Ester (Griego) 4
4
Ich'ijiyemlel judiojob
1 Che'bä tsi' yu'bi Mardoqueo chuki tsa' ujti, tsa' itsili ipislel ti' yejtal ich'ijiyemlel, yik'ot tsi' ixojo jaykexambä ipislel. Ti wi'il tsi' boño täñäl k'ajk ti' ijol yik'ot tsa' ixäñä tejklum che' wo'okñel ti uk'el. 2 Tsa' k'oti k'äläl ya' ti iti' yotot yumäl, ixku ma'añik tsa' ochi cha'añ tik'bilobäch che' ma'añik majch mejl ti ochel ya' ti yotot yumäl mi xojol icha'añ jaykexambä ipislel cha'añ ich'ijiyemlel. 3 Che' tsa' k'oti ikämbeñob ixik'ojel yumäl ya' ti jujump'ejl tejklumtak, tsa' ochi ich'ijiyemlel ipusik'al jiñi judiojob. Tsa' kajiyob ti ch'ajb, wo'okñayob ti uk'el. Ka'bälob tsa'bä tots'leyob ya' ti ipam täñäl k'ajk yik'ot tsi' iläpäyob jaykexambä ipislel.
Mardoqueo mi' ik'ajtiñ ikoltäñtel ti Ester
4 Che'bä jiñi xch'okob yik'ot jiñi xkäñtaya icha'añ Ester tsi' su'beyob chuki woli iyujtel, tsa' kaji imel ipusik'al ja'el. Che' jiñi tsa' ichokbe majlel ipislel Mardoqueo cha'añ mi' ijoche' jiñi jaykexambä ipislel, ixku jiñi ma'añik tsi' ch'ämä. 5 Che' jiñi Ester tsi' päyä tilel Hatac, jiñäch juntikilbä xkäñtaya ak'bilbä icha'añ yumäl cha'añ mi' icha'leñ k'äñol ti' tojlel Ester, tsi' ixik'i majlel cha'añ mi' ik'ajtibeñ Mardoqueo chuki woli iyu'biñ.
6 Hatac tsa' majli ya' ti tempäjibäl icha'añ tejklum, ya'bä añ ti' tojel iti' yotot yumäl, ya' ya'i tsi' ik'ajtibe Mardoqueo 7 chuki woli iyu'biñ. Che' jiñi Mardoqueo tsi' su'be bajche' jiñi Amán tsi' iyälä it'añ cha'añ oñ mi' ikajel iyäk'e' ti' tojlel xmuch'k'iya tak'iñob icha'añ yumäl, mi' ikaj ik'ex cha'añ mi' laj jisäñtel ipi'älob. 8 Che' ja'el Mardoqueo tsi' yäk'e junk'ejl juñ ts'ijbäbilbä ya' ti Susa baki mi iyäl jump'ejl xik'ojel cha'añ mi' ijisäñtel judiojob, tsi' isu'be ja'el cha'añ mi' ipäsbeñ Ester yik'ot mi ilaj tsiktesäbeñ jiñi t'añ. Mardoqueo tsi' k'ajtibe ja'el cha'añ mi isu'beñ Ester che' yom mi' imajlel ik'el yumäl cha'añ mi ik'ajtibeñ ti wokol t'añ cha'añ ma'añik mi ijisäñtel jiñi ipi'älob; 8a mach me ñajayik cha'añ joñoñ tsi' kosa che' aläl xch'okto. La' iña'tañ cha'añ Amán, jiñäch icha'tiklel wiñik ñukbä iye'tel ya' ti yumäñtel, tsa' icha'le u'yaj t'añ ti' tojlel yumäl cha'añ mi' tsänsäñtelob jiñi judiojob. Che' ja'el la' ik'ajtibeñ Lak Yum ikoltaya, yik'ot la' ipejkañ yumäl cha'añ ma'añik mi itsänsäñtelob judiojob.
9 Tsa' sujti Hatac ba'añ Ester. Tsi' su'be chuki tsi' yälä Mardoqueo. 10 Ester tsi' isu'be majlel ili t'añ cha'añ Mardoqueo:
11 «Añix lujump'ejl icha'k'al (30) k'iñ che' ma'añix mi' ipäyoñ jiñi yumäl. Ti' pejtelel x-e'telob icha'añ yumäl yik'ot ti' pejtelel xchumtälob ila ti tejklum yujilob cha'añ ma'añik majch mejl ti majlel ipäs ibä ti' tojlel yumäl mi ma'añik mi' ipäjyel, mi' itsänsäñtel majki mi' iñusañ xik'ol. Mi tsa' isäts'ä ik'äb yumäl che' chukul icha'añ iye'täjib melbilbä ti k'äñlemañbä tak'iñ, woli ti p'uñtäñtel jiñi mu'bä iyochel».
12 Che'bä tsi' iyu'bi Mardoqueo chuki tsi' iyälä Ester, 13 Mardoqueo tsi' ichokbe majlel Ester ili ijak'ol t'añ:
«Ma'añik mi' kaj akoltañ abä cha'añ jach ya' añet ti yotot jiñi yumäl. 14 Mi mach awomik t'añ che' bäbäk'eñbä k'iñ bajche' ili, jiñi ikoltäñtel judiojob mi' ikaj itilel ti ik'äb yaño'bä, ixku jatet yik'ot pejtelel api'älob mi' ikajel la' chämel. Mik ñop cha'añ tsa' ak'eñtiyet jiñi ñukbä awe'tel ti kojach cha'añ ma' koltañ api'älob ti ilibä k'iñ che' añ iwokol».
Ester mi' iña'tañ ikoltañ ipi'älob
15 Che' jiñi Ester tsi' ijak'be it'añ Mardoqueo:
16 «Tempañ pejtelel judiojob ya'bä añob ti Susa, yik'ot cha'leñla ch'ajb cha'añoñ, mach la' cha'leñ we'el uch'el ti uxp'ejl k'iñ. Che' ja'el jiñi xch'okbä jkaj e'telob yik'ot joñoñ mi kajeloñ ti ch'ajb. Che' mij kujtel ti ch'ajb mi kaj kmajlel ba'añ yumäl, mach chäkä ch'ujbibe ixik'ojel. ¡Mi tsa' iyäk'äyoñ ti chämel la'ix chämikoñ!»
17 Che' jiñi, tsa' majli jiñi Mardoqueo yik'ot tsi' laj mele che' bajche' tsi' icha'le xik'oñel Ester, iyijñam yumäl. 18 Che' ja'el, tsa' k'ajtiyi icha'añ pejtelel ikoltaya Lak Yum tsa'bä imele, tsi' ipejka bajche' ili:
19 «¡KCh'ujutat, kCh'ujutat!
¡Yumäl machbä añik ip'isol ip'ätälel!
¡Xuk'chokobil jiñi pañämil cha'añ ap'ätälel!
Jatetäch mi amejlel akoltañ atejklum;
ma'añik majch mi' mejlel imäktañet.
20-21 »Jatetäch tsa' amele chukitak añ,
pejtelel t'ojoltakbä ti pañämil.
¡Jatetäch iyumälet pejtelel chuki añ,
yik'ot ma'añik majch mejl imälbeñet!
22-23 »¡Jatet laj awujil chuki mi' iyujtel!
Awujil cha'añ mach kom
jk'el che' chañ mi' imel ibä Amán,
ixku mach cha'añik ñuk jk'äjñibal joñoñ.
Kña'tayik che' chañ mi' imel ibä
mi' mejlel ikoltañ israelitajob,
tilem ti kpusik'al mik kñupbeñ iyok.
24 »Ma'añik che' tsa' kmele
cha'añ ma'añik majki yom ñuk mi' ik'ejlel
mejlbä awäk'eñtel jatet.
Joñoñ mik pek'esañ kbä ti' atojlel,
cha'añ kojach jatet kCh'ujutatet.
25 »Jiñi ts'a'leyajob
yom ijisañoñ lojoñ;
yom ijisañob atejklum,
jiñi tejklum acha'añächbä.
¡iCh'ujutatetbä Abraham,
jatet Kyumet lojoñ!
¡Ñusäbeñoñ lojoñ kmul!
26 Jatet tsa' awäk'äyoñ lojoñ ti kojlel
ti' tojlel Egipto,
¡Mach akäyoñ lojoñ ti kbajñelil!
27 »¡Kch'ujutat lojoñ,
ñäch'täbeñoñ jk'ajtiya,
yik'ot p'uñtañ jiñi atejklum!
¡K'extañ lojoñ kwokolel ti tijikñäyel,
ya'i mij k'äyiñet lojoñ ti' pejtelel k'iñ!
¡Mach awäk' ti ñäjch'el kñuk'esañ lojoñ ak'aba!»
28 Ti' pejtelel jiñi israelitajob wolix ik'elob che' läk'älix ichämel, tsa' kaji ipejkañob Lak Ch'ujutat ti' pejtelel ip'ätälel ipusik'al yik'ot tsi' ik'ajtiyob ikoltäñtel ti k'ambä it'añ.
29-31 Jiñi Ester ambä ñukbä iye'tel, weñ ch'ijiyem jax ipusik'al cha'añ albilix mi' ikajel ijisäñtelob, jiñ cha'añ ja'el tsa' kaji isajkañ koltäñtel ti Lak Yum. Jiñ cha'añ tsi' ijocho weñ it'ojolbä ipislel, che' jiñi tsa' kaji ixoj ipislel cha'añ ich'ijiyemlel. Bi'bibä iwut tsi' imele ibä: Ma'añix tsi' ik'äñä xojokñabä ts'ak, tsa' kaji p'ujp'uñ täñäl k'ajk ti' pam ijol; ma'añik tsi' ixojo ich'äjlib letsbä itojol, che' ja'el ma'añik tsi' ichäñ kächä ijol, xiki wamal tsa' ajñi. Ti wi'il tsa' kaji ipejkañ iCh'ujutat Israel, tsi' iyälä:
32 «¡KCh'ujutat, kyumet lojoñ!
¡Kbajñelix añoñ
yik'ot jkuxtälel añ ti wokol!
¡Jatet jach mejl akoltañoñ!
33 »Che' aläl ch'okoñto,
tsa' ikäñtesayoñob cha'añ kYumetäch lojoñ;
cha'añ yajkäbilbä atejklumoñäch lojoñ
ti' tojlel yañtakbä tejklumob ti pañämil.
Jatet tsa' ayajka xpäsbijob lojoñ kcha'añ,
yik'ot tsa'äch alaj mele chuki tsa' asu'beyob.
¡Acha'añoñäch lojoñ ti' pejtelel k'iñ!
34-35 »¡Tojäch jiñi amelbal Kyum!
Ñukbä mulil ti' atojlel tsa' kcha'le lojoñ,
cha'añ tsa' kch'ujutesa lojoñ yañtakbä
kuybilo'bä ti ch'ujul.
Jiñ cha'añ tsa' awäk'äyoñ ti yajlel
ti' ik'äb jiñi mu'bä its'a'leñoñ lojoñ.
36-37 »Jiñob tsa' itik'layoñ lojoñ
ti k'äñol ti tsätsbä e'tel;
mach tijikñayo'bix yik'ot iliyi,
tsi' iyäk'beyob it'añ ti tojlel
kuybilo'bä ti ch'ujul icha'añob
cha'añ ma'añik mi' ikajel iyäk'eñetob
amel tsa'bä asu'beyoñ lojoñ.
Tsi' iyäläyob ijisañob atejklum,
cha'añ ma'añik mi' ik'äyiñetob.
Tsi' iyäk'äyob it'añ cha'añ mi' ijemob
it'ojlel ch'ujulbä ajñibäl acha'añ
yik'ot mi' ikajel ijisañob jiñi ch'ujulbä awe'te'.
38 »¡Jiñi mu'bä its'a'leñoñ lojoñ
mi' ikajel ichäñ k'äyob käybilo'bä icha'añ ti ch'ujul,
yik'ot ti' pejtelel k'iñ mi' ikaj ik'ejlel ti ñuk iyum
muk' jachbä isajtel ja'el!
39 »¡KCh'ujutat lojoñ, jatetäch kYumet lojoñ!
Mach ma' akäy ich'ämob ach'ujulbä awajñib
jiñi kuybilo'bä ti ch'ujul.
Mach ma' awäk' itse'tañob wiñikob x-ixikob
cha'añ kwokolil lojoñ.
Ak'ä ti yajlel ti' itojlelob
jiñi wokol mu'bä iña'tañ imelob ti ktojlel lojoñ.
Ak'eñ ti toj imul majki tsa'bä iña'ta itik'lañoñ lojoñ,
cha'añ ti' tem pejtelel mi' ña'tañob pañämil.
40 »Ch'ujutatbä icha'añbä israelitajob,
ñuketbä Yumäl icha'añ ch'ujulo'bä,
jatet ma' ayumäñtel ti' pejtelel chukitak añ.
Ñukäch jiñi kwokolil lojoñ,
¡U'bibeñoñ lojoñ kwokol kt'añ!
»Ak'eñoñ kch'ejlel
41 cha'añ mik mälbeñ jiñi yumäl,
mu'bä imich'añ bajche' joñtolbä bajlum.
Yom ma' awäk'eñoñ tojbä kt'añ
cha'añ mi' koltañ ktejklum ti tojlel yumäl.
Choko majlel imich'lel yumäl ti' tojlel Amán,
cha'añ mi ijisañ temel yik'ot ipi'älob.
42 »Kyum kcha'añ,
koltañoñ lojoñ ti ap'ätälel.
Ma'añik majch mejl ksu'beñ;
kojach jatet mejl akoltañoñ.
43 ¡Jatet awujil pejtelel chuki mi' iyujtel!
¡Awujil bajche' k'amel mik kts'a'leñ
che' mi' mälob xjoñtolilob!
¡Awujil bajche' mik bi'leñ ijñamiñtel
ti' tojlel majki ma'añik mi' ich'ujbiñ at'añ!
44 ¡Mik bi'leñ che' iyaj e'teloñ ti tojlel jiñi wiñikob!
Käläxix mik bi'leñ ili ich'äjlib kjol
machbä añik mik xoje' che' bajñel añoñ.
¡Awujil bajche' añoñ ti wokol!
45 »Joñoñ awaj e'teloñ,
jiñ cha'añ ma'añik tsa' kcha'le we'el uch'el
ti' ik'iñilel k'ux waj icha'añ Amán.
Ma'añik tsa' kmuläbe
jiñi ik'iñilel yumäl,
mi tsa'ik kjapä iya'lel ts'usub
mu'bä iyäk' cha'añ kuybilo'bä ti ch'ujul.
46 »Ch'ujutatetbä Abraham,
k'äläl che' tsa' awa'chokoyoñ ti ñukbä e'tel,
ma'añik chuki mi tijikñesañ kpusik'al.
¡Kojach ti atojlel Kyum añ ktijikñäyel!
47 ¡Ma'añik majch añ ñumeñ p'ätälbä bajche' jatet!
Lok'sabeñoñ kbäk'eñ cha'añ mik pejkañ yumäl.
»Ñäch'tañ lojoñ jk'ajtiya yik'ot koñel lojoñ,
awilañ, obol lojoñ kpusik'al.
¡Lok'sañoñ lojoñ ti' ip'ätälel xjoñtolilob!»
Цяпер абрана:
Ester (Griego) 4: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM