MATIUS 10
10
Isa akkeo' sampulorua ana' gurung
10:1-4
(Mark. 3:13-19; Luk. 6:12-16)
1Isa lakeo' sampuloiya rua suroNa na assare kahasa mange ri iyai langga'gara setang na laappakagassing tau battu risikuanna garring-garring na kalammaang. 2Iamo inni arenna suro sampulorua injo: Makase're, Simon turiang injo Petrus na Andreas uranna siana', na Yakobus ana'na Zebedeus surang Yahya uranna siana', 3Filipus na Bartolomeus, Tomas na Matius palele sima, Yakobus ana'na Alfeus, na Tadeus, 4Simon tau battu ri Zelot na Yudas Iskariot tua'bali' ballang injo ri Ia.
Isa assuro ri sampulorua injo suro
10:5-15
(Mark. 6:6b-13; Luk. 9:1-6)
5Sampuloiya rua suro-suro risuro ri Isa na Ia appasang mange ri iyai, ”Akolalo a'lili mange ri pa'lalanganna tau maraeng iyareka antama' ri kota tau Samaria, 6passangadinna a'lampako mange ri jimbala tappela' battu ri umma' Israele. 7#Luk. 10:4-12A'lampako na pala'bangi: Pakkaraengang Suruga gelemu dere. 8Pakagassinglalo tau garring injo; pakaattallasai tau mate injo; pakamole tau kattakang injo; ga'garai sikonjo setang. Maeng muuppa ngase'mu nagelejua muhalli, injomo saba'na passareang todo'i nagele lahalli.
9Akolalo ngerang bulaeng iyareka salaka, iyareka benggolo lalang ripanga'ba' aja'mu. 10#1 Kor. 9:14; 1 Tim. 5:18Akolalo ngerang purukang pamunaang bokong ripa'lingkaammu, akolalo ngerang ruallahara baju, sandala iyareka tukkang, saba' se're tau pajama siratangi lauppa sahala'na. 11Ampa antamakiko ri kota iyareka ri desa, bojalalo ri injo se're tau nusiratang na ammariko ri ia sa'gemmu a'lampai. 12Ampa antama'ko rise're saponna tau, assareko barasallang mange ri iyai. 13Ampa iyai injo latarimai, barasallammu injo naungi mange ri iyai, ampa gele, barasallammu injo muliangi mange ri kau. 14#Suro-suro 13:51Ampa rie' tau geleko latarima na gele lapilangngeri paumu, ansulu'laloko na bokoi saponna iyareka kota injo na pabe'besei limpuranna battu ri bangkemmu. 15#Kej. 19:24-28; Mat. 11:24Sitoje'na Nakke appau mange ri kaui: Rihattu pangadelang tana Sodom na Gomora lala'bi ringangang hukkunganna battu ri kota injo.”
Passissa nularie' injo na pangakuang ri Isa
10:16-33
(Mark. 13:9-13; Luk. 12:2-9, 21:12-19)
16 #
Luk. 10:3
”Janjangi, Nakke assuro ri kaui assimpole jimbala mange ritangnga-tangngana asu borong, injomo saba'na paralluko sara'de' assimpole saa na baji' assimpole bangkeng bodo.
17Mingka tutuko mange risikuanna tau; saba' rie' tulalapassareangko mange ri pangadelang agama na iyai injo lanrabung ri kau ri sapo passambajanganna. 18Kanara Nakke, kaui lariparapa' mange ri a'rakanna sikuanna tukahasa na pamarenta assimpole se're passa'bi mange ri iyai na mange risikuanna tau gele injo tappa' ri Allataala. 19Ampa iyai injo lapassarreangko, akolalo bata-bata ripassala anteekamua na apa nuparallu lamupau, saba' iangase'na injo ripassareangi mange ri kaui rihattu injo jua. 20Saba' gele kau appau-pau, mingka Nyaha Ammammu; Ia laappau-pau lalang ri kau.
21Se're urang siana' lalapassareang uranna siana' larihuno, appakonjo todo'i se're amma mange ri ana'na. Ana' lamaronta' mange ri tau toana na lalahuno ngase'i. 22#Mat. 24:9, 13Larikali'kingangko risikuanna tau kanara arengKu; mingka tau attahang injo sa'genna rikala'busanna lasalama'i. 23Ampa iyai injo nyissa ri kau lalang rise're kota, a'lampako mange ri kota maraeng; saba' sitoje'na Nakke appau mange ri kaui: Rigelenapa la'bang mubattui sikonjo kota ri Israele, Ana' Rupatau rie'mu. 24#Luk. 6:40; Yah. 13:16, 15:20Se're ana' gurung gele la'bi battu ri anrong gurunna, iyareka se're ata la'bi battu ri tau ngatainna. 25#Mat. 9:34, 12:24; Mark. 3:22; Luk. 11:15Ganna'mu rise're inni ana' gurung ampa ia a'jari assimpole anrong gurunna na rise're inni ata ampa ia a'jari assimpole tau ngatainna. Ampa opuna sapo riare' Belzeebul, la'bipa pole assinna sibatu sapo.
26 #
Mark. 4:22; Luk. 8:17 Jari, akolalo malla' mange ri iyai, saba' gele rie' manna se're nutattongko' lagele ribungkara, na gele rie' manna se're nutassa'bu lagele ripappiissekang. 27Apa Kupau mange ri kaui lalang rikalammang, lagarai injo lalang ri tampa' sinara; na apa nuribisi' mange ri tolimmu, pappiissekangi injo battu rate ripa'buhungang sapo. 28Akolalo malla' mange ri iyai tuakkulle injo muno batangkale, mingka tide' kahasana lamuno nyaha; malla'laloko mange ri Ia tukahasa injo lamuno baji' nyaha iyareka batangkale lalang ri naraka.
29Gelejua dongi' intu ribalukangi ruangkaju silahara doe' ki'di'? Mingka, manna sikaju gelerie' a'dappe' naung ri tana pantarang ria'ra'na Ammammu. 30Na kau, manna uhu' ri ulummu ta'rekeng ngase'i. 31Injomo saba'na, akolalo malla', saba' kau la'bi riekang anggaranna battu ri dongi' lohe injo.
32Sikuanna tau ngani ri Nakke ri a'rakang rupatau, Nakke langani todo' ri ia ri a'rakanna AmmangKu ri suruga. 33#2 Tim. 2:12Mingka inai jua a'boko ri Nakke ri a'rakanna rupatau, Kubokoi todo'i ri a'rakanna AmmangKu ri suruga.”
Isa ngerang passisala pahangang
Anteekamua minahang ri Isa
10:34–11:1
34 #
Mi. 7:6; Luk. 12:51-53 ”Akolalo a'ngare' ma'nassana Nakke rie' mae langerang dame ri bahonna lino inni; Nakke rie' mae gele langerang dame, mingka pa'dang. 35Saba' Nakke rie' mae lappassisa'la' tau battu ri ammanna, ana' bahine battu ri idonna, ana' mintu bahine battu ri matoang bahinena, 36na balinna tau inni iamo intu tau assinna saponna.
37 #
Luk. 14:26-27
Inai jua ngamaseang ri amma iyareka ri idonna la'bi battu ri Nakke, ia gele siratang ri Nakke; na inai jua ngamaseang ri ana' bura'nena iyareka ri ana' bahinena la'bi battu ri Nakke, ia gelei siratang ri Nakke. 38#Mat. 16:24-25; Mark. 8:34-35; Luk. 9:23-24Inai jua gele lasompo salli'na na minahang ri Nakke, ia gelei siratang ri Nakke. 39#Luk. 17:33; Yah. 12:25Inai jua lakakutui nyahana, ia latappela' nyahana, na inai jua tappela' nyahana kanara ri Nakke, ia lauppai muliang.
40 #
Mark. 9:37; Luk. 9:48, 10:16; Yah. 13:20 Inai jua anruppai ri kau, ia anruppai ri Nakke, na inai jua anruppai ri Nakke, ia anruppai Ia tuassuro injo ri Nakke. 41Inai jua anruppai se're nabbi assimpole nabbi, ia lanarima passahalang nabbi, na inai jua anruppai tau naba, ia lanarima passahalang tau naba. 42#Mark. 9:41Inai jua assare ere inung manna se're jua galasi mange risala se'renna tau ki'di' inni, saba' ia ana' gurungKu, sitoje'na Nakke appau mange ri kaui: Ia gele latappela' passahalanna.”
المحددات الحالية:
MATIUS 10: LAI_SLY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@LAI 2012 Indonesian Bible Society (Lembaga Alkitab Indonesia)
