Luc 4
4
Dzabri asaha olehe Zezi ntsa etsiniŋi ma ebi
1Zezi awa na Zurde, Oduduma Santi oma luula o nde, Oduduma obiri nde ntsa kayi. 2O kua, Dzabri osoŋi nde ekuumi ma etsuhu ena. Ntsa etsuhu bia nde aka dza biila ni, emana ŋa ndzala esi nde. 3Dzabri na nde ndi: «Yuhu we muana Ndziami, wobo na kele dzi ekiriha biila.» 4Zezi okaali ndi: «Amateende ntsa Osaangumu o Ndziami ndi, “Mvuuru omuo aka baha lebihi ma lempeembe letu ni.”»
5Dzabri obiri nde nkara yulu, olahi nde esi e yulu a ntsie eso. 6Nde na Zezi ndi: «Me edze ompa we onkumu bla osolo e ma esi bi, dzo eso aki ama mpa me. Me se ompa na mvuuru a me edia. 7We owura avuo o miisi a me, dzo eso me edze oka e we.» 8Zezi okaali ndi, ama ateende ntsa Osaangumu o Ndziami ndi: «We owura avuo eso o miisi a Ndziami a Nkumu a we, we ovuono eso nde otu.»
9Dzabri obiri Zezi Zerizaleme, nde otsuusi nde o yula ndzo e Ndziami. Nde na nde ndi: «Yuhu we Muana Ndziami va o ntsie! 10Obila ama teende ntsa Osaangumu o Ndziami ndi: “Ndziami adze oduha na abaandzi a nde asuha we.” 11Bo ma adze obira we ntsa dziala e bo ma odema nyiili e we ema tiila o kele.» 12Zezi okaali ndi: «Ateende ntsa Osaangumu o Ndziami ndi: “We i soŋo Ndziami a Nkumu a we ni.”» 13Nde oma mana osoŋo Zezi ma angulu aso, Dzabri olabihi na nde ma odila oya na avuriha ntini nkima.
Zezi ovurihi Ngalili
14Zezi ovurihi Ngalili, mpari Oduduma Santi eki ema luula o nde. Baari aya ma wobo o nde o ntsa ngaala dzia eso. 15Nde oyisihi mbari o ntsa sinagoge#4.15 Sinagoge oma kaha ndzo Azife ma vuonoŋo. , ndzo ma avuonoŋo. Baari adzuusi nde.
Atsuuri Zezi o Nazarete
16Zezi oyeni Nazarete, mpili ma kuusi nde. Nde onyunihi ntsa ndzo ma avuonoho, o tsuhu ma awuumaha, me esihi e nde e kala. Nde otemihi ma oliira Osaangumu o Ndziami. 17Ampi nde osaangumu owobi a mbari e Ndziami Ezayi. Nde onaani, oliiri biri ma ama teende ndi:
18«Oduduma a Nkumu oli o me.
Nde ama suolo me, ma otooso Ntsia e Mve na baari ma ali ntsa owuha.
Nde atuma me ma ovusiha baari ma ali ntsa engeneŋe,
ma onaana miisi a baari ma ali i mono ni,
ma ovusiha baari ma ali ntsa ampasi,
19ma oduha ndi ki osibi o be lemono eve e Nkumu.»
20Zezi ovuuri osaangumu na odzandzi, oya o ntsi. Baari aso ma aki ntsa ndzo ma avuonoho, ma keese nde. 21Nde na bo ndi: «Maami a be leyuhi ntsa Osaangumu ki, ami mono mo lobi.» 22Baari aso a siisi enyua e nde, aya kimimi mo mbari e nde e mve. Bo ndi: «Saabe yu ka muana Zuzefe ni?»
23Ŋa nde na bo ndi: «Be lebuuna ota me ntsintsami dzi mbri: “Osalihi, salaha nyuru e we, we ankulu.” Ŋa be se lebuuna oduha me mbri: “Bisi lema yuha maami a we asi ma onguundu o Kaprenaume. Sa ma osuumbu dzua ntsa onguundu o we.”» 24Nde oluusi ndi: «Ee me eduha be, owobi a mbari e Ndziami se omo ma aka yambaha mo osi o nde ankulu ni. 25Sisiele me eduha be, ntini owobi a mbri e Ndziami Eli akihi ntsa osi o Isayele, mvula aki aka noho esibi etari na otini ni, mpuhu evi ndzala. Ntini dzia se eki na akuuli. 26Ŋa Ndziami aka tuma Eli mpili e bo aso ni. Nde osuoli okuuli omo akihi ntsa onguundu o Sareta ma osi o Sidon. 27O ntini owobi a mbari e Ndziami Elize akihi o Isayele, eki na se anga ebila, nde aka salaha bo ni. Nde asalihi Naman, osi Siri.»
28Aso ma yuhi nde ntsa ndzo ma avuonoho, abie nkala. 29Bo atemihi, atsuuri nde. Ayeni na nde ntsuo onguundu yulu okuri, obiri ma ama tua onguundu o Nazarete. Bo asahi otsiniŋa nde ntsa mbie. 30Nde oyiri o mpanihi e bo, oyeni.
Zezi ovusihi mvuuru aki na edidima ma ebi
31Zezi osurihi Kaprenaume, onguundu o ntsa ngaala e Ngalili, nde aki ayisiha o tsuhu ma awuumaha. 32Baari aya kimimi ma osuumbu eyisihi nde bla mpari e Ndziami. 33«Ntsa ndzo ma avuonoho balaha mo eki na odidima obi. Owuli nkima na nkala.» 34«Aa! We Zezi a Nazarete, we na bisi oma? We omi ya na apama bisi. Me eyaa we, we opeende a Ndziami atumi!» 35Zezi obie na nde ndi: «Tsuuha o nde!» Oduduma obi obali mvuuru dzua o ntsie, o mua okuha. Otsuuhi o nde, aka yusaha nde ngaa ni. 36Bo aso aya kimimi, aya ma ŋiina ompanihi ebo ndi: «Saabe dzi mbari ma? Nde awobo na edidima ma ebi na mpari bla lila, dzo ma etsuuha.» 37Okuumu o nde oyeni ntsa ngaala dzia eso.
Zezi Osalihi abieri
38Zezi otsiehi ndzo ma avuonoho, oyeni ndzo e Simon. Nde obasihi oko o Simon okaasi na obaa o nkala. Bo apisi Zezi ma osalaha nde. 39Nde okumihi o yula okaasi, obie na obaa, obaa owi. O ntsi na ntsi ŋa, nde otemihi, oya ampa bo biila.
40Tari ema va, baari ma aki na abieri ayi na laha bo na Zezi, nde olehi dziala o yula bo, bo awuumi. 41Edidima ma ebi etsuuhi na owula ankima: «We Muana Ndziami.» Zezi obie na bo ma oka pi. Obila bo adziabi ndi nde Krisi.
Zezi atooso mbari e Ndziami ntsa andzo ma avuonoho
42Eto na entsiere, Zezi otsuuhi ntsa onguundu ma odze ntsa kayi. Baari aya ma saha nde, bo ayi mpili e nde. Bo akanihi nde ma oduma nde oma dze. 43Nde na bo ndi: «Ove me se yeni na otooso Ntsia e Mve Onkani o Ndziami, ntsa enguundu ekima. Kia obila o Ndziami atumi me o yula ntsie.» 44Ŋa nde atoosihi mbari dzia ntsa andzo ma avuonoho a Zide.
المحددات الحالية:
Luc 4: MDT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
