HAOKAPHOK 3
3
Mikumowui Tākatung
(Rom 5.12-21)
1 #
Phon 12.9; 20.2. Varena sākakhui ramsā saikorawui ngachaili phara̱na awor themmeikapsai. Ana sha̱nao chili hānga, “ ‘Yāmgui chili khalei thingrongwui athei akhala nani mashaipaimara’ da Varena hāngla?” 2Chieina sha̱nao china phara̱ chili hānga, “Inina yāmgui chiwui thingrongbingwui athei chi shaipaiserra; 3kha Varena hānga, ‘Yāmguiwui alungthungli khalei thingrong chiwui athei mashaipaimara, kasing eina tangda masingza̱paimara, singza̱akha thira ji.’” 4#2 Cor 11.3. Kha phara̱ china sha̱nao chili hānga, “Nani mathimara. 5Varena thei kaja, nanina hi shaikhaleoda naniwui mik rakhaora; kala kashi-kaphā theida Vare thāhaora.” 6Chieina sha̱nao china thingrong chi kashakazāwui vang mathai da kathei eina, kala mikli ngayam ngasak kahai eina kala thingrong china thangmei ngasaka jihaoda, ana chiwui athei chi khuida shai; kala agaharalila kateokha mi, kala ana shai. 7Chieina aniwui mik rakhaowa, kala ani asāmsai eina lei kaji theihaowa; chieina anina khaorātheinā khopkazemkhuilaga ngavai khavai sākhui.
8Zingyinlam Proho Varena yāmguili yaothui kharāwui pheikhon shai, chieina mi chi eina apreiva̱na Proho Varewui eina yāmguiwui thingrongbingwui alungli ngathumhaowa. 9Kha Proho Varena mi chili hoda hānga, “Na kali leili?”
10Ana ngahānkai, “Yāmguilungli ina nawui akhon shai, kha I khamahong eina leikahaiwui vang ngacheehaida ngathum kahaina.”
11Ana hānga, “Na khamahong eina leili da khipāna hāngkhala? Ina nali mashaialu kaji thingrong chiwui athei shaihaola?” 12Mi china ngahānkai, “Nana iwui vang khami sha̱nao china arong chiwui athei chi mida ina shaihaowa.” 13#2 Cor 11.3. Chieina Proho Varena sha̱nao chili hānga, “Nana khi sākahaikhala?” Sha̱nao china ngahānkai, “Phara̱ china ili ning nguingasakhaida shaihaowa.” 14#Phon 12.9; 20.2.Proho Varena phara̱ chili hānga,
“Nana hithāda kasāwui vang,
sha̱keiwui ngachaili kala
ramsā saikorawui ngachaili nali khonshi kahaina;
nawuk eina ngamenzatra,
kala nawui mirin peichaoda ngalei zālaga okthuira.
15Ina sha̱nao naniwui ngachaili kala nawui athei eina awui atheiwui ngachaili yangshi khangarok leingasakra;
ana nakui naikhaira,
kala nana aphei maja̱li makeira.”
16Sha̱nao chili ana hānga,
“Ina nali nao khavaiwui kachotkachāng haklak eina mataisangmira,
chotchānglak eina nana nao pharākhuira,
chithālala nana nagaharali ningchāngchingra,
kala ana nawuitungli mungra.”
17 #
Heb 6.8. Kala Adamli ana hānga,
“Nana napreiva̱wui tui khanganāwui vang,
kala ina nali ‘Chi mashaialu’
da kaso kahai thingthei chi kashaiwui vang ngalei hi nawui vang eina khonkashi ngasāhaira;
nawui mirin peida chotlak eina ot sāda phāshak phazāra,
18ka̱shāt, kuivā nawui vang shokra;
kala luili kashok thingnā-ra̱hā eina na ringra.
19Nana ngaleili malatvāranglakha eina tangda shairanra̱ shokta phazāra;
kaja nali ngalei eina sākakhuina;
na chifana, kala chifa ngasāluira.”
20Mi china apreiva̱li Eve hoi, kaja ana kharing saikorawui ava̱va̱na. 21Kala Proho Varena Adam eina apreiva̱wui vang sāhui eina kachon sākhuida anili ngavaimi.
Yāmguiwui eina Adam eina Eveli Chiho kahai
22 #
Phon 2.7; 22.2,14,19. Chiwui thili Proho Varena hānga, “Yanglu, mi hina ithum akha thāda kashi-kaphā theihaira; ara apāng eina kharingawui thingthei chi khuishaiakha mashimānla ringhaora” — 23chiwui vang eina Proho Varena ali shungkhui khavai ngalei chili lui ot sākhavai Eden yāmguiwui eina chihohaowa. 24Ana mi chili kashamshokhaowa; kala kharingwui thingrong shongfa chi mayon khavai Eden yāmguiwui zingshoshong cherubim kala achikun peida nganingung nganingkhavā meiwon kashoka raighai akha da haihaowa.
Цяпер абрана:
HAOKAPHOK 3: TANGBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.