtelel israelitajob tsi' ik'äyäyob ti' tem pejtelel ili k'ay:
Цяпер абрана:
Judit 15: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM