Judit 14
14
Jiñi israelitajob mi' chajpañob ibä cha'añ jisaya
1Che' jiñi Judit tsi' su'beyob:
—¡Ñäch'tañla ili kt'añ kpi'älob! Ch'ämäla jiñi ijol Holofernes, yik'ot jich'ila ti' ipam jiñi chañbä ts'ajk. 2Che' mi' säk'añ pañämil, yom mi' la' wa'chokoñ juñtikil yumäl cha'añ jisaya, che' jiñi pejtelel jiñi mejlo'bä ti jisaya la' ich'äm jiñi iye'tijib yik'ot lok'eñla majlel ya' ti tejklum. Kom cha'añ ma' alotiñla jiñi asiriojob cha'añ mi' iñopob che' bajche' la' wom ju'bel ajisañla.
3»Che' mi' ikajel ik'eletola jiñi asiriojob, jiñob mi' ikajel ich'ämob iye'tijib yik'ot ajñel mi' ikajel imajlel ip'ixtesañob iyumob icha'añ. Che' jiñi ti' tem pejtelel mi ikaj imajlelob isajkañob jiñi Holofernes, ixku che' mi' k'elob cha'añ chämeñix, tsiltsilñeyob mi kajelob ti bäk'eñ ya'i ajñel mi ikajelob ti lok'el ti puts'el. 4Che' jiñi, jatetla, temel yik'ot pejtelel israelitajob chumulo'bä ya' ti witstak, mi' ikaj la' awajñesañla majlel cha'añ mi la' tsäñsañob ti' pejtelelob. 5Ñaxañ, päyäla tilel jiñi Aquior, yumälbä icha'añ amonitajob. Kom cha'añ mi' ik'el ti iwut bajche' tsa' ujti jiñi wiñik jiñi tsa'bä iña'ta ijisañ yik'ot tsa'bä itse'ta jiñi israelitajob.
6Tsi' chokoyob ti päyol jiñi Aquior ya'bä añ ti' iyotot jiñi Ozías. Che' tsa' k'oti, tsi' k'ele che' juñtikil wiñik wol chukul ijol icha'añ Holofernes, ya'i tsa' säm sajti. 7Che'bä tsi cha' juli ipusik'al, tsi' iñokchoko ibä ti' tojlel jiñi Judit, cha'añ woli ik'uxbiñ, tsa' kaji iyäl:
«¡La' k'ejliket ti ñuk, ti' pejtelel xchumtälob ti Judá yik'ot ya' ti' pejtelel yumäñteltak uts'at yom mi' iyäjlel ak'aba'! ¡La' kajikob ti bäk'eñ ti' pejtelel che' mi' yu'biñob ti ajlel ak'aba'! 8Wäle su'beñoñ chuki tsa' mele ti ili k'iñtak tsa'ixbä ñumi».
Che' jiñi Judit tsa' kaji iyäl ti' tejchibal k'älä ti' yujtibal pejtelel chuki tsa'bä imele. 9Che' tsa' ujti ilaj tsiktesañ, tsa' itijikñesayob ibä, yik'ot ya' ti' pejtelel jiñi tejklum ajpañ tsikil oñeltak cha'añ tijikñayob.
10Che'bä tsi' yu'bi jiñi Aquior pejtelel chuki tsa'bä imele jiñi iCh'ujutatbä Israel, tsa' iña'ta iñop Lak Ch'ujutat ti' pejtelel ipusik'al che' ja'el tsi' k'ajti cha'añ mi' tsejpel ipächälel iñi'il iwiñiklel, jiñäch iyejtal cha'añ wolix iñop Lak Ch'ujutat. Ti wi'il, tsa' käle ti chumtäl yik'ot jiñi israelitajob k'äläl che' mi chämel.
Mi itsiktiyel cha'añ chämeñix jiñi Holofernes
11Che' tsa' säk'a pañämil, jiñi israelitajob tsa' ijich'beyob ijol jiñi Holofernes ya' ti ipam ñumeñ chañbä jiñi ts'ajk. Jiñi wiñikob tsa' kaji ich'ämob iye'tijib, tsa' lok'iyob majlel ti jujuñmojt ya' ti bijtak mu'bä k'otel ti tejklum. 12-13Che'bä tsa' ik'eleyob jiñi asiriojob, tsa' isu'beyob jiñi yumälo'bä icha'añob. Jiñob tsa' ipäyäyob jiñi Bagoas, iyaj koltaya ak'bilbä icha'añ Holofernes, tsi' su'beyob: «¡P'ixtesañix jiñi lak yumäl! ¡La' majlikoñla lak tsäñsañ jiñi ak'bilo'bä ti mosojäñtel tsa'bä iña'tayob iju'bel tilel cha'añ yom ijisañoñla!»
14Tsa' ochi jiñi Bagoas ya' ti pisilbä otot, tsi' lajlaj jats'äj jiñi pisil imajkib wäyib, cha'añ woli iña'tañ cha'añ jiñi Holofernes ya' woli ti wäyel yik'ot Judit.
15Che' ma'añik majki tsi' jak'ä jiñi t'añ, tsi' täts'ä jiñi pisil, tsa' ochi ya' ti wäyibäl, ya' ñolol ti lum tsi' taja Holofernes ti' yochib che' chämeñix yik'ot che' set'ojbilix ibik'.
16Che' jiñi Bagoas k'am tsi' cha'le oñel, yik'ot tsa' itsili ipislel cha'añ mi ipäs iyejtal ich'ijiyemlel, tsa' kaji ti uk'el yik'ot ti oñel. 17Ti wi'il tsa' majli ya' baki añ ipisilbä otot Judit, yik'ot che' ma'añik tsa' itaja, tsa' lok'i yik'ot tsa' kaji isu'beñ jiñi xjisayajob:
18«¡Kelela, chämeñix Holofernes, tsa' iset'ojbeyob ijol! ¡Jiñi xmajtañ e'telob tsi' lotiyoñla! ¡Juñtikil hebreabä x-ixik tsa' itse'ta ip'ätälel jiñi yumälbä lak cha'añ!»
19Che' tsa' iyu'biyob, jiñi yumälo'bä xjisaya icha'añ asiriojob tsiltsilñeyob tsa' kajiyob ti bäk'eñ. Tsa' kaji ixet' tsilob ipislel, ya' ti' yojlil jiñi kolembä lejchempattak tsa' kajiyob ti k'ambä uk'el.
Цяпер абрана:
Judit 14: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM