Ester (Griego) 3
3
Mardoqueo yik'ot Amán
1 Che' ñumeñix ka'bäl k'iñ, jiñi yumäl Asuero tsi' yäk'e ñumeñ ñukbä iye'tel Amán iyalobil Hamedata ip'olbalbä Agag. 2 Pejtelel x-e'telob icha'añ yumäl tsa' ñokleyob yik'ot tsi' k'uchchokoyob ibä ti' tojlel Amán, cha'añ che'äch tsi' yälä ixik'oñel yumäl.
Ixku jiñi Mardoqueo ma'añik tsa' ñokle mi tsa'ik ik'uchchoko ibä ti' tojlel Amán. 3 jiñi x-e'telob icha'añ yumäl wa'chokobilo'bä ikäñtañ iti' yotot yumäl tsi' k'ajtibeyob Mardoqueo chukoch woli añusabeñ ixik'ojel yumäl. 4 Ti jujump'ejl k'iñ tsa' ichäñ k'ajtibeyob, jiñi ma'añik chuki tsa' ijak'ä. Ti wi'il x-e'telob tsi' isu'beyob Amán. Yom ik'elob mi' che'äch mi ikaj ichäñ ajñel bajche' mi' ña'tañ Mardoqueo, awilañ tsa'ix isu'bu ibä cha'añ judiojäch. 5 Che'bä Amán tsi' yu'bi cha'añ jiñi Mardoqueo ma'añik woli iñokchokoñ ibä ti' tojlel, tsa' weñ mich'a. 6 Che' tsa' su'beñti Amán cha'añ judiojäch Mardoqueo, tsi' iña'ta cha'añ mi' tsäñsañ pejtelel judiojob pam pujkemo'bä ti' pejtelel iyumäñtel Asuero, mach ibajñelik Mardoqueo.
Jiñi yumäl mi' iñopbeñ it'añ Amán
7 Che' ti uw ik'aba' Abib, che' ti lajchänp'ej ja'bil ti yumäl Asuero, tsi' cha'leyob yajkaya ti alas cha'añ mi' ña'tañob bakibä k'iñ yom ujtel chuki tsi' ña'ta imel Amán. Ñaxañ tsa' kaji iña'tañ bakibä tsik, ti wi'il tsi' ña'ta jiñi uw, jiñäch uw ik'ab'a Adar. 8 Amán tsi' su'be yumäl Asuero:
—K'ax ñukbä yumäl, ti' ayumäñtel woli ti chumtäl wiñikob x-ixikob machbä che'ik bajche' joñoñla. Mi lak tajob ti' joytilel ayumäñtel. K'extiyemäch itoj-esäñtel. Ma'añik mi' jak'beñob itoj-esaya jiñi yumäl. Mach uts'atik cha'añ mi' yäjk'elob ti chumtal ila ti ayumäñtel. 9 Mi che'äch yom apusik'al, la' icha'leñ xik'ojel cha'añ mi' laj jisañtelob. Joñoñ mi kaj käk' ti oñ säklemañbä tak'iñ ti' tojlel xmuch'k'iya tak'iñob cha'añ mi' yotsañob ti' yotlel tak'iñ icha'añ yumäl.
10 Che' jiñi, jiñi Asuero tsi' lok'sa imotk'äb ambä iyejtal icha'añ yumäl, tsi' iyäk'e Amán, xts'a'leyabä ti' tojlel judiojob. 11 Jiñi yumäl tsi' su'be Amán:
—Mik majtañ ak'eñet jiñi tak'iñ, che' ja'el mij käk' ti ak'äb jiñi wiñikob yik'ot x-ixikob, mele bajche' yom apusik'al.
Ixik'oñel cha'añ mi' tsänsäñtelob judiojob
12 Ti' uxlujump'ejl k'iñ icha'añ uw ik'aba' Abib jiñi yumäl tsi' päyäyob tilel xts'ijbayajob cha'añ mi' ts'ijbañob ti juñ ixik'oñel Amán cha'añ pejtelel x-e'telob yik'ot yumälo'bä icha'añ wukp'ej icha'kal iwukk'al (127) tejklumtak, tejchem ti India k'äläl ti Etiopía, yik'ot ti jujuñtikil x-e'telob ti jujump'ejl tejklum. Ili xik'oñel tsa' ts'ijbuñti bajche' yujilob t'añ ti jujump'ejl tejklum, che' bajche' tsi' cha'le xik'oñel Asuero. 13 Tsi' choko majlel juñ ti' k'äb x-ak'juñob ti' pejtelel tejklumtak ti' yumäñtel. Ya' ti juñ woli icha'leñ xik'oñel Amán cha'añ ti jump'ejl jach k'iñ ti' uw Adar, mi' laj tsänsäñtelob pejtelelob judiojob, bajche' ch'itoñob, xñoxob, x-ixikob yik'ot alälob, yik'ot mi' ilaj chilbeñtelob ichu'bä añ icha'añ.
14 Jiñäch jiñi t'añtak ts'ijbubilbä ya' ti juñ tsa'bä ichoko majlel jiñi ñukbä yumäl Asuero ti itojlel pejtelel x-e'telob yik'ot yumälob ti wukp'ej icha'k'al iwukk'al (127) tejklumtak, tejchem ya' ti India k'äläl ti Etiopía:
15 «Joñoñ Asuero yumäloñäch icha'añ pejtelel pañämil, yik'ot k'ax ñuk kp'ätälel, ma'añik tsa' kchañ'esa kbä ti' kaj ke'tel. Isujmäch añ iyutslel kpusik'al yik'ot lajal mik k'uxbiñetla.
»Che' ja'el kojach kom cha'añ tijikña mi' yajñelob pejtelel año'bä ti kyumäñtel. 16 Jiñ cha'añ tsa' k'ajtibeyob jkaj tik'ojelob bajche' mi' mejlel ixuk'chokoñtel jiñi ñäch'tälel yik'ot tijikñäyel.
»Jiñi Amán, ambä ñukbä iye'tel, ti' pejtelel k'iñ tsiktiyem cha'añ ñukbä iña'täbal, yik'ot jump'ejl jach ipusik'al ik'uxbiya ti ktojlel. Jiñ cha'añ ñaxañ buchul kik'ot cha'añ toj imelbal. 17-18 Jiñi Aman tsa' itsiktesäbeyoñ cha'añ añäch jump'ejl tejklum wolibä icha'leñob chumtäl ti' chajp ti' chajp ti' joytilel pañämil joñtolo'bä ipusik'al, yañobäch ixik'oñel bajche' lak cha'añ. Jiñi tejklum ma'añik mi' ch'ujbiñob kxik'ojel yik'ot tsa'ix imeleyob bi'bi'bä joñtolil. Ti' ikaj ili mi iyäk' ti wokol jiñi chuki mik ña'tañ lojoñ kmel ti loñ yumäñtel, mi' mäktañob chuki kom lojoñ kmel.
19 »Amán, lajaläch bajche' yambä juñtikil lak tat, tsi' its'ijba ti juñ majkiyob jiñi xchumtälob. Jiñ cha'añ, tsa'ix kcha'le xik'oñel cha'añ ya' ti chäñlujump'ejl (14) k'iñ ti lajchänp'ej (12) uw ik'aba' Adar, che' ti ili ja'bil, ti' pejtelel jiñi x-ixikob yik'ot wiñikob yom laj jisäñtikob. Mi juñtikilik yom kuxul mi' kälel yik'ot mach la' amel la' k'uxbiya ti' tojlelob, mach jiñ yälä mi x-ixikob yik'ot alälob.
20 »Che' chämeño'bix jiñi xjoñtolilob yik'ot che' ya'ix añob ti mukoñibäl, mux lak mejlel ti chumtäl ti tijikñäyel».
21-22 Che' jiñi tsa' pam pujki jiñi xik'ojel ti jujump'ejl tejklum cha'añ yumäñtel, yik'ot ja'el ya' ti kolem tejklum ik'aba' Susa. Che' ja'el tsa' pam pujki jiñi juñ cha'añ jiñi x-ixikob yik'ot wiñikob mi' ichajpañob ibä che' mi' k'otel jiñi k'iñ. Awilañ, ya' ti Susa mach jump'ejlobik ipusik'alob, ixku jiñi yumäl yik'ot Amán tijikña woliyob ti k'iñijel.
Цяпер абрана:
Ester (Griego) 3: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM