Luc 5
5
Zezi asuolo aluoni a nde antsomi
1Tsuhu lemo Zezi aki osiese a dzaanga e Zenezarete, lemvuuru lema dzenehe nde. Lepia nde, ma oyuha mbari e Ndziami. 2Nde omoni ambuungu muele ma osiese a dzaanga, anga mo aki ama suriha ma otsuka apondzi. 3Zezi okumi o ntsa mbuungu mo, mbuungu dzia eki e Simon. Zezi oduhi na Simon ndi tsiina na mbuungu mua andza. Nde oya o ntsi ntsa mbuungu, ayisiha lemvuuru.
4Nde omana oyisiha, nde na Simon ndi: «Tsiisa mbuungu mua okeri, lehe apondzi ma andza, ma okuara antsu.» 5Simon okaali na nde ndi: «Nkumu, bisi lema dzandza lempiibi letsiina, leka abaha kiila ni. Ŋa me elehe apondzi ma andza lemihi na eduhi e we.» 6Bo alehi apondzi ma andza, akuari antsu a kuna, apondzi aya ma baha. 7Bo atsuoli abuha ma aki o mbuungu emo, na ayamaha bo. Bo ayi, aluusi ambuungu a muele. Antsu ama vula kuna, ambuungu aya ma dzina. 8Simon Piere oma mono maami maa aso, nde ovi ma avuo o miisi a Zezi. Nde na nde ndi: «Aa Nkumu, labaha na me, me osi ambiini.» 9O ŋa, Simon bla abuha a nde aso amoni vuoho, obila mo kuna antsu a bo ma kuari. 10Zaake bla Zan baana a Zebede, aki bla Simon amoni vuoho se. Ŋa Zezi oduhi na Simon ndi: «We oka monoho vuoho ni, na ema ka we, dzandza e we oma ka lesaha le baari.» 11Bo ama ya na mbuungu o sabi, asubi mo kalihi, aluoni Zezi.
Zezi osalihi nga ebila
12Tsuhu mo Zezi aki ntsa onguundu. Balaha mo, eki na ebila, omono Zezi, oyi na akumuha o miisi a nde mpaa o ntsie. Na nde ndi: «Nkumu, me eyaa mbri we odia, we abuuna osalaha me.» 13Zezi olabi kuoho, otiili nde ndi: «Me edia, wuuma!» O ŋiŋa, ebila ewi. 14Zezi ndi: «We okaa duha mvuuru ni. Dziehe na alaha nyuru mpili osi avuoŋi, ma ompa vuoŋi ma osuumbu a Moyize aduhi. Ma osiisa enyua mbri we omi wuuma.» 15Baari kuna ma wobo o ntsia e nde. Lemvuuru lekuha na e nde, ma oyuha nde, ma osaha nde osalaha angaa a bo. 16Ŋa nde oyeni ntsa kayi na avuono Ndziami.
Zezi osalihi obuka
17Tsuhu mo Zezi aki ayisiha. Afarizi bla ayisihi ma angri a Ndziami, aki o ntsi o paani e Zezi. Bo awihi ampuhu a ma angaala a Ngalili na onguundu o Zide na Zerizaleme. Mpari e Nkumu eki bla Zezi ma osalaha abieri. 18Baari ayi bla obuka o yula okuba ma osaha osuumbu ma onyunuŋa ntsa ndzo, ma otsuusa nde o miisi a Zezi. 19Baari aki ama vula kuna, bo aka yaa osuumbu onyunuŋa ni, bo akumi yula ndzo. Anaani maha, atubi bulu. Apiisi okuba o mua okuha, o miisi a Zezi. 20Nde omoni oyalihi eki bla bo, na obuka ndi: «Ambiini a we amiboloho.» 21Ayisihi ma angri bla Afarizi, aya ma awobo ndi: «Yu mvuuru na, atuuha Ndziami yu? Ongula Ndziami na mvuuru okima abuuna oboloho ambiini? Kali, Ndziami otu!» 22Zezi aki oyahi etsimiŋi ebo, okaali ndi: «Be bi etsimiŋi ema? 23Osiami kali oma? Leduha le mbri “Ambiini a we amiboloho” si kali ma oduha ndi: “Temeŋe, we olaana?” 24Mo bu mbri be leyaa mbri Muana Mvuuru na onkumu ma oboloho ambiini o yula ntsie.» Nde na obuka ndi: «Temeŋe, yaha okuba a we, dze ndzo.» 25O ŋiŋa, obuka otemihi o miisi a baari, oyahi okuba a nde akihi o yula nde, oyeni ndzo. Na okuusa lekuma le Ndziami. 26Baari aso aki ntsa lekimi na lenyiima, bo ma akuusa lekuma le Ndziami ndi: «Lobi bisi lemi mono maami a luari.»
Zezi osuoli Levi
27Emana Zezi oyeni, omoni otoniŋi lepo a nkuumi Levi, aki o ntsi obiri e nde e dzandza. Zezi na nde ndi: «Luono me!». 28Levi otemihi, osubi eso kalihi, oluoni nde. 29Emana Levi osi biila e kuna, otsuoli Zezi ndzo e nde na adza. Baari aki kuna, na abuha a nde ma atoniŋi ma lepo. 30Afarizi bla ayisihi ma angri ma ŋiina, na aluoni a Zezi ndi: «Be ledza, lenyua bla atoniŋi ma lepo, na asi ma ambiini ma oma?» 31Zezi okaali na bo ndi: «Baari ma ali enganaha kaama mo osalihi kali, abieri baari ma ali na kaama. 32Me eka aya na atsuolo baari ma tsimiŋa ndi bo ali tele ni, ŋa asi ma ambiini, mo bu ndi bo akaala eku.»
Zezi awobo ma ongerehe
33Afarizi na Zezi ndi: «Aluoni a Zan Batise bla a bisi ma aka ongerehe ma ovuono. Ŋa aluoni a we, ma adza, ma anyua.» 34Zezi okaali na bo ndi: «Ŋa tsuhu e tsinda e baala be lebuuna onyila andihi ma olumi aki ndzala o ntini olumi ali bla bo? 35Ŋa ntini edze oto, ma adze otsiese olumi o mpanihi e bo. Bia etsuhu ebo ma adze oka ongerehe.»
36Zezi oti bo ntsintsami ndi: «I buuna otsebe o bari o mfa e nyarihi ma otsua bla mfa e kala ni. Osa vua, abiisi mfa e nyarihi. Obari kia se i vunuha bla mfa e kala ni. 37Mvuuru i buuna olehe mali ma anyarihi ntsa ambasa a kala ni. Tsaaki mo abulihi, nde oyeli aso. 38Ove alehi mali ma anyarihi ntsa ambasa ma anyarihi. 39Mvuuru i buuna onyua mali a kala ovurihi opisi ma anyarihi ni. Obila baari ndi: “A kala avuli ove.”»
المحددات الحالية:
Luc 5: MDT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
