JON 3
3
I Jisas ko i Nikodimas
1A tangaloi gatagale a henana i Nikodimas, ingeie talo burigi nora Varise, i lawua gorora nora duvi Israel. 2Lolo bongi gatagale ingeie u vano lobei Jisas mo veve lawea vena: “Huhui, igamai gam ilo huri ve iniko a huhui gu vonai den God. Huri a tangaloi vin he vai lei na gigilegi tea ingere ngaha iniko gom vaire, nge hogosie tare ve i God meie.”
3I Jisas mo duvi lawea vena, “A hogo, a hogo, nam veve lawego vena, ihine tea vin he leo na mwasoana garaqa tea i God mo ratahigi lolona nge hogosie tare ve ingeie vin vora taligu.”
4I Nikodimas mo hui Jisas vena, “A tangaloi vin vora taligu wuraha tavohe nge u sesea beno? A hogo, nge vin he ahu taligu lai tea sulolo taqangi ratahine ko siu mo bei vora vagatuegi!”
5I Jisas mo duvi vena, “A hogo, a hogo, nam veve lawego vena, ihine tea vin he ahu lai tea sulolo mwasoana garaqa God mo ratahigi lolona, nge hogosie tare ve ingeie vin vora gena wai mena Vui. 6Ihine mo vora lo tangaloi, nge a tangaloi, ko ihine mo vora lo Vui, nge a vui. 7Gon mese awogi huri nam veve lawego, ‘Mo eno huri ve gimiu nein vora taligu.’ 8A langi mo here vanai logo mwerehi nge mo tarani; gom rongo na rorona, nge go he iloe tea ve mo vanai logo sige mo vano logo. Mwerehi vage vataha tangaloi ram vora gena Vui.”
9I Nikodimas mo huie vena, “?A gineu ngaha vin vei lei wuraha?”
10I Jisas mo duvi lawea vena: “?Wa iniko a huhui nora duvi Israel, ko go he ilo na gineu ngaha tea? 11A hogo, a hogo, nam veve lawego vena, igamai gam veve huri na hava gineu gau iloe, ko gam laqagi matamwasaragi huri na hava gineu gau leo, ne igimiu ne he rono na nomai leo tea. 12?Tare ve ne he ladohogo te gieu tavohe nam veve lawe gimiu huri na gineu talo ure ngaha, nein ladohogogieu wuraha tavohe nain veve lawe gimiu huri na gineu ta eulu? 13Ko ihine tea he hage tea lo eulu nge hogosie i Netui Tangaloi, ngehi u himei den eulu.”
14Mwere i Mosis u tabe hagagi na nunui mwata rau veie gena bras lo gai lolo vanue vurugi, mwerehi vage vin tabe hagagi i Netui Tangaloi, 15huri ve vataha hine mo ladohogoginie vin hakovi na mwasoana radu. 16Huri i God u tabe na ure hageliu; giniehi ne mo siregi Netune gatagale hogosie, huri ve rahine doluegi rain ladohogoginie rain he mate tea ne rain hakovi na mwasoana radu. 17Huri God he hora Netune tea sulolo ure ve vin vevegi na tangaloi nge ve vin vagamwasoire.
18Ihine tea mo ladohogo gi Netui God vin he veveginie lai tea; ihine tea he ladohogo tea u veveginie beno, huri ingeie he ladohogo tea lui Netui God gatagale hogosie. 19A vevegi inge ngaha a leleo u vanai beno sulolo ure, ne a tangaloi rau tarani na dodogi u liuhage dena leleo, huri ingere ram vai na gineu rau esi. 20Ko ihine tea mo vai na gineu esi mo leomasi na leleo ko he vanai tea lobei na leleo, huri nge he tarani na nona gineu esi tea ve vin haharaginire. 21Nge ihine ram vai na gineu hogo mo vanai sulo leleo, huri ve a leleo vin haharagi ve nge u vei na nona tabanagi mwere i God mo tarani.
I Jisas ko i Jon Garuhigogona
22Lo tagugi ngaha, i Jisas ko a nona rorongtagi rau vano lo loloi venue Judia. Ingeie mo toga meire aiehi, ko mo garuhigogona gina sinobu.
23I Jon vage mo garuhigogona lo mahoi venue Aenon, he vagahao tea dena togagi venue Selim, huri aiehi a wai u sao. A sinobu ram vano lobena huri mo garuhigogona ginire. 24Huri ra he tau Jon tea mosigei lolo valei vauveu.
25A rorongtagi noi Jon lavasigi ram tauvuigi ram vuigarogi mena tangaloi a duvi Israel gatagale huri lengai gagaru mo vai mwasaragi lo nagoi God. 26Siu ingere ram vano lobei Jon ko ram veve lawea vena, “Huhui, a tangaloi hi u toga meigo lo tavului wei Jodan, ngehi niko gu laqagi matamwasaragi hurie, nge mo garuhigogona siserigi ngaha, ko vataha na tangaloi ram vano lobena!”
27I Jon mo duvi vena, “A tangaloi vin he hakovi na gineu tea tare ve God vin he betea te lawea. 28Igimiu sibomiu nein lado bubugi ve nau veve vena, ‘Ineu hatie Kraes, nge i God u horau tomueginie.’
29A vavine mo rarai vena lagi a vavine noi taglagi, gahea. A buluana hi mo bului na taglagi, huri mo labe meie ko mo rorongtaginie. Ingeie mo havuhevu huri mo rongo na diloi taglagi. Lo matahala mwerehi tau, i nam havuhevu u liu. 30Ingeie vin lawua taligu, ineu nain mala hivo siuvuine.
Ingeie hi mo vanai den eulu
31Ingeie hi mo vanai den eulu u lawua liu na tangaloi doluegi; ingeie hi mo vanai dena ure ingeie talo ure ko mo laqagi huri na gineu talo ure. Ingeie hi mo vanai den eulu u lawua liu na tangaloi doluegi. 32Nge mo laqagi matamwasaragi huri na gineu ingeie u leo ko u rono, nge ihine tea gatagale he lai na nona leo tea. 33Ihine tea mo lai na nona leo mo haharaginie ve i God a hogo, 34a vevenagi a tangaloi ngehi i God u horae vanai mo laqagi na leo ingere hi a noi God; huri God mo bete na nona Vui lawea doluegi. 35I Mama mo tabe Netune ko u bete na gineu doluegi sulo limana. 36Ihine tea mo ladohogo lui Netui God vin hakovi na mwasoana radu; nge ihine tea mo rahagi Netui God vin he hakovi na mwasoana radu tea, nge a lologagasi noi God mo eno lune.”
Цяпер абрана:
JON 3: HNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible Society of the South Pacific, 2013