لشهر مارس؛ رحمات جديدة كل صباحعينة

إلا كنتي كتحزن على سقوط العالم ديالك في عوض أنك تلعن صعوباته، عرف بلّي النعمة زارتك.

الحياة في هاد العالم المهرس صعيبة. نت باستمرار كتعامل مع الإحباط ديال هاد العالم اللّي ماخدامش بالطريقة اللّي قصدها الله. نت ديما كتواجه اللّي ماشي في المُتوقّع. تقريبًا كل نهار خاصك تتعامل مع حوايج ماكنتيش اختارتيها على قبل حياتك، ولكن هي كاينة تماّ بسباب الموقع اللّي كنعيشو فيه. الحياة هنا ودابا هي بحال لكنّا كنعيشو في دار مخربة بدات كتريب على الساس ديالها. هي مازال دار، ولكن ماخدّاماش بالشكل اللّي كان خاصها. البيبان كتتعكّس ديما. الروبينيات ديال الما ماكيخدموش ديما. ماعمرك كتكون متأكد من شنو غيوقع ملّي تركّب شي جهاز في الپريز، والسقف كيبان كيخرّج الما حتى ملّي ماكايناش الشتا. إذن، هادا هو العالم اللّي كنعيشو فيه أنا ونت. هو بالحق دار مخرّبة.

دابا، في الحقيقة كاينين غير جوج ردود الفعل على الانكسار اللّي كيعقد حياة كل واحد فينا: نلعنو أولا نحزنو. نكونو صريحين. اللعن هو الرد الطبيعي. حنا كنلعنو حقيقة أنه خاصنا نتعاملو مع ناس فيهم العيب. حنا كنلعنو حقيقة أنه خاصنا نتعاملو مع الحوايج اللّي ماخداماش مزيان. حنا كنلعنو حقيقة أننا خاصنا نتعاملو مع التلوث والمرض. حنا كنلعنو حقيقة أن الوعود كتخسر، والعلاقات كتتهرّس، والأحلام كتموت. حنا كنلعنو الواقع ديال الألم والمعاناة. حنا كنلعنو حقيقة أن هاد العالم الخاسر تخصّص باش يكون العنوان فين كنعيشو. كل هادشي كيخلّينا مقلقين، بلا صبر، عامرين بالمرارة، غاضبين، ومافرحانينش. أه، مزيان باش مايعجبوناش هاد الحوايج. من الطبيعي نكونو عيّينا بيهم، حيت كيما كيقول بولس في رومية 8، العالم كله كينين وهو كيتسنّى في الفادي. ولكن الشتم واللعن هو الرد الغلط. حنا كنلعنو دوك الصعوبات اللّي خاصنا نتعاملو معاها حيت كيخليو حياتنا صعيبة من اللّي بغينا. الأساس ديال اللعن هو راحتنا، ومتعتنا، وسلامنا. اللعن هو في الأساس أناني. الحزن هو أحسن رد فعل.

الحزن كيقبل المأساة ديال السقوط. الحزن كيعترف بلّي العالم ماغاديش بالطريقة اللّي كانت في القصد ديال الله. الحزن كيطلب الفداء ديال الله، وكيطلب يده اللّي كتجدّد كلشي. الحزن كيعترف بالمعاناة ديال الناس لخرين. الحزن هو شي حاجة كبر من حقيقة أن الحياة صعيبة. الحزن كيحزن على شنو دارته الخطية في الكون وكيكون متشوّق باش يجي الفادي ويجدّد العالم دياله المكسور. إذن، الحزن هو استجابة كتدعمها النعمة.

في هاد الجانب من الأبدية في هاد العالم المكسور، اللعن هو اللغة الأساسية ديال مملكة الذات، ولكن الحزن هو اللغة الأساسية ديال مملكة الله. شنو هي اللغة اللّي غتهدر بيها اليوم؟

من أجل دراسة وتشجيع كتر: تكوين 1 – 3