Utusang pung Carita 16
16
Timotius iko Paulus deng Silas
16:1-5
1Satu kali bagini, Paulus deng Silas bajalang tarus sampe ka kota Derbe. Abis itu, dong pi ka kota Listra. Di kota tu ada satu orang yang iko Yesus. Dia nama Timotius. Dia pung mama orang Yahudi yang su parcaya Yesus. Mar dia pung papa orang Yunani. 2Samua basudara yang parcaya Yesus di Listra deng kota Ikonium bilang kalo Timotius ni orang bae. 3Paulus mau Timotius pi lai deng dia. Jadi, Paulus kasi sunat dia biar orang Yahudi di daera tu tarima dia. Barang, dong samua tau kalo Timotius pung bapa tu orang Yunani. 4Waktu dong tiga bajalang koliling dari kota ka kota, dong kasi tau ampa atorang yang Yesus pung utusang-utusang deng penatua-penatua di kota Yerusalem parna bilang, biar orang-orang parcaya iko akang. 5Jadi, orang-orang parcaya tu pung parcaya labe kuat lai. Dong labe hari labe tamba banya.
Allah pung Roh suru Paulus dong pi ka Makedonia
16:6-10
6Allah pung Roh larang Paulus, Silas, deng Timotius par jang pi kasi tau Kabar Bae soal Yesus di propinsi Asia. Jadi, dong bajalang tarus langgar daera Frigia deng propinsi Galatia. 7Waktu dong sampe di daera Misia, dong mau maso ka propinsi Bitinia. Mar Yesus pung Roh larang dong jang pi ka sana. 8Jadi, dong bajalang langgar Misia la sampe di kota Troas.
9Akang pung malang bagini, Allah kasi lia apapa satu par Paulus. Yang dia lia tu, orang Makedonia satu badiri di muka dia la bilang kata, “Bapa e, datang do ka Makedonia par tolong katong.”
10Abis Paulus lia orang tu, dia carita akang par beta, Silas, deng Timotius. Oras itu jua katong#16:10 Lukas yang tulis kitab ni pake kata katong di sini tagal waktu itu dia mulai iko Paulus, Silas, deng Timotius. siap par pi ka propinsi Makedonia. Barang, katong tau kalo Allah yang suru katong par musti pi kasi tau Kabar Bae soal Yesus par orang-orang di Makedonia.
Lidia jadi parcaya Yesus
16:11-15
11Dari kota Troas, katong pi balayar tarus ka pulo Samotrake. Akang pung eso, katong sampe di kota Neapolis. 12Dari Neapolis, katong pi ka kota Filipi, kota partama di Makedonia. Filipi tu pemerinta Roma pegang akang. Katong tinggal di kota tu sadiki lama.
13Waktu orang Yahudi pung hari Barenti Karja, katong pi ka pinggir kali, di luar kota pung pintu maso. Barang, katong pikir kalo di situ ada orang Yahudi pung tampa sombayang. Di situ katong dudu bicara deng parampuang-parampuang yang ada bakumpul di tampa tu. 14Dari samua parampuang yang ada dengar katong pung bicara tu, ada parampuang satu yang nama Lidia. Dia ni tukang bajual kaeng warna biji gandaria yang pung harga mahal. Dia asal dari kota Tiatira. Dia bukang orang Yahudi mar somba Allah. Jadi, Allah buka dia pung hati deng pikirang biar dia bisa mangarti apa yang Paulus bilang tu la parcaya Yesus. 15Tarus, katong baptis Lidia deng samua orang yang ada di dia pung ruma. Abis itu, Lidia bilang par katong kata, “Basudara e! Kalo kamong pikir beta ni batul-batul su parcaya Tuhan Yesus, mari manumpang di beta pung ruma jua.” Dia tinggal kong paksa-paksa katong tarus sampe katong iko dia.
Paulus deng Silas maso bui
16:16-40
16Satu kali bagini, waktu katong bajalang pi ka tampa sombayang, katong baku dapa deng jongos parampuang satu. Setang kasi kuasa par dia sampe dia bisa kasi tau apa yang nanti jadi. Orang jaga kasi kepeng par bayar apa yang dia biking tu, la akang bawa untung basar par dia pung bos-bos.
17Satu kali bagini, parampuang tu bajalang iko Paulus deng katong samua la tabaos kata, “Dong ini ni Allah yang Paleng Tinggi pung orang-orang karja. Dong datang par kasi tau kamong bagemana Allah bisa kasi salamat kamong.”
18Parampuang tu tinggal kong biking bagitu tarus sampe Paulus jumawa paskali. Jadi, Paulus bale la hokmat setang yang ada di dalang parampuang tu kata, “Hoe setang! Deng Yesus Kristus pung kuasa, beta parenta ose kaluar dari parampuang ni!” Oras itu jua, setang tu kaluar.
19Parampuang tu pung bos-bos tau kalo parampuang tu su seng bisa dapa kepeng lai par dong. Jadi, dong tangkap Paulus deng Silas la hela dong dua ka tenga-tenga kota par lapor dong di muka pemerinta kota. 20Waktu dong samua sampe di muka pamimping-pamimping kota tu, dong bilang kata, “Dong dua ni orang Yahudi. Dong biking katong pung kota ni kaco. 21Barang, dong dua kasi balajar orang-orang par iko dong pung adat-adat yang katong orang Roma seng bole iko.”
22Abis dengar bagitu, orang banya mulai mangamu la mau pukul dong dua. Jadi, pamimping-pamimping kota tu suru orang kasi lapas dong dua pung pakiang dari badang la pukul dong deng rotang. 23Dong pukul Paulus deng Silas banya paskali. Abis itu, dong buang dong dua dalang bui la suru kapala bui jaga dong dua bae-bae. 24Dengar bagitu, oras itu jua, kapala bui kasi maso dong dua dalang ruang yang ada di bui pung bagiang tenga paskali. Dia jua gepe dong dua pung kaki deng kayo balak la rante akang lai.
25Mangkali barang tenga malang bagitu, Paulus deng Silas sombayang deng manyanyi puji-puji Allah. Orang-orang laeng yang ada di bui tu dengar dong dua manyanyi lai. 26Skrek bagini, tana goyang kuat paskali sampe pandasi bui samua tagoyang-goyang. Pintu-pintu bui jua tabuka lai. Orang-orang yang dapa rante pung rante-rante jua talapas samua. 27Kapala bui tu tacigi la bangong. Dia lia bagini, pintu-pintu bui su tabuka. Jadi, dia cabu dia pung parang par mau bunu diri, tagal dia kira kata orang-orang bui samua su lari. 28Mar Paulus bataria kata, “Bapa e! Jang bunu diri! Katong samua ada di sini.”
29Dengar bagitu, kapala bui tu minta obor la lari maso. Dia lari gamatar-gamatar sampe di muka Paulus deng Silas la tikang lutu. 30Tarus, dia antar dong dua kaluar la bilang kata, “Bapa-bapa e! Beta musti biking apa biar beta bisa dapa kasi salamat?”
31Dong dua bilang, “Bapa e, parcaya Tuhan Yesus la Antua nanti kasi salamat ale, bagitu lai deng samua orang yang ada di ale pung ruma, kalo dong jua parcaya Tuhan Yesus.”
32Abis itu, Paulus deng Silas kasi tau Kabar Bae soal Tuhan Yesus par dia deng samua orang yang ada lai di dia pung ruma. 33Malang itu jua kapala bui tu bawa dong dua la kasi barsi dong dua pung luka-luka. La oras itu jua dong dua baptis dia deng samua orang yang ada di dalang dia pung ruma. 34Tarus, dia bawa dong dua pi ka dia pung ruma la taru makang par dong dua. Dia deng samua orang yang ada di dalang ruma tu paleng sanang, tagal dong su parcaya Allah.
35Akang pung eso pagi bagini, pamimping-pamimping kota tu suru polisi-polisi pi bilang pasáng par kapala bui tu. Dong bilang kata, “Kasi lapas Paulus deng Silas!”
36Kapala bui tu bale bilang pasáng tu par Paulus kata, “Pamimping-pamimping kota ni ada suru beta kasi lapas bapa dong. Jadi, pi jua deng dame.”
37Mar Paulus bilang par polisi-polisi tu kata, “Katong ni warga Roma. Seng pake sidang lai dong su pukul katong di muka orang banya la kasi maso katong dalang bui. Sakarang ni dong mau kasi kaluar katong tado-tado? Seng bisa! Kasi tinggal dong sandiri datang kamari la kasi kaluar katong.”
38Polisi-polisi tu pi bilang apa yang Paulus su bilang par pamimping-pamimping kota tu. Waktu dong dengar kalo Paulus deng Silas tu warga Roma, dong paleng takotang paskali.#16:37-38 Pemerinta Roma jaga hak-hak warga Roma paskali. Jadi, dong seng bole dapa hukum ka dapa bui kalo balong dapa sidang ka balong ada putusang sidang. Kalo Paulus lapor ka orang-orang basar Roma soal apa yang pamimping-pamimping kota tu biking par dia deng Silas, pamimping tu bisa dapa hukum barát ka dapa pecat. 39Jadi, dong pi ka bui la minta ampong dari Paulus deng Silas. Abis itu, dong kasi kaluar dong dua dari bui la bilang kata, “Bapa-bapa e! Pi jua kasi tinggal akang kota ni.”
40Abis kaluar dari bui, Paulus deng Silas pi ka Lidia pung ruma. Di situ, dong dua baku dapa deng basudara yang iko Tuhan Yesus. Tarus, dong dua kasi kuat basudara tu pung hati biar dong parcaya Yesus tarus. Abis itu, dong dua pi kasi tinggal kota tu.
المحددات الحالية:
Utusang pung Carita 16: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
