JON 2
2
A lagiana lolo vanue Kena
1Lo tagui rani gairue a lagiana lolo togagi venue Kena, lo vanue Kalili. I ratahi Jisas mo toga aiehi, 2ko ram ware Jisas mena nona rorongtagi vage ve rain vano lolo lagiana.
3Tavohe hi a waen huri na lagiana u rovo, i ratahi Jisas mo veve lawea vena, “A waen u rovo denire.”
4I Jisas mo duvi lawea vena, “?Ide, Huri hava gineu gom tau na gineu ngaha laweau? A noku taro he vanai te tau.”
5I ratahi Jisas mo veve lawera tangaloi tabanagi vena, “Igimiu nein vei na hava gineu hi ingeie vin veve lawe gimiu.”
6Ingere a duvi Israel a lengara huri na qaqaga u sao, ko a laha vatu gaiono ram toga aiehi huri na gineu hi, vatahaginire rau lawua u tatarise ve u kakarani ve lita vudolue. 7I Jisas mo veve lawera vena, “Igimiu nen hogoni na laha ngerehi gena wai.” Ingere ram hogonire ram horo madiridiri, 8ko mo rovo nge mo veve lawera vena, “Siserigi ngaha igimiu nen utu na wai lavasigi ko nen laie vano lawe na tangaloi hi mo leogoro na hinaga.”
Ingere ram laie vano lawea, 9ko ingeie mo simi rongo na wai hi, u dori gina waen. Ingeie he ilo tea huri ve a waen hi u vanai logo (nge a tangaloi tabanagi hi rau utu na wai rau iloe); siu nge mo ware na tangaloi hi u legi, 10ko mo veve lawea vena, “Vataha tangaloi rau bete na matani waen tomue, ko lo tagugi a tangaloi rau inu lawua beno nge mo bete na waen he garea te lawuagi. Nge iniko gu wiribibi na matani waen mo dadari siserigi ngaha!”
11I Jisas u vei na nona gigilegi tomuegi ngaha lolo togagi venue Kena lo vanue Kalili, ko mo haharagi na nona managi, ko a nona rorongtagi ram ladohogo ginie.
12Lo tagugi ngaha, i Jisas ko i ratahine ko i retuana ko a nona rorongtagi ram vano sulo togagi venue Kabeniam, ko ingere ram toga aiehi a rani te gaivihe.
I Jisas mo vagamwasaragi na Sara Gogona
13A taro mo kakarani huri na Hinagai Halegagaliu nora duvi Israel, siu i Jisas mo hage a Jerusalem. 14Nge mo haqe na tangaloi lolo Sara Gogona ram sogagi na bulugi, a sibsib ko a rangamea, ko a tangaloi ram lealeahi homu ram toga hivo lo nora tanoi homu. 15Nge mo vai na gaiteli lo garo ko mo vuro lue ngerehi doluegi dena Sara Gogona, mena sibsib ko a bulugi; nge mo talulugi dori na tanoi homu noi rahine ram lealeahi homu ko a nora homu ram gagaburegi; 16ko mo veve lawera hi ram sogagi na rangamea vena, “Nen lai vohogi na gineu ngerehi dena ute tangaha! Nen mese vai na valei Tamaku mo voragi na valei sosogagi!”
17Lune a gineu ngaha mo vai ira rorongtagi ram ladohaqe ve a Reve reve Gogona mo veve vena, “A noku tabetabe huri na valemu, God, u mwere na avi lolo loloku mo gao vohogieu.”
18Ira lawua nora duvi Israel ram duvi taligu lawea, ram huie vena, “?Iniko goin vei na hava gigilegi ve goin haharagi lawe gamai huri ve iniko gu tatarise ve goin vei na gineu ngaha?”
19I Jisas mo duvi vena, “Nein tala vohogi na valei God ngaha ko lo rani gaitolu nain vutue taligu.”
20Ira lawua nora duvi Israel ram huie vena, “Rau vutu na valei God ngaha u lei na higao ngavulu gaivesi domwagi gaiono. ?Wa iniko goin vutue taligu lo rani gaitolu?”
21Nge a valei God hi i Jisas mo laqagi huri na betune. 22Giniehi, tavohe hi ingeie mo maraga taligu dena mateana, a nona rorongtagi ram ladohaqe ve ingeie u veve mwere ngaha; ko ingere ram ladohogo lo Reve reve Gogona ko lo leo hi i Jisas u veve.
I Jisas u ilo na tangaloi doluegi
23Lune hi i Jisas u toga Jerusalem lo taro huri na hinagai Halegagaliu, a sinobu u sao rau ladohogoginie a vevenagi ingere rau lehi na vaigivui u sao u veire. 24I Jisas he vaie tea sibona ve rain ladohogoginie, a vevenagi ingeie u ilo vurugeginire. 25Hatie taranigi ve ihine vin veve lawea hurire a vevenagi ingeie sibona u ilo na havagineu hi mo eno lolo lolora tangaloi.
Цяпер абрана:
JON 2: HNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible Society of the South Pacific, 2013