Yohanis 21
21
Yesus kasi unju rupa par Antua pung murid tuju orang
21:1-14
1Abis Yesus kasi unju rupa par Antua pung murid-murid, Antua kasi unju rupa satu kali lai par Antua pung murid-murid di pinggir dano Tiberias. Akang pung carita bagini: 2Satu kali bagini, Yesus pung murid-murid ada bakumpul. Dong yang bakumpul tu nama Simon Petrus, Tomas yang orang biasa panggel par Didimus, Natanael dari kota Kana yang ada di propinsi Galilea, bapa Sebedeus pung ana dua, deng murid dua orang lai. 3La Simon Petrus bilang par dia pung tamang-tamang tu kata, “Eh, beta mau pi buang jareng do.”
La dia pung tamang-tamang tu bilang par dia, “Kalo bagitu, katong pi deng ale lai.” Jadi dong turung ka pinggir dano la nai parau par pi mancari. Mar satu malang antero-antero tu dong seng dapa apapa.
4Waktu matahari su mulai pica, Yesus badiri di pinggir dano. Mar Antua pung murid-murid tu seng kanal Antua. 5Tarus Antua bataria tanya dong kata, “Hoe basudara e! Kamong dapa ikang ka seng?”
La dong jawab Antua, “Seng!”
6Tarus Yesus bilang par dong kata, “Buang kamong pung jareng tu ka parau pung sabala kanang! Nanti kamong dapa ikang.” Jadi, dong biking apa yang Yesus bilang tu la dapa ikang paleng banya sampe dong seng kuat hela jareng tu lai.
7Tarus, Yesus pung murid yang Antua paleng sayang tu bilang par Petrus kata, “He, itu Tuhan Yesus tu!”
Waktu Simon Petrus dapa dengar kata itu Tuhan Yesus tu, dia langsung sarong dia pung baju panjang luar yang dia lapas waktu karja, la balumpa ka dalang aer, la barnang ka dara. 8Murid-murid yang masi ada dalang parau tu panggayo ka dara la hela jareng yang pono deng ikang-ikang tu. Waktu itu, dong seng jau dari dara, mangkali cuma saratus meter sa. 9Waktu dong sampe di pinggir dano, dong lia su ada bara api di situ deng ikang di atas akang. Dong jua lia ada roti lai. 10La Yesus bilang par dong kata, “Tolong bawa ikang satu dua ekor yang kamong baru tangkap tu kamari.”
11Tagal itu, Simon Petrus nai ka parau la hela jareng tu ka dara. Jareng tu pono deng ikang basar-basar. Samua ada 153 ekor. Mar biar kata dong dapa ikang banya macang bagitu lai, jareng tu seng tarobe. 12La Yesus bilang par dong kata, “Mari makang!”
Seng ada satu orang lai dari Yesus pung murid-murid tu yang barani tanya kata Antua tu sapa, tagal dong samua su tau kata Antua tu Tuhan Yesus. 13Abis itu, Yesus maju ambe roti tu la kasi akang par dong makang. Antua biking bagitu lai deng ikang tu.
14Itu tu kali katiga Yesus kasi unju rupa par Antua pung murid-murid abis Antua hidop kombali.
Yesus suru Petrus par jaga orang-orang yang parcaya Antua
21:15-19
15Abis makang, Yesus tanya Simon Petrus kata, “Simon, Yohanis pung ana e! Ale sayang Beta labe dari dong samua ni sayang Beta ka?”
Tarus Simon Petrus jawab Antua, “Iya Tuhan! Tuhan tau kalo beta sayang Tuhan.”
La Yesus bilang par dia kata, “Kalo bagitu, jaga orang-orang yang parcaya Beta tu bae-bae, macang deng orang yang jaga dia pung bos pung domba-domba.”
16Abis itu Yesus tanya Petrus lai kata, “Simon, Yohanis pung ana e! Ale sayang Beta ka seng?”
Tarus Simon Petrus jawab Antua, “Iya Tuhan! Tuhan sandiri tau kalo beta sayang Tuhan.”
La Yesus bilang par dia kata, “Kalo bagitu, jaga orang-orang yang parcaya Beta tu bae-bae, macang deng orang yang jaga dia pung bos pung domba-domba.”
17Abis itu Yesus tanya Petrus satu kali lai kata, “Simon, Yohanis pung ana e! Ale sayang Beta ka seng?”
Pas dengar bagitu, dia pung hati ancor paskali tagal Antua su tanya dia tiga kali sepe-sepe kata dia sayang Antua ka seng. Tarus dia jawab Antua kata, “Sio Tuhan e! Tuhan tau samua-samua. Tuhan tau kalo beta sayang Tuhan.”
La Yesus bilang par dia lai kata, “Kalo bagitu, jaga orang-orang yang parcaya Beta tu bae-bae, macang deng orang yang jaga dia pung bos pung domba-domba.
18Dengar bae-bae tagal apa yang Beta bilang ni batul! Waktu ale masi muda, ale sandiri yang pake ale pung pakiang la bajalang ka mana sa iko ale pung suka. Mar waktu ale su tua, ale nanti kasi ale pung tangang par orang laeng ika la dong nanti bawa ale ka tampa yang ale seng mau pi.”
19Yesus bilang bagitu par kasi unju kalo Petrus nanti dapa bunu deng cara bagemana biar Allah dapa puji. Abis bilang bagitu, Antua bilang par Petrus kata, “Mari iko Beta.”
Yesus pung murid yang Antua paleng sayang
21:20-23
20Waktu Petrus bale muka, dia lia Yesus pung murid yang Antua paleng sayang tu ada iko dong. Dia ni murid yang dudu dekat Yesus waktu dong ada makang sama-sama waktu Paska, la tanya Antua kata, “Tuhan, sapa tu yang nanti jual Tuhan?”#Yohanis 13:23-25
21Waktu Petrus dapa lia dia, Petrus tanya Yesus kata, “Tuhan, la bagemana deng dia tu?”
22Mar Yesus bilang, “Ale seng parlu tau soal dia. Kalo Beta mau biar dia hidop tarus sampe Beta bale kombali ka, seng ka, itu bukang ale pung urusang. Yang panting tu ale musti iko Beta tarus!”
23Tagal Yesus bilang bagitu, tasiar carita dari mulu ka mulu di Yesus pung murid-murid yang laeng kata dia nanti seng mati. Mar Yesus seng bilang bagitu. Antua cuma bilang kata, “Kalo beta mau dia hidop tarus sampe Beta bale kombali ka, seng ka, itu bukang ale pung urusang.”
Yohanis pung kata-kata laste
21:24-25
24Beta ni Yesus pung murid yang Antua paleng sayang tu. Beta yang carita soal samua yang Yesus su biking tu deng yang tulis samua-samua yang ada dalang buku ni. La beta deng beta pung tamang-tamang samua tau kalo apa yang beta bilang ni batul.
25Masi banya lai yang Yesus biking. Mar kalo samua-samua tu dapa tulis satu abis satu, seng ada tampa di dunya ni lai yang bisa muat buku-buku tu.
المحددات الحالية:
Yohanis 21: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
