Yohanis 15
15
Yesus tu sama deng pohong anggor yang batul
15:1-8
1Yesus bilang ande-ande satu par Antua pung murid-murid kata, “Beta ni pohong anggor satu yang batul, kamong tu akang pung jaga-jaga, la Beta pung Bapa tu orang yang kalesang akang. 2Kalo jaga-jaga yang ada di Beta tu seng kasi kaluar bua, Antua nanti potong akang abis. La kalo jaga-jaga tu kasi kaluar bua, Antua nanti kasi barsi akang pung daong-daong deng potong akang pung jaga-jaga sadiki biar akang bisa babua labe tamba banya lai. 3Kamong samua su dapa kasi barsi deng su dapa potong sadiki tagal kamong su tarima ajarang yang Beta su bilang par kamong. 4Kamong musti satu hati tarus deng Beta. Kalo kamong biking bagitu, Beta jua nanti satu hati deng kamong lai. Seng ada jaga pohong yang bisa babua kalo tapisa dari akang pung pohong. Bagitu lai deng kamong. Kamong seng bisa biking apapa yang bae kalo kamong seng satu hati deng Beta.
5Beta ni pohong anggor la kamong tu akang pung jaga-jaga. Sapa yang satu hati deng Beta la Beta satu hati deng dia, dia nanti bisa biking samua yang bae. Barang, sapa yang seng satu hati deng Beta, dia seng bisa biking apapa yang bae. 6Sapa sa yang seng satu hati deng Beta, dia nanti dapa buang macang deng jaga-jaga pohong yang seng babua, yang dapa potong par buang. Pas akang su karing, orang kumpul akang la angka lempar akang ka dalang api la tabakar. 7Mar, kalo kamong satu hati tarus deng Beta la Beta pung ajarang tatanang dalang kamong pung hati, kamong bisa minta apa sa dari Beta pung Bapa la Antua nanti kasi akang par kamong. 8Kalo kamong biking apapa yang bae, kamong su kasi unju kalo kamong tu batul-batul Beta pung murid-murid. La deng bagitu, orang-orang nanti puji-puji Beta pung Bapa.”
Parenta par baku sayang satu deng laeng
15:9-17
9Yesus bilang lai kata, “Sama deng Beta pung Bapa sayang Beta, Beta jua sayang kamong lai. Jadi sakarang, kamong musti tetap satu hati deng Beta biar kamong bisa tau kalo Beta sayang kamong paskali. 10Kalo kamong biking Beta pung parenta tarus, itu sama sa deng kamong tetap satu hati deng Beta deng tau kalo Beta sayang kamong. Bagitu lai deng Beta. Beta jua biking Beta pung Bapa pung parenta tarus, la tetap satu hati deng Antua, deng tau kalo Antua sayang Beta. 11Beta kasi tau samua ni par kamong biar kamong pung hati sanang macang deng Beta, deng biar kamong pung hati batul-batul sanang paskali. 12Ini ni Beta pung parenta par kamong: Kamong musti baku sayang satu deng laeng, macang deng Beta sayang kamong.#Yohanis 13:34, 15:17; 1 Yohanis 3:23; 2 Yohanis 1:5 13Orang yang paleng sayang dia pung tamang-tamang tu orang yang mau kasi dia pung hidop par mati ganti dong biar dong bisa salamat. 14Kalo kamong biking Beta pung parenta, kamong tu Beta pung tamang-tamang. 15Beta seng panggel kamong tu orang suru-suru lai, tagal orang suru-suru seng tau apa yang dong pung bos mau biking. Mar Beta panggel kamong tu Beta pung tamang-tamang, tagal Beta su kasi tau samua-samua yang Beta su dengar dari Beta pung Bapa par kamong.
16Bukang kamong yang pili Beta, mar Beta yang pili kamong. La Beta su kasi tugas kamong par pi biking apa yang bae, la apa yang kamong biking tu bisa kasi kaluar hasil yang batahang tarus-tarus, macang deng jaga-jaga pohong anggor yang kasi kaluar bua yang banya deng bagus-bagus. Kalo kamong biking bagitu, apa sa yang kamong minta dari Beta pung Bapa deng Beta pung nama, Antua nanti kasi akang par kamong. 17Jadi ini ni Beta pung parenta: Kamong musti baku sayang satu deng laeng.”
Orang-orang seng suka Yesus deng Antua pung murid-murid
15:18—16:4
18Yesus bilang par Antua pung murid-murid lai kata, “Kalo orang-orang yang seng parcaya Beta yang ada di dunya ni binci kamong, kamong musti inga kalo dong tu su binci Beta kamuka kamong. 19Kalo kamong sama sa deng dong di dunya ni, dong pasti sayang kamong, tagal kamong tu dong pung orang-orang. Mar kamong seng sama lai deng dong, tagal Beta su pili kamong dari dong tu. Itu yang biking sampe dong binci kamong. 20Jang lupa apa yang Beta parna bilang par kamong kata, ‘Jongos seng labe basar dari dia pung bos.’#Yohanis 13:16 Jadi kalo dong su siksa Beta, dong jua pasti siksa kamong lai. Kalo dong dengar apa yang Beta bilang, dong jua pasti dengar apa yang kamong bilang lai. 21Mar dong nanti siksa kamong, tagal kamong tu Beta pung orang-orang. Barang, dong seng kanal Antua yang utus Beta. 22Kalo Beta seng datang la seng kasi balajar dong, dong bisa pikir kalo dong seng biking dosa. Mar sakarang ni, dong seng ada pung alasang kata dong seng tau kalo apa yang dong biking tu dosa.
23Sapa yang binci Beta, itu sama sa dia jua su binci Beta pung Bapa. 24Dong su lia tanda-tanda herang yang Beta biking yang seng ada satu orang lai yang parna biking akang, mar dong seng mau parcaya Beta. Kalo Beta balong parna biking akang, dong bisa pikir kalo dong seng biking dosa. Mar biar kata dong su lia akang lai, dong masi binci Beta deng Beta pung Bapa. 25Mar apa yang tatulis dalang Allah pung Tulisang yang dong iko tu musti jadi. Akang bilang kata, ‘Dong binci Beta, mar seng ada akang pung alasang.’#Lagu-Lagu 35:19, 69:5
26Beta nanti utus Allah pung Roh par tolong kamong ganti Beta. Roh yang datang dari Bapa tu salalu kasi tau ajarang yang batul soal Allah par kamong. Waktu Roh tu datang, Roh tu nanti kasi tau soal Beta par orang-orang. 27Mar kamong jua musti kasi tau orang-orang soal Beta, tagal dari waktu Beta mulai karja di dunya ni lai kamong su ada sama-sama deng Beta.
المحددات الحالية:
Yohanis 15: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
