Utusang pung Carita 1
1
Allah janji mau kiring Antua pung Roh
1:1-5
1Bapa Teofilus yang beta#1:1 Beta di sini ni Lukas. Dia yang tulis kitab ni. hormat.
Dalang beta pung kitab yang partama,#1:1 Kitab yang partama yang dokter Lukas tulis tu kitab Lukas, la kitab kadua tu Utusang pung Carita. beta su tulis soal samua yang Yesus su biking deng ajar,#Lukas 1:1-4 2sampe waktu Antua tarangka ka sorga. Waktu Antua balong tarangka, deng kuasa dari Allah pung Roh, Antua kasi pasáng par Antua pung utusang-utusang yang Antua su pili soal apa yang dong musti biking. 3Abis Antua sangsara sampe mati la hidop kombali, Antua kasi unju diri ulang-ulang par dong deng kasi unju banya bukti par dong kalo Antua batul-batul su hidop. Antua kasi unju diri par dong ampa pulu hari sepe-sepe deng kasi tau par dong soal bagemana Allah pegang parenta jadi Raja.
4Satu kali, waktu Antua ada makang deng Antua pung utusang-utusang, Antua bilang kata, “Jang kamong pi kasi tinggal kota Yerusalem do. Tunggu sampe Beta pung Bapa kasi Antua pung Roh yang Antua su janji, sama deng apa yang Beta su parna bilang par kamong.#Lukas 24:49 5Barang, Yohanis Tukang Baptis tu baptis deng aer, mar seng lama lai Beta pung Bapa nanti baptis kamong deng Allah pung Roh.”#1:5 baptis kamong deng Allah pung Roh: Kata-kata ni pung arti, Allah nanti kasi Antua pung Roh par orang-orang yang parcaya Yesus. Kata-kata ni jua ada dalang Matius 3:11, Markus 1:8, Lukas 3:16, deng Yohanis 1:33.
Yesus tarangka ka sorga
1:6-11
6Waktu Yesus deng Antua pung utusang-utusang ada bakumpul di gunung Saitun, dong tanya Antua kata, “Tuhan e, sakarang Tuhan mau user orang Roma biar katong orang Israel bisa bale pegang parenta kombali ka?”
7Yesus bilang, “Kamong seng usa tau apa tempo samua tu jadi. Beta pung Bapa yang su ator akang. Antua yang pung kuasa par samua itu. 8Mar, Antua pung Roh nanti maso tinggal di dalang kamong la kamong ada pung kuasa. La kamong nanti jadi Beta pung saksi-saksi par pi kasi tau soal Beta, mulai dari kota Yerusalem, antero propinsi Yudea, Samaria, sampe ka ujung dunya.”#Matius 28:19; Markus 16:15; Lukas 24:47-48
9Abis bilang bagitu, Antua tarangka ka sorga. Dong samua yang ada di situ lia Antua tarangka deng dong pung mata kapala sandiri, sampe dong seng bisa lia Antua lai, tagal Antua tatutu deng awang.#Markus 16:19; Lukas 24:50-51 10Waktu dong masi tangada muka ka langit, skrek bagini, dua orang yang pake pakiang puti badiri di dong pung sabala. 11Dong dua bilang kata, “He, orang-orang Galilea e! Mangapa kong kamong tinggal tangada muka ka langit? Yesus yang kamong su lia tarangka ka sorga tu, nanti satu waktu datang kombali lai macang bagitu.”
Matias dapa pili par ganti Yudas
1:12-26
12Abis Yesus tarangka ka sorga, Antua pung utusang-utusang bajalang bale ka kota Yerusalem. Dari gunung Saitun ka Yerusalem tu kurang labe satu kilometer. 13Pas sampe di kota tu, dong pi ka ruma yang dong ada tinggal. Tarus, dong nai ka dong pung kamar yang ada di lante atas. Dong nama: Petrus, Yohanis, Yakobis, Andarias, Filipus, Tomas, Bartolomeus, Matius, Yakobis yang pung bapa par Alpeus, Simon dari kalompok Selot,#1:13 Kalompok Selot tu satu kalompok orang Yahudi yang marontak par kasi bebas bangsa Yahudi yang dapa tindis dari pemerinta Roma. deng Yudas yang pung bapa par Yakobis.#Matius 10:2-4; Markus 3:16-19; Lukas 6:14-16 14Dong samua jaga bakumpul la satu hati sombayang par Tuhan. Dong sombayang sama-sama deng babarapa parampuang, Yesus pung ade-ade, deng Yesus pung mama Maria.
15Satu kali bagini, waktu basudara-basudara yang iko Yesus ada bakumpul, mangkali barang 120 orang bagitu, Petrus badiri di tenga-tenga dong samua la bilang kata, 16“Basudara e! Samua yang su ada dalang Allah pung Tulisang tu musti jadi. Dolo-dolo, Antua pung Roh su bicara lewat Raja Daud soal Yudas, orang yang nanti bawa jalang par tangkap Yesus. 17Yudas tu Yesus pung utusang lai, sama deng katong. Dia su dapa pili par karja sama-sama deng katong. 18(Mar dia jual Yesus par dapa kepeng. La kepeng yang dia dapa dari dia pung kajahatang tu, akang dapa pake par bali tana sapanggal. Di sana, dia jatu tikang kapala la dia pung poro tabala sampe dia pung tali-tali poro kaluar samua.#Matius 27:3-8 19Barita soal dia pung kamatiang tu, samua orang di Yerusalem dengar akang, sampe dong kasi nama tana sapanggal tu dalang dong pung bahasa par Akaldama. Akang pung arti ‘Tana Dara’).#1:19 Orang-orang yang pintar Alkitab bilang kata ayat 18 deng 19 tu Lukas pung kata-kata, bukang Petrus pung.
20Daud tulis dalang kitab Lagu-Lagu kata,
‘Loko kasi tinggal dia pung ruma tu sunyi,
biar seng ada satu orang lai yang tinggal di akang.’#Lagu-Lagu 69:26
Daud jua tulis,
‘Kasi tinggal dia pung tugas tu orang laeng ambe akang.’ ”#Lagu-Lagu 109:8
21-22Petrus bilang lai, “Tagal itu, katong musti cari satu orang par ganti Yudas biar dia deng katong bisa kasi tau orang kalo Yesus su hidop kombali. Dia tu musti orang yang salalu iko Tuhan Yesus sama-sama deng katong, mulai dari waktu Yohanis baptis Yesus sampe waktu Yesus tarangka ka sorga.”#Matius 3:16; Markus 1:9, 16:19; Lukas 3:21, 24:51
23Abis itu, orang-orang yang ada bakumpul di situ pili dua orang par ganti Yudas. Dong dua tu, satu nama Yusuf yang orang biasa panggel par Barsabas ka Yustus, deng satu lai nama Matias. 24-25Tarus dong sombayang. Dong bilang kata, “Bapa e, Bapa tau samua orang pung isi hati. Yudas tu su mati. Dia su ada di tampa yang pantas par dia par dapa hukum, deng dia jua su seng jadi Yesus pung utusang lai. Jadi Bapa e, tolong kasi unju par katong, dari dong dua ni, sapa yang Bapa pili par ganti Yudas.”
26Tarus, dong goyang undi la Matias pung nama yang kaluar. Jadi, dong angka dia par jadi Yesus pung utusang lai, baku tamba deng dong sapulu satu utusang tu.
المحددات الحالية:
Utusang pung Carita 1: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
