Ester (Griego) 1
1
Kolem k'iñijel icha'añ yumäl Asuero
18-20 Asuero, yumälbä ti Persia, tsi' icha'le yumäñtel ti' itojlel wukp'ej iwukk'al (127) kolem tejklumtak tejchem ya' ti India k'äläto ti Etiopía, jiñi ñukbä ik'äjñibal icha'añ iyumäñtel jiñäch ik'aba' Susa.
Ti iyuxp'ejlel ija'bilel iyumäñtel, Asuero tsi' ichajpa jump'ejl kolem k'iñijel cha'añ ti' pejtelelob jiñi x-e'telob icha'añ yik'ot yañtakbä ñukbä x-e'telob ti iyumäñtel. Che' ja'el tsi' päyä tilel jiñi ñuko'bä iye'tel xjisaya tilemo'bä ti Persia yik'ot Media, yik'ot tsa' päjyiyob ja'el yumälob ya'bä añob ya' ti tejklumtak. 21 Jiñi yumäl tsa' jali wuk'p'ejl uw cha'añ mi' ilaj päs chuki añtakbä icha'añ yik'ot tsi' iyäk'eyob ik'el iñuklel ip'ätälel iyumäñtel.
22 Ti wi'il tsa' icha'le xik'oñel cha'añ mi' ichajpäñtel yambä k'iñijel cha'añ pejtelel xchumtälob ti Susa, tsa' päjyiyob ñuko'bä yik'ot machbä ñukobik. Wukp'ej k'iñ tsi' cha'leyob k'iñijel ti' pat iyotot yumäl ya' ba'añ päk'äbäl. 23 Ya' ti' iyoyel melbiltakbä ti mármol tsa' jok'chokoñti säsäkbä yik'ot yäxmulañbä pisil, kächälbä ti chäkkojañbä ich'ajñel yik'ot ti xotol säklemañbä tak'iñ. Tsa' ajk'i buchlibäl yik'ot k'ajob oj melbilbä ti k'äñlemañ yik'ot ti säklemañbä tak'iñ. Ilumil imal iyotot tsa' itäsbeyob säsäkbä xajlel yik'ot i'ik'bä yik'ot tsi' päk'beyob ts'äylawbä xajlel. 24 Ka'bäl tsa' ajk'i iya'lel ts'usub, awilañ jiñi yumäl weñ uts ipusik'al. Jiñi iyuch'ib baki tsa' ije'beyob iya'lel ts'usub melbilbä ti k'äñlemañbä tak'iñ, jujump'ejl melbil ti' ichajp ti' ichajp. 25 Che' ja'el, jiñi yumäl tsi' cha'le xi'k'oñel ti' pejtelel x-e'telob icha'añ, cha'añ ma'añik majki mi' ixijk'el ijap jiñi ya'lel ts'usub machbä yomik. Jiñi yombä ijap mi' mejlel ijap che' bajche' k'amel yom ipusik'al.
26 Jiñi iyijñam yumäl ti bajñel yäk'ä jump'ejl k'iñijel ya' ti' yotot Asuero cha'añ pejtelel x-ixikob iyijñamo'bä päybilo'bä ti k'iñijel.
Jiñi Vasti tsi' iñusabe it'añ yumäl
27 Ti' wukp'ejlel k'iñbä k'iñijel, weñ tijikñayix ipusik'al jiñi yumäl cha'añ ti ijapä oñbä ya'lel ts'usub. Che' jiñi tsi' päyä tilel wuktikil wiñikob, jiñobäch ñukbä mi ik'elob: Mehumán, Biztá, Harboná, Bigtá, Abagtá, Zetar yik'ot Carcás, 28-29 tsa' xijk'iyob majlel ipäy tilel Vasti. Tsa' su'beñtiyob cha'añ yom mi' itilel che' xojol ich'äjlib ijol, cha'añ jiñi wiñikob yik'ot yumälob mi' k'otel ik'elbeñob it'ojlel, awilañ, jiñi x-ixik weñ it'ojoljax. Ixku jiñi x-ixik ma'añik tsi' ch'ujbi jiñi xik'ol tsa'bä iyälä yumäl.
Che' tsi' iyu'bi iliyi, jiñi yumäl tsa' mich'a. 30 Ya'i tsi' k'ajtibeyob iyaj e'telob icha'añ ti toj-esaya chuki yom imel. Itileläch cha'añ mi' ik'ajtiñ toj-esäñtel jiñi ikäñäyo'bä jiñi juñilel icha'añ xik'ojel. 31 Jiñi mu'bä iweñ koltañob ti toj-esaya jiñobäch Carsená, Setar, Admat, Tarsis, Meres, Marsená yik'ot Memucán. Iliyob wuktikil x-e'telobäch icha'añ persajob yik'ot medojob, añob ñukbä iye'telob ti tejklum yumäl. 32 Che' jiñi yumäl tsi' ik'ajtibeyob:
—Jiñi kijñam Vasti tsa'ix iñusa kt'añ. Che'äch bajche' mi' iyäl toj-esäñtel, ¿Chuki mejl lak mel ti' itojlel?
33 Che' jiñi Memucán tsa' ijak'beyob ik'ajtiya yumäl yik'ot jiñi yambä xtik'ojelob:
—Mach jiñik jach ti' tojlel yumäl tsi' cha'le p'ajoñel Vasti, tsi' cha'le p'ajoñel ja'el ti' tojlel jiñi ñuko'bä iye'tel yik'ot ti' tojlel pejtelel tejklumtak. 34-35 Che' jiñi x-ixikob ti Persia yik'ot ti Media mi' k'otel iyu'biñob tsa'bä imele Vasti, ma'añix mi ikaj ik'uxbiñob iñoxi'al. Wäle mi kaj isu'beñob iñoxi'al chuki tsa' imele jiñi Vasti, ya'i ka'bäl wokol mi kajel lak taj ila ti kyumäñtel. 36 Mi che'äch yom ipusik'al yumäl, la' imel xik'ojel cha'añ jiñi Vasti ma'añix mi' chäñ k'ejlel ti ñuk, yik'ot iliyi xik'ojel icha'año'bäch xchumtälob ti Persia yik'ot ti Media, cha'añ ma'añik majki mi' imejlel ik'extañ at'añ. Che' ja'el, yajkañ yambä x-ixik ñukbä ik'äjñibal ñumeñ uts'atbä imelbal bajche' jiñi Vasti. 37 Che' mi' kaj ik'otel ti käjñel ixik'ojel yumäl ti' pejtelel ili kolem yumäñtel, pejtelel jiñi x-ixikob mi kaj ik'uxbiñob iñoxi'al, chumulo'bä ti uts'at yik'ot jiñi p'ump'uño'bä.
38 Uts'atäch tsi' yu'biyob jiñi t'añ jiñi yumäl yik'ot xtik'ojelob. Jiñ cha'añ jiñi yumäl 39 tsi' choko majlel juñ ti' pejtelel iyumäñtel. Jiñi juñtak tsa' ts'ijbuñti ti chajp ti chajp bajche' mi' icha'leñob t'añ ti jujump'ejl tejklum, yik'ot ti juñyaj t'añ tsa' sujbi cha'añ jiñi wiñik jiñäch ñukbä iye'tel ti' p'olbal ya' ti' yotot, yik'ot ya' ti ichumlib mi' mejlel ipejkañob ibä ti' it'añ tatäl.
Цяпер абрана:
Ester (Griego) 1: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM