Utusang pung Carita 2
2
Allah pung Roh pung kuasa par orang-orang yang parcaya Yesus
2:1-13
1Waktu orang Yahudi pung hari basar Pentakosta,#2:1 Orang Yahudi pung hari basar Pentakosta tu hari ambe hasil gandum. Waktu itu, orang Yahudi samua datang bakumpul di kota Yerusalem par iko hari basar ni sama-sama. orang-orang yang parcaya Yesus bakumpul di ruma satu.#Kaluar dari Mesir 23:16, 34:22; Imam-Imam pung Atorang 23:15-21; Carita Ulang 16:9-11 2Skrek bagini, ada bunyi dari langit macang deng anging basar yang batiop koliling dalang ruma, tampa dong dudu bakumpul tu. 3Tarus, dong lia bagini macang ada lida-lida api yang tabage-bage turung di atas dong satu-satu. 4Oras itu jua, Allah pung Roh kasi kuasa par dong samua deng biking dong bicara pake bahasa-bahasa laeng yang dong sandiri seng mangarti akang.
5Waktu itu, orang-orang Yahudi yang dengar-dengarang Allah, yang datang dari sagala daera di dunya, dong ada di kota Yerusalem. 6Waktu dong dengar bunyi macang deng anging basar tu, dong samua pi bakumpul. Dong samua bingong tagal dong dengar orang-orang yang parcaya Yesus tu bicara pake dong samua yang bakumpul tu pung bahasa sandiri-sandiri. 7Dong samua manganga taherang-herang la baku tanya kata, “He, orang-orang yang ada bicara ni orang Galilea to? 8Bagemana kong katong bisa dengar dong bicara pake katong satu-satu pung bahasa? 9Katong ni orang Yahudi dari daera Partia, Media, Elam, Mesopotamia, Yudea, Kapadokia, Pontus, deng Asia. 10Saparu lai dari Frigia, Pamfilia, Mesir, deng daera-daera Libia, yang baku dekat deng kota Kirene. Saparu lai dari kota Roma, 11itu tu orang-orang Yahudi deng orang-orang yang su maso agama Yahudi. La saparu lai datang dari pulo Kreta deng daera Arab. Katong samua ada dengar dong bicara pake katong pung bahasa sandiri-sandiri soal hal-hal basar yang Allah su biking deng Antua pung kuasa.”
12Dong samua taherang-herang. Jadi, dong baku tanya kata, “Samua ini ni, akang pung arti apa la?”
13Mar ada orang-orang laeng yang pukul sindir dong kata, “Hoe! Dong tu ada mabo la su bicara takaruang.”
Petrus kasi tau Kabar Bae par orang banya
2:14-42
14Tarus, Petrus deng Yesus pung sapulu satu utusang laeng badiri la Petrus tabaos basar-basar par orang-orang yang ada bakumpul kata, “Basudara orang Yahudi deng orang-orang yang tinggal di kota Yerusalem, pasang talingang la dengar bae-bae! 15Jang kamong kira kalo katong ni ada mabo. Sakarang baru jam sambilang pagi. Sapa yang mau minong anggor par pagi-pagi bagini!#2:15 Orang Yahudi jaga minong anggor kalo dong makang daging. La waktu par dong makang daging tu malang hari. Kalo pagi hari, dong jaga makang roti sa. Lia Kaluar dari Mesir 16:8. 16Mar yang katong ada biking sakarang ni, dolo Allah su bilang akang par Antua pung Juru Bicara Yoel. La Yoel tulis kata,
17‘Allah bilang, “Nanti pas dunya ni su mau abis, Beta kasi Beta pung Roh par samua orang.
Kamong pung anana laki-laki deng parampuang nanti kasi tau pasáng yang dong dapa dari Beta.
Kamong pung anana muda nanti dapa lia hal-hal yang Beta kasi unju par dong.
Kamong pung orang-orang tatua nanti mimpi apapa yang Beta kasi lia par dong.
18Labe-labe lai par Beta pung orang suru-suru laki-laki deng parampuang,
Beta nanti kasi Beta pung Roh par dong oras itu jua.
La dong nanti kasi tau pasáng yang dong dapa dari Beta.
19Beta nanti biking tanda-tanda herang di langit di atas tu deng di dunya di bawa ni.
Nanti ada dara, api, deng asap tabal-tabal di dunya.
20Matahari nanti jadi galap, bulang jadi mera macang deng dara.
Akang nanti jadi bagitu kamuka do,
baru hari par Beta datang kombali deng Beta pung kuasa yang basar la putus samua pung parkara.
21Hari itu sapa sa yang minta tolong dari Beta,
Beta nanti kasi salamat dia.” ’#Yoel 2:28-32
22Basudara orang Israel e, pasang talingang la dengar bae-bae! Allah su kasi unju kalo Yesus orang Nasaret dapa utus dari Antua. Allah kasi kuasa par Yesus biar Antua biking tanda-tanda herang di tenga-tenga kamong. Samua itu tu kamong su tau to? 23Iko Allah pung rencana yang Antua su biking dari dolo, Antua su ator par kasi Yesus par kamong. La kamong su kasi Antua par orang-orang yang seng parcaya Allah par salib Antua sampe mati.#Matius 27:35; Markus 15:24; Lukas 23:33; Yohanis 19:18 24Mar Allah kasi hidop Antua kombali. Waktu Antua mati, Antua dapa siksa paleng barát, mar Allah seng kasi biar Antua mati tarus. Barang, seng mungkin Antua mati tarus.#Matius 28:5-6; Markus 16:6; Lukas 24:5 25Dolo-dolo Raja Daud parna tulis kalo Yesus bilang kata,
‘Beta jaga lia Tuhan ada di muka Beta.
Tuhan badiri di Beta pung sabala kanang
biar Beta seng taku apapa.
26Jadi, Beta pung hati paleng sanang deng puji-puji Tuhan tarus.
Beta parcaya Tuhan nanti biking Beta hidop kombali.
27Barang, Tuhan seng kasi tinggal Beta ada di orang mati pung dunya tarus.
Tuhan seng kasi biar Beta, Orang yang Kudus ni pung mayat busu di dalang kubur.
28Tuhan su kasi tau par Beta kalo Beta nanti hidop kombali.
Beta pung hati paleng sanang tagal Tuhan ada deng Beta tarus-tarus.’ ”#Lagu-Lagu 16:8-11
29Petrus bale bilang lai kata, “Basudara samua! Beta deng barani mau kasi tau sadiki par kamong soal Raja Daud, katong pung moyang:
Raja Daud su mati la orang-orang su kubur antua pung mayat. Antua pung kuburang masi ada di tenga-tenga katong sampe oras tadi ni. 30Mar Daud tu Allah pung juru bicara. Antua tau kalo Allah su janji deng sumpa par antua kalo Allah nanti angka satu Orang dari antua pung anana cucu par jadi Raja macang deng antua.#Lagu-Lagu 132:11; 2 Samuel 7:12-13 31Antua su tau lai soal apa yang Allah mau biking nanti. Jadi, antua bilang kalo Orang yang Allah su Angka par Kasi Salamat Manusia tu nanti mati la hidop kombali. Antua jua bilang kalo Allah seng kasi biar Orang yang Allah su Angka tu ada di orang mati pung dunya tarus deng Antua pung mayat seng busu dalang kubur.
32Basudara e! Orang yang Raja Daud su bilang tu, Yesus. Allah su kasi hidop Antua la katong samua su lia kajadiang itu deng katong pung mata kapala sandiri. 33Allah su angka Antua ka sorga la Antua ada dudu di Allah pung sabala kanang, tampa paleng panting. Antua su tarima Allah pung Roh lai yang Allah Bapa su janji tu. La sakarang Antua ada kasi Antua pung Roh par katong. Itu yang kamong ada dengar deng lia sandiri di sini. 34Raja Daud seng tarangka ka sorga, mar antua sandiri bilang,
‘Tuhan Allah su bilang par beta pung Tuhan#2:34 Yang Daud maksud deng beta pung Tuhan tu, Kristus. Jadi, ayat ni bicara soal Allah ada bicara par Tuhan Yesus. kata: Mari dudu di Beta pung sabala kanang, tampa paleng panting,
35sampe Beta kasi kala Ale pung musu-musu la biking dong tundu par Ale.’#Lagu-Lagu 110:1
36Jadi, kamong deng samua orang Israel musti tau batul-batul kalo Yesus yang kamong su kasi salib tu, Allah su angka Antua par jadi Raja yang Kasi Salamat Manusia.”
37Waktu dong dengar bagitu, dong pung hati ancor paskali. Tarus, dong tanya Petrus deng Yesus pung utusang-utusang laeng tu kata, “Jadi basudara e, katong musti biking apa?”
38Petrus bilang, “Kamong samua musti kasi tinggal kamong pung dosa-dosa deng kasi kamong pung diri par dapa baptis par kasi unju kalo kamong su satu hati deng Yesus Kristus, biar Allah kasi ampong kamong pung dosa-dosa. Tarus, Allah nanti kasi Antua pung Roh par kamong lai. 39Barang, Tuhan, Allah yang katong somba, su janji kalo Antua mau kasi Antua pung Roh par samua orang yang Antua su panggel par jadi Antua pung orang-orang. Samua orang tu, kamong, kamong pung anana cucu, deng orang-orang yang tinggal jau-jau.”
40Petrus bicara banya lai par kasi nasehat dong. Dia bilang kata, “Ingatang! Allah nanti hukum orang-orang jahat yang sakarang ada di dunya ni. Jadi, kamong musti parcaya Antua biar Antua kasi salamat kamong. Jang tunggu lai. Parcaya suda!”
41Orang-orang yang tarima Petrus pung bicara tu jadi parcaya la kasi dong pung diri par dapa baptis. La hari itu orang yang parcaya Yesus batamba kurang labe tiga ribu orang. 42Dong paleng rajing dengar Yesus pung utusang-utusang pung ajarang deng jaga bakumpul par sombayang deng makang sama-sama.
Orang-orang yang parcaya Yesus pung cara hidop
2:43-47
43Yesus pung utusang-utusang biking banya tanda herang sampe orang-orang yang ada di kota Yerusalem taherang-herang deng takotang. 44Orang-orang yang su parcaya Yesus jaga bakumpul tarus. La apa sa yang dong pung, dong jaga bage-bage deng pake akang sama-sama.#Utusang pung Carita 4:32-35 45Dong jual dong pung harta la bage akang pung kepeng iko orang-orang tu pung parlu. 46Sabang hari dong jaga bakumpul deng satu hati di orang Yahudi pung Tampa Sombayang Pusat pung kintal. Dong jaga makang deng sombayang sama-sama dari ruma ka ruma deng rasa sanang deng hati bae. 47Dong jaga puji-puji Allah. Orang-orang samua suka dong. Sabang hari Tuhan kasi salamat orang-orang sampe dong yang parcaya Antua batamba banya.
المحددات الحالية:
Utusang pung Carita 2: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
