Chenesis 9
9
1Mihmʋt Chitokaka yʋt Noah ya̱ micha ushi ʋhleha aiena ka̱ yukpalit, Hʋsh wayʋt apakna cha, yakni paknaka ya̱ hʋsh alotowashke.
2Yohmikma isht a hʋchi̱ nukshopa, micha isht a hʋchi̱ komota aiena kʋt nampoa puta yakni paknaka aiasha ka̱ moma, micha hushi puta ʋba itʋnowa moma, micha nana hosh yakni paknaka a̱ya moma, micha nʋni okhʋta aiasha ka̱ moma onʋtoyula hi oke; hʋch ibbak a̱ fohka hoke.
3Nan okcha̱ya itʋnowa moma kʋt hʋchim ilhpak achi̱ hoke: haiyu̱kpulo okcha̱ki atok akinli ho̱ ai itilauechit nan oklu̱ha ka̱ hʋchim issa li hoke.
4Amba nipi ʋt isht okcha̱ya yʋmmʋt im issish ak oka aieninchit hʋsh pa ná,
5Atukma hʋchim ilhfiopak hʋchim issish ak o̱ a hoyo li pulla hi oke: nan okcha̱ya moma ka̱ im a hoyo likmʋt, hatak ibbak a̱ a hoyo la hi oke; hatak a̱ itibapishi puta hatukma ibbak a̱ hatak im ilhfiopak a̱ a hoyo la hi oke.
6Kʋna hosh hatak im issish a̱ hlatʋblikma, ilap im issish ma hatak osh hlatʋbla hi oke: Chitokaka ya̱ holba ho̱ hatak a̱ ikbi tok oka.
7Yohmi ka̱ hʋchishno ʋt wayʋt hʋsh apaknashke; yakni paknaka ya̱ a waya fehnʋt ai apaknʋt hʋsh aiashashke, im achi tok.
8Micha Chitokaka yʋt Noah, micha ushi ʋhleha aiena ka̱ im anumpulit,
9Ʋno, yakeh! ʋno ʋt hʋchishno, micha hʋchim ishtatiaka chi akaiya aiena,
10Micha nan okcha̱ya puta hʋch ibafoyuka ka̱, hushi, nan ʋlhpoa, micha nampoa puta yakni paknaka aiasha hʋch iba foyuka kʋt peni chito yash kohcha tuk, nampoa puta yakni paknaka aiasha ka̱ kʋllochit nana itim apesa lishke.
11Micha kʋllochit nana hʋchitim apesa la chi̱ hoke: mikma himakma nanipi moma kʋt oka falama isht illit taha he keyu hoke; micha himakma oka falama ʋt a̱ya cha, yakni ya̱ okpʋna he keyu hoke, achi tok.
12Micha Chitokaka yʋt, Ilʋppak osh ʋno, micha hʋchishno ya̱ micha nan okcha̱ya moma hʋchi apeha ka̱ ai itishali bilia ka̱ nana itim apesa itim ikbi li ka̱ isht atokowa yoke.
13Ʋno ʋt a̱ hinakbitepuli ya̱ hoshonti anu̱kaka ya̱ takalichi li hoke; mikma yʋmmak osh ʋno ʋt yakni ya̱ nana itim apesa li tuk isht atokowa yosh talaia achi̱ hoke.
14Atukma yakohma hi oke, hoshonti ha̱ yakni paknaka isht a̱ya likma, hinakbitepuli hʋt hoshonti ha̱ takalit haiaka hi oke.
15Mikma ʋno, micha hʋchishno, micha nanokcha̱ya nipi a̱sha moma aiena ka̱ nana itim apesa ʋt a pitin takla takali ka̱ ithaiyana la hi oke; mikma himakma oka yʋt oka falama toba cha, nana nipi a̱sha moma ka̱ oka tʋmola he keyu ka hi oke.
16Mikma hinakbitepuli hʋt hoshonti ha̱ takala hi oke; mikma nana itim apesa ont ataha iksho ʋt Chitokaka, micha nan okcha̱ya nipi a̱sha moma yakni paknaka aiasha aiena kʋt im ai itin takla takali ka̱ ithaiyana la chi̱ kʋt pi̱hi̱sa la hi oke, achi tok.
17Micha Chitokaka yʋt Noah ya̱, Ilʋppak osh nana itim apesa ʋno ʋt nan okcha̱ya nipi a̱sha moma yakni paknaka aiasha ka̱ kʋllochit itim apesa li tuk a̱ isht atokowa yoke, im achi tok.
18Mihma Noah ushi ʋhleha peni chito ya̱ asht kocha wiha kʋt Shem, micha Ham, micha Chafelh ak atok: atuk o̱ Ham ak osh Kenan a̱ i̱ki atok.
19Ilʋppak osh Noah ushi ʋhleha tuchina mak oke; atuk o̱ yʋmmak atok ak o̱ yakni moma ka̱ ai ita fimimpa tok.
20Mihma Noah hʋt yakni a toksʋlit wakaya cha, osapushi pa̱kʋpi ahollokchi ya̱ ikbi tok.
21Atuk osh oka pa̱ki ya̱ ishko cha haksi tok; mihmʋt i̱ shahbi hosh im ʋlhtipo anu̱kaka ya̱ itonla tok.
22Mihma Kenan i̱ki Ham ʋt i̱ki ʋt nipi bano ka̱ pisa mʋt, itibapishi tuklo kocha a̱shwa tuk a̱ im anoli tok.
23Mihma Shem, micha Chafelh ita tuklo kak osh anchi yo̱ ishi cha, tahchi ha̱ onochit bi̱ka cha, olbʋlh‐pelʋt ia hosh i̱ki nipi bano tuk a̱ ont ompohomo tok: micha nashuka ʋt i̱ filʋmmi hatuk osh i̱ki nipi bano ka̱ ik pesot okla tok.
24Atuk o̱ Noah hʋt oka pa̱ki ishkot haksi tuk ʋt kostini mʋt, ushi nakfish ak osh nana im akaniohmi tuk a̱ akostininchi tok.
25Micha, Kenan ʋt kalakshashke; tishu ʋhleha in tishu hosh itibapishi ʋhleha ha̱ i̱ nutaka hosh aiasha hi oke, achi tok.
26Mihmʋt Shem in Chitokaka Chihowah yʋt holitopashke: mikma Kenan ʋt in tishu ha hi oke.
27Chitokaka yʋt Chafelh a̱ im auatʋchikma, Shem im ʋlhtipo puta ka̱ ʋttʋt a̱ya hi oke; mikma Kenan ʋt in tishu ha hi oke, achi tok.
28Atuk osh Noah hʋt, oka falama ʋt a̱ya ha ya̱ okcha̱yʋt ahanta na, afʋmmi tahlepa tuchina cha̱, pokoli tahlapi tok.
29Mihma Noah hʋt nitak moma ahanta kʋt afʋmmi tahlepa chakkali cha, pokoli tahlapi tok: atuk osh illi tok.
المحددات الحالية:
Chenesis 9: CHH
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Published by the American Bible Society 1848-1886, reprinted 1913
