Genesi 1
1
I. GU TUMBULUGA
Guvangwa nya ndzadzi ni mafu ni satshavbo si guromo umo
(Joba 38—39; Dzindzimo 104; Johane 1:1-3)
1Guhegulani Nungungulu a di vanga ndzadzi ni mafu. 2Mafu ma diri liphanga nyambana giwumbelo, ma diri giwula nyambana gilo, gidema gi di fenengedza linene, Liphuvbo la Nungungulu li di gu furugedza vbatshani nya mati.
3 # Wona gambe: 2 Dzik 4:6. Nungungulu a di phela gu ganela, khuye: “Gu na manege guwonegela.” Guwonegela gu di manega.
4Nungungulu a di wona nya gukhuye guwonegela gilo nya gyadi, a gu hambanisa guwonegela ni gidema.
5Nungungulu a di rana guwonegela, khuye: “Mihani” a gu rana gidema khuye “wutshigu.” Li di pfola, li gugya; litshigu nya guhegule.
6Nungungulu a di khuye: “Gu na manege ndrengelenge vbakari nya mati, yi hambanisa aya ya vbatshani ni aya ya vbavbatshi.”
7Gu di girega kharato. Nungungulu a di gira ndrengelenge, a hambanisa mati ya vbavbatshi ni aya ya vbatshani nya ndrengelenge, si girega kharato.
8 # Wona gambe: 2 Ped 3:5. A di rana ndrengelenge khuye ndzadzini. Li di pfola li gugya; litshigu nya wuvili.
9Nungungulu a di khuye: “Ma na patane dangamwedo mati ma guromo vbavbatshi nya ndzadzi, gu manege mafu nya gubange.” Gu di girega kharato. 10Nungungulu a di rana gipandre nya gubange, khuye: “Mafu,” a gu rana tshangano nya mati, khuye: “Linene.” Pfhumu Nungungulu a di si wona gukhuye khyadi.
11Nungungulu a di ganela gambe, khuye: “Mafu ma na fenengedzwe khu likhabi; mafumbu nya mwasi ma ningago dzithanga, ni misimbo nya mihandro yi velegago mihandro ni dzithanga dzaye mafuni, gukhedza khu lifumbu ni lifumbu.” Gu di girega kharato.
12Mafu ma di bugisa mwasi ni mitongwe yi ningago dzithanga khu mafumbu yaye, ni misimbo yi ningago mihandro ni mbewu khu mafumbu yaye. Pfhumu Nungungulu a di si wona gukhuye khyadi. 13Li di pfola, li gugya; litshigu nya wuraru.
14Nungungulu a di khuye: “Gu na manege myenge nya guwenengedze ndzadzini, yi hambanisa wutshigu ni mihani. Yi na khale giyeyedzo nya dzinango, matshigu ni myaga, 15Myenge yoyo yi vegidwego ndzadzini yi na wenengedze mafu.” Gu di girega kharato. 16Nungungulu a di vanga myenge mivili nya yikhongolo: Owu nya wukhongolo wu fela gufumela mihani, owu nya wudugwane wu fumela wutshigu. Khu guhegisa, a di gira dzinyeledzi. 17Nungungulu a di dzi vega ndzadzini gasi gu wenengedza mafu, 18dzi fumela mihani ni wutshigu, dzi hambanisa gu wonegela ni gidema. Nungungulu a di si wona gukhuye khyadi; 19li di pfola li gugya; Litshigu nya wu na.
20Nungungulu a di khuye: “Matini gu na tale khu sirengo nya guvbanye: Sinyoni si na vbuvbe damboni.” 21Nungungulu a di vanga mafumbu nya guhambanelane nya sirengo nya sikhongolo sa linene, ni sirengo satshavbo si vbanyago matini ni satshavbo si vbuvbago khu mambapi. Nungungulu a di si wona gukhuye khyadi. 22Nungungulu a di si kategisa, khuye: “Velegelani mu andra mu gu tadza mati ya linene; sinyoni niso si na velegelane tigoni.” 23Li di pfola, li gugya: Litshigu nya livbandre.
24Nungungulu a di khuye: “Gu na manege sirengo nya guvbanye, nya mafumbu ni mafumbu: Sifuyo, sirengo nya gukhwirire khu lididi, ni sirengo nya likhabi, khu mafumbu yawe.” Gu di girega kharato. 25Nungungulu a di vanga mafumbu yatshavbo nya sirengo nya likhabi ni mafumbu yatshavbo nya sifuyo, ni mafumbu yatshavbo nya sirengo si khwirirago khu lididi mafuni. Nungungulu a di si wona gukhuye satshavbo khyadi.
Guvangwa nya muthu
26 # Wona gambe: 1 Kor 11:7. Nungungulu a di khuye: “Hongoleni hi gire muthu khu mufananiso wathu, a godzana ni Ethu, gasi a fumele dzindzandzi dza phwani, ni sinyoni si vbuvbago ndrengelengeni, ni sirengo satshavbo si vbanyago mafuni.”
27 # Wona gambe: Gen 5:1-2; Mat 19:4; Mark 10:6. Nungungulu a di vanga muthu khu mufananiso Waye, a mu giride a godzana ni Nungungulu; a di vanga mwama ni nyamayi.
28Nungungulu a di va kategisa a va embela, khuye: “Velegelanani, mu andra, mu tadza mafu, mu ma fumela. Fumelani dzindzandzi dza matini, sinyoni ni sirengo satshavbo si vbanyago mafuni.”
29Nungungulu a di ganela gambe, khuye: “Nyi ngu mi ningani mwasi watshavbo wu velegago mbewu, ni misimbo yatshavbo yi velegago mihandro yi gu na ni dzithanga. Si na khale guhodza gwanu. 30Gasi sirengo satshavbo si vbanyago mafuni, ni sinyoni satshavbo sa damboni ni satshavbo si khwirirago khu lididi, si gu ni hefemulo nya guvbanye, nyi ngu si ninga gu hodza mwasi watshavbo wu bugago mafuni.” Gu di girega kharato.
31Nungungulu a di wona gukhuye sigiro Saye satshavbo si diri sadi ngudzu. Li di pfola, li gugya: Litshigu nya livbandre na limwedo.
Цяпер абрана:
Genesi 1: BGG2014
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Gitonga DC Bible © Bible Society in Mozambique, 2014.