Mʉkpanganɨa 9
9
Asɔɓɨɨ ɔkiokio Nɔa nɔ ɓana ɓangɔ
1Asɔɓɨɨ a꞉kiokio Nɔa, nɔ ɓana ɓangɔ akɔsugo ɓɔ: «Nɔteni ɓana, nɔ, ucheni, nɔ, uhuseni dɔdɔ ɓɔ kyɛɛ. 2Ɓanama ɓaɓomu, nɔ ɓanoi ɓaɓomu, nɔ ɓayaka ɓaɓomu ngʉɓa ɓanaɗa akɔ ɨsɨ, nɔ sipe kʉ iɓomu amati ɔ ɓalisini, ɓa꞊huo nɔ ʉɓa nɔgbɛ, nenu akɔkumo. Ɓayaka ngʉɓɔnanɨ ɓaɓomu, ɓa꞊ɓio ta asɨ ɔ ʉpanʉ ngʉweno. 3Ngbanga kʉndʉ na꞉ninjo jɛnɛ ɓɔ dyeni lɨgbɛɛ, ɨtakɨtakɨ ngɨyɛ, nɔninjo inu, anɨdya tɨa kʉ nɔ ɓanama ɓaɓomu, ngʉɓa ɓahomuo.
4Yakamɛngana, nátɨdyenimʉ ta nama ɔɓieni nɔ uɓei ngʉwangɔ kʉtaa, ɨsɨ yɔngɔ ɓɔ ɔɓieni nɔ menike. 5Nɔ ɓata, menike ngʉkeno, ka uɓei ngʉweno. Kʉɓanɨ, nama ɔweni mombi, ɨmɨ, na꞊mɨta ta ɓusiko ɓɔ menike kangɔ ɓɔ kpalaa. Kʉndʉ mombi ɔweni abʉangɔ mombi, ɨmɨ Asɔɓɨɨ, na꞊mɨta kʉ ɓusiko ɓɔ menike ngʉkangɔ ɓɔ kpalaa. 6Mombi ngɨa anjwʉakiso menike ngʉkɔ mangɛ, abʉangɔ mombi, ɓa꞊njwʉakiso ʉkangɔ, kʉ njwʉakisoni. Dɔ, mombi a isisenio yɔ Asɔɓɨɨ. 7Tɨa akɔ inu, nɔteni, nɔ, ucheni, nɔ, nadaeni dɔdɔ kʉ muɓomu, nɔ, muhuseni ta ɓɔ kyɛɛ kyɛɛ.» 8Asɔɓɨɨ ɔ꞉tɔsigio ɓata Nɔa nɔ ɓana ɓangɔ kʉ ɓɔ: 9«Ɨmɨ ingainga, na꞊kio agɔmɛ nenu, nɔ ɓanɔnɔ ɓeno nɔ ɓanɔnɔ ɓɔ ɓanɔnɔ ɓeno. 10Agɔmɛ ngɨananɨ, a kʉ akɔ lɨkyɛmʉ liɓomu ngɨlɛ lahomuo, ɨlɛ la꞉chwɛa pɛ ɨhɔ nenu amati ɔ ɨngbɔɔ: ɓanoi, ɓanama ɓɔ ndei, nɔ ʉɓɔ iju nɔ ʉɓɔ dɔdɔ ɓaɓomu. 11Ɨmɨ, nɛmaiso agɔmɛ ngɨasɛmɨ nenu ɓɔ: Na꞊ngɔwa ɓata dɔdɔ nɔ mipo kɔta maja, nɔ lɨkyɛmʉ liɓomu, la꞊ngɔdʉka ɓata nɔ mipo.»
12Asɔɓɨɨ ɔ꞉tɔsugo ɓata ɓɔ: «Ineni isisenio yɔ agɔmɛ ngɨasɛmɨ nenu, ɨhɔ nɔ lɨkyɛmʉ liɓomu ngɨlɛ lahomuo ati eno, nɔ isisenio ngɨyɛnɛnɨ, yɛ꞊sɨnganaka ɓio ta ngbingbii, akɔ lɨfananja liɓomu ngɨlɛ la꞊nɨka ambise. 13Nɔnapɨɔ isuɓe, alɨkʉɓa lɔ ʉgbaá, ɨyɛ, ya꞊ɓio isisenio yɔ agɔmɛ ngɨasɛmɨ, nɔ dɔdɔ. 14Angbinga muɓomu ngɨa, na꞊ɓikuto-ɔɔ dɔdɔ nɔ lɨkʉɓa lɔ ʉgbaá, nɔ isuɓe yɔchwɛanɨa akʉʉ ɔngɔ, 15ya꞊ɓinatungwiso agɔmɛ ngɨasɛmɨ nenu, ɨhɔ nɔ ɓayaka ɓaɓomu ngʉɓa ɓahomuo, akɔsugo ɓɔ ʉgbaá wɔta ʉja, wa꞊ngɔneyo sina ɓata, akɔdʉka dɔdɔ nɔ mipo kʉta maja. 16Ɨmɨ, na꞊ɓikanga suo isuɓe ngɨyɛnɛnɨ yɔchwɛanɨeni akʉʉ ɔ ɓisi, nɔ, nɔ꞊tunguo agɔmɛ ngɨananɨ ɔ maɓisi maɓomu, ati ɔ Asɔɓɨɨ nɔ lɨkyɛmʉ liɓomu ngɨlɛ lahomuo akɔ dɔdɔ.» 17Ga Asɔɓɨɨ nɔ Nɔa ɓata ɓɔ: «Isuɓe ya isisenio yɔ agɔmɛ ngɨasɛmɨ, nenu ɓaɓomu ngʉɓa ná akɔ dɔdɔ.»
Ɓana ɓegue ɓaatʉ ngʉɓɔ Nɔa
18Ɓana ɓɔ Nɔa ngʉɓa ɓa꞉chwɛa amati ɔ ɨngbɔɔ, ya꞉ɓio atɨ Sɛmʉ, nɔ Hama nɔ Yafɛtɨ. Hama akɛ a꞉ɓio ɨsɛ ɔ Kanana. 19Ɓana ɓegue ɓaatʉ ngʉɓɔ Nɔa, ɨɓɔ ʉɓɔnanɨ. Ɓanɔnɔ ɓeɓo akɛ ɓanadadaa dɔdɔ muɓomu.
20Nɔa a꞉ɓio gue ɔ ɨhʉna, nɔ kʉ ɨyɔ akɛ, a꞉pʉnga hʉna kʉbaa ɔ mijabibo. 21Ɨyɛ ndʉ a꞉mwa ʉkyɛpʉ wɔ mijabibo ngɨangɔ, ɔ꞉damʉa. Nɔ ɔ꞉tɔɗuoko lɨpʉkʉ liɓomu, nɔ, ɔ꞉kwaa ga gbangamu, amati ɔ ɨhɨma ngɨangɔ tɨta munduu. 22Ndʉ Hama, ɨsɛ ɔ Kanana, a꞉mɨna ɨsɛ Nɔa munduu, ɔ꞉chwɛa anɨsa aɓɨa ɓamanye ɓapɨnɨ aɓei. 23Kʉdɔ, atɨ Sɛmʉ nɔ Yafɛtɨ ɓa꞉sɨka ɨpʉkʉ, ɨɓɔ ɓapɨnɨ ɓɔ꞉napɨa amapaka ngʉkeɓo. Nɔ ɓɔ꞉sa nɔ ɓanɔmbise nɔ mbise, ɓɔ꞉mukuto ɨsɛ eɓo munduu ga gbu. Ɨɓɔ, mesu ta anɔ ambamba, sɔkʉmʉ ɓɨ꞉na ɨsɛ eɓo munduu pɔ bele.
24Ɨyɛ ndʉ ingwo yɔ ʉkyɛpʉ ya꞉mʉngangaa, ɔ꞉tɔka tɨa yaka ngɨyɛ mwana angɔ ngɨyɔ mbise, a꞉ɓio ɓɔ ɔmʉkɨeni. 25Ga ɨyɔ aka ɓɔ: «Ambɔ Kanana ɔgakanakɨa gɔ ta nʉgakanakɨa, nɔ, iɓio gɔ ta baya ɔ ɓabaya ɓɔ ɓamanye!» 26Ga ɨyɔ ɓata kʉ ɓɔ:
«MAKWƆƁƗƗ, Asɔɓɨɨ ngɨyɔ Sɛmʉ, ɨsɨka ʉbɨba.
Ambɔ Kanana iɓio gɔ ta baya angɔ.
27Asɔɓɨɨ ɨsɨnganakiso Yafɛtɨ ɨsɨnganakisoni,
nɔ, iwolo amati lɨhɛma ngɨlɛ lɔ Sɛmʉ.
Ambɔ Kanana iɓio gɔ ta baya angɔ!»
28Ambise ɔ mipo kʉta maja ngʉkɔnanɨ, Nɔa a꞉kwaa ɓata-sɨ ta mago lɨmɨa ɗietu nɔ ɓatɛkɛɓɛ ɓɔkʉ. 29Mago maɓomu ngʉka Nɔa a꞉kwaa ɛsɨ ɔ ɨpá, ka꞉ɓio lɨmɨa ɨsaɓɔkʉ nɔ ɓatɛkɛɓɛ ɓɔkʉ, mbise ɔngɔ ɔ꞉wo.
المحددات الحالية:
Mʉkpanganɨa 9: buuN
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2021, Wycliffe Bible Translators, Inc.
