Yohanis 20
20
Yesus hidop kombali
20:1-10
(Matius 28:1-8; Markus 16:1-8; Lukas 24:1-12)
1Hari Minggu amper siang, waktu masi galap lai, Maria Makdalena su pi di Yesus pung kubur tu. Pas sampe di sana, dia lia bagini, batu basar yang tutu mulu kubur tu su taguling. 2Tagal itu, dia lari cari Simon Petrus deng Yesus pung murid yang Antua sayang la bilang kata, “Ayo e! Ada orang yang su ambe Tuhan pung mayat dari dalang kubur. Katong#Matius 28:1; Markus 16:1; Lukas 24:1 seng tau dong taru Antua di mana.”
3Jadi Petrus deng Yesus pung murid satu tu pi ka kubur. 4Dong dua lari ka sana mar murid satu tu lari labe kancang dari Petrus. Tagal itu dia sampe kamuka. 5Pas sampe, dia tundu la mangente ka dalang. Dia lia kaeng lenan yang bungkus Yesus pung mayat tu ada di situ.
6Waktu Simon Petrus sampe dari balakang, dia langsung maso ka dalang kubur tu. Dia dapa lia kaeng tu ada di situ lai. 7Dia jua dapa lia kaeng sapanggal yang tutu Antua pung muka. Mar, akang seng ada di satu tampa sama-sama deng kaeng yang bungkus Antua pung mayat tu. Akang ada di tampa laeng deng su talipa. 8La murid satu yang sampe kamuka di kubur tu maso lai. Waktu dia maso la lia samua-samua tu, dia parcaya kalo Yesus su hidop kombali. 9Dari dolo dong masi balong mangarti apa yang tatulis dalang Allah pung Tulisang yang bilang kata Antua musti hidop kombali.#Matius 22:29; Yohanis 2:22; Lukas 24:26, 46; Utusang pung Carita 2:24 10Abis itu dong dua pulang.
Yesus kasi unju rupa par Maria Makdalena
20:11-18
(Matius 28:9-10; Markus 16:9-11)
11Maria Makdalena tinggal kong badiri di muka liang kubur tu la manangis tarus. Waktu dia ada manangis, dia mangente ka dalang kubur tu. 12Skrek bagini, dia dapa lia malekat dua orang deng pakiang puti mangkilat-mangkilat. Dong dua ada dudu di tampa taru Yesus pung mayat. Satu dudu di sabala kapala la yang satu lai dudu di sabala kaki. 13La malekat dua tu tanya dia kata, “Mama, mangapa kong mama manangis?”
Dia jawab, “Beta pung Tuhan pung mayat su dapa ambe dari sini, baru beta jua seng tau kata dong su taru Antua di mana.”
14Abis bilang bagitu deng dia bale muka la dapa lia Yesus ada badiri di situ. Mar dia seng tau kata itu Yesus. 15La Yesus bilang par dia kata, “Mama, mangapa kong mama manangis? Mama cari sapa?”
Maria kira kata Antua tu orang yang jaga taman tu. Tagal itu, dia bilang kata, “Bapa! Kalo memang bapa yang ambe beta pung Tuhan pung mayat, tolong bilang par beta jua bapa taru Antua di mana biar beta bisa pi ambe Antua.”
16Yesus bilang, “Maria.”
Maria bale muka par Yesus la bilang kata, “Rabuni!” (Kata ni dari bahasa Ibrani. Akang pung arti ‘Tuang Guru’.)
17La Yesus bilang par dia, “Jang pegang Beta tagal Beta balong bale par Beta pung Bapa. Pi bilang par Beta pung sudara-sudara dong kata Beta su mau bale par Beta pung Bapa deng Beta pung Allah. Antua tu jua kamong pung Bapa deng kamong pung Allah lai.” 18Jadi Maria Makdalena pulang kasi tau barita tu par Yesus pung murid-murid. Dia bilang kata, “He, beta su lia Tuhan!” La dia bilang Antua pung pasáng par dong samua.
Yesus kasi unju rupa par Antua pung murid-murid
20:19-23
(Matius 28:16-20; Markus 16:14-18; Lukas 24:36-49)
19Hari Minggu#20:19 Hari Minggu: Teks bahasa Yunani bilang “hari partama”. Kalo iko orang Yahudi pung almanak, hari partama tu hari Minggu. malang tu, Yesus pung murid-murid bakumpul di ruma satu. Dong konci pintu-pintu samua tagal dong taku orang Yahudi pung pamimping-pamimping. Skrek bagini, Yesus datang la badiri di tenga-tenga dong samua la bilang, “Syalom par kamong samua!”
20Abis bilang bagitu, Antua kasi unju Antua pung bakas luka di tangang deng bawa rusuk tu. Waktu dong lia dong pung Tuhan tu, dong pung hati paleng sanang paskali. 21La Yesus bilang par dong satu kali lai kata, “Beta minta biar Allah Bapa kasi dame par kamong samua. Sama deng Beta pung Bapa utus Beta, Beta jua utus kamong samua lai.”
22Pas abis bilang bagitu, Antua tiop Antua pung napas par dong la bilang, “Tarima Allah pung Roh. 23Kalo kamong kasi ampong sapa sa pung dosa-dosa, Allah jua kasi ampong dong pung dosa-dosa lai. Mar kalo kamong seng kasi ampong dong pung dosa-dosa, Allah jua seng kasi ampong dong pung dosa-dosa lai.”
Yesus kasi unju rupa par Tomas
20:24-29
24Dari Yesus pung murid sapulu dua orang, ada satu orang nama Tomas. Orang-orang jaga panggel dia jua par Didimus, yang pung arti ‘ana bakambar’. Waktu Yesus kasi unju rupa par Antua pung murid-murid tu, dia seng ada. 25Jadi murid-murid yang laeng tu bilang par dia kata, “Tomas! Katong su lia Tuhan.”
Mar Tomas pung slak, “Kalo beta balong lia Antua pung bakas luka di Antua pung tangang deng beta pung mata kapala sandiri, deng kalo beta balong sonto Antua pung bakas luka di tangang tu deng balong taru beta pung tangang di Antua pung bakas luka di bawa rusuk tu, jang harap kata beta mau parcaya kamong.”
26Langgar saminggu bagini, Yesus pung murid-murid tu bakumpul kombali di ruma tu. Kali ini Tomas jua ada sama-sama deng dong lai. Dong su konci pintu-pintu samua, mar skrek bagini Yesus badiri di tenga-tenga dong samua. Antua bilang kata, “Beta minta biar Allah Bapa kasi dame par kamong samua.”
27Abis itu, Antua bilang par Tomas, “Tomas, mari lia Beta pung bakas luka di tangang ni la cucu akang deng ale pung jare. Lunjur ale pung tangang tu la cucu akang dalang Beta pung bakas luka di bawa rusuk ni. Jang seng parcaya lai, mar musti parcaya!”
28La Tomas bilang par Antua kata, “Sio Bapa e! Bapa ni beta pung Tuhan deng beta pung Allah!”
29Tarus Yesus bilang par dia, “Tomas e! Tagal ale su lia Beta, jadi ale parcaya. Mar dengar Beta bilang: Sapa yang seng lia mar parcaya, dia tu paleng baruntung paskali.”
Mangapa kong Yohanis tulis buku ni
20:30-31
30Memang masi banya tanda herang laeng lai yang Yesus biking di muka Antua pung murid-murid. Mar seng samua yang tatulis di buku ni. 31Mar, beta tulis ini biar kamong parcaya kalo Yesus tu Orang yang Allah su Angka par Kasi Salamat Manusia. Antua tu Allah pung Ana. Beta jua tulis samua ni biar kamong bisa hidop tarus-tarus tagal parcaya Antua.
المحددات الحالية:
Yohanis 20: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
