Yohanis 16
16
1Beta su bilang samua tu sakali biar kamong jang bale balakang la seng parcaya Beta. 2Kamong nanti dapa larang par seng bole inja orang Yahudi pung tampa-tampa sombayang. Mala satu waktu jua, orang-orang yang bunu kamong tu sangka kata waktu biking bagitu, itu dong ada biking Allah pung mau. 3Dong nanti biking bagitu, tagal dong seng kanal Beta deng Beta pung Bapa. 4Beta bilang samua tu sakali biar kalo akang jadi, kamong inga kalo Beta parna bilang akang par kamong. Beta seng bilang akang dari kamuka-kamuka tagal Beta masi ada sama-sama deng kamong.”
Allah pung Roh tolong orang-orang yang parcaya Yesus
16:5-15
5Yesus bilang par Antua pung murid-murid lai kata, “Sakarang, Beta mau bale par Beta pung Bapa yang su utus Beta datang kamari. Mar seng ada satu lai dari kamong yang tanya kata Beta mau pi ka mana. 6Mala kamong pung hati susa tagal Beta bilang bagitu. 7Mar apa yang Beta mau bilang ni batul. Kalo Beta bale, itu mala labe bae par kamong. Barang, kalo Beta seng bale, Antua pung Roh seng bisa datang par tolong kamong. Mar kalo Beta bale, Beta bisa utus Roh tu par datang par kamong.
8Waktu Roh tu datang, Roh tu nanti kasi unju tarang-tarang kalo manusia di dunya ni su biking dosa. Roh tu nanti kasi tau soal apa yang batul di muka Allah. Roh tu jua nanti kasi tau dong kombali kalo Allah nanti hukum manusia. 9Roh tu nanti kasi unju kalo manusia di dunya ni su biking dosa, tagal dong seng parcaya Beta. 10Roh tu nanti kasi tau kalo Beta batul di muka Allah, tagal Beta nanti bale par Beta pung Bapa kombali la kamong seng lia Beta lai. 11Roh tu jua nanti kasi tau kalo Antua nanti hukum manusia, tagal Setang pung Raja yang parenta dunya ni su dapa hukum.
12Masi banya lai yang Beta mau bilang par kamong, mar kamong balong bisa mangarti akang sakarang. 13Mar, waktu Roh yang kasi tau ajarang yang batul soal Allah tu datang, Roh tu nanti tolong kamong biar kamong bisa mangarti soal samua-samua yang batul. Roh tu seng bicara iko Roh tu pung mau sandiri. Mar apa sa yang Roh tu dengar, itu yang Roh tu bilang. Roh tu jua nanti bilang par kamong apa yang nanti jadi eso lusa. 14Roh tu nanti biking sampe orang-orang taru hormat par Beta, tagal Roh tu nanti bilang par kamong apa yang Roh tu tarima dari Beta. 15Samua-samua yang Beta pung Bapa pung, itu tu Beta pung lai. Tagal itu kong Beta bilang kata Antua pung Roh tu nanti bilang apa yang Roh tu tarima dari Beta par kamong.”
Orang-orang parcaya nanti susa mar nanti bale sanang kombali
16:16-33
16Yesus bilang par Antua pung murid-murid kata, “Tinggal sadiki tempo sa kamong seng lia Beta lai. Mar seng lama abis itu, kamong nanti lia Beta kombali.”
17Abis Yesus bilang bagitu, Antua pung murid-murid saparu laeng bilang par laeng kata, “Eh, mangapa kong Antua bilang kata tinggal sadiki tempo sa katong seng bisa lia Antua lai, mar seng lama abis itu katong nanti lia Antua kombali? La waktu bilang kata Antua nanti bale par Antua pung Bapa, itu Antua pung maksud apa?” 18Dong tinggal kong batanya tarus kata, “Itu Antua pung maksud apa waktu bilang kata tinggal sadiki tempo sa? Katong seng mangarti apa yang Antua bilang tu.”
19Yesus tau kalo dong inging paskali par tanya Antua. Tagal itu, Antua bilang par dong kata, “Hui! Kamong ada baku tanya soal apa yang Beta baru bilang tu sa kapa? Kamong ada baku tanya kata tinggal sadiki tempo sa kamong seng bisa lia Beta lai, mar seng lama abis itu kamong nanti lia Beta kombali to? 20Dengar bae-bae tagal apa yang Beta bilang ni batul! Kamong nanti manangis marata, mar orang-orang di dunya ni nanti tatawa pata gigi. Kamong nanti hati susa, mar kamong pung hati yang susa tu nanti bale sanang kombali. 21Itu sama deng parampuang yang rasa paleng saki paskali waktu mau kasi lahir ana. Mar waktu dia pung ana su lahir, dia su lupa dia pung saki tu. Dia rasa paleng sanang tagal dia pung ana su lahir. 22Kamong sama deng parampuang yang mau kasi lahir ana tu. Sakarang, kamong pung hati ada susa tagal Beta mau pi. Mar waktu Beta bale lia kamong kombali, kamong pung hati nanti sanang. La seng ada satu orang lai yang bisa rampas akang dari kamong pung hati. 23Waktu itu, kamong seng parlu tanya apapa dari Beta lai. Dengar bae-bae tagal apa yang Beta bilang ni batul! Apa sa yang kamong minta dari Beta pung Bapa deng Beta pung nama, Antua nanti kasi akang par kamong. 24Sampe oras ni, kamong balong minta apapa dari Beta pung Bapa deng Beta pung nama. Jadi minta, la kamong dapa kasi. La deng bagitu kamong pung hati batul-batul sanang.
25Sampe sakarang, Beta bilang samua ni deng ande-ande par kamong, mar satu waktu nanti Beta seng bicara deng ande-ande lai. Waktu itu, Beta nanti bicara tarang-tarang soal Beta pung Bapa. 26Waktu itu, Beta seng parlu minta apapa dari Beta pung Bapa par kamong lai. Kamong sandiri bisa minta akang langsung dari Antua, tagal kamong minta deng Beta pung nama. 27Barang, Antua sandiri paleng sayang kamong, tagal kamong sayang Beta deng tagal kamong parcaya kalo Beta datang dari Allah. 28Memang Beta datang dari Allah Bapa ka dalang dunya ni. Mar sakarang ni, Beta mau kasi tinggal dunya ni la mau bale par Antua.”
29Waktu dengar bagitu, Antua pung murid-murid bilang, “Tuang Guru! Sakarang baru Tuang Guru bicara tarang-tarang par katong, seng pake ande-ande lai. 30Sakarang katong tau kalo Tuang Guru tau samua-samua. Orang seng parlu tanya-tanya Tuang Guru lai, tagal Tuang Guru su tau dong mau tanya apa la su jawab akang kamuka. Tagal itu, katong parcaya kalo Tuang Guru ni datang dari Allah.”
31La Yesus bilang par dong kata, “Jadi sakarang ni kamong su parcaya? 32Dengar! Satu waktu nanti, mala sakarang ni jua, kamong nanti lari talamburang ka kamong pung ruma satu-satu la kasi tinggal Beta sandiri. Mar Beta seng sandiri, tagal Beta pung Bapa ada sama-sama deng Beta. 33Beta bilang samua ni biar kamong pung hati dame, tagal kamong su satu hati deng Beta. Kamong pasti susa deng sangsara dalang dunya ni. Mar kamong musti kasi kuat kamong pung hati, tagal Beta su kasi kala sagala kuasa yang ada dalang dunya ni.”
المحددات الحالية:
Yohanis 16: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
