مَرْقُسْ 13
13
الْفَصْلْ تْلْطَاشْ
يَسُوعْ كَيْتّْنَبّْأْ بْلِّي بِيتْ اللَّهْ غَيْتّْرَيّْبْ
1وْمْلِّي خْرَجْ يَسُوعْ مْنْ بِيتْ اللَّهْ، ݣَالْ لِيهْ وَاحْدْ مْنْ التّْلَامْدْ دْيَالُه: «آ سِيدِي، شُوفْ شْحَالْ كْبِيرْ هَادْ الْحْجَرْ، وْشْحَالْ كْبِيرْ هَادْ الْبْنِي!». 2وْهُوَ يْجَاوْبُه يَسُوعْ: «يَاكْ كَتْشُوفْ هَادْ الْبْنِي الْكْبِيرْ؟ رَاهْ حْتَّى حَجْرَة مْنُّه مَا غَتْبْقَى فْبْلَاصْتْهَا، كُلّْشِي غَيْرِيبْ».
عَلَامَاتْ أَخّْرْ الزّْمَانْ
3وْمْلِّي كَانْ يَسُوعْ ݣَالْسْ فْجْبَلْ الزِّيتُونْ مْقَابْلْ مْعَ بِيتْ اللَّهْ، سْوّْلُه بُطْرُسْ وْيَعْقُوبْ وْيُوحَنَّا وْأَنْدْرَاوُسْ بِينْهُمْ وْبِينُه: 4«ݣُولْ لِينَا إِيمْتَى غَيْوْقَعْ هَادْشِّي؟ وْأَشْنُو هِيَ الْعَلَامَة اللِّي غَتْبَيّْنْ بْلِّي هَادْشِّي كُلُّه قَرّْبْ يْوْقَعْ؟». 5وْجَاوْبْهُمْ يَسُوعْ وْبْدَا كَيْݣُولْ لِيهُمْ: «رْدُّو بَالْكُمْ لَيْغَلّْطْكُمْ شِي حَدّْ. 6حِيتْ غَيْجِيوْ بْزَّافْ دْ النَّاسْ وْغَيَاخْدُو الْإِسْمْ دْيَالِي وْغَيْݣُولُو: أَنَا هُوَ! وْغَيْغَلّْطُو نَاسْ كْتَارْ. 7مَا تّْخَلْعُوشْ مْلِّي تْسَمْعُو عْلَى الْحَرْبْ وْعْلَى خْبَارْ الْحَرْبْ، حِيتْ هَادْشِّي كُلُّه لَابْدَّ يْوْقَعْ، وَلَكِنْ مَا غَادِيشْ يْكُونْ هَادَا هُوَ اللّْخْرْ دْ الزّْمَانْ. 8غَادِي يْهْجَمْ شَعْبْ عْلَى شَعْبْ وْمَمْلَكَة عْلَى مَمْلَكَة، وْغَيْضْرَبْ الزّْلْزَالْ فْبْلَايْصْ كْتَارْ، وْغَيْجِي الجُّوعْ، وْهَادْشِّي كُلُّه غِيرْ الْبْدُو دْيَالْ الْوْجَعْ. 9وْنْتُمَ رْدُّو بَالْكُمْ: رَاهْ غَيْسَلّْمُوكُمْ لْلْمَحَاكِمْ، وْغَيْضَرْبُوكُمْ فْدْيُورْ الصّْلَاة، وْغَتْوَقْفُو قُدَّامْ الْحُكَّامْ وْالْمُلُوكْ عْلَى قْبْلِي بَاشْ تْشَهْدُو لِيَّ قُدَّامْهُمْ،#متى 10:17-20؛ لوقا 12:11،12 10وْرَاهْ خَاصّْ فْاللّْوّْلْ يْتْخَبّْرُو الشّْعُوبْ كُلّْهُمْ بْالْبْشَارَة. 11وْمْلِّي يْشَدُّوكُمْ بَاشْ يْسَلّْمُوكُمْ لْلْمَحْكَمَة، مَا تْرَفْدُوشْ الْهَمّْ لْدَاكْشِّي اللِّي غَتْݣُولُو، وَلَكِنْ جَاوْبُو بْالْكْلَامْ اللِّي غَيْعْطِيكُمْ اللَّهْ فْدَاكْ الْوَقْتْ، عْلَاحْقَّاشْ الرُّوحْ الْقُدُسْ هُوَ اللِّي غَيْتّْكَلّْمْ فِيكُمْ مَاشِي نْتُمَ. 12الْخُو غَيْسَلّْمْ خُوهْ بَاشْ يْتّْقْتَلْ، وْالْبُو غَيْسَلّْمْ وَلْدُه بَاشْ يْتّْقْتَلْ، وْالْوْلَادْ غَيْنُوضُو ضْدّْ وَالِدِيهُمْ وْغَيْقْتْلُوهُمْ، 13وْغَيْكَرْهُوكُمْ ݣَاعْ النَّاسْ عْلَى وْدّْ الْإِسْمْ دْيَالِي. وَلَكِنْ اللِّي بْقَى تَابْتْ حْتَّى لْلّْخْرْ غَيْنْجَا».#متى 10:22
الْمْحْنَة الْكْبِيرَة
14«وْمْلِّي تْشُوفُو النَّجَاسَة دْيَالْ الْخَرَابْ فْالْبْلَاصَة فِينْ مَا خَاصّْهَاشْ تْكُونْ -اللِّي كَيْقْرَا هَادْشِّي يْفْهَمْ!- دِيكْ السَّاعَة اللِّي فْبْلَادْ الْيَهُودِيَّة يْهَرْبُو لْلجّْبَالْ، 15وْاللِّي فُوقْ السّْطَحْ#13:15 الدّْيُورْ فْفِلِسْطِينْ فْالْقَرْنْ اللّْوّْلْ كَانُو عَنْدْهُمْ الدّْرُوجْ دْيَالْ السّْطَحْ عْلَى بْرَّا دْ الدَّارْ. وْمْلِّي كَيْشُوفْ شِي وَاحْدْ شِي خَطَرْ، كَيْنْزَلْ مْنْ الدّْرُوجْ دْيَالْ السّْطَحْ وْكَيْخْرُجْ عْلَى بْرَّا بْلَا مَا يْدْخُلْ لْلدَّارْ.، مَا يْنْزَلْشْ وَلَا يْدْخَلْ لْدَارُه بَاشْ يَاخُدْ دَاكْشِّي اللِّي فِيهَا.#لوقا 17:31 16وْاللِّي فْالْفْدَّانْ، مَا خَاصُّوشْ يْرْجَعْ لْدَارُه بَاشْ يْدِّي لْبَاسُه! 17يَا وِيلْ الْعْيَالَاتْ الْحَامْلَاتْ وْاللِّي كَيْرَضّْعُو فْدِيكْ لِيَّامْ! 18وْصَلِّيوْ لْلَّهْ بَاشْ مَا يْوْقَعْشْ هَادْشِّي فْالشّْتْوَة، 19حِيتْ فْدِيكْ لِيَّامْ غَتْكُونْ وَاحْدْ الْمْحْنَة عَمّْرْ مَا كَانْتْ بْحَالْهَا مْنْ النّْهَارْ اللِّي خْلَقْ اللَّهْ الدّْنْيَا حْتَّى لْدَابَا، وْعَمّْرْهَا مَا غَتْعَاوْدْ تْكُونْ.#الرؤيا 7:14 20وْإِلَا مَا قَصّْرْشْ الرَّبّْ مْنْ دِيكْ لِيَّامْ، رَاهْ حْتَّى وَاحْدْ مَا غَيْنْجَا. وَلَكِنْ عْلَى وْدّْ النَّاسْ دْيَالُه اللِّي خْتَارْهُمْ هُوَ، رَاهْ قَصّْرْ مْنْ دِيكْ لِيَّامْ. 21وْرَاهْ إِلَا ݣَالْ لِيكُمْ شِي وَاحْدْ: هَا الْمَسِيحْ هْنَا! وْلَا: رَاهْ هُوَ تْمَّ! مَا تِّيقُوشْ بِيهْ. 22حِيتْ غَادِي يْجِيوْ نَاسْ اللِّي غَيْكَدْبُو وْغَيْݣُولُو بْلِّي هُمَ الْمَسِيحْ وْغَيْجِيوْ أَنْبِيَا كْدَّابِينْ، غَيْدِيرُو عَلَامَاتْ وْعْجَايْبْ، بَاشْ يْوَضّْرُو إِلَا قَدْرُو حْتَّى النَّاسْ اللِّي خْتَارْهُمْ اللَّهْ. 23إِيوَا رْدُّو بَالْكُمْ نْتُمَ. هَانِي خَبّْرْتْكُمْ بْكُلّْشِي قْبَلْ مَا يْوْقَعْ».
الْمْجِي دْيَالْ وَلْدْ الْإِنْسَانْ
24«وَلَكِنْ فْدِيكْ لِيَّامْ، مْنْ بَعْدْ دِيكْ الْمْحْنَة، غَتْضْلَامْ الشّْمْسْ وْالْقَمَرْ مَا غَيْضَوِّيشْ. 25وْغَيْطِيحُو نْجُومْ السّْمَا وْالْقُوَّاتْ اللِّي فْالسّْمَا غَيْتّْزَعْزْعُو. 26وْفْدِيكْ السَّاعَة، غَيْشُوفُو النَّاسْ وَلْدْ الْإِنْسَانْ جَايْ فْالسّْحَابْ بْقُوَّة كْبِيرَة وْبْالْعَزّْ.#الرؤيا 1:7 27وْغَيْصِيفْطْ دْغْيَا الْمَلَايْكَة دْيَالُه بَاشْ يْجَمْعُو اللِّي تّْخْتَارُو لِيهْ مْنْ الشَّرْقْ حْتَّى لْلْغَرْبْ، وْمْنْ الشَّمَالْ حْتَّى لْلْجَنُوبْ، مْنْ الدّْنْيَا كُلّْهَا».
الْمْتَالْ دْيَالْ الْكَرْمَة
28«تْعَلّْمُو مْنْ الْكَرْمَة هَادْشِّي: مْلِّي كَيْخْضَارُو الْعْرُوشْ وْكَيْخَرّْجُو الْوْرَاقْ، كَتْعَرْفُو بْلِّي الصِّيفْ قَرّْبْ. 29وْهَكَّا حْتَّى نْتُمَ مْلِّي تْشُوفُو هَادْشِّي كَيْوْقَعْ، عَرْفُو بْلِّي وَلْدْ الْإِنْسَانْ رَاهْ قَرّْبْ يْجِي وْرَاهْ هُوَ حْدَا الْبِيبَانْ. 30وْنْݣُولْ لِيكُمْ الْحَقّْ: مَا يْجِي فِينْ يْتْقَادَا هَادْ الْجِيلْ حْتَّى تْوْقَعْ هَادْ الْأُمُورْ كُلّْهَا. 31رَاهْ السّْمَا وْالْأَرْضْ غَيْفْنَاوْ وَلَكِنْ كْلَامِي عَمّْرُه مَا غَيْفْنَى. 32أَمَّا دَاكْ النّْهَارْ وْدِيكْ السَّاعَة مَا كَيْعْرَفْهُمْ حَدّْ، لَا مَلَايْكَةْ السّْمَا وَلَا الْوَلْدْ، مْنْ غِيرْ الْآبْ بُوحْدُه».#متى 24:36
بْقَاوْ دِيمَا سْهْرَانِينْ
33«رْدُّو بَالْكُمْ وْبْقَاوْ سْهْرَانِينْ! حِيتْ نْتُمَ مَا كَتْعَرْفُوشْ إِيمْتَى غَيْجِي هَادْ الْوَقْتْ. 34رَاهْ بْحَالْ وَاحْدْ الرَّاجْلْ سَافْرْ وْخْلَّا دَارُه وْكَلّْفْ بِيهَا الْخْدَّامَا دْيَالُه، كُلّْ وَاحْدْ وْخْدَمْتُه، وْوْصَّى الْعْسَّاسْ دْيَالْ الْبَابْ بَاشْ يْعَسّْ مْزْيَانْ.#لوقا 12:36-38 35إِيوَا بْقَاوْ سْهْرَانِينْ! حِيتْ مَا كَتْعَرْفُوشْ إِيمْتَى غَيْجِي مُولْ الدَّارْ، وَاشْ فْالْعْشِيَّة، وْلَا فْنَصّْ اللِّيلْ، وْلَا قْبَلْ مَا يْصْبَحْ الْحَالْ، وْلَا فْالصّْبَاحْ، 36بَاشْ إِلَا جَا عْلَى غَفْلَة مَا يْلْقَاكُمْشْ نَاعْسِينْ. 37وْاللِّي كَنْݣُولُه لِيكُمْ، كَنْݣُولُه لْݣَاعْ النَّاسْ: بْقَاوْ سْهْرَانِينْ».
المحددات الحالية:
مَرْقُسْ 13: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
