SAN JUAN 4

Nu cuna'a̱ ngu' Samaria

1Lo'o li' ndyuna ngu' fariseo, nda ngu' cuentya cha' quiña'a̱ la ñati̱ ndya'a̱ lo'o Jesús cha' caca tsa'a̱ ngu' ji'i̱ yu, jua'a̱ ntyucuatya yu ji'i̱ ngu'; xti la ngu' ndi'i̱ nu ndyaca tsa'a̱ ji'i̱ Juan. 2Pana si'i ycui' Jesús nu ntyucuatya ji'i̱ ngu' bi'; nu ngu' cuañi' nu ndyaca tsa'a̱ ji'i̱, bi' laca nu ntyucuatya ji'i̱ ngu'. 3Nu lo'o ngua cuayá' ti' Jesús cha' cua ndyuna ngu' fariseo cha' bi', li' ndu'u yu nde loyuu su cuentya Judea, ndyaa yu chaca quiya' ca loyuu su cuentya Galilea bi' li'.

4Nu lo'o ndyaa Jesús tyucui̱i̱, nteje tacui yu nde loyuu su cuentya Samaria. 5Li' ndyalaa yu quichi̱ Sicar, sca quichi̱ su ndi'i̱ ngu' Samaria. Ndi'i̱ quichi̱ bi' lo yuu nu nda jyo'o Jacob ji'i̱ jyo'o José sñi'. 6Ca bi' ndu̱ sca tyuu pilya nu nacui̱ ngu' cha' tyuu ji'i̱ jyo'o Jacob laca bi'. Nde hora ngua li', lo'o jua'a̱ ngua cña' tsa Jesús tyucui̱i̱. Li' ndyaa tucua yu to' tyuu bi'. 7-8Cua ndyaa ngu' nu ndyaca tsa'a̱ ji'i̱ lquichi̱, ndyaa ngu' cui'ya ngu' na cacu ngu'. Lo'o li' ya̱a̱ sca nu cuna'a̱ ngu' Samaria yaa qui'ya hitya.

―¿Ha ná ta xi hitya co'o na'? ―nacui̱ Jesús ji'i̱ nu cuna'a̱ bi'.

9―Ngu' judío laca nu'u̱ ―nacui̱ nu cuna'a̱ bi'―, lo'o na', ngu' Samaria laca na'. ¿Ni cha' laca ndijña nu'u̱ hitya jna' cha' co'o nu'u̱? ―nacui̱ nu cuna'a̱ bi'.

Nacui̱ jua'a̱ cha' ná ntsu'u cha' ji'i̱ ngu' Samaria lo'o ngu' judío tyempo bi'. 10Li' nguxacui̱ Jesús cha' ji'i̱ nu cuna'a̱ bi':

―¿Ha ná jlo ca ti' nu'u̱ ña'a̱ cha' tso'o nu nda ycui' Ndyosi ji'i̱ ñati̱? ―nacui̱ Jesús―. Si jlo ca ti' nu'u̱ tilaca laca nu ngüijña hitya co'o jinu'u̱, ná tyiquee' chcui' nu'u̱ lo'o na' cha' ta na' hitya co'o ycui' nu'u̱ li' ―nacui̱―, lo'o li' ta na' hitya co'o nu'u̱ nu chañi ca cha' cua'ni cu'ú cresiya jinu'u̱.

11―Cusu' ―nacui̱ nu cuna'a̱ bi' ji'i̱ Jesús―, qui'ñi tsa tyuu re; ná lo'o cubeta jinu'u̱ ―nacui̱―. ¿Ñi'ya̱ caca culo nu'u̱ hitya cha' cua'ni cu'ú nu'u̱ 'na? ―nacui̱―. 12¿Ha tlyu la nu'u̱ que jyo'o cusu' Jacob ji'na nu nda tyuu re ji'i̱ ya? ―nacui̱―. Ndyi'yu jyo'o bi' hitya tyuu re, lo'o jua'a̱ ndyi'yu sñi' yu, lo'o scu̱' ngu' ndyi'yu hitya re.

13―Lo'o co'o ngu' hitya tyuu re ―nacui̱ Jesús―, xa' tyucua nguityi ngu' tiya' la ―nacui̱ yu―. 14Lo'o co'o ngu' hitya nu ta na', nga'aa tyucua nguityi ngu' tsiya' ti li' ―nacui̱―. Ta na' sca lo hitya co'o ngu' nu cua'ni cu'ú cresiya ji'i̱ ngu'. Ndi'ya̱ laca bi': ñi'ya̱ si laca sca su̱u̱ hitya nde ne' cresiya ji'i̱ ngu', jua'a̱ ná nga'a̱ cha' tye chalyuu ji'i̱ ngu' li'.

15Li' nguxacui̱ nu cuna'a̱ bi' cha' ji'i̱ Jesús:

―Ta clya nu'u̱ hitya bi' co'o na', cusu' ―nacui̱―, cha' nga'aa tyucua nguityi na', cha' nga'aa ta cña 'na cha' ca̱a̱ qui'ya na' hitya ca nde.

16Li' nchcui' Jesús lo'o nu cuna'a̱ bi':

―Yaa clya nu'u̱ yaaqui'ya ji'i̱ clyo'o cha' ca̱a̱ ca nde.

17―Ná ntsu'u clyo'o na' ―nacui̱ nu cuna'a̱ bi' li'.

―Liñi nchcui' nu'u̱ lo'o na' cha' ná ntsu'u clyo'o nu'u̱ ―nacui̱ Jesús li'―. 18Cua ca'yu quiya' ngujui clyo'o nu'u̱ sa'ni la, lo'o jua'a̱ si'i clyo'o laca nu qui'yu nu nga'a̱ lo'o nu'u̱ juani ―nacui̱―. Liñi tsa cha' nu nchcui' nu'u̱ lo'o na'.

19―Cusu' ―nacui̱ nu cuna'a̱ bi'―, cua ngua cuayá' ti' na' juani cha' tii tsa nu'u̱; sca nu laca tu'ba ji'i̱ ycui' Ndyosi cha' nchcui' Ni lo'o ñati̱ laca nu'u̱ ―nacui̱―. 20Ca'ya cua̱ cua ni, tacati tsa ca'ya cua̱ cua ji'i̱ jyo'o cusu' ji'i̱ ya, cha' nde bi' ti ngua'ni tlyu ngu' jyo'o bi' ji'i̱ ycui' Ndyosi; pana xa' cha' nti' cu'ma̱ ngu' judío, cha' nacui̱ ma̱ cha' ntsu'u cha' cua'ni tlyu na ji'i̱ ycui' Ndyosi sca ti ca ne' laa tlyu ca Jerusalén.

21―Cua'a̱ jyaca̱ nu'u̱ jna' ―nacui̱ Jesús ji'i̱ nu cuna'a̱ bi'―. Cua ngulala ti tyempo cha' nga'aa cua'ni tlyu ma̱ ji'i̱ ycui' Ndyosi nde ca'ya tacati cua, ni si'i ca quichi̱ Jerusalén ―nacui̱―. 22Cu'ma̱ ngu' Samaria ni, lo'o ndu'ni tlyu ma̱ ji'i̱ ycui' Ndyosi ná nslo ma̱ ti ji'i̱ ndu'ni tlyu ma̱; pana ngu' judío cuare, nslo ya ti ji'i̱ ndu'ni tlyu ya, cha' sca ngu' quichi̱ tyi ya laca nu ñati̱ tlyu nu cua'ni lyaá ji'i̱ lcaa ñati̱ ―nacui̱ Jesús ji'i̱ nu cuna'a̱ bi'―. 23Cua ngulala ti hora, cua la cui' hora ndyaca juani, cha' cua'ni tlyu ma̱ ji'i̱ ycui' Ndyosi tyucui tyiquee ma̱. Lo'o jua'a̱ xtyucua Xtyi'i ycui' Ni ji'i̱ ma̱ li', cha' jua'a̱ nti' ycui' Ndyosi cha' cua'ni na lo'o cua'ni tlyu na ji'i̱ Ni. 24Ná taca ña'a̱ na ji'i̱ ycui' Ndyosi; ñi'ya̱ laca sca xee nu tso'o tsa ntyiji'i̱ lijya̱, jua'a̱ laca ycui' Ndyosi. Ñati̱ nu chañi cha' nti' ngu' cua'ni tlyu ngu' ji'i̱ ycui' Ni, nga'a̱ cha' cua'ni tlyu ngu' ji'i̱ Ni tyucui tyiquee ngu'; xtyucua Xtyi'i ycui' Ndyosi ji'i̱ ngu' bi' li'.

25Lo'o li' nguxtyacui nu cuna'a̱ bi' cha' lo'o Jesús chaca quiya':

―Nda na' cuentya cha' cua ca̱a̱ ti sca ñati̱ tlyu nu ta ycui' Ndyosi ji'i̱ cha' ca̱a̱ chalyuu, nu caca naa Cristo ―nacui̱―. Lo'o ca̱a̱ yu bi', li' culu'u liñi yu lcaa cha' tucui ji'na.

26Li' nacui̱ Jesús ji'i̱ nu cuna'a̱ bi':

―La cui' bi' laca na' nu nchcui̱' lo'o nu'u̱ juani.

27Li' xa' ya̱a̱ ñati̱ nu ndyaca tsa'a̱ ji'i̱, ndube tsa ti' ngu' cha' ntucua Jesús ndya cha' lo'o sca nu cuna'a̱. Pana ná nchcuane ngu' ji'i̱ nu cusu' bi': ¿Ni cha' nti' nu cuna'a̱ cua lo'o nu'u̱? ¿Ni cha' nda nu'u̱ lo'o nu cuna'a̱ cua? 28Li' ngusta nu cuna'a̱ bi' te'í̱ hitya lo yuu, ngutu'u ndyaa lquichi̱; ndyaa cho' ndyaa ndacha' cho' ji'i̱ ngu' quichi̱ cha' tsaa ngu' tsaa na'a̱ ngu' ji'i̱ Jesús.

29―Cajua ti ndu̱ sca ñati̱ nu tii tsa ―nacui̱ nu cuna'a̱ bi'―. Lcua ti lo cña nu ngua'ni na' ya̱a̱ na' chalyuu, lcaa cha' bi' cua ndacha' nu cusu' bi' jna'. ¿Ha bi' nu laca Cristo nu ñati̱ tlyu nu cua ca̱a̱ ti, nti' cu'ma̱?

30Li' ngutu'u ngu' ndyaa ngu' ca su ntucua Jesús. 31Laja li' ndu̱ ñati̱ nu ndyaca tsa'a̱ ji'i̱, tya'na nchcui' ngu' lo'o Jesús cha' cacu yu xi tyaja.

―Mstru ―nacui̱ ngu'―, cacu nu'u̱ xi.

32―Cua nguaala' ti' na' ―nacui̱ Jesús li'―. Cua ntsu'u xi na ndyacu na' re nu ná nslo ma̱ ji'i̱.

33Li' nchcui' ngu' nu ndyaca tsa'a̱ ji'i̱ lo'o tya'a ngu':

―¿Ha ya̱a̱ ngu' ya̱a̱ lo'o ngu' na cacu yu? ―nacui̱ ngu'.

34Ndi'ya̱ nacui̱ Jesús ji'i̱ ngu' bi' li':

―Lo'o ndu'ni na' cña ji'i̱ ycui' Ndyosi Sti na', li' ndyaala' ti' na' ñi'ya̱ si cua ndyacu na', ñi'ya̱ si cua ndyo'o na' hitya ―nacui̱ yu―. Nga'a̱ cha' cua'ni tye na' cña nu nda Ni 'na lijya̱a̱ nde chalyuu ―nacui̱―. 35¿Ha ná chañi cha' nu nchcui' ngu' ndi'ya̱? “Lo'o caca jacua co', lo'o ti caca clacua” ―nacui̱ Jesús ji'i̱ ngu' nu ndyaca tsa'a̱ ji'i̱―. Pana chaca cha' ñacui̱ na' ji'i̱ ma̱ juani, cha' xña'a̱ ma̱ xi ji'i̱ ñati̱ quiña'a̱ jua nu cua lijya̱ ti slo na ―nacui̱―. Nti' tsa ngu' bi' cuna ngu' cha' nu chcui' na' lo'o ngu'. Ñi'ya̱ laca sca xtya̱ nu tso'o tsa ndyatsi, cha' cua ngulala ti caca clacua, jua'a̱ laca ngu' bi'. 36Caja xcaya' msu 'na nu cua'ni clacua bi', ni ná nga'a̱ cha' tye cña nu cua'ni msu bi'. Lo'o li' stu'ba ti caca chaa ti' ngu' bi' lo'o ngu' nu cua ngusañi si'yu, la cui' ñati̱ nu ngusañi cha' tso'o ji'i̱ ycui' Ndyosi lcaa su ndi'i̱ ñati̱ tya clyo la; stu'ba ti caca chaa ti' ngu' bi' lo'o ñati̱ nu cua na'a̱ lo'o ndyatí̱ ca cha' bi' ne' cresiya ji'i̱ ngu' ―nacui̱ Jesús ji'i̱ ngu' nu ndyaca tsa'a̱ ji'i̱―. 37Chañi laca cha' nu nchcui' ngu': “Tsaca laca nu ndyataa nscua', chaca laca nu cua'ni clacua”. 38Nu cu'ma̱ ni, cua ngulo na' cña ji'i̱ ma̱ ―nacui̱ Jesús―, cha' tsaa ma̱ cua'ni tye ma̱ sca cña nu bilya cua'ni ma̱, cha' tya̱a̱ ma̱ tya̱a̱ lo'o ma̱ ji'i̱ ñati̱ ca slo na', cua ña'a̱ ca ñati̱ nu xñi cha' 'na. Xa' ñati̱ cua ngua'ni cña bi' yala la, lo'o juani ña'a̱ ma̱ ñi'ya̱ nu ndu'u tucua cña nu ngua'ni ngu' tya li'.

39Lo'o jua'a̱ tyu̱u̱ tya'a ngu' Samaria, ngu' ca tyi ni, cua ngusñi ngu' cha' ji'i̱ Jesús xqui'ya cha' nu nda nu cuna'a̱ bi' lo'o ngu': “Lcua ti lo cña nu ngua'ni na' ya̱a̱ na' chalyuu, lcaa cha' bi' nchcui' nu cusu' bi' lo'o na'”, nacui̱ nu cuna'a̱ bi' ji'i̱ ngu'. 40Lo'o li' ndyalaa ngu' Samaria bi' ca su ntucua Jesús, tya'na nchcui' ngu' lo'o Jesús cha' tyanu la xi quichi̱ tyi ngu'. Bi' cha' ndyanu Jesús ca bi' tya tyucuaa tsa̱ li'. 41Lo'o ndyuna la ngu' cha' nu nda ycui' Jesús lo'o ngu', cua quiña'a̱ la ngu' ngusñi ngu' cha' ji'i̱ yu. 42Li' nacui̱ ngu' bi' ji'i̱ nu cuna'a̱ bi':

―Si'i xqui'ya nu'u̱ ngusñi ya cha' ji'i̱ yu juani. Na cua nchcui' ycui' yu lo'o ya, bi' cha' jlya ti' ya cha' nu nchcui' yu; cua nda ya cuentya cha' chañi cha' laca nu cusu' re Cristo, nu ñati̱ tlyu nu cua ca̱a̱ ti cha' cua'ni lyaá ji'i̱ lcaa ñati̱ chalyuu.

Ngua'ni Jesús jo'o ji'i̱ sñi' ngu' laca cña

43Lo'o ndu'u scua tucua tsa̱ bi', li' ngutu'u Jesús loyuu su cuentya Samaria ndyaa nde loyuu su cuentya Galilea. 44Cua nacui̱ yu cha' nga'aa ndu'ni chi̱ ngu' loo ñati̱ tya'a quichi̱ tyi ngu', si ta ñati̱ bi' cha' ji'i̱ ycui' Ndyosi lo'o ngu'; bi' cha' ndyaa yu nde Galilea chaca quiya'. 45Lo'o cua ndyalaa yu nde loyuu bi', tso'o tsa nchcui' ngu' Galilea lo'o. Cua na'a̱ ngu' bi' lcaa cña tonu nu ngua'ni Jesús nu lo'o ndyaa yu ta'a quichi̱ Jerusalén bi', cha' lo'o ngu' bi' ndyaa ngu' ta'a.

46Lo'o li' xa' ndyaa Jesús ca quichi̱ Caná loyuu su cuentya Galilea chaca quiya'; quichi̱ bi' ngua su ngüiñá Jesús vino lo'o hitya ti, cha' co'o ngu' nu nguti'i̱ ta'a bi'. Ca bi' ntsu'u sca ñati̱ tlyu nu ndya'a̱ ne' xña ji'i̱ rey, pana quicha tsa sñi' ntsiya ca to' tyi nu cusu' bi' nde quichi̱ Capernaum. 47Lo'o cua ndyuna nu laca cña bi', cha' ngutu'u Jesús loyuu su cuentya Judea ndyalaa yu sca quichi̱ cacua ti su ndi'i̱ nu cusu' bi', la cui' nde loyuu su cuentya Galilea, li' ndyaa nu cusu' bi' slo Jesús. Ndijña tsa cha' clyu ti' ji'i̱ Jesús cha' tsaa yu quichi̱ tyi nu cusu' bi', cha' tsaa yu cua'ni yu jo'o ji'i̱ nu piti quicha bi', cha' cua cajaa ti.

48―¿Ni jacua' jlya ti' ma̱ ji'i̱ ycui' Ndyosi? ―nacui̱ Jesús ji'i̱ nu cusu' bi' li'―. ¿Ha ná jlya ti' ma̱ cha' caca cua'ni Ni cña si ná lo'o cua'ni na' sca cña tonu cha' ña'a̱ cui'ya ma̱ xi ji'i̱?

49―Cusu' ―nacui̱ nu laca cña bi' ji'i̱ Jesús―, cua'ni cha' tso'o tsaa nu'u̱ to' tyi na' juani, nu lo'o bilya cajaa ti sñi' na'.

50―Tyaa nu'u̱ ca to' tyi ―nacui̱ Jesús ji'i̱―, ca tso'o sñi' nu'u̱ jua'a̱ ti. Ná cajaa bi'.

Jlya ti' nu laca cña bi' cha' nu nchcui' Jesús lo'o. Li' ngutu'u nu cusu' bi' ndyaa quichi̱ tyi. 51Tyucui̱i̱ bi' su nguxtyu̱u̱ ndyaa, ndyacua tya'a lo'o msu ji'i̱:

―Tya lu'ú sñi' nu'u̱, cusu' ―nacui̱ msu ji'i̱―. Nga'aa cajaa bi' juani.

52―¿Ni hora ngua tso'o la sñi' na'? ―nchcuane nu laca cña bi' ji'i̱ msu li'.

―Tya la caa, hora cua tsaca nde ngusi̱i̱, li' ndyu'u tyique' ji'i̱ ―nacui̱ msu ji'i̱.

53Li' ngua cuayá' ti' sti nu piti bi', cha' la cui' hora lo'o nchcui' Jesús lo'o cha' tyaca tso'o sñi', la cui' hora bi' ngua tso'o sñi'. Li' jlya ti' nu cusu' ji'i̱ Jesús, lo'o jua'a̱ jlya ti' lcaa ngu' nu ndi'i̱ ca to'ni'i̱ ji'i̱.

54Cua ngua tucua quiya' nu ngua'ni Jesús sca cña tonu cuentya ji'i̱ ycui' Ndyosi nde loyuu su cuentya Galilea bi', tya lo'o nguxtyu̱u̱ yu nde Galilea.

المحددات الحالية:

SAN JUAN 4: cta

تمييز النص

نسخ