Génesis 1
1
Dios ajayinö öwa̧pedina jawa
1Ajayinöma Dios wa̧pedijetö#1:1 wa̧pedö jö̧ba̧löma öwawobö webijetö jö̧ba̧lö Diosma, ju'wi jawatjö otidökönö okobe jwiinö, mölejȩbi böjȩbi. 2Ja̧danö, Dios böjȩ ina otidapjii böjȩma otikwö̧kö̧jȩ ji̧jetö. Ju'wi jayebi jwiijetö. Jwai balawada li̧jetö böjȩ bakwemeachibanö. Jödö wame yȩböda yȩijetö wamema. Ja̧danö, Dios O̧'wo̧ Luwo̧ma#1:2 Dios O̧'wo Luwo̧ma Diosda Jo̧ jwai balawa wamenö kwebachö ji̧jetö.
Ajayinö möle jawa
3Ikenama:
—¡Dewinö babibi!— jö̧ba̧lö webijetö Diosma. Jejenö dewinö baibijetö, iteda wei̧danö. 4Diosma dewobe edinö ösödijetö, otiwa jö̧ba̧lö. Ikenama ja̧ dewi̧ma wainö ji̧nö, yȩi̧bi wainö ji̧nö junijetö Diosma. 5Ja̧danö, dewi̧ma möle jö̧ba̧lö öbabijetö. Ja̧danö, yȩi̧ma yö̧te jö̧ba̧lö öbabijetö. Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö ajayinö mölema.
Dötölataja möle jawa
6Ikenama:
—¡Jwai balawa 'da̧bachibö lamati ö'weje wajo̧ baibanö!— jö̧ba̧lö webijetö Diosma. 7Ja̧danö, Diosma jwai balawa 'da̧batijetö ö'weje wa̧jo̧ baibanö. Jejenö wa̧jo̧emi wame ojwiyoma li̧nö nönijetö Diosma. Ja̧danö wa̧jo̧emi teebe jwai balawa lijetö. Jejenö baibijetö, Dios wei̧danö. 8Ja̧danö, Diosma öbabijetö wa̧jo̧emima mölejȩ, jö̧ba̧lö. Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö dötölataja mölema.
Wa̧pötakwa möle jawa
9Ikenama:
—Niji öwawachö, jwai balawa öibajinö babibi, bakwödöda baibanö— jö̧ba̧lö webijetö Diosma. Jejenö baibijetö, Dios wei̧danö. 10Ja̧danö, öibajemima niji jö̧ba̧lö öbabijetö Diosma. Ja̧danö, öbibajö lamatajödöma jwai balawa jö̧ba̧lö öbabijetö. Ja̧danö, Diosma öibajemi, ja̧danö, öbibajö lamatajödö edinö ösödijetö, otiwa, jö̧ba̧lö.
11Ikenama:
—Nijitjö okobe jwiinö pokwi̧ma pokwinö babibi. Ja̧ pokwi̧ wa̧aja̧ma önebiya opijutjö libö i̧ya̧jakwada pokwinö babibi. Towibiya wa̧ji̧owibiyabi opo okwa a̧ji̧ önebiyatjö i̧ya̧jakwada pokwinö babibi— jö̧ba̧lö webijetö Diosma. Jejenö baibijetö, Dios wei̧danö. 12Ja̧danö, nijitjö okobe jwiinö pokwi̧ma pokwijetö. Ja̧ pokwi̧ma önebiya opijutjö libö i̧ya̧jakwada pokwijetö. Towibiya wa̧ji̧owibiyabi opo okwa a̧ji̧ önebiyatjö pokwijetö, i̧ya̧jakwada. Diosma ja̧ pokwaja̧ edinö ösödijetö, otiwa jö̧ba̧lö. 13Ikenama yi̧böbi yi̧bijetö. Ja̧danö dewachöbi dewachijetö. Jejenö baibijetö wa̧pötakwa mölema.
Ö'wejemu möle jawa
14Ikenama:
—Möle ja̧wo̧bi yö̧te ja̧wo̧bi si̧li̧'i̧döbi babibaduwi, mölebi yö̧tebi wainö ja̧kobetjö̧. Ja̧danö, ökwödö mölejȩ lö̧jadöma, mölebiya baledi̧, ja̧danö o̧ba, imiyame baledi̧ kwi̧sebaduwakobetjö̧ babibaduwi. 15Ja̧danö, mölejȩbetjö böjȩkwö kwidejataduwakobetjö̧ babibaduwi— jö̧ba̧lö webijetö Diosma. Jejenö Dios wei̧danö babibijadötö, möle jawo̧bi yö̧te ja̧wo̧bi si̧li̧'i̧döbi. 16Du̧ju̧tajanö ödöbaedö dewinö dejatadönö wa̧pedijetö Diosma. Möle ja̧wo̧nöma tubinö dejato̧nö wa̧pedijetö möle dewobö. Ja̧danö, yö̧te ja̧wo̧nöma tiyuwanö dejato̧nö wa̧pedijetö yö̧te dewobö. Si̧li̧'i̧dönöbi wa̧pedijetö. 17Diosma mölejȩnöda nönijetö jobadönöma tjidejato jö̧ba̧lö böjȩkwö. 18Ja̧danö, bakwo̧nöma möleda idejatobö ja̧danö, jelo̧nöma, si̧li̧'i̧dönöbi yö̧teda tjidejatobö nönijetö Diosma. Mölebi yö̧tebi wainö ja̧kobetjö̧ nönijetö. Ja̧danö, Diosma önajawö̧nö edinö ösödijetö, otiwadö jö̧ba̧lö. 19Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö ö'wejemu mölema.
Bakwamu möle jawa
20Ikenama:
—Jwai balawa okwanö kwebachö lö̧jadö ba̧jekwadö babibaduwi. Ja̧danö, mö köba̧lö ju̧kwadöbi böjȩ wamenö babibaduwi— jö̧ba̧lö webijetö Diosma. Jejenö babibijadötö Dios wei̧danö. 21Diosma jwai balawa okwanö kwebachö lö̧jadönö ödöbaedönöbi, ju'wedönöbi okobe deinö wa̧pedijetö. Idödada yetjawobö wa̧pedijetö. Ja̧danö, okobe deinö mö köba̧lö ju̧kwadöbi idödada yetjawobö wa̧pedijetö. Diosma wa̧pedajawö̧nö edinö ösödijetö, otiwadö jö̧ba̧lö.
22Ikenama Diosma jö̧ba̧lijetö öwa̧pedajawö̧nö, Ökwödönöma kwöba̧jekwachaduwobö ösödanö edö pjatatakwo̧sa, jö̧ba̧lö. Jejenö jö̧ba̧lö webijetö:
—Nöinö yebawaduwi kwöba̧jekwachaduwo. Ökwödö jwai balawa okwanö kwebachö lö̧jadö kwöba̧jekwachaduwo jwai balawa okwatjö, böjȩ bakwemeachibanö. Ja̧danö, ökwödö mö köba̧lö ju̧kwadöbi kwöba̧jekwachaduwo böjȩ ba̧kwemeachibanö— webijetö Diosma jwai balawa okwanö kwebachö lö̧jadönöma, ja̧danö, mö kö̧ba̧lö ju̧kwadönöma, dösölö̧jinö edö pjatatakwo̧sa, jö̧ba̧lö.
23Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö bakwamu mölema.
Jelemutjö bakwöta möle jawa
24Ikenama:
—Nijitjö̧ babibaduwi böjȩnö kwebachadö a̧ji̧kwakwawedöbi, tebonö ju̧kwadöbi, nijinö töbawadöbi okobe deinö ökwödödada yebawö kwuju̧kwaduwo— jö̧ba̧lö webijetö Diosma. Jejenö Dios wei̧danö babibijadötö. 25Okobe deinö tebonö ju̧kwadönöbi, a̧ji̧kwakwawedönöbi, nijinö töbawadönöbi otidijetö Diosma, idödada yetjawobö. Ja̧danö, Diosma otidajawö̧nö edinö ösödijetö, otiwadö, jö̧ba̧lö.
Jelemutjö bakwöta möle Dios jojodönö otidinena jawa
26Ja̧danö, Diosma yöba̧lijetö:
—Dotidaduwo jojodönö ökwödödanö ichejekwadönö, ökwödödajayedönö. Jobadö jojodö dotidajawö̧ma böjȩ uluwedö tjö̧jakwedö. Ja̧danö, okobe deinö böjȩnö ju̧kwadö tjuluwedö baibanö tjö̧jakwedö. Jobadöma ba̧i̧nöbi mö köba̧lö ju̧kwadönöbi, a̧ji̧kwakwawedönöbi, nijinö töbawadönöbi okobe deinö böjȩnö ju̧kwadönöbi webö tjö̧jakobe— yöba̧lijetö Diosma.
27Ja̧danö, Diosma otidijetö jojodönö, itedadajayedönö, Diosdanö ichejekwadönö. Iso̧nöbi isujunöbi otidijetö. 28Otidajawö̧nöma yöba̧lijetö, Ökwödönö kwöba̧jekwachaduwobö dösölö̧jinö edö pjatatakwo̧sa, jö̧ba̧lö. Jejenö jö̧ba̧lö webijetö:
—Nöinö yekawaduwo, böjȩ ba̧kwemeachibanö kwöba̧jekwachaduwo. Ja̧danö, böjȩnö ju̧kwadö tjuluwedö baibanö webö kwuju̧kwaduwo. Ba̧i̧bi, mö köba̧lö ju̧kwadöbi, a̧ji̧kwakwawedöbi okobe deinö böjȩnö kwebachö ju̧kwadö tjuluwedö baibanö webö kwuju̧kwaduwo— jö̧ba̧lö webijetö Diosma jojodönö, otidö ujunajawö̧nöma, ökwödönö ösödanö edö pjatatakwo̧sa jö̧ba̧lö.
29Ja̧danö, yöba̧lijetö:
—Okobe jwiinö önebiya opijutjö libö böjȩnö pokwi̧ma, ja̧danö okobe jwiinö towibiyanö opo okwa a̧ji̧ önebiyatjö pokwö waji̧ma kukwaduwakwa̧ baibanö ökwödönöma chiya— jö̧ba̧lijetö Diosma otidajawö̧nöma—. 30Ja̧danö, okobe deinö ju'wedö böjȩnö 'yaba̧lö ju̧kwadönö, tebonö ju̧kwadönöbi, mö köba̧lö ju̧kwadönöbi, nijinö töbawadönöbi meje'ye 'yaya'ye jobadö tjukwa'ye baibanö chiya— jö̧ba̧lijetö Diosma. Jejenö baibijetö Dios jö̧a̧li̧danö.
31Diosma okobe jwiinö otidaja̧ edinö jwiinö ösödijetö, otiwa, jöba̧lö. Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö jelemutjö bakwöta mölema.
Цяпер абрана:
Génesis 1: WPC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2021, All Rights Reserved