SAN JUAN 3

Jesús lo'o Nicodemo

1Ntsu'u sca ngu' cusu' ji'i̱ ngu' judío nu naa Nicodemo, ngu' fariseo laca. Lo'o ngu' fariseo ni, tacati tsa ndu'ni ycui' ngu', nti' ngu'. 2Ndyaa nu cusu' bi' sca talya su nga'a̱ Jesús:

―Mstru Jesús ―nacui̱―, jlo ti' ngu' cha' nu'u̱ laca sca mstru nu nda ycui' Ndyosi ji'i̱ lijya̱ chalyuu, cha' ná ngua jinu'u̱ cua'ni ni sca cha' tlyu si ná nxtyucua ycui' Ndyosi jinu'u̱. Ná nchca ji'i̱ ñati̱ chalyuu cua'ni ngu' jua'a̱ ―nacui̱ Nicodemo ji'i̱ Jesús.

3Li' nchcui' Jesús lo'o:

―Liñi tsa cha' nu ta na' lo'o nu'u̱ juani: ndu'ni ycui' Ndyosi Sti na' cha' cala ñati̱ chaca quiya', si nti' ngu' xñi ngu' cha' ji'i̱ ycui' Ni cha' caca Ni loo ne' cresiya ji'i̱ ngu' ―nacui̱.

4―¿Ñi'ya̱ caca cala na chaca quiya' si cua cusu' na? ―nacui̱ Nicodemo ji'i̱ Jesús― ¿Ha taca tyatí̱ na ne' xtya'a̱ na chaca quiya' cha' xa' cala na? ―nacui̱.

5-6―Ta na' sca cha' liñi lo'o nu'u̱ juani ―nacui̱ Jesús―. Ñati̱ laca nu nclya lo'o ndu'ni cala ñati̱ chalyuu ji'i̱, pana Xtyi'i ycui' Ndyosi laca nu ndu'ni cha' cha'a̱ cresiya ji'i̱ ngu' ―nacui̱ Jesús―. Ntsu'u cha' caca cucui cresiya ji'i̱ ma̱ si cua nti' ma̱ cha' culo ycui' Ndyosi cña ji'i̱ ma̱. Ntsu'u cha' tyu'u ma̱ lo hitya, lo'o jua'a̱ ntsu'u cha' tyanu Xtyi'i ycui' Ndyosi ne' cresiya ji'i̱ ma̱ ―nacui̱ Jesús ji'i̱ Nicodemo―. 7Ná culacua tsa ti' nu'u̱ cha' nchcui' na' lo'o nu'u̱ cha' ntsu'u cha' cala ñati̱ chaca quiya'. 8Cui'i̱ ni, nchca cui'i̱ macala su nti'; masi nduna na cha' ndañi nchca cui'i̱ li', pana ná nchca cuayá' ti' na macala ngutu'u, ma nde tsaa cui'i̱ bi' li' ―nacui̱ yu―. La cui' jua'a̱ laca lo'o Xtyi'i ycui' Ndyosi, ná nchca cuayá' ti' ngu' ñi'ya̱ nu ndu'ni Ni cha' caca cui cresiya ji'i̱ ngu' ―nacui̱ Jesús ji'i̱.

9―¿Ñi'ya̱ jua'a̱? ¿Ñi'ya̱ caca cha' bi'? ―nacui̱ Nicodemo li'.

10Li' nguxtyacui Jesús cha' lo'o:

―¿Ha si'i mstru cusu' laca nu'u̱ ji'i̱ ngu' judío? ¿Ni cha' laca ná nda nu'u̱ cuentya ji'i̱ cha' bi' lacua? ―nacui̱ yu―. 11Liñi tsa cha' nu nda na' lo'o nu'u̱. Nu cuare, liñi nchcui' ya ji'i̱ sca cha' nu cua jlo ti' ya, sca cha' nu cua na'a̱ ya, pana ná ntucuá ma̱ tsiya' ti cha' nu nchcui' ya ―nacui̱ yu―. 12Ntsu'u cha' nu nchcui' na' lo'o cu'ma̱ cuentya ji'i̱ chalyuu re, pana ná jlya ti' ma̱ cha' bi'. ¿Ñi'ya̱ caca cha' jlya ti' ma̱ jna' si chcui' na' lo'o ma̱ scaa cha' nu ntsu'u ji'i̱ ycui' Ndyosi nu laca loo? ―nacui̱ Jesús ji'i̱ Nicodemo―.

13’Bilya tsaa ni tsaca ñati̱ ca slo ycui' Ndyosi. Sca ti na' nu nda ycui' Ndyosi 'na lijya̱a̱ cha' caca na' ñati̱, cua ndya'a̱ na' cajua, cha' cajua laca tyi na'. 14Lo'o nguti'i̱ jyo'o Moisés nde nati̱' btyi bi' cua sa'ni la, ngusicua̱ yu ji'i̱ sca cuaña chcua̱ nu ndacui chu̱' yaca cha' ña'a̱ ngu' cuaña bi', cha' caca jo'o ji'i̱ quicha nu ntsu'u ji'i̱ ngu' bi' ―nacui̱ Jesús―. Ñi'ya̱ nu ngusicua̱ ji'i̱ cuaña bi', jua'a̱ nga'a̱ cha' sicua̱ ngu' jna' lo crusi, na' nu lijya̱a̱ cha' caca na' ñati̱. 15Lo'o li' cua ña'a̱ ca cu'ma̱ nu xñi ma̱ cha' jna', li' caja chalyuu tso'o ji'i̱ ma̱, chalyuu nu ná nga'a̱ cha' tye ―nacui̱ Jesús ji'i̱ Nicodemo―.

Ntsu'u tsa tyiquee Ni ña'a̱ Ni ji'i̱ ñati̱

16’Ntsu'u tsa tyiquee ycui' Ndyosi ña'a̱ Ni ji'i̱ ñati̱ chalyuu, bi' cha' cua nda ycui' Ni jna' nu laca̱ Sñi' ycui' ca Ni lijya̱ na' chalyuu. Ná tsaa ñati̱ ca bilyaa si xñi ngu' cha' jna', nu laca̱ sca ti Sñi' ycui' Ndyosi; caja chalyuu tso'o ji'i̱ ngu' bi', chalyuu nu ná nga'a̱ cha' tye ―nacui̱ Jesús―. 17Si'i cha' sta ycui' Ndyosi Sti na' qui'ya ji'i̱ ñati̱ chalyuu nda Ni jna' lijya̱ na' chalyuu, na cua lijya̱ na' cha' cuityi̱ na' qui'ya nu ntsu'u ji'i̱ ñati̱ chalyuu; bi' cha' cua nda Ni jna' lijya̱ na' ―nacui̱ Jesús―.

18’Ná xcube' ycui' Ndyosi ji'i̱ cua ña'a̱ ca ñati̱ nu xñi cha' jna'. Cua ngua'ni cuayá' Ni ji'i̱ lcaa ñati̱ nu ná nxñi cha' jna', cha' xcube' Ni ji'i̱ ngu', cha' ná ntaja'a̱ ngu' jlya ti' ngu' jna' cha' laca̱ nu sca ti Sñi' ycui' Ndyosi ―nacui̱ Jesús―. 19Na cua nda ycui' Ndyosi xee lijya̱ lo yuu, pana ná ntaja'a̱ ñati̱ chalyuu tyi'i̱ su xee bi'. Ntsu'u tsa ngu' nu ndiya la ti' tyi'i̱ ngu' su talya ña'a̱, cha' xña'a̱ tsa ngu' bi'; bi' cha' ntsu'u qui'ya nu ngusta Ni ji'i̱ ngu' bi'. 20Ná nti' nu ñati̱ xña'a̱ bi' cha' ta ycui' Ndyosi xee nu tyu'ú ne' cresiya ji'i̱ ngu'. Tyijyu' ti ndya'a̱ ngu' bi' su ná ña'a̱ xa' ñati̱ ji'i̱ ngu', xqui'ya cha' xcui' cha' cuxi ndu'ni ngu' bi' ―nacui̱ Jesús―. 21Ñati̱ nu xñi lcaa cha' liñi nu nda Ni lo'o ñati̱ ni, nda ycui' Ndyosi xee nu tyu'ú ne' cresiya ji'i̱ ngu' bi'. Ndi'i̱ ngu' su xee bi', cha' taca ca jlo ti' xa' ñati̱ cha' ndyu'ni ngu' bi' cua ña'a̱ ca cña nu nclyo ycui' Ndyosi ji'i̱ ngu'.

Xa' nda Juan Bautista cha' ji'i̱ Jesús lo'o ñati̱

22Tiya' la li' ndyaa Jesús, ndyaa lo'o ñati̱ nu ndyaca tsa'a̱ ji'i̱ yu, nguti'i̱ ngu' xi nde loyuu su cuentya Judea. Ntyucuatya Jesús ji'i̱ ngu' ca bi'. 23Lo'o jua'a̱ nga'a̱ Juan cacua ti, cha' lo'o tya ntyucuatya Juan ji'i̱ ngu'. Sca se'i̱ su naa Enón, ca bi' ngutu̱ Juan, cacua ti ji'i̱ sca se'i̱ su naa Salim. Ca bi' ntyucuatya ji'i̱ ngu' cha' ca bi' ntsu'u tsa hitya. Ndya'a̱ tsa ngu' cha' tyucuatya ji'i̱ ngu'. 24Tya lyiji su'ba ngu' ji'i̱ Juan ne' chcua̱ tyempo bi'.

25Lo'o li' nda xi ngu' judío cha' cusu̱u̱ lo'o ngu' nu ndyaca tsa'a̱ ji'i̱ Juan; nguxlyú ngu' cha' hichu̱' tya'a ngu' ñi'ya̱ nu tso'o la cua'ni ngu' cha' caca lubii cresiya ji'i̱ ngu' cuentya ji'i̱ ycui' Ndyosi. 26Bi' cha' ya̱a̱ ngu' slo Juan cha' chcui' ngu' lo'o:

―Mstru ―nacui̱ ngu'―, nu ñati̱ nu ya̱a̱ slo nu'u̱ nde chaca tsu' sta'a̱ Jordán tya tsubi' la, la cui' nu nacui̱ nu'u̱ cha' loo la laca ycui' yu, cua ndyalaa yu bi' ntyucuatya yu ji'i̱ ñati̱ nde tsu' re juani. Ndya'a̱ tsa ngu' slo.

27Li' nguxacui̱ Juan cha' ji'i̱ ngu' bi':

―Tsa lo cua ti cña nchca ji'i̱ scaa na cua'ni na, tsa ña'a̱ nu nda ycui' Ndyosi chacuayá' cua'ni scaa na ―nacui̱―. 28Cua ndyuna ma̱ ñi'ya̱ nu ni na' ji'i̱ ma̱ tsubi' ti, cha' si'i na' laca̱ Cristo, nu ñati̱ tlyu nu cua ca̱a̱ ti chalyuu. Cua laca ti cña ntsu'u jna' cha' yala la ngutu'u tucua na' loyuu re cha' quiñi tyucui̱i̱ su ca̱a̱ ycui' ―nacui̱ Juan―. 29Ñi'ya̱ nu laca lo'o ngujui clyo'o ngu', sca ti nu cutsii bi' ngujui clyo'o lo'o nu cuxi̱i̱; pana lcaa tya'a tso'o cutsii nu ndi'i̱ ca bi', tso'o tsa ntsu'u tyiquee ngu'. Ñi'ya̱ lo'o chaa ti' ngu' ndi'i̱ ngu' lo'o ngujui clyo'o ngu', jua'a̱ na' tso'o tsa ntsu'u tyiquee na' cha' ña'a̱ na' ji'i̱ ngu' nu ndya'a̱ lo'o Jesús ―nacui̱ Juan―. 30Lo'o jua'a̱ caca tlyu la ycui' yu, sube la nscua cha' caca na' li'.

Nde slo ycui' Ndyosi ngutu'u Jesús

31Loo la laca ycui' Cristo cha' ngutu'u yu nde cua̱ ca su ntucua ycui' Ndyosi, ya̱a̱ yu nde chalyuu. Pana nu Juan ni, sñi' sca ñati̱ chalyuu ngua bi'; nde chalyuu ntsu'u tyi, nchcui' ñi'ya̱ nu nchcui' ñati̱ ti. Nu Jesucristo ni, ya̱a̱ yu bi' nde cua̱ ca su ndi'i̱ ycui' Ndyosi, 32nda yu cha' liñi lo'o na cuentya ji'i̱ lcaa na nu cua na'a̱ yu, lcaa cha' nu cua ndyuna yu ca bi'. Pana ná ntaja'a̱ ñati̱ xñi cha' nu nda yu lo'o ngu'. 33Si taquiya' na ji'i̱ cha' nu nda Jesús, li' ndu'ni na lo'o tya'a na cha' liñi tsa laca cha' nu nda ycui' Ndyosi lo'o na. 34Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na. 35Ntsu'u tsa tyiquee ycui' Ndyosi Sti yu ña'a̱ Ni ji'i̱ Sñi' Ni, la cui' Jesús bi'; lo'o jua'a̱ lcaa chacuayá' nu ntsu'u ji'i̱ ycui' Ni, la cui' ti cua nda Ni ji'i̱ Sñi' Ni lijya̱. 36Lo'o xñi ñati̱ cha' ji'i̱ Jesús, Sñi' ycui' Ndyosi, ná nga'a̱ cha' tye chalyuu tso'o nu ta Ni ji'i̱ ngu' bi'. Pana ñati̱ nu ná taquiya' tsiya' ti ji'i̱ cha' nu nchcui' Jesús, ná ta Ni chalyuu tso'o ji'i̱ ngu' bi'; xcube' tsa Ni ji'i̱ ngu' bi' li'.

المحددات الحالية:

SAN JUAN 3: cta

تمييز النص

نسخ