Ester (Griego) 2
2
Asuero mi sajkañ iyijñam
1 Che' tsa'ix ñumi imich'ajel jiñi yumäl Asuero, tsi' icha' ña'ta chuki tsi' imele ti' tojlel Vasti yik'ot bajche' tsi' cha'le xik'ojel mi' tumbeñtel ti' itojlel. 2-4 Che' jiñi iyaj toj-esayajob ti isu'beyob yumäl:
—La' iwa'chokoñ jiñi yumäl x-e'telob ti' pejtelel tejklumtak iyumäñtel, cha'añ mi' isajkäñtel t'ojolbä xch'okob yik'ot maxtobä año'bik iñoxi'al. La' ipäjyelob majlel jiñi xch'oktakob ya' ti' iyotot yumäl. Ya'i mi' ikajel ikäñtäñtelob ti' tojlel Hegai, jiñäch juñtikil wiñik ak'älbä cha'añ mi' ikäñtañ x-ixikob, cha'añ mi' iyäk'eñob it'o'oljax k'ejlel. Che' jiñi, jiñi yumäl mi ikaj iyajkañ xch'ok mu'bä iweñ mulañ, ya'i mi iyäk'eñ ñukbä iye'tel tsa'bä ikäyä Vasti.
Jiñi yumäl uts'atax tsi' yu'bi jiñi t'añ. Che'äch tsa' mejli.
Ester mi' ik'otel ti' yotot yumäl
5 Ya' chumul ya' ti Susa juñtikil judío ip'olbalbä Benjamín ik'aba' Mardoqueo iyalobil Jair, ibuts Simeí yik'ot ik'ojt Quis. 6 Mardoqueo jiñäch juñtikil xkächol ti Jerusalén tsa'bä ipäyä majlel Nabucodonosor, yumälbä ti Babilonia, temel yik'ot Joaquín, yumälbä ya' ti Judá. 7 Mardoqueo tsi' kosa juñtikil iyalobil iyumjel, ik'aba' Ester, cha'añ me'ba' xch'ok. Che' tsa' chämi itat iña', jiñi Mardoqueo tsi' päyä che' bajche' iyalobil icha'añ. It'ojoljax jiñi xch'ok.
8 Che'bä tsa' pam pujki ixik'ojel jiñi yumäl, ka'bäl xch'okob tsa' päjyiyob majlel ya' ti yotot yumäl, tsa' käle ti' tojlel Hegai cha'añ mi' ikäñtañob. Ya' añ Ester ja'el yik'otob. 9 Hegai uts'at tsi' k'ele jiñi xch'ok, tsi' weñ mula bajche' yilal, jiñ cha'añ se'el tsi' cha'le xik'oñel cha'añ mi' yäk'eñtel its'äkal ipächälel yik'ot yajkäbilbä ibäl iñäk'. Che' ja'el tsi' xik'i wuktikil xch'okob ya'bä añob ti' iyotot yumäl cha'añ mi' yäk'eñob chuki yom Ester, yik'ot mi' iyäk'eñtel uts'ataxbä ajñibäl ya' ti' yotot x-ixikob.
10 Ma'añik tsi' su'bu Ester bakibä tejklum tilem mi tsa'ik yälä majki ip'olbal, cha'añ jiñi Mardoqueo tsi' itik'i cha'añ ma'añik majki mi' itsiktesäbeñ. 11 Ti jujump'ejl k'iñ mi' tilel ñumel Mardoqueo ya' ti pat yotot x-ixikob cha'añ mi' ik'el bajche' yilal Ester yik'ot bajche' woli ti chumtäl.
12 Jiñi xch'okob yom mi' majlel ipäsob ibä ti jujuñtikil ti' tojlel yumäl, ixku che' mi ikajel imajlelob, mi iyotsäñtelob lajchänp'ej uw cha'añ ñumeñ t'ojoljax ichajpäñtelob, cha'añ itileläch che' mi' imejlel bajche' jiñi. Ñaxambä wäkp'ej uw yom mi' iboñbeñob ipächälel ti ts'ak lok'embä ti mirra, yik'ot ti' ikolo'bal tsik mi' ik'äñob jiñi xojokñabä ts'ak yik'ot mu'bä isäymañ lak pächälel. 13 Ti jujuñtikil mu'bä imajlel ipäs ibä ti' tojlel yumäl ya' ti iyotot, muk'äch imejlel iyäk'eñtel ixoj ipislel yik'ot ich'äjlib mu'bä iyajkañ ya' ti yotot x-ixikob. 14 Ti och'añ k'iñ mi' imajlel juñtikil xch'ok ti yotot yumäl, ti' säk'ajel yambä k'iñ mi sujtel majlel ya' ti' cha'p'ejlelbä iyotot x-ixikob ambä ti' tojlel jiñi Saasgaz, jiñäch yambä wiñik ku'xbä mi' iyu'biñ yumäl. Kojach mi' icha' tilel ipäs ibä ti' tojlel yumäl mi cha'añ che'äch yom yik'ot mi' ipäy tilel ti ik'aba'.
Ester mi' iyajkäñtel ti ñukbä x-ixik
15-16 Ik'aba' itat Ester jiñäch Abihail, yik'ot iyichañäch Mardoqueo. Ester tsi' itaja ik'uxbiñtel ya' ti yotot yumäl, yik'ot che' tsa' k'oti iyorajlel cha'añ mi' imajlel ipäs ibä ti' tojlel yumäl, xojol majlel icha'añ ipislel tsa'bä isu'be Hegai ixoj. Jiñäch ya' ti uw ik'aba' Tébet, che' wukp'ejix ija'bilel iyochel ti yumäl Asuero.
17 Jiñi yumäl Asuero tsi' ñumeñ mulañ Ester bajche' pejtelel yaño'bä xch'okob, tsi' ñumeñ mulañ bajche' pejtelel x-ixikob. Jiñ cha'añ tsi' k'äkchokobe ti' pam ijol ich'äjlib ya'i tsi' yäk'e ñukbä iye'tel tsa'bä ikäyä Vasti.
18 Ti wi'il jiñi yumäl tsi' mele kolembä k'iñijel cha'añ Ester. Ya' ti k'iñijel tsa' ipäyä tilel pejtelel jiñi xe'telob yik'ot xkoltayajo'bä icha'añ ya' ti iyumäñtel. Che' ja'el tsa' ju'säbeñtiyob itojoñel, yik'ot tsi' puku lets'bä majtañäl, mejlbä iyäk' jiñi yumäl.
Mardoqueo mi' yu'biñ che' yom itsäñsañob yumäl
19-20 Ester mi' ichäñ ch'ujbiñ chuki mi' iyäl Mardoqueo k'äläl che' alä xch'okto, yik'ot wäle ma'añik mi' iyäk'tañ ich'ujbiñ. Ma'añik majch yujil majki ipi'älob mi' jiñik majki ip'olbal, cha'añ tik'bil icha'añ Mardoqueo cha'añ ma'añik mi' isu'b. jump'ejl k'iñ, che' woli itempañob ibä jiñi xch'okob ti yambä iyotot jiñi x-ixikob, jiñi Mardoqueo tsa' buchle ya' ti yochib'lel iyotot yumäl, 21 ya' ti' iyu'bibe it'añ cha'tikil x-e'telob icha'añ yumäl wolibä ikäñtañob iti' yotot yumäl. Jiño'bäch Bigtán yik'ot Teres, weñ woliyob ti mich'ajel ti' tojlel yumäl yik'ot woli iña'tañob cha'añ mi' itsäñsañob. 22 Che' tsi' iyu'bi iliyi, jiñi Mardoqueo tsa' majli isu'beñ Ester. Ester tsi' su'be yumäl. 23 Jiñi yumäl tsi' choko majlel ti u'biñtel mi isujmäch jiñi t'añ, che' tsa' tsiktiyi cha'añ isujmäch, tsa' icha'le xik'oñel cha'añ mi ijijch'elob ti' icha'tiklelob jiñi wiñikob. Che' jiñi tsi' icha'le xik'oñel cha'añ mi' iyotsañob ti juñ cha'añ yumäñtel ik'äyiñtel Mardoqueo cha'añ mi' ikäjyel iyejtal iye'tel tsa'bä imele Mardoqueo.
Цяпер абрана:
Ester (Griego) 2: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM