Utusang pung Carita 11
11
Petrus kasi jelas soal apa yang jadi deng Kornelius dong par orang-orang parcaya di Yerusalem
11:1-18
1Yesus pung utusang-utusang deng basudara-basudara yang iko Antua di propinsi Yudea dengar kata orang-orang yang bukang Yahudi su tarima Allah pung ajarang soal Yesus lai.
2Jadi, waktu Petrus sampe di kota Yerusalem, orang-orang Yahudi yang parcaya Yesus baku malawang deng dia. 3Dong bilang kata, “He, mangapa kong ale maso ka dalang orang-orang bukang Yahudi pung ruma la dudu makang deng dong?”
4Tarus, Petrus carita par dong soal samua-samua tu, mulai dari partama sampe abis. Dia bilang, 5“Satu kali bagini, waktu beta ada sombayang di kota Yope, skrek bagini, Allah kasi lia apapa par beta. Akang turung dari langit sampe di muka beta. Akang macang deng kaeng basar satu yang taika di akang pung ampa ujung. 6Beta lia bagini, dalang kaeng basar tu ada sagala macang binatang yang haram par orang Yahudi makang. Binatang-binatang tu ada yang pung kaki ampa, ada yang liar, ada yang maraya, deng ada burung-burung. 7Tarus, beta bale dengar ada suara yang bilang par beta kata, ‘Petrus e, bangong! Bunu binatang-binatang tu la makang!’
8Mar beta bilang, ‘Seng! Seng Tuhan! Beta balong parna makang apa sa yang haram.’
9Mar suara dari sorga tu bale bilang, ‘Apa yang Allah bilang itu seng haram, jang ale bilang itu haram.’ 10Samua tu akang jadi sampe tiga kali baru kaeng tu bale nai ka langit.
11Oras itu jua, tiga orang dari kota Kaisarea su ada di muka ruma tampa katong tinggal. Dong dapa utus par cari beta. 12Tarus, Allah pung Roh bilang par beta kata, ‘Jang bimbang, pi sa deng dong.’ Basudara anam yang iko Yesus ni jua pi deng beta lai ka Kaisarea. Sampe di Kaisarea, katong maso ka orang yang undang beta tu pung ruma. Dia nama Kornelius. 13Tarus, dia bilang par katong kata, ‘Malekat satu datang kasi unju rupa par beta dalang beta pung ruma. Malekat tu bilang kata, “Utus orang pi ka kota Yope par panggel Simon yang dapa panggel par Petrus tu par datang kamari. 14Dia nanti kasi tau kabar satu par ale, yang biking ale deng samua orang yang ada dalang ale pung ruma ni salamat.” ’
15Waktu beta mulai bicara, Allah pung Roh turung par dong samua, macang deng yang jadi par katong dolo-dolo lai. 16Tarus, beta dapa inga apa yang Tuhan Yesus su parna bilang kata, ‘Yohanis baptis orang deng aer, mar Allah nanti baptis kamong deng Antua pung Roh.’#Utusang pung Carita 1:5 17Jadi akang batul. Allah kasi Antua pung Roh par orang-orang bukang Yahudi, macang deng dolo Antua kasi par katong, waktu katong mulai parcaya Tuhan Yesus Kristus. Jadi, bagemana beta mau larang Allah?”
18Waktu orang-orang Yahudi di Yerusalem tu dengar Petrus bilang bagitu, dong seng bisa bilang apapa lai. Tarus dong puji-puji Allah kata, “Jadi Allah buka jalang par orang-orang bukang Yahudi lai biar dong kasi tinggal dong pung dosa-dosa la bisa hidop tarus-tarus deng Antua.”
Barnabas deng Saulus pi ka Antiokia
11:19-30
19Abis bunu Stefanus, orang-orang Yahudi siksa basudara-basudara yang iko Yesus sampe dong samua talamburang ka sagala tampa. Saparu orang dari dong lari sampe ka daera Fenisia, pulo Siprus, deng kota Antiokia. Dong yang talamburang tu jua kasi tau Kabar Bae soal Yesus, mar cuma par orang-orang Yahudi sa.#Utusang pung Carita 8:1-4 20Mar dari basudara-basudara yang iko Yesus tu, ada saparu orang yang asal dari Siprus deng kota Kirene yang pi ka Antiokia. Dong pi par kasi tau Kabar Bae soal Tuhan Yesus par orang-orang yang bukang Yahudi lai.#11:20 Bukang Yahudi: Teks bahasa Yunani bilang, “orang Yunani”. 21Tuhan pung kuasa ada sama-sama deng dong sampe orang banya parcaya apa yang dong bilang la iko Tuhan Yesus.
22Kabar soal apa yang dong biking tu sampe par orang-orang yang parcaya Yesus yang ada di kota Yerusalem. Jadi, dong suru Barnabas pi ka Antiokia. 23-24Barnabas ni pung hati bae. Dia batul-batul parcaya Yesus deng Allah pung Roh pung kuasa ada deng dia. Waktu Barnabas sampe di Antiokia, dia lia bagemana Allah kasi berkat basar par orang-orang di tampa tu yang su parcaya Yesus. Jadi, dia pung hati paleng sanang. Tarus, dia kasi nasehat par dong biar dong tarus parcaya Tuhan deng hati antero-antero. Tagal Barnabas ni sampe orang banya jadi parcaya Tuhan Yesus.
25Abis itu, Barnabas pi ka kota Tarsus par cari Saulus. Waktu dia baku dapa Saulus, dia bawa Saulus ka Antiokia. 26Dong dua bakumpul deng orang-orang yang parcaya Yesus di situ deng kasi balajar orang banya sampe satu taong. Di Antiokia tu partama kali orang-orang yang iko Yesus dapa panggel par orang Kristen.
27Waktu itu, Allah pung juru-juru bicara saparu dari Yerusalem datang ka Antiokia. 28Satu dari dong tu nama Agabus.#Utusang pung Carita 21:10 Dia badiri la deng Allah pung Roh pung kuasa dia bilang kata, “Sagala tampa di antero karajaang Roma nanti paleng susa makanang.” (Akang jadi waktu Klaudius jadi raja basar Roma.)
29Jadi, Yesus pung murid-murid baku ator par kumpul kepeng iko dong pung kuat la kiring akang par dong pung basudara-basudara yang iko Yesus di propinsi Yudea. 30Abis dong samua kumpul kepeng, dong utus Barnabas deng Saulus pi bawa akang par penatua-penatua yang ada di sana.
المحددات الحالية:
Utusang pung Carita 11: ABMA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2022, Sinode Gereja Protestan Maluku
