مَرْقُسْ 12
12
الْفَصْلْ طْنَاشْ
الْمْتَالْ دْيَالْ الجّْنَانْ دْ الْعْنَبْ وْالجّْنَايْنِيَّة
1وْبْدَا يَسُوعْ كَيْتّْكَلّْمْ مْعَاهُمْ بْالْمْتُولْ وْݣَالْ: «هَادَا وَاحْدْ الرَّاجْلْ غْرَسْ جْنَانْ دْ الْعْنَبْ، وْضَوّْرْ بِيهْ الْحِيطْ، وْحْفَرْ فِيهْ مْعَصْرَة وْبْنَى بَرْجْ لْلْعْسَّة، وْكْرَاهْ لْشِي جْنَايْنِيَّة وْسَافْرْ. 2وْمْلِّي وْصَلْ الْوَقْتْ فَاشْ كَيْتّْجْنَى الْعْنَبْ، صِيفْطْ لِيهُمْ وَاحْدْ الْعَبْدْ بَاشْ يَاخُدْ الْغْلَّة دْ الْعْنَبْ. 3وْنَاضُو الجّْنَايْنِيَّة وْقْبْضُو الْعَبْدْ وْضْرْبُوهْ وْرْجّْعُوهْ بْيْدِّيهْ خَاوْيِينْ. 4وْعَاوْدْ صِيفْطْ لِيهُمْ عَبْدْ آخُرْ، وْضْرْبُوهْ عْلَى رَاسُه وْعَايْرُوهْ. 5وْعَاوْدْ صِيفْطْ لِيهُمْ عَبْدْ آخُرْ، وْهُمَ يْقْتْلُوهْ. وْمْنْ بَعْدْ صِيفْطْ لِيهُمْ وْحْدِينْ خْرِينْ كْتَارْ، شِي مْنّْهُمْ ضْرْبُوهُمْ وْالْخْرِينْ قْتْلُوهُمْ. 6وْبْقَى لِيهْ غِيرْ وَلْدُه الْعْزِيزْ، وْفْاللّْخْرْ صِيفْطُه لِيهُمْ وْݣَالْ: غَادِي يْحْتَرْمُو وْلْدِي. 7وَلَكِنْ هَادُوكْ الجّْنَايْنِيَّة ݣَالُو بِينَاتْهُمْ: هَا هُوَ اللِّي غَادِي يْوْرَتْ! يَالَّاهُو نْقْتْلُوهْ بَاشْ يْوَلِّي الْوَرْتْ دْيَالْنَا. 8وْهُمَ يْشَدُّوهْ وْقْتْلُوهْ وْخَرّْجُوهْ عْلَى بْرَّا دْ الجّْنَانْ». 9وْݣَالْ لِيهُمْ يَسُوعْ: «إِيوَا آشْ غَيْدِيرْ مُولْ الجّْنَانْ دْ الْعْنَبْ؟ رَاهْ غَادِي يْجِي وْيْقْتَلْ هَادُوكْ الجّْنَايْنِيَّة، وْغَادِي يْعْطِي الجّْنَانْ دْ الْعْنَبْ لْجْنَايْنِيَّة خْرِينْ. 10وَاشْ مَا قْرِيتُوشْ فْكْتَابْ اللَّهْ:
الْحَجْرَة اللِّي مَا بْغَاوْهَاشْ الْبْنَّايَا،
هِيَ اللِّي وْلَّاتْ حَجْرَةْ السَّاسْ؟
11هَادْشِّي جَا مْنْ عَنْدْ الرَّبّْ،
وْهُوَ عْجِيبْ فْنَضَرْنَا!».
12وْفْهْمُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ وْالشّْيُوخْ بْلِّي الْمْتَالْ كَانْ عْلِيهُمْ، دَاكْشِّي عْلَاشْ بْدَاوْ كَيْقَلّْبُو كِيفَاشْ يْشَدُّو يَسُوعْ. وَلَكِنْ كَانُو خَايْفِينْ مْنْ الجّْمَاعَة دْ النَّاسْ، وْخْلَّاوْهْ، وْمْشَاوْ بْحَالْهُمْ.
الْخْلَاصْ دْيَالْ الضَّرِيبَة لْلْقَيْصَرْ
13وْصِيفْطُو لْيَسُوعْ شِي رْجَالْ مْنْ الْفْرِّيسِيِّينْ وْالْهِيرُودُسِيِّينْ، بَاشْ يْشَدُّو عْلِيهْ شِي غَلْطَة فْكْلَامُه. 14وْجَاوْ لْعَنْدُه وْݣَالُو لِيهْ: «آ سِيدِي، كَنْعَرْفُو بْلِّي رَاكْ صَادْقْ، مَا كَيْهَمّْكْشْ بْنَادْمْ كِمَا كَانْ شَانُه، وْمَا كَتْدِيرْشْ الْوْجْهِيَّاتْ، وَلَكِنْ كَتْعَلّْمْ طْرِيقْ اللَّهْ بْالْحَقّْ. وَاشْ حْلَالْ نْخَلّْصُو الضَّرِيبَة لْلْقَيْصَرْ وْلَا لَّا؟». 15وْعْرَفْ يَسُوعْ النِّفَاقْ دْيَالْهُمْ وْݣَالْ لِيهُمْ: «عْلَاشْ كَتْجَرّْبُونِي؟ جِيبُو لِيَّ وَاحْدْ الدِّينَارْ بَاشْ نْشُوفُه». 16وْجَابُوهْ لِيهْ، وْݣَالْ لِيهُمْ: «هَادْ التّْصْوِيرَة وْهَادْ الْكْتْبَة اللِّي فْالْفْلُوسْ دْيَالْ مْنْ؟»، وْݣَالُو لِيهْ: «دْيَالْ قَيْصَرْ». 17وْݣَالْ لِيهُمْ: «إِيوَا اللِّي هُوَ دْيَالْ قَيْصَرْ عْطِيوْهْ لْقَيْصَرْ وْاللِّي هُوَ دْيَالْ اللَّهْ عْطِيوْهْ لْلَّهْ!». وْتّْعَجّْبُو مْنْ كْلَامُه.
السُّؤَالْ عْلَى الْبَعْتْ دْيَالْ الْمُوتَى
18وْجَاوْ لْعَنْدْ يَسُوعْ شِي وْحْدِينْ مْنْ الصّْدُّوقِيِّينْ اللِّي كَيْنَكْرُو بْلِّي الْمُوتَى كَيْتّْبَعْتُو، وْسْوّْلُوهْ وْݣَالُو لِيهْ:#الاعمال 23:8 19«آ سِيدِي، مُوسَى كْتَبْ لِينَا: إِلَا شِي وَاحْدْ مَاتْ وْخْلَّا مْرَاتُه بْلَا وْلَادْ، خَاصّْ خُوهْ يْتّْزَوّْجْ بِيهَا بَاشْ يْدِيرْ وْلَادْ عْلَى سْمِيّْةْ خُوهْ. 20وْكَانُو سْبْعَة دْيَالْ الْخُوتْ، تّْزَوّْجْ اللّْوّْلْ بْوَاحْدْ الْمْرَاة وْمَاتْ، وْمَا خْلَّاشْ الْوْلَادْ. 21وْتّْزَوّْجْ بِيهَا التَّانِي، وْمَا وْلَدْشْ مْعَاهَا وْمَاتْ. وْالتَّالْتْ حْتَّى هُوَ. 22وْهَكَّا تّْزَوّْجُو بِيهَا الْخُوتْ بْسَبْعَة، وْحْتَّى وَاحْدْ فِيهُمْ مَا خْلَّا وْلَادْ. وْفْاللّْخْرْ مْنْ بَعْدْمَا مَاتُو كُلّْهُمْ مَاتْتْ الْمْرَاة حْتَّى هِيَ. 23إِيوَا، فْيُومْ الْبَعْتْ، مْلِّي غَيْتّْبَعْتُو مْنْ الْمُوتْ، لَمّْنْ فِيهُمْ غَادِي تْكُونْ هَادْ الْمْرَاة؟ حِيتْ كَانْتْ مْزَوّْجَة بِيهُمْ بْسَبْعَة». 24وْݣَالْ لِيهُمْ يَسُوعْ: «نْتُمَ رَاكُمْ غَالْطِينْ حِيتْ مَا كَتْعَرْفُو لَا كْتَابْ اللَّهْ وَلَا قُوَّةْ اللَّهْ. 25عْلَاحْقَّاشْ مْلِّي غَيْتّْبَعْتُو النَّاسْ مْنْ الْمُوتْ رَاهْ مَا غَيْتّْزَوّْجُوشْ وْمَا غَيْزَوّْجُوهُمْشْ، وَلَكِنْ غَيْعِيشُو بْحَالْ الْمَلَايْكَة فْالسَّمَاوَاتْ. 26أَمَّا مْنْ جِهْةْ الْمُوتَى اللِّي غَيْتّْبَعْتُو مْنْ الْمُوتْ، وَاشْ مَا قْرِيتُوشْ فْالْكْتَابْ دْيَالْ مُوسَى الْقْصَّة دْ السّْدْرَة مْلِّي ݣَالْ لِيهْ اللَّهْ: أَنَا هُوَ إِلَاهْ إِبْرَاهِيمْ، وْإِلَاهْ إِسْحَاقْ، وْإِلَاهْ يَعْقُوبْ؟ 27رَاهْ هُوَ مَاشِي إِلَاهْ الْمُوتَى، وَلَكِنْ إِلَاهْ الْحَيِّينْ. نْتُمَ رَاكُمْ غَالْطِينْ بْزَّافْ!».
الْوْصِيَّة اللّْوّْلَى فْݣَاعْ الْوْصِيَّاتْ
28وْجَا وَاحْدْ الْعَالِمْ دْ الشّْرَعْ وْسْمَعْهُمْ كَيْتّْنَاقْشُو. وْشَافْ بْلِّي يَسُوعْ كَيْجَاوْبْهُمْ مْزْيَانْ، وْهُوَ يْسْوّْلُه: «أَشْنُو هِيَ الْوْصِيَّة اللّْوّْلَى فْݣَاعْ الْوْصِيَّاتْ؟». 29وْجَاوْبُه يَسُوعْ: «الْوْصِيَّة اللّْوّْلَى هِيَ: سْمَعْ آ شَعْبْ إِسْرَائِيلْ، رَاهْ الرَّبّْ إِلَاهْنَا هُوَ رَبّْ وَاحْدْ. 30تْبْغِي الرَّبّْ إِلَاهْكْ مْنْ قَلْبَكْ كُلُّه، وْمْنْ نْفْسَكْ كُلّْهَا، وْمْنْ عَقْلَكْ كُلُّه، وْمْنْ قُوّْتْكْ كُلّْهَا. 31وْالْوْصِيَّة التَّانْيَة هِيَ: تْبْغِي اللِّي قْرِيبْ لِيكْ كِيفْ كَتْبْغِي رَاسْكْ. مَا كَايْنْ حْتَّى شِي وْصِيَّة خْرَى مُهِمَّة كْتَرْ مْنْ هَادُو». 32وْݣَالْ لِيهْ الْعَالِمْ دْ الشّْرَعْ: «مْزْيَانْ آ الْمُعَلِّمْ! عَنْدْكْ الْحَقّْ. رَاهْ اللَّهْ وَاحْدْ، وْمَا كَايْنْ حْتَّى وَاحْدْ آخُرْ مْنْ غِيرُه، 33وْخَاصّْ الْوَاحْدْ يْبْغِي اللَّهْ مْنْ قَلْبُه كُلُّه، وْمْنْ عَقْلُه كُلُّه، وْمْنْ قُوّْتُه كُلّْهَا، وْخَاصُّه يْبْغِي اللِّي قْرِيبْ لِيهْ كِيفْ كَيْبْغِي رَاسُه، هَادْ الْوْصِيَّاتْ مُهِمِّينْ كْتَرْ مْنْ ݣَاعْ الدّْبَايْحْ اللِّي كَتّْحْرَقْ لْلَّهْ وْالتَّقْدِمَاتْ». 34وْمْلِّي شَافْ يَسُوعْ بْلِّي الرَّاجْلْ جَاوْبُه بْالْحْكْمَة ݣَالْ لِيهْ: «نْتَ رَاكْ مَاشِي بْعِيدْ عْلَى مَمْلَكَةْ اللَّهْ». وْمَا زْعَمْ حْتَّى وَاحْدْ يْعَاوْدْ يْسْوّْلُه أَسْئِلَة خْرَى.#لوقا 10:25-28
الْمَسِيحْ وْالنّْبِي دَاوُدْ
35وْمْلِّي كَانْ يَسُوعْ كَيْعَلّْمْ فْبِيتْ اللَّهْ سْوّْلْهُمْ: «كِيفَاشْ كَيْݣُولُو الْعُلَمَا دْ الشّْرَعْ بْلِّي الْمَسِيحْ هُوَ وَلْدْ دَاوُدْ؟ 36حِيتْ دَاوُدْ بْرَاسُه مْلِّي وْحَى لِيهْ الرُّوحْ الْقُدُسْ ݣَالْ:
ݣَالْ الرَّبّْ لْرَبِّي:
ݣْلَسْ عْلَى لِيمْنْ دْيَالِي
حْتَّى نْدِيرْ عْدْيَانْكْ تَحْتْ رْجْلِيكْ.
37رَاهْ دَاوُدْ بْرَاسُه كَيْعَيّْطْ لْلْمَسِيحْ رْبِّي، إِيوَا كِيفَاشْ غَيْكُونْ الْمَسِيحْ وَلْدُه؟». وْكَانُو الجّْمَاعَاتْ دْ النَّاسْ كَيْسَمْعُو لْيَسُوعْ وْهُمَ فْرْحَانِينْ.
يَسُوعْ كَيْوَصِّي تْلَامْدُه يْرَدُّو بَالْهُمْ مْنْ الْعُلَمَا دْ الشّْرَعْ
38وْزَادْ كَيْعَلّْمْهُمْ وْݣَالْ: «رْدُّو بَالْكُمْ مْنْ الْعُلَمَا دْ الشّْرَعْ! رَاهْ كَيْبْغِيوْ يْتّْسَارَاوْ بْالسّْلَاهْمْ وْكَيْبْغِيوْ يْسَلّْمُو عْلِيهُمْ النَّاسْ فْالسّْوَاقْ، 39وْكَيْبْغِيوْ يْكُونُو فْالْبْلَايْصْ اللّْوّْلِينْ فْدْيُورْ الصّْلَاة، وْيْݣَلْسُو فْالْبْلَايْصْ الْمْخَيّْرِينْ فْالْحَفَلَاتْ. 40وْكَيَاكْلُو رْزَقْ الْهْجَّالَاتْ، وْكَيْطَوّْلُو فْصْلَاتْهُمْ غِيرْ بَاشْ يْبَانُو. هَادُو غَيْتّْعَاقْبُو بْزَّافْ».
الْهْجَّالَة اللِّي مَا فْحَالْهَاشْ
41وْݣْلَسْ يَسُوعْ فْبِيتْ اللَّهْ قُدَّامْ صْنْدُوقْ التَّقْدِمَاتْ، كَيْشُوفْ فْالنَّاسْ وْهُمَ كَيْحَطُّو فِيهْ الْفْلُوسْ. وْكَانُو بْزَّافْ دْ النَّاسْ اللِّي لَبَاسْ عْلِيهُمْ كَيْحَطُّو فْلُوسْ كْتِيرَة. 42وْجَاتْ وَاحْدْ الْمْرَاة هْجَّالَة مَا فْحَالْهَاشْ، وْحْطَّاتْ غِيرْ جُوجْ شْقْفَاتْ دْيَالْ الْفْلُوسْ اللِّي هِيَ جُوجْ رْيَالَاتْ. 43وْعَيّْطْ يَسُوعْ عْلَى التّْلَامْدْ دْيَالُه وْݣَالْ لِيهُمْ: «نْݣُولْ لِيكُمْ الْحَقّْ: هَادْ الْهْجَّالَة اللِّي مَا فْحَالْهَاشْ حْطَّاتْ كْتَرْ مْنْ دَاكْشِّي اللِّي حَطُّو ݣَاعْ النَّاسْ فْالصّْنْدُوقْ. 44عْلَاحْقَّاشْ هُمَ حَطُّو مْنْ دَاكْشِّي اللِّي شَايْطْ عْلِيهُمْ، وَلَكِنْ هِيَ وَاخَّا مَا فْحَالْهَاشْ حْطَّاتْ ݣَاعْ دَاكْشِّي اللِّي عَنْدْهَا وْاللِّي بِيهْ كَتْعِيشْ».
المحددات الحالية:
مَرْقُسْ 12: MSTD
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
