Mʉkpanganɨa 8
8
Mipo kʉta maja kɔpʉngɔ ɗɔa akɔ dɔdɔ
1Mbise ngɨananɨ, Asɔɓɨɨ ɔ꞉tunguo atɨ Nɔa ɨhɔ nɔ ɓanama ɓaɓomu ʉɓɔ iju, nɔ ʉɓɔ ndei, ʉɓa ɓa꞉ɓio naɓɔ amati ɔ ɨngbɔɔ. Ɔ꞉tʉma mahuo akɔchana akʉʉ ɔ dɔdɔ, kʉdɔ, mipo kɔ꞉pʉnga ɗɔa. 2Ɓambɛna ngʉɓa asini ɓɔ꞉sɨa chwɛiso mipo, nɔ lɨkʉɓa lɔ ʉgbaá ngɨlɛ akʉʉ ɔ ɓisi, lɔ꞉kutonokio tɨa kʉ kutonokioni, nɔ, ʉgbaá wɔ꞉nanganaka. 3Mipo kɛ꞉sɨnganaka ɗɔa ta ɨgyɛtɛ akʉʉ ɔ dɔdɔ. Ambise ɔ makwaa mɨa mʉngana nɔ ɓatɛkɛɓɛ ɓɔkʉ, kɔ꞉ɗɔa tɨa nɔgbɛ. 4Akɔ ɓisi ɓɔ uyi tɛkɛɓɛ nɔ mɛɗɨanɛka, akɔ uyi ngʉwɔ mɛɗɨanɛka, ɨngbɔɔ yɔ꞉fana akʉʉ ɔ lɨkpangba amati ɔ ihoi yɔ Alalatɨ. 5Mipo kɛ꞉sɨnganaka ɗɔa akɔɓɔya akɔ uyi ngʉwɔ tɛkɛɓɛ. Akɔ ɓisi ɓɔ uyi mʉngana akɔ uyi ngʉwɔnanɨ, mɨtʉ yɔ lɨkpangba yɔ꞉pʉnga nɨnɨa.
Nɔa akʉnda anɨmbɨa ɓɔ mipo ka tɨa tanɨ
6Ambise ɔ makwaa ɓatɛkɛɓɛ ɓɔgɨna, ɔ꞉gana idilisa ngɨyɛ a꞉ɨchwa akɔ ɨngbɔɔ. 7Ɔ꞉tɔchwɛiso munoi mʉngana ndʉ iyeku, ngɨa a꞉tɨsa nɔ tɔwa, akɔɓɔya ta aka mipo ka꞉nanganaka-ɔɔ akɔ dɔdɔ. 8Ɔ꞉tɔchwɛiso tɨa anjua akɔkanga ɓɔ mipo kɔɗɔwɔ ndɨ akɔ dɔdɔ tɨa ɗɔanɨ. 9Yakamɛngana, sɔkɔmʉ anjua ɨ꞉na ɨda ngɨyɛ awolo-ɔɔ, dɔ, mipo ka꞉ɓio-sɨ ta mahuoke akɔ dɔdɔ ɓɔ kyɛɛ kyɛɛ. Kʉdɔ, ɔ꞉tɔwa ɓata-sɨ kʉ amati ɔ ɨngbɔɔ. Nɔa ɔ꞉chwɛiso ɨkɔndɔ, ɔ꞉mʉfa nɔ ɔ꞉mutoiso kʉ amati ɔ ɨngbɔɔ tinene nayɔ. 10Nɔa ɔ꞉ɓɛtɨa ɓata makwaa mɛɗɨanɛka, pɛɨ ngɨa a꞉chweiso ɓata-ɔɔ anjua aɓei ɔ ɨngbɔɔ. 11Anjua ngɨananɨ, ɔ꞉tɔwa ɓata atɨ Nɔa nɛpasɨ, ɔ꞉kɛteni ɨgbɛɨ yɛta ɨɓɨsɨnɨ yɔ Olivɛ amonu. Kʉdɔ, Nɔa ɛ꞉mbɨa ɓɔ mipo kɔɗɔwɔ akɔ dɔdɔ tɨa ɗɔwanɨ. 12Ɔ꞉ɓɛtɨa ɓata makwaa ngakɔmɔ mɛɗɨanɛka, ɔ꞉chwɛiso anjua, yakamɛngana, sɔkɔ tii ɓata ɨ꞉mʉtɔyɨa.
13Mipo ka꞉nangaka akɔ ɨtaka, akɔ igo ngɨyɔ lɨmɨa mɛɗɨa nɔ mʉngana, akɔ uyi ngʉwɔ pɛɨ, nɔ ɓisi ɓɔ uyi ɓɔngɔ mʉngana. Nɔa ɔ꞉gana ɨda mɛngana yɔ ʉpaʉ wɔ ɨngbɔɔ, nɔ, ɛ꞉na ɓɔ ɨtaka ya꞉ɓio tɨta ɓɔ kakau. 14Akɔ ɓisi ɓɔ uyi ɓatɛkɛɓɛ ɓapɨnɨ nɔ mɛɗɨanɛka, uyi ngʉwɔ ɓepini, ʉmʉa wa꞉ɓio ɓɔ wɔ꞉nanganakeni tɨta ɓɔ kakau kakau.
15Kʉdɔ, Asɔɓɨɨ ɔ꞉musigio Nɔa ɓɔ: 16«Ha gue, chwɛa aɨngbɔɔ tɨa chwɛanɨ, ʉwɛ nɔ moi asɔɔ, nɔ ɓana ngʉɓɔsɔɔ ɓegue, nɔ ɓaneni ɓɔsɔɔ.» 17Chwɛiso migbo yɔ ɓanama di di di ɓaɓomu, ngʉɓa ɓa ɨhɔ nɔwɛ inani amati ɔ ɨngbɔɔ, ʉɓa ɓɔta ɓakpɔkpɔ, nɔ ʉɓa ɓɔta bele bele ɓanaɗa akɔ ɛsɨ, nɔ ɓanoi ɓaɓomu, iɗo ambɔ ɓɨnanjana, nɔ, ɓɔhuiso dɔdɔ ta muɓomu ɓɔ kyɛɛ. 18Kʉdɔ, Nɔa ɔ꞉tɔchwɛa tɨa ɨyɔ, ɨhɔ nɔ moi angɔ, nɔ ɓana ngʉɓangɔ ɓegue nɔ ɓanenu ɓangɔ. 19Ɓanama ɓaɓomu ngʉɓɔ iju, nɔ ʉɓa ɓɔta bele bele ɓakɨnaɗa aɨsɨ, nɔ, ɓanoi kʉ ɓaɓomu ɓɔ꞉chwɛa amati ɔ ɨngbɔɔ, akpatanakɨa ta nɔ migbo ngɨyeɓo di di di.
20Nɔa ɔ꞉tuɓoko gbɔ́gbɔ ɔ mutebii akɔbibiso Asɔɓɨɨ, nɔ, nʉya ndʉ mutebii akɔ MAKWƆƁƗƗ, ɓanama, nɔ ɓanoi nganangana ati ɔ migbo iɓomu ngɨyɛ yangɔmʉ nɔ ɔpɛ. 21MAKWƆƁƗƗ ɔ꞉ka imbo yɛta tɨpɨ, nɔ, ɔ꞉yakanaka amati ɔ mʉtɨma ngʉwangɔ ɓɔ: «Ɨmɨ, na꞊ngɔnapɨa sina ɓata dɔdɔ nɔ mʉgwɛ pɔ bele, akʉʉ ɔ yaka yɔ ɓombi. Ya ta ingono, ɓɔ itungwio ngɨyeɓo, yakʉnda ta ɓʉɓɨɓɨ anɨngwa ta nɔ ɨɓwana ngɨyeɓo. Na꞊ngɔdʉka ɓata sina lɨkyɛmʉ liɓomu ngɨlɛ lahomuo akɔ dɔdɔ, ndʉ aka nɔ꞉kɨɔ-ɔɔ.
22Gʉtʉ ta sinani nɔ sinani,
ya꞊ɓio ta nɔ angbinga ɔ ɨhʉna, nɔ ɨyɔ buoko masɔɔ,
ɨyɔ sɛsʉ nɔ ɓʉnja,
ɨyɔ ʉgbaá nɔ ɨpá,
ɓisi ɓɔta ɓʉyɛ nɔ ʉɓɔ ta ɓiye.
Yaka ngɨyɛnɛnɨ iɓomu,
ya꞊ngɛmaa sina ɓata,
akɔɓɔya ta amiɓo wɔ dɔdɔ.»
المحددات الحالية:
Mʉkpanganɨa 8: buuN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2021, Wycliffe Bible Translators, Inc.
