Génesis 2
2
Dios jelemutjö dötölataja möle, inesö möle, jö̧ba̧lö ujunina jawa
1Ja̧danö, Diosma mölejȩbi mölejȩnö lö̧jadönöbi böjȩbi böjȩnö ju̧kwadönöbi otidö kabatijetö. 2Ja̧danö, iteda otidawatjö okobe jwiinö kaatakwawabetjö̧ ju'wi dewachö möle, jelemutjö dötölataja mölema ö'wachijetö Diosma, otidökönö. 3Ja̧ möle, jelemutjö dötölataja mölema omukwatö dösölö̧jinö edö jö̧ba̧lijetö Diosma:
—Biya möle, jelemutjö dötölataja mölema inesö möle baibanö chujuna— jö̧ba̧lijetö Diosma, ja̧ mölema iteda otidawatjö ö'wachö kaatakwawina mölȩobetjö̧.
Dios jojonö otidaja̧ ikena batjonö ujunina jawa
4Baikwö laebobe Isabenö Jo̧ Dios ajayinöma mölejȩ, böjȩ öwa̧pedaja̧ ikena baledina jawa: Isabenö Jo̧ Diosma#2:4 Isabenö Jo̧ Dios jö̧ba̧löma Dios iteda imi. böjȩ, mölejȩ öwa̧pedaja̧ ikena 5ina nijitjöma pokwijökötö pokwi̧ma, kwakwawabi kwakwawö̧kö̧bi. Isabenö Jo̧ Diosma ina ojwiyo o̧binö weokobetjö̧, ja̧danö jojo, batjo niji soawa otido̧ ina deobetjö̧ pokwijökötö pokwi̧ma. 6Ja̧ mölema ojwiyo o̧bököjayonö ojwiyosapjo nijitjö möakwö kabamö tiyudijetö böjȩ okobe jwiinö.
7Ikenama Isabenö Jo̧ Diosma nijitjö jojodanö otidijetö. Otidajökwe isu̧nö ja̧kwawa imiyupjo pjubijetö jojo baibanö. 8Ikenama Isabenö Jo̧ Diosma batjo jalayu, otiwayu junijetö ja̧wo̧ laebemi badeibö, Edén batjo mikwayu. Jayunö jena junijetö jojonö, otidajökwenöma. 9Ja̧danö, Isabenö Jo̧ Diosma towibiya okobe jwiinö ju'wiowibi, ju'wiowibi, otiwi̧owibiya, ja̧danö wa̧ji̧ kwakwawanö o̧ti̧owibiya pokwobö ja̧bijetö. Ja̧danö ja̧yu ö'wejenö bakwowi, ja̧kwawa towi ji̧jetö. Jowitjö kwadöma ba̧kwelöjatebö tjuju̧kwakwedö. Ja̧danö, jelowibi ji̧jetö jayu ö'wejenö, otiwi̧bi sulabebi waisachibakwawa towima. Jowitjö kwadöma otiwi̧bi sulabebi̧ tjöwaisachibakwedö.
10Ja̧danö, Edén batjo ö'weje ojwe li̧jetö batjonö ju̧kwi̧ tiyudödö. Jödötjöma ojwebiyama ö'wejemu jawa ödö 'da̧achijetö. 11Ajayinö 'da̧achödöma Pisón mikwijetö. Jödöma Havilá nijinö li̧jetö wi̧so̧inö. Havilá nijinöma oro bi̧jetö. 12Jöjȩ nijima bakwai̧ oroda bi̧jetö. Ja̧danö, towibiya i̧dȩlu̧, o̧tinö o̧mȩwi̧bi, inawiya onise mikwi̧ öwiyabi ju̧kwijetö. 13Jemi ikenasödöma mikwijetö Guihón. Jödöma Cus nijinö wi̧so̧inö li̧jetö. 14Jemi ikenasödöma mikwijetö Tigrís. Jödöma Asiria nijitjöma ja̧wo̧ laebobekwö li̧jetö. Jemi ikenasödöma Éufrates mikwijetö.
15Ikenama Isabenö Jo̧ Diosma jojonö junijetö Edén batjonö, jayu otidobö, ja̧danö, ja̧nö ite'ada̧lobö. 16-17Ja̧danö:
—Biyu batjo okobe jwiinö towibiyanö wa̧ji̧ kukwobö wetijayonö bakwowi towi wa̧ji̧tjö, otiwi̧bi sulabebi waisachibakwawa towi wa̧ji̧tjöma kukwoko. Jowi wa̧ji̧tjö kukwitjö̧ma i̧ya̧da möle woköbakwo̧ja— jejenö jö̧ba̧lö junijetö Isabenö Jo̧ Diosma jojonöma.
Jojo okobe deinö tebonö ju̧kwadönöbi, mejenö ju̧kwadönöbi, mö köba̧lö ju̧kwadönöbi imidina jawa
18Jemi ikenama:
—Chedemi otiwökö iso̧ jo̧dawa'ye öjoböma. Jo̧kwaobetjö̧ chotidakwo̧sa pjajatakwujunö, itedadanö ichejekwujunö— jö̧ba̧lijetö Isabenö Jo̧ Diosma.
19Ja̧danö, Isabenö Jo̧ Diosma okobe deinö tebonö ju̧kwadönöbi mejenö ju̧kwadönöbi mö köba̧lö ju̧kwadönöbi nijitjö otidijetö. Otidajo̧ma jobadönö öbibö 'yi̧jetö jojo ö̧jobekwö, dakwö imidojobö chedo jö̧ba̧lö. Jojoma Dios ichejebö ujunajawö̧nö tjimibiya midijetö. Ja̧danö okobe deinö böjȩnö ju̧kwadöma jojo imidaja̧nöda mikwijadötö, tjimibiyama. 20Jojoda okobe deinö a̧ji̧kwakwawedönöbi, mö köba̧lö ju̧kwadönöbi, tebonö ju̧kwadönöbi, mejenö ju̧kwadönöbi midijetö. Jo̧kwaijayonö okobe deinö imidajawö̧tjöma bakwujubi debijotö, itedadanö ichejekwuju, ja̧danö jo̧banö pjabatujuma.
Dios isujunö otidina jawa
21Ikenama Isabenö Jo̧ Diosma iso̧nöma bö̧ti söinö abibanö ja̧bijetö. Ja̧danö, jejenö ja̧ajökwenöma aba̧lo̧nö Isabenö Jo̧ Diosma ometupasö'itjö bakwö'i 'yebijetö. Jejenö 'yebajo̧ma iteba'oma yemidanö woachibanö ja̧bijetö. 22Jö'i ometupasö'itjö Isabenö Jo̧ Diosma otidijetö isujunöma. Ikenama jobujunö isujunöma iyijetö iso̧nö.
23Ja̧danö, jojoma isujunö edinö jö̧ba̧lijetö:
—Bisuma ötjö chiwe'ijudanö, chitebiyadanö ichejekwuju. Ja̧danö, isuju, jö̧ba̧lö ötjabikwuju iso̧tjö otikwujuja̧tjö— jö̧ba̧lijetö jojoma. 24Jejenö baledinobetjö̧ bakwo̧ma abe'dotjöbi ojo'dotjöbi 'da̧bachibö labebajo̧ ilekwokwöda ö̧jo jö̧ba̧lö. Ja̧danö, jobadö du̧ju̧tajama iso̧kwö ilekwokwö bakwo̧da babibadö.
25Ja̧danö, jobadö Edén batjonö ju̧kwadöma, iso̧bi, ilekwobi tja̧diju jwibö tjuju̧kwijayonö taba jwiinö ju̧kwijadötö.
Цяпер абрана:
Génesis 2: WPC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2021, All Rights Reserved