SAN JUAN 8

1Li' ndu'u Jesús, ndyaa yu sca ti nde ca'ya Olivos cha' chcui' yu lo'o ycui' Ndyosi. 2Pana tsa cua cuxee ti, xa' ndatu̱ Jesús ne' laa tonu. Li' ndyu'u ti'i̱ lcaa ñati̱ ca slo yu. Ca bi' ndyaca'a̱ yu ngulu'u yu cha' ji'i̱ ycui' Ndyosi ji'i̱ ngu'. 3Li' ya̱a̱ ngu' fariseo bi' slo Jesús, lo'o ngu' mstru cha' jo'ó, ya̱a̱ lo'o ngu' ji'i̱ sca nu cuna'a̱ nu ndacui qui'ya ji'i̱. Cua ngujui nu cuna'a̱ bi' ji'i̱ ngu' la cui' tyempo nu ngua'a̱ cho' lo'o clyo'o xa' ñati̱. Li' nguxatu̱ ngu' bi' ji'i̱ nu cuna'a̱ bi' cla'be laja su ndi'i̱ ngu'. 4Nchcui' ngu' lo'o Jesús li':

―Mstru ―nacui̱ ngu' bi'―, cua ngujui nu cuna'a̱ re ji'i̱ ya la cui' tyempo lo'o ngua'a̱ cho' lo'o clyo'o xa' ñati̱ ―nacui̱ ngu' ji'i̱ Jesús―. 5Cuentya ji'na, cuentya ji'i̱ cha' nu cua nda jyo'o Moisés lo'o na, ntsu'u cha' cujui'i̱ na quee ji'i̱ cho' cua cha' cujuii na ji'i̱. ¿Ñi'ya̱ ñacui̱ ta nu'u̱ ji'i̱?

6Na nchcui' cuayá' ti ngu' bi' lo'o Jesús, cha' cua nti' ngu' caja cha' ji'i̱ ngu' ñi'ya̱ caca sta ngu' qui'ya ji'i̱ Jesús. Bi' cha' ñi'ya̱ nu nga'a̱ ti yu ndati'i̱chu̱' yu xi, nguscua lo'o sne ya' ti yu lo yuu. 7Lo'o jua'a̱ nchcuane ngu' ji'i̱ Jesús chaca quiya'. Li' ndaca'a̱ liñi Jesús, nchcui' yu lo'o ngu' nu ya̱a̱ lo'o ji'i̱ nu cuna'a̱ bi':

―Lo'o ntsu'u tsaca cu'ma̱ nu ná ntsu'u qui'ya ji'i̱ ma̱ ―nacui̱ yu―, bi' caca nu cujui'i̱ quee ji'i̱ nu cuna'a̱ cua clyo.

8Li' xa' ndati'i̱chu̱' Jesús nscua lo'o sne ya' ti yu lo yuu, nga'aa nchcui' yu li'. 9Lo'o ndyuna ngu' cha' bi', nguxana ngu' ngutu'u ngu' ndyaa ngu' li', cha' cua jlo ti' ngu' cha' ntsu'u qui'ya ji'i̱ ycui' ngu'. Clyo la ndyaa nu ngu' cusu' la, li' ndyaa lcaa ngu' cuentya sca ti ngu'. Li' ndyanu Jesús chaca tya yu, lo'o ña'a̱ ti ndu̱ nu cuna'a̱ bi' ntajatya ji'i̱ yu ni jacua' chcui' yu lo'o. 10Ndaca'a̱ Jesús chaca quiya', li' nacui̱ yu ji'i̱ nu cuna'a̱ bi':

―¿Macala ndyaa ngu' jua? ―nacui̱―. ¿Ha tya ndu̱ nu ngusta qui'ya jinu'u̱?

11―Ná tucui ndu̱ nu ngusta qui'ya 'na, cusu' ―nacui̱ nu cuna'a̱ bi'.

―Tso'o lacua ―nacui̱ Jesús ji'i̱―. Jua'a̱ na', ná ntsu'u qui'ya nu sta na' jinu'u̱. Tyaa clya nu'u̱ juani ―nacui̱―, nga'aa cua'ni la nu'u̱ cha' cuxi.

Xee nu tyu'ú ne' cresiya ji'i̱ ñati̱ laca Jesús

12Chaca quiya' nda Jesús cha' lo'o ngu' ne' laa bi'.

―Na' laca̱ nu nda̱ xee cha' tyu'ú ne' cresiya ji'i̱ ñati̱ ―nacui̱ yu―. Tyanu xee lubii jna' ne' cresiya ji'i̱ ñati̱ nu xñi cha' jna', lo'o jua'a̱ ná nga'a̱ cha' tye chalyuu ji'i̱ ngu' bi' li'; nga'aa ntsu'u cha' tya'a̱ yu'u ngu' bi', ñi'ya̱ nu ndu'ni ngu' nu ná ntsu'u xee jna' ne' cresiya ji'i̱ tsiya' ti.

13Li' nacui̱ ngu' fariseo ji'i̱ Jesús:

―Sca ti nu'u̱ nda cha' liñi cuentya ji'i̱ ycui' ca. Ná tucuá ngu' cha' jinu'u̱ si chcui' nu'u̱ jua'a̱.

14Nguxtyacui Jesús cha' lo'o ngu' li':

―Tucuá ngu' cha' nu ta na' lo'o ngu' tu'ni. Masi sca ti na' nda̱ cha' liñi cuentya ji'i̱ ycui' ca na' ―nacui̱ yu―. Cua jlo ti' na' macala ngutu'u na', lo'o cua jlo ti' na' ma nde tsa'a̱; pana nu cu'ma̱ ni, ná jlo ti' ma̱ tsiya' ti mala ngutu'u na', ná jlo ti' ma̱ ma nde tsa'a̱ ―nacui̱ Jesús ji'i̱ ngu'―. 15Cua laca ngusta ma̱ yabe' chu̱' na'. Lo'o ndyu'ni ma̱ jua'a̱, ndyu'ni ma̱ ñi'ya̱ ndu'ni ñati̱ chalyuu ti. Si'i na lijya̱ na' chalyuu cha' sta na' yabe' chu̱' ñati̱ ―nacui̱―, 16pana taca cua'ni cuayá' na' ji'i̱ ñati̱. Lo'o cua'ni cuayá' na' ji'i̱ ngu' ni, liñi cha' nu ta na' li', cha' si'i ycui' ti na' cua'ni cuayá' na' ji'i̱ ngu' li'; lo'o na' lo'o ycui' Ndyosi nu nda jna' lijya̱a̱ re, stu'ba ti cua'ni cuayá' ya ji'i̱ ngu' li' ―nacui̱ Jesús―. 17Ndaquiya' tsa na ji'i̱ cha' cusu' nu nscua lo quityi cua sa'ni la; ndacua nscua sca cha' nu nchcui' cha' tyu'u lubii ñati̱ ji'i̱ scaa cha' nu ntsu'u ji'i̱, nu lo'o stu'ba ti chcui' tucua tya'a ngu' ji'i̱ cha' bi'. 18Tsaca ngu' bi' laca na' ―nacui̱ Jesús―, cha' nchcui' na' cha' liñi cuentya ji'i̱ ycui' ca na'; nu chaca ngu' bi' laca Sti na' nu nda jna' lijya̱a̱ re.

19―¿Macala ntsu'u Sti nu'u̱ lacua? ―nacui̱ ngu' ji'i̱ Jesús li'.

―Ná nslo ma̱ jna' tsiya' ti, lo'o la cui' ti ná nslo ma̱ ji'i̱ Sti na' ―nacui̱ Jesús ji'i̱ ngu'―. Si cua ndyuloo ma̱ jna', la cui' jua'a̱ cua ndyuloo ma̱ ji'i̱ Sti na' li'.

20Nacui̱ Jesús jua'a̱ lo'o ngulu'u yu ji'i̱ ngu' ne' laa tonu, ntucua yu cacua ti su ndu̱ cñá' su cujui'i̱ ngu' cñi nu caca msta̱ ji'i̱ ngu' ne' laa. Lo'o ná tucui ngua'ni cha' tejeya' ji'i̱ Jesús, cha' tsaa lo'o ji'i̱ yu ni'i̱ chcua̱, cha' tya lyiji tyalaa tyempo ji'i̱ yu cha' xcube' ngu' xña'a̱ ji'i̱ yu.

“Ná caja chacuayá' tsaa ma̱ ca su tyi'i̱ na'”

21Li' xa' nchcui' Jesús lo'o ngu':

―Tsa'a na' ―nacui̱ yu―, li' tsaana ma̱ jna' ca su ndya'a̱ na', pana ná quije na' ji'i̱ ma̱ tsiya' ti ―nacui̱―. Tya lyiji quije na' ji'i̱ ma̱ lo'o cajaa ycui' ma̱ ña'a̱ lo'o cresiya cuxi ji'i̱ ma̱, pana ná caja chacuayá' tsaa ma̱ ca su tyi'i̱ na' li'.

22―¿Ha cujuii yu ji'i̱ ycui' ca yu? ―nacui̱ ngu' judío ji'i̱ tya'a ngu'―. ¿Ha jua'a̱ ntsu'u tyiquee yu lo'o nacui̱ yu: “Ná caja chacuayá' tsaa ma̱ ca su tyi'i̱ na' li'”?

23Bi' cha' tya nda la Jesús xi cha' lo'o ngu' bi':

―Nde chalyuu su ndi'i̱ cu'ma̱ cuxi tsa ndu'ni ñati̱; pana na' ni, chaca chalyuu ca slo ycui' Ndyosi ngutu'u na' ―nacui̱ yu―. Cua ngui'i̱ ma̱ ji'i̱ nu cuxi nu ndu'ni ñati̱ chalyuu; pana na' ni, ntsu'u tyiquee na' ji'i̱ ycui' Ndyosi Sti na' ca su ntucua ycui' Ni ―nacui̱ Jesús―. 24Bi' cha' ni na' ji'i̱ ma̱ cha' cajaa ycui' ma̱ ña'a̱ lo'o cresiya cuxi ji'i̱ ma̱; chañi cha' bi': cajaa ma̱ ña'a̱ lo'o cresiya cuxi ji'i̱ ma̱, si ná jlya ti' ma̱ cha' laca na' ñi'ya̱ nu ni na' ji'i̱ ma̱ cha' laca na'.

25―¿Tilaca laca nu'u̱ lacua? ―nacui̱ ngu' ji'i̱ Jesús li'.

―Tya tsubi' ni na' ji'i̱ ma̱ tilaca laca na' ―nacui̱ Jesús li'―. 26Tya quiña'a̱ la cha' taca chcui' na' lo'o ma̱ nquicha' cuentya ji'i̱ qui'ya nu ntsu'u ji'i̱ ma̱; pana liñi tsa cha' nu nda ycui' Ndyosi nu nda 'na lijya̱a̱, lo'o jua'a̱ cua ña'a̱ ca cha' nu nda Ni lo'o na', bi' ti cha' laca nu nda na' lo'o ñati̱ chalyuu.

27Ná ngua cuayá' ti' ngu' cha' nu nchcui' Jesús lo'o ngu' cha' ji'i̱ ycui' Ndyosi Sti yu. 28Bi' cha' tya nchcui' la Jesús lo'o ngu' li':

―Tiya' la lo'o sicua̱ ma̱ jna' lo crusi, li' caca cuayá' ti' ma̱ cha' laca na' ñi'ya̱ nu ni na' ji'i̱ ma̱, na' nu lijya̱a̱ chalyuu cha' caca̱ ñati̱ ―nacui̱ Jesús―. Ná sca cña ndu'ni na' chacuayá' ji'i̱ ycui' ca na'; ycui' Ndyosi Sti na', bi' laca nu ngulu'u 'na lcaa ca cha' nu nchcui' na' ―nacui̱―. 29Lcaa tsa̱ ndi'i̱ Ni lo'o na', ycui' Ni laca nu nda jna' lijya̱a̱ re. Ná nguxtyanu Sti na' jna', cha' xcui' cña nu ndiya ti' Ni, bi' laca cña nu ndu'ni na'.

30Lo'o ndyuna ngu' cha' nchcui' Jesús jua'a̱, tyu̱u̱ tya'a ngu' ngusñi hique ti ngu' cha' nu nchcui' yu.

“Nga'aa tatsaa ngu' ji'i̱ ma̱ cha' cua'ni ma̱ cña cuxi”

31Lo'o li' nda Jesús cha' lo'o ngu' judío nu jlya ti' ji'i̱ yu.

―Lo'o tyanu cha' nu nclyu'u na' ji'i̱ ma̱ ne' cresiya ji'i̱ ma̱, cha' ji'i̱ ycui' Ndyosi bi', li' chañi cha' laca ma̱ ñati̱ nu ndyaca tsa'a̱ jna' ―nacui̱ Jesús ji'i̱ ngu'―. 32Li' taca ca cuayá' ti' ma̱ lcaa cha' liñi; ná tucui caca tatsaa ji'i̱ ma̱ cha' cua'ni ma̱ cña cuxi ca su ndi'i̱ ma̱, xqui'ya cha' jlo ti' ma̱ cha' liñi bi'.

33―Ñati̱ ji'i̱ jyo'o Abraham laca ya ―nacui̱ ngu' judío bi'―, ni sca ñati̱ bilya tatsaa ji'i̱ ya cha' cua'ni ya cña cuxi. ¿Ñi'ya̱ nti' ta nu'u̱ lo'o nacui̱ nu'u̱ cha': “Nga'aa tatsaa ngu' ji'i̱ ma̱ cha' cua'ni ma̱ cña cuxi ca su ndi'i̱ ma̱”? ―nacui̱ ngu' judío bi' ji'i̱ Jesús.

34―Liñi tsa cha' ta na' lo'o ma̱ juani ―nacui̱ Jesús li'―, cha' cua laca ntsu'u xu'na ñati̱ chalyuu, lcaa ca ñati̱ nu ntsu'u qui'ya ji'i̱ ngu'. 35Lo'o sca ñati̱ nu ntsu'u xu'na ni, cua laca ti hora ndyiji cha' tso'o ji'i̱ ca su ndi'i̱ yu to' tyi xu'na yu, cha' si'i ñi'ya̱ laca sñi' laca msu nu ndi'i̱ slo xu'na yu. Pana sñi' nu xu'na bi', lcaa tyempo ndi'i̱ sñi' lo'o sti, ndyiji tsa cha' tso'o ji'i̱ ―nacui̱ Jesús―. 36Na' nu laca̱ nu sca ti Sñi' ycui' Ndyosi ni, lo'o cua'ni lyaá na' ji'i̱ ma̱, chañi cha' nga'aa caca tatsaa ngu' ji'i̱ ma̱ cha' cua'ni ma cña cuxi chaca quiya' ca su ndi'i̱ ma̱ ―nacui̱―. 37Cua jlo ti' na' cha' tya'a ñati̱ ji'i̱ jyo'o Abraham laca cu'ma̱, pana cua nti' ma̱ cujuii ma̱ jna' cha' ná ntucuá ma̱ cha' nu nchcui' na' lo'o ma̱ ―nacui̱ Jesús―. 38Nclyu'u na' ji'i̱ ma̱ cua ña'a̱ ca cha' nu cua na'a̱ na' slo ycui' Ndyosi Sti na', bi' laca cha' nu nchcui' na' lo'o ma̱. Lo'o cu'ma̱ ni, ndu'ni ma̱ lcaa ña'a̱ cña nu ngua tsa'a̱ ma̱ ji'i̱ sti ma̱, bi' cña ndu'ni ma̱.

39Li' nguxtyacui ngu' cha' lo'o Jesús:

―Jyo'o Abraham bi' ngua jyo'o cusu' ji'i̱ ya, nu nguti'i̱ cua sa'ni la ―nacui̱ ngu'.

―Si chañi cha' laca ma̱ tya'a ñati̱ ji'i̱ jyo'o Abraham bi', li' cua'ni ma̱ ñi'ya̱ nu ngua'ni ycui' Abraham bi' ―nacui̱ Jesús ji'i̱ ngu' bi'―. 40Pana juani nti' tsa ma̱ cujuii ma̱ jna', masi xcui' cha' liñi nclu'u na' ji'i̱ ma̱, la cui' cha' liñi nu nda ycui' Ndyosi lo'o na. 41Ná ngua'ni jyo'o Abraham jua'a̱ ―nacui̱ Jesús―. Chaca nu laca sti cu'ma̱, lo'o jua'a̱ cña nu nclyo nu bi', bi' laca cña nu ndiya la ti' ma̱ cha' ndu'ni ma̱.

―Si'i sñi' nu xña'a̱ laca ya ―nacui̱ ngu'―. Sca ti ycui' Ndyosi laca Sti ya ―ndu'ni ngu' judío lo'o Jesús li'.

42―¿Ha ycui' Ndyosi laca Sti cu'ma̱ lacua? ¿Ni cha' laca ná ntsu'u tyiquee ma̱ ña'a̱ ma̱ jna' lacua? ―nacui̱ Jesús―. Nde slo ycui' Ndyosi ngutu'u na'; xqui'ya Ni, bi' cha' ndi'i̱ na' nde chalyuu ―nacui̱ Jesús―. Si'i cuentya ji'i̱ ycui' ca ti na' lijya̱ na' chalyuu, ngulo ycui' Ndyosi cña jna' cha' ca̱a̱ na'. 43¿Ni cha' laca ná ndaca'a̱ jyaca̱ ma̱ ji'i̱ cha' nu nchcui' na' lo'o ma̱? ―nacui̱ Jesús ji'i̱ ngu' li'―. Ná nchca ji'i̱ ma̱ tsiya' ti caca cuayá' ti' ma̱ cha' nu nda na' lo'o ma̱ ―nacui̱ yu ji'i̱ ngu' judío bi'―. 44Ycui' nu xña'a̱ laca sti cu'ma̱, lo'o jua'a̱ nti' ma̱ cua'ni ma̱ la cui' cña nu ngulo nu bi' ji'i̱ ma̱. Tya lo'o nguxana chalyuu, tya li' nguxana ndyu'ni ñu'u̱ nu bi' ji'i̱ cresiya ji'i̱ ñati̱ ―nacui̱ Jesús―. Ná ngutu'u nu bi' ca su ntsu'u su̱u̱ cha' liñi, ná ntsu'u cha' liñi ji'i̱ nu bi' tsiya' ti ―nacui̱―. Lo'o ñilo'o nu bi' ji'i̱ ñati̱, xquicha' ycui' ca laca cha' cuiñi nu nda nu bi' lo'o ngu'. Sca nu cuiñi laca nu xña'a̱, bi' laca sti lcaa nu cuiñi. 45Nda na' cha' liñi lo'o ma̱, bi' cha' ná jlya ti' ma̱ jna' tsiya' ti, cha' si'i cha' cuiñi nda na' lo'o ma̱. 46Ná caca ñacui̱ ma̱ cha' ntsu'u xqui'ya na'; pana lo'o ta na' sca cha' liñi lo'o ma̱, ¿ni cha' laca ná jlya ti' ma̱ 'na li'? 47Lcaa ñati̱ nu nacui̱ cha' ycui' Ndyosi laca Sti ngu', tyaja'a̱ ngu' bi' cuna ngu' lcaa cha' nu nchcui' Ni lo'o ngu' ―nacui̱ Jesús ji'i̱ ngu' judío bi'―. Pana si'i sñi' ycui' Ndyosi laca cu'ma̱, bi' cha' ná nti' ma̱ cuna ma̱ cha' nu nchcui' na' lo'o ma̱ tsiya' ti.

Cua laca lu'ú Jesús lo'o nguti'i̱ jyo'o Abraham tya sa'ni la

48Li' nguxtyacui ngu' judío cha' lo'o Jesús:

―Liñi cha' nu nchcui' ya jinu'u̱ juani, cha' ngu' Samaria laca nu'u̱. Ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu' li'.

49―Ná ntsu'u cui'i̱ cuxi jna' tsiya' ti ―nacui̱ Jesús―. Chi̱ tsa ndu'ni na' loo ycui' Ndyosi Sti na'; lo'o cu'ma̱ ni, ná ndu'ni chi̱ ma̱ loo na'. 50Pana si'i cha' nti' na' cha' cua'ni tlyu ngu' ji'i̱ ycui' na', cha' ycui' Ndyosi Sti na' ndu'ni cha' caca tlyu na'. Sca ti ycui' Ndyosi laca nu cua'ni cuayá' ji'i̱ lcaa ñati̱. 51Lo'o chañi tsa cha' nu ta na' lo'o cu'ma̱ ndi'ya̱: Lo'o taquiya' ngu' ji'i̱ cha' nu nclyu'u na' ji'i̱ ngu', ná tye chalyuu tso'o nu ta na' ji'i̱ ngu' bi', masi cajaa ngu'.

52Li' xa' nchcui' ngu' judío bi' lo'o Jesús chaca quiya':

―Juani jlo ti' ya cha' ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu'―. Sa'ni ngujuii jyo'o Abraham, sa'ni ngujuii nu xa' la jyo'o cusu' nu nda cha' ji'i̱ ycui' Ndyosi lo'o ñati̱. ¿Ñi'ya̱ nti' nu'u̱ lo'o nacui̱ ca ti nu'u̱: “Ná nga'a̱ cha' tye chalyuu ji'i̱ ñati̱ nu taquiya' ji'i̱ cha' nu nclyu'u na' ji'i̱”? ―nacui̱ ngu'―. 53¿Ha nti' nu'u̱ cha' xti la cha' jlo ti' jyo'o cusu' Abraham ji'i̱ ya, quiña'a̱ la cha' jlo ti' ycui' nu'u̱ lacua? ¿Ha jua'a̱ nti' nu'u̱? Lo'o jyo'o Abraham, lo'o nu xa' la jyo'o cusu' bi', cua ngujuii lcaa ngu' bi'. ¿Tilaca laca nu'u̱, nti' nu'u̱?

54Lo'o li' nacui̱ Jesús:

―Ná tso'o na' tsiya' ti si cua'ni na' cha' caca tlyu ycui' ca ti na', pana ycui' Ndyosi Sti na' ndu'ni cha' caca tlyu na' ―nacui̱―. Ndu'ni ma̱ cha' Sti ma̱ laca ycui' Ndyosi; 55masi ná ndyuloo ma̱ ji'i̱ Ni, pana jua'a̱ ndu'ni ma̱. Nslo na' ji'i̱ Ni tu'ni. Ná taca ñacui̱ na' cha' ná nslo na' ji'i̱ Ni; cuiñi na' si jua'a̱ ñacui̱ na', ñi'ya̱ laca cu'ma̱, cha' cuiñi tsa ma̱. Chañi cha' nslo na' ji'i̱ Ni, jua'a̱ ndaquiya' na' ji'i̱ lcaa cha' nu nchcui' Ni lo'o na' ―nacui̱ Jesús ji'i̱ ngu' judío bi'―. 56Nu Abraham jyo'o cusu' ji'i̱ ma̱ ni, lye tsa ngua ti' yu ña'a̱ yu jna' lo'o cala na' chalyuu. Lo'o li' ndi'ya̱ ngua, cha' cua na'a̱ nu cusu' jna', tso'o tsa ndyu'u tyiquee yu li'.

57Li' lye nchcui' ngu' judío lo'o Jesús:

―Bilya caca tu'ba tyi yija̱ nu'u̱ ―nacui̱ ngu' ji'i̱―. ¿Ñi'ya̱ ngua cha' cua na'a̱ nu'u̱ ji'i̱ jyo'o Abraham lacua?

58―Liñi tsa cha' nu nchcui' na' lo'o cu'ma̱ juani ―nacui̱ Jesús―, cha' cua laca lu'ú na' lo'o ngula jyo'o Abraham bi'.

59Li' ngusñi ngu' quee cha' cu̱ ngu' ji'i̱ Jesús cujuii ngu' ji'i̱ li', pana ndyu'u cuatsi' yu ji'i̱ ngu'. Ngutu'u yu ne' laa bi', nteje tacui yu cla'be su ndi'i̱ ñati̱ ndyaa yu li'.

المحددات الحالية:

SAN JUAN 8: cta

تمييز النص

نسخ