SAN JUAN 9

Nu qui'yu nu ca ña'a̱ cuityi̱' lo'o ngula

1To' tyucui̱i̱ su ndyaa Jesús, na'a̱ yu ji'i̱ sca ngu' cuityi̱', ca ña'a̱ cuityi̱' lo'o ngula nu quicha bi'. 2Li' nchcuane nu ngu' nu ndyaca tsa'a̱ bi' ji'i̱ Jesús:

―Mstru ―nacui̱ ngu'―, ¿tilaca ntsu'u qui'ya ji'i̱ cha' cuityi̱' cloo yu cua lo'o ngula yu? ¿Ha ycui' yu? ¿Ha ngu' cusu' ji'i̱ yu ndacui qui'ya ji'i̱?

3―Si'i xqui'ya yu cua, si'i xqui'ya ngu' cusu' ji'i̱ yu ―nacui̱ Jesús ji'i̱ ngu'―. Na cuityi̱' yu lo'o ngula yu cha' taca ña'a̱ ngu' ñi'ya̱ laca cña tonu nu cua'ni ycui' Ndyosi lo'o cua'ni Ni cha' tyaca tso'o yu. 4Lo'o tya xee nga'a̱ cha' cua'ni na cña ―nacui̱ Jesús―, lo'o cua ndyaa cuichaa nga'aa caca cua'ni ni sca na cña li'. Lo'o jua'a̱ laca lo'o na' ―nacui̱―, nga'a̱ cha' cua'ni na' lcaa ña'a̱ cña nu ngulo ycui' Ndyosi jna' lo'o nda Ni jna' lijya̱ na' ca nde ―nacui̱ Jesús―. 5Lo'o tya tyi'i̱ na' chalyuu, tya ta na' xee nu tyu'ú ne' cresiya ji'i̱ ñati̱.

6Ndye nchcui' Jesús, li' ngusalú yu xi hitya sañi' lo yuu, cha' nguxa' xi lo'o yuu cha' caca nana'. Nda'a̱ yu nana' bi' chu̱' scua' cloo nu quicha bi'. 7Li' nacui̱ Jesús ji'i̱:

―Yaa nu'u̱, caata chcu nde tojo'o Siloé ―tojo'o bi' naa Siloé cha'cña ji'i̱ ngu', ñi'ya̱ nti' si ñacui̱ na cha'cña ji'na: tojo'o “su nacui̱ ji'i̱ ngu' cha' tsaa ngu'”.

Bi' cha' ndyaa nu quicha bi' ndyaata tojo'o bi' li'. Lo'o ñaa li', cua ndyaca tso'o cloo. 8Lo'o li' nu ngu' nu ndi'i̱ cacua ti su ndi'i̱ nu ngua quicha bi', nu cua na'a̱ su ngüijña msta̱ tsubi' la, li' nchcui' ngu' bi' ji'i̱:

―Nu qui'yu re, ¿ha la cui' yu re laca nu ngua'a̱ calle ngüijña yu msta̱ ji'i̱ ngu'?

9―La cui' yu bi'― nacui̱ tsaca ngu'.

―Si'i yu bi', masi sca ti cuayá' ña'a̱ loo yu bi'― nacui̱ chaca ngu'.

Lo'o li' nguxacui̱ ycui' nu qui'yu bi' cha' ji'i̱ ngu' bi':

―La cui' yu bi' laca na'.

10Li' nchcuane ngu' ji'i̱ yu:

―¿Ñi'ya̱ ngua cha' ndyaca tso'o cloo nu'u̱ juani?

11―Nu ñati̱ nu naa Jesús, bi' laca nu nguxa' xi nana' cha' nguta'a̱ chu̱' scua' cloo na' ―nacui̱ nu qui'yu bi'―. Lo'o li' ngulo yu bi' cña 'na cha' tsa'a na' caata̱ nde tojo'o Siloé, bi' cha' ndya'a̱ ndyaata̱ ca bi'; hora ti ngua tso'o cloo na', tyaca̱' tso'o ña'a̱ na' juani.

12―¿Ma nde ndyaa yu bi'? ―nacui̱ ngu' ji'i̱ li'.

―Ná jlo ti' na' ―nacui̱.

Nchcui' ngu' fariseo lo'o nu ngua cuityi̱'

13Ndyaa lo'o ngu' ji'i̱ nu qui'yu nu ngua cuityi̱' bi' slo ngu' fariseo ne' laa. 14Tsa̱ nu ndi'i̱ cña' ngu' ngua bi', tsa̱ tacati ngua nu lo'o nguxa' Jesús nana' bi', ngua'ni yu jo'o ji'i̱ cloo nu cuityi̱' bi'. 15Lo'o li' nguxana ngu' fariseo, nchcuane ngu' ji'i̱ nu ngua cuityi̱' bi':

―¿Ñi'ya̱ ngua cha' ngua tso'o cloo nu'u̱?

―Nguta'a̱ yu nana' chu̱' scua' cloo na' ―nacui̱ nu qui'yu bi'―, li' ndyaa na' ndyaata̱ chcu, tyaca̱' tso'o ña'a̱ na' juani ―nacui̱.

16Li' ntsu'u xi ngu' fariseo nu nacui̱:

―Si'i slo ycui' Ndyosi ya̱a̱ nu Jesús bi', bi' cha' ná ndaquiya' yu tsa̱ ta'a ji'i̱ ngu'.

Lo'o jua'a̱ ntsu'u xi xa' ñati̱ nu nchcui' ji'i̱ yu ndi'ya̱:

―¿Ñi'ya̱ caca ji'i̱ yu bi' cua'ni yu cña tonu cuentya ji'i̱ ycui' Ndyosi si jua'a̱ ntsu'u tsa qui'ya ji'i̱ yu?

Ná stu'ba cha' nu nchcui' ngu' bi' ji'i̱ Jesús. 17Li' xa' nchcuane ngu' ji'i̱ nu ngua cuityi̱' bi':

―Nu'u̱ ni, ¿ñi'ya̱ chcui' ta nu'u̱ cha' ji'i̱ yu bi' juani, cha' cua ngua'ni yu jo'o ji'i̱ cloo nu'u̱?

Li' nguxacui̱ nu qui'yu bi' cha' ji'i̱ ngu':

―Sca nu cusu' nu nda cha' ji'i̱ ycui' Ndyosi lo'o ñati̱, jua'a̱ laca yu bi' ―nacui̱.

18Ná jlya ti' nu ngu' judío bi', cha' ca ña'a̱ cuityi̱' nu qui'yu bi' lo'o ngula, lo'o nu juani tyaca̱' tso'o xee ña'a̱. Su ndye cha', li' ngusi'ya ngu' ji'i̱ ngu' cusu' ji'i̱. 19Li' nchcuane ngu' ji'i̱ ngu' cusu' bi':

―¿Ha sñi' cu'ma̱ laca yu re? ―nacui̱ ngu'―. ¿Ñi'ya̱ ngua li'? ¿Ha ca ña'a̱ cuityi̱' yu lo'o ngula yu? ¿Ñi'ya̱ ngua cha' ña'a̱ yu juani?

20Li' nguxacui̱ sti xtya'a̱ cha' ji'i̱ ngu' fariseo bi':

―Jlo ti' ya cha' sñi' ya laca yu, jlo ti' ya cha' ca ña'a̱ cuityi̱' yu lo'o ngula yu ―nacui̱ ngu'―, 21pana ná nda ya cuentya tsiya' ti ñi'ya̱ ngua cha' ngujui xee nu ntsu'u cloo yu juani. Ná jlo ti' ya tilaca laca nu ngua'ni jo'o ji'i̱ yu. Xcuane ma̱ ji'i̱ ycui' yu; cua tlyu yu bi', ycui' yu taca ta liñi yu cha' lo'o ma̱.

22Jua'a̱ nacui̱ sti xtya'a̱ nu qui'yu bi' ji'i̱ ngu', cha' ntsi̱i̱ tsa ngu' ji'i̱ ngu' judío bi'; na cua ngua'ni stu'ba ngu' laca cña cha' ji'i̱ ngu' lo'o tya'a ngu' cha' culo'o ngu' ji'i̱ ñati̱ ne' laa, cua ña'a̱ ca ñati̱ nu ñacui̱ cha' Jesús laca Cristo, nu ñati̱ tlyu nu nda ycui' Ndyosi ji'i̱ lijya̱ chalyuu. Nga'aa ta ngu' judío bi' chacuayá' tsaa ngu' ne' laa li'. 23Bi' cha' nacui̱ sti xtya'a̱ nu ngua cuityi̱' bi': “Xcuane ma̱ ji'i̱ ycui' yu, cua tlyu yu bi'”.

24Tya ngusi'ya ngu' ji'i̱ nu ngua cuityi̱' bi' chaca quiya', lo'o li' lye nchcui' ngu' lo'o:

―Chacuayá' ji'i̱ ycui' Ndyosi, ta nu'u̱ cha' liñi lo'o ya juani ―nacui̱ ngu' ji'i̱―. Cua jlo ti' ya cha' ntsu'u tsa qui'ya ji'i̱ nu Jesús bi'.

25―Ná nda na' cuentya si ntsu'u qui'ya ji'i̱ yu ―nacui̱ nu ngua cuityi̱' bi'―. Jlo ti' na' cha' cuityi̱' na' clyo, lo'o juani cua ntsu'u xee cloo na'. Tsa bi' ti cha' jlo ti' na'.

26―¿Ñi'ya̱ ngua'ni yu bi' lo'o nu'u̱ lacua? ―nacui̱ ngu'―. ¿Ñi'ya̱ ngua'ni yu cha' ndyaca tso'o cloo nu'u̱ juani?

27―Cua ndacha' na' ji'i̱ ma̱ tsaca quiya' tsa̱, lo'o ná ngua'a̱ jyaca̱ ma̱ ji'i̱ cha' bi' ―nacui̱ nu qui'yu bi'―. ¿Ni cha' laca xa' nti' ma̱ cuna ma̱ cha' bi' chaca quiya'? ¿Ha lo'o cu'ma̱ nti' ma̱ caca tsa'a̱ ma̱ cha' ji'i̱ yu?

28Li' nchcui' nu ngu' judío bi' cha' ti'í lo'o:

―Nu'u̱ laca sca nu ndyaca tsa'a̱ ji'i̱ yu bi' ―nacui̱ ngu'―, cuare laca ya ñati̱ nu ndyaca tsa'a̱ ji'i̱ jyo'o cusu' Moisés. 29Jlya ti' ya cha' nda ycui' Ndyosi cha' lo'o nu Moisés bi', pana ná jlo ti' ya tsiya' ti ma nde ngutu'u nu Jesús bi' lijya̱.

30Li' nguxtyacui nu qui'yu bi' cha' lo'o ngu' fariseo bi':

―Tlyu tsa cha' nda ma̱ lo'o na' juani ―nacui̱―. Nde cua ti ndu̱ sca nu qui'yu nu ngua'ni ca ti jo'o cloo na', lo'o ná jlo ti' ma̱ tsiya' ti ma nde ngutu'u yu lijya̱ yu ―nacui̱―. 31Jlo ti' lcaa tya'a na cha' ná ndaquiya' ycui' Ndyosi ji'i̱ cha' nu nchcui' ñati̱ cuxi lo'o Ni; ndaquiya' Ni ji'i̱ ngu' lo'o nchcui' ñati̱ nu ndu'ni tacati, ñati̱ nu ndu'ni cña nu ngulo Ni ji'i̱ ―nacui̱―. 32Tya lo'o nguxana chalyuu, bilya cua'ni ngu' cha' tyu'u xee cloo ñati̱ chaca quiya' nu lo'o ca ña'a̱ cuityi̱' ngu' lo'o ngula ngu'. 33Ná caca ji'i̱ yu bi' cua'ni yu cña bi' si si'i ca slo ycui' Ndyosi ngutu'u yu.

34―Ngu' cuxi laca nu'u̱, pana nti' nu'u̱ culu'u xi cha' jo'ó ji'i̱ ya ―nacui̱ ngu' judío li'―. Cuxi nu'u̱ lo'o ngula nu'u̱, jua'a̱ cuxi ti nguluu nu'u̱ ―nacui̱ ngu'.

Lo'o li' ngulo'o ngu' ji'i̱ nu qui'yu bi', nga'aa nda ngu' chacuayá' tsaa ne' laa tsiya' ti.

Na cuityi̱' ngu' cha' ná jlya ti' ngu'

35Li' ngujui cha' ji'i̱ Jesús, ndyuna yu cha' ngulo'o ngu' ji'i̱ nu qui'yu bi' ne' laa. Lo'o ngujyacua Jesús ji'i̱, nchcuane yu ji'i̱ li':

―¿Ha jlya ca ti' nu'u̱ ji'i̱ ycui' nu cua lijya̱ chalyuu cha' caca ñati̱? ―nacui̱ Jesús ji'i̱.

36―¿Tilaca laca yu bi', cusu'? ―nacui̱ nu qui'yu bi'―. Nti' tsa na' xñi na' cha' ji'i̱.

37―Cua na'a̱ nu'u̱ ji'i̱ yu bi' ―nacui̱ Jesús―. Na' laca̱ bi', na' nu nchcui̱' lo'o nu'u̱ juani ti.

38Hora ti ndyatu̱ sti̱' nu qui'yu bi' slo Jesús.

―Jlya ti' na' jinu'u̱, Xu'na ―nacui̱.

39Li' nchcui' Jesús lo'o:

―Cua lijya̱ na' chalyuu cha' cua'ni cuayá' na' ji'i̱ ñati̱, tilaca laca nu xñi cha' jna', tilaca laca nu ná tyaja'a̱ xñi cha' jna' ―nacui̱ Jesús―. Ta na' xee nu tyu'ú ne' cresiya ji'i̱ ngu' nu xñi cha' jna', masi ñi'ya̱ nti' cuityi̱' ti ngu' ndi'i̱ ngu' chalyuu; tacu̱' na' xee ji'i̱ ngu' nu ná tyaja'a̱ xñi cha' jna' tsiya' ti, masi ndu'ni ngu' cha' tso'o tsa ycui' ngu'.

40Ndu̱ xi ngu' fariseo slo Jesús lo'o nchcui' yu jua'a̱.

―¿Ha cuityi̱' cua lacua? ―nacui̱ ngu' ji'i̱ yu.

41―Ná ntsu'u qui'ya ji'i̱ ma̱, si jlo ti' ma̱ cha' cuityi̱' ti ma̱ ―nacui̱ Jesús―. Cha' nchcui' ma̱ cha' taca ña'a̱ ma̱, bi' cha' ña'a̱ ti ntsu'u qui'ya ji'i̱ ma̱.

المحددات الحالية:

SAN JUAN 9: cta

تمييز النص

نسخ