Utusang pung Carita 15
15
Yesus pung utusang-utusang deng penatua-penatua bakumpul di kota Yerusalem
15:1-21
1Satu kali bagini, babarapa orang dari propinsi Yudea pi ka kota Antiokia la kasi balajar basudara yang iko Yesus di sana kata, “Kalo kamong seng dapa sunat, sama deng apa yang Musa tulis dalang Kitab Torat,#Imam-Imam pung Atorang 12:3 kamong nanti seng dapa kasi salamat.”
2Waktu dengar orang-orang bilang bagitu, Paulus deng Barnabas seng tarima. Tarus, dong dua baku malawang mati deng orang-orang yang bilang macang bagitu. Jadi, orang-orang parcaya di Antiokia utus Paulus, Barnabas, deng babarapa orang parcaya lai pi par Yesus pung utusang-utusang deng penatua-penatua di kota Yerusalem par bicara soal sunat.
3Orang-orang parcaya di Antiokia tu antar Paulus dong sampe ka luar kota. Tarus, Paulus dong bajalang langgar daera Fenisia deng daera Samaria. Di daera-daera tu dong carita kalo orang-orang yang bukang Yahudi su parcaya Tuhan Yesus. Carita tu biking samua basudara yang iko Yesus tu pung hati sanang paskali.
4Waktu Paulus dong sampe di Yerusalem, orang-orang parcaya di kota tu tarima dong bae-bae. Dong pung penatua-penatua deng Yesus pung utusang-utusang jua tarima Paulus dong bae-bae. Tarus, Paulus dong carita par orang-orang tu soal samua hal yang Allah su biking dalang dong pung karja. 5Mar saparu orang dari kalompok Farisi yang su parcaya Yesus badiri la bilang kata, “Orang-orang yang bukang Yahudi musti sunat deng musti iko apa yang Musa su tulis dalang Kitab Torat.”
6Jadi, Yesus pung utusang-utusang deng penatua-penatua bakumpul par bicara soal itu. 7Dong baku tukar pikirang lama paskali. Abis itu, Petrus badiri la bilang kata, “Basudara e! Kamong su tau to? Dolo, Allah su pili beta dari katong samua par kasi tau Antua pung Kabar Bae par orang-orang yang bukang Yahudi sampe dong jadi parcaya Antua.#Utusang pung Carita 10:1-43 8Allah yang tau orang-orang pung dalang hati tu su kasi unju kalo Antua tarima orang-orang yang bukang Yahudi. Barang, Antua su kasi Antua pung Roh par dong macang deng yang Antua su kasi par katong orang-orang Yahudi yang parcaya Yesus.#Utusang pung Carita 2:4, 10:44 9Antua jua seng kasi beda katong deng dong. Antua jua su kasi ampong dong pung dosa-dosa tagal dong parcaya Yesus, sama deng Antua su kasi ampong katong tagal katong parcaya Yesus. 10Jadi sakarang, mangapa kong kamong coba-coba Allah, deng cara paksa orang-orang yang bukang Yahudi yang su parcaya Yesus tu par iko atorang-atorang dalang Kitab Torat tu? Itu sama sa deng kamong su taru barang barát par dong pikol. Katong pung moyang-moyang deng katong sandiri jua seng bisa pikol akang to? 11Jadi, katong jang paksa dong par biking bagitu. Barang, katong parcaya kalo katong orang Yahudi bisa salamat tu cuma tagal Tuhan Yesus su kasi unju Antua pung berkat basar par katong. Bagitu lai deng orang-orang yang bukang Yahudi tu.”
12Samua orang yang ada di tampa tu tado mati la dengar Paulus deng Barnabas bicara sa. Dong dua bicara soal sagala macang tanda herang yang Allah biking lewat dong par orang-orang yang bukang Yahudi. 13Waktu Paulus deng Barnabas abis bicara, Yakobis bilang kata, “Basudara samua, dengar bae-bae! 14Simon Petrus ada baru bilang bagemana Allah partama kali kasi unju Antua pung hati bae par orang-orang yang bukang Yahudi. Antua pili saparu dari dong par jadi Antua pung orang-orang. 15Allah pung juru-juru bicara su tulis macang bagitu soal orang-orang yang bukang Yahudi. Dong tu tulis kalo Allah bilang kata,
16‘Daud deng dia pung anana cucu su seng jadi raja lai,
mar Beta nanti bale la angka Daud pung ana cucu satu par jadi raja kombali.
Akang macang deng ruma satu yang su rata deng tana
la orang bale kasi badiri akang.
17Beta nanti biking bagitu biar samua orang laeng datang cari Beta.
Samua orang yang bukang Yahudi yang Beta su pili par jadi Beta pung orang-orang
nanti datang cari Beta lai.
Beta, Tuhan, su bilang samua ni,
jadi Beta nanti biking akang.
18Beta su kasi tau akang dari dolo lai.’ ”#Amos 9:11-12
19Yakobis bale bilang, “Tagal itu, beta pikir katong jang suru orang bukang Yahudi yang su parcaya Allah tu par iko katong orang Yahudi pung samua atorang agama yang barát tu, tagal itu cuma biking susa dong. 20Labe bae katong kiring surat sapanggal par dong la bilang sa kata jang makang makanang yang orang su kasi par patong-patong, jang maeng serong, jang makang binatang yang mati tagal dapa caka, deng jang minong dara binatang.#Kaluar dari Mesir 34:15-17; Imam-Imam pung Atorang 17:10-16, 18:6-23 21Bilang dong biking itu sa, biar dong deng orang-orang Yahudi tu bisa hidop bae-bae. Barang dari dolo sampe sakarang, di kota mana sa, orang carita Tuhan pung Kitab Torat yang Musa su tulis. La katong masi dengar orang baca akang di katong orang Yahudi pung tampa-tampa sombayang sabang kali hari Barenti Karja.”
Yesus pung utusang-utusang deng penatua-penatua kiring surat par orang-orang yang bukang Yahudi
15:22-35
22Yesus pung utusang-utusang, penatua-penatua, deng samua orang parcaya akor par pili satu dua orang dari dong par pi deng Paulus deng Barnabas ka kota Antiokia. Jadi, dong pili Silas deng Yudas. Yudas tu biasa dapa panggel par Barsabas. Samua basudara yang iko Yesus taru hormat par dong dua. 23Dong ampa pi bawa surat satu yang bilang bagini,
“Par samua basudara yang bukang Yahudi yang iko Tuhan Yesus yang tinggal di Antiokia, di propinsi Siria, deng di propinsi Kilikia.
Hormat dari katong, kamong pung basudara yang iko Yesus. Katong ni Yesus pung utusang-utusang deng penatua-penatua.
24Katong su dengar kalo saparu orang dari katong ada yang datang par kamong la kasi balajar kamong iko dong pung suka sampe biking kamong pung hati susa deng balisa, padahal katong seng suru dong. 25Tagal itu, katong su bicara, la akor par pili satu dua orang, la utus dong par pi deng Paulus deng Barnabas yang katong paleng sayang, 26deng yang seng taku mati par pi kasi tau orang-orang soal Tuhan Yesus Kristus yang katong parcaya. 27Jadi, katong ada suru Yudas deng Silas biar dong dua bisa kasi tau surat ni pung isi par kamong deng dong dua pung mulu sandiri. 28Katong su putus, iko Allah pung Roh pung mau, par jang paksa kamong par iko Musa pung samua atorang agama yang biking barát kamong tu. Kamong cuma musti iko ampa atorang ni sa: 29Kamong jang makang makanang yang orang su kasi par patong-patong, jang minong dara binatang, jang makang binatang yang mati tagal dapa caka, deng jua jang maeng serong. Kalo kamong iko atorang-atorang ni, kamong su biking apa yang batul.
Itu sa dari katong. Hormat par kamong samua. Syalom.”
30Orang-orang yang parcaya Yesus di kota Yerusalem suru dong ampa pi ka Antiokia. Di situ, dong ampa panggel samua orang yang parcaya Yesus par bakumpul la kasi surat tu. 31Abis baca surat tu, orang-orang yang parcaya tu pung hati paleng sanang. Barang, akang pung isi kasi kuat dong pung hati.
32Yudas deng Silas ni Allah pung juru bicara lai, jadi dong dua bicara banya par basudara yang iko Yesus, par kasi kuat dong pung hati, biar dong parcaya Yesus tarus. 33Waktu dong dua su sadiki lama tinggal di Antiokia, basudara yang iko Yesus di kota tu deng hati yang tenang lapas dong dua par bale kombali par orang-orang yang utus dong. 34[Mar Silas putus par tinggal tarus di kota tu.]
35Paulus deng Barnabas jua tinggal lama lai di Antiokia. Dong dua, sama-sama deng banya orang laeng lai, kasi balajar deng kasi tau Kabar Bae soal Tuhan Yesus.
Paulus deng Barnabas baku malawang
15:36-41
36Satu kali bagini, Paulus bilang par Barnabas kata, “Sudara e! Labe bae katong dua bale lia katong pung basudara yang iko Yesus di samua kota, tampa katong parna kasi tau Kabar Bae soal Tuhan Yesus, biar katong bisa tau dong sakarang su bagemana.”
37Waktu dengar bagitu, Barnabas mau paskali par bawa Yohanis yang jaga dapa panggel par Markus tu. 38Mar Paulus seng mau bawa Markus, tagal dolo Markus pi kasi tinggal dong dua di daera Pamfilia, deng seng mau karja sama-sama deng dong dua.#Utusang pung Carita 13:13 39Tagal masala tu, Paulus deng Barnabas mulai baku malawang hebat paskali sampe dong dua baku pisa jalang. Barnabas bawa Markus la balayar ka pulo Siprus. 40Mar Paulus pili par bawa Silas. Abis basudara yang iko Yesus di kota Antiokia sombayang minta Tuhan kasi Antua pung berkat basar par Paulus deng Silas, 41dong dua pi koliling daera Siria deng Kilikia par kasi kuat orang-orang parcaya pung hati biar dong parcaya Yesus tarus.
المحددات الحالية:
Utusang pung Carita 15: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
