Génesis 34
34
Siquem Dinawe awe idi
1Jacobweta Líapa awẽ wake Dina idi. Wetsatiã Dinapa awĩwu rana uĩ kai kadi pexe ikawu adu. 2Nadu pexku awẽ ade Siquem idi. Naatu apa Hamor na atũ diaiwu idi. Hamorpa wake Siquem. Siquem Dinapa raniwiyaitu achita awe idi. 3Naskata duikuidi awe wianapaixikĩ. 4Naskata Siquempa awẽ apa Hamor yuikĩ iskawadi: “Ea yuixuxiwe awe wiananu”, wadi.
5Siquempa wasĩkui achita Dinawe awe ika dikadi Jacob peesiyudiba awẽ wakewu weyunuwu. Nawuwawe wai babakixu ovejawu kexei wuawu idi. 6Siquempa apa Hamor tsaiki kai kadi Jacobwe.
7Jacobpa awẽ wakewawe kushikui dikadiwu na ika. Wai babakiduax sidayana wediwu Siquempa achita awe ika dikakakĩ. Jacobpa awẽ wake Dina chakawaa Siquempa duku iskawaa idiwu. 8Hamor atu yuidi: “Ewẽ wake Siquempa matu chiku duikui. Matu chikuwe ewẽ wakewe wiananukawe. 9Nu shinanukawe nuku kaiwuu xawu ma wiyaidu matu kaiwuu xawu nu witiru. 10Duwe ikawe naduax awara bidikata peiuxũ bai wiixikakĩ”, Hamor atu wadi.
11Siquempari Jacob yuita Dina awẽ uchiwu atu yuidi: “Matu chiku ea inakawe. Na ma ea ñukai batu inanu. 12Awarawu ea ñukakawe. Naskake matu chiku ewe wiananu”, atu wadi.
13Jacobpa awẽ wakewawe kebadiwu parakakĩ Siquemya awẽ apa Hamor. 14Naskata duduri atu yuidiwu: “Nuku pui nu inatiruba dukuwede awẽ wushki wichi xateaba. Naskara uduax nu rawĩtiru. 15Ma askayabaitu matu wushki wichi ma xateyabake duku keskara ma iyabaitu nuku xawu batu nu inatiruba. 16Naskatari nuku wakewuwe matu wakewu wianatiruwu. Naskax da bai adu nu batuwe itiru nadu wisti nu iixikĩ. 17Matu wushki wichi ma xateyabaitu Dina iyuta duduax nu kai”, idiwu.
18Naa dikakadi Hamor awẽ wake Siquemwe “Ikũ”, idiwu. 19Naa dikakĩ Siquempa awẽ wushki wichi xatepaidi Jacobpa awẽ wake Dinamai duikuikĩ. Siquem yura sharakui ipaudi awẽ kaiwuu udua.
20Pexe ichapa awẽ ade Siquem awẽ kaĩti adu wudiwu. Hamor awẽ apa Siquemwe diaiwu wetsawuwe tsaiki wukadi wudiwu: 21“Jacobpa awẽ kaiwuu sharawu. Atuwe nu iki nuku bai ewapa naskatari atũ kaiwuu xawu nu winu nawuwaweri nuku xawu winuwu”, idiwu. 22“Nuku wushki wichi xateabax nu atuwe itiruba. Aduri nu shinayabaitu dukuwe itiruwuba naskara weyabiswu. 23Naawu duwe inuwu atũ awarawu atũ yuinawu nukuna inu”, idiwu.
24Naskata dukuwedewawe naduri shinadiwu Siquemweta Hamorpa atu yuiyaitu. Naskaxu atũ wushki wichi xatediwu. 25Jacobpa wake rawe Simeónwe Leví Dinapa awẽ uchi rawe ma tres peda ikadu pexe ichapa adu wudiwu. Atũ wushki wichi xateitawu kayawubadu keduya wukata atu retediwu. Atũ wushki wichi xateitaxakakĩ atuwe ikinatiru idiwuba. 26Naskatari Hamor retekata Siquem retediwu. Atu retekata Dina na pexe aduxu iyudiwu. 27Naskayaidu Jacobpa wakewu atiri dukudiwu naa rakawawaĩda winuwukata atũ awara wiãdiwu atũ chikuuxũ atu retekata naduax ubiskuike. 28Naskatari oveja iyukata vaca asno nawu iyudiwu. Naskatari pexe ichapadua awarawu wukata wai babakiduari awarawu wudiwu. 29Naa pexe adua awarawu wukata wakewu atu iyukata awĩwu mishti atu iyudiwu. 30Naskata Jacobpa Simeónya Leví atu yuidi: “Ea ma chakawabaa. Canaán adu ikawawe ferezeowawe ea duikaspakadi naawu ichanakaxu ea retekata batu retexikadi ewẽ kaiwuuya numai ichapabake”, Jacobpa atu wadi.
31Awẽ wakewawe kebadiwu: “Siquempa nuku chiku na ikabis keskara duku waita”, apa wadiwu.
المحددات الحالية:
Génesis 34: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
